| Library / Tipiṭaka / ཏིཔིཊཀ • Tipiṭaka / ཝིནཡཝིནིཙྪཡ-ཊཱིཀཱ • Vinayavinicchaya-ṭīkā |
ནིགམནཀཐཱཝཎྞནཱ
Nigamanakathāvaṇṇanā
༩༦༡-༣. མཧེསིནོ ཏིཝིདྷསྶཱཔི སཱསནསྶ སུཙིརཊྛིཏིཀཱམེན ཨཏིཙིརཀཱལཔྤཝཏྟིཾ ཨིཙྪནྟེན དྷཱིམཏཱ པསཏྠཏརཉཱཎེན སུདྡྷཙིཏྟེན ལཱབྷསཀྐཱརནིརཔེཀྑཏཱཡ པརིསུདྡྷཛ྄ཛྷཱསཡེན བུདྡྷདཏྟེན བུདྡྷདཏྟཱབྷིདྷཱནེན ཨཱཙརིཡཝརེན རཙིཏོ།
961-3. Mahesino tividhassāpi sāsanassa suciraṭṭhitikāmena aticirakālappavattiṃ icchantena dhīmatā pasatthatarañāṇena suddhacittena lābhasakkāranirapekkhatāya parisuddhajjhāsayena buddhadattena buddhadattābhidhānena ācariyavarena racito.
པཛྫཝསེན གནྠཏོ, ཨཏྠཏོ ཙེཝ པརམུཏྟརོ ཨུཏྟརོ ཝིནིཙྪཡོ ཨནྟརཱཡཾ ཨནྟརེན ཨཛ྄ཛྷཏྟིཀཾ, བཱཧིརཾ ཝཱ ཨནྟརཱཡཾ ཝིནཱ ཡཐཱ སིདྡྷིཾ ཨུཔཱགཏོ པརིནིཊྛཱནཾ པཏྟོ, ཏཐཱ སཏྟཱནཾ དྷམྨསཾཡུཏཱ ཀུསལཱུཔསཾཧིཏཱ སངྐཔྤཱ མནོརཐཱ སིཛ྄ཛྷནྟུ ཨནྟརཱཡཾ ཝིནཱ ནིཔྤཛྫནྟུ, ཨེཏེན ཨུཏྟརཝིནིཙྪཡརཙནཱམཡེན མཧཏཱ པུཉྙོདཡེན ཙཏཱུཧི སངྒཧཝཏྠཱུཧི ཛནཾ རཉྫེཏཱིཏི ‘‘རཱཛཱ’’ཏི སངྑཾ གཏོ མཧཱིཔཱལོ མཧིཾ པཐཝིསནྣིསྶིཏཾ ཛནཀཱཡཾ སམྨཱ ཉཱཡེན དས རཱཛདྷམྨེ ཨཀོཔེནྟོ པཱལེཏུ། དེཝོ པཛྫུནྣོ ཀཱལེ ཐཱཝརཛངྒམཱནཾ ཨུཔཡོགཱརཧཀཱལེ སམྨཱ པཝསྶཏུ ཨཝུཊྛིཨཏིཝུཊྛིཀཾ ཨཀཏྭཱ སམྨཱ པཝཙྪཏུ།
Pajjavasena ganthato, atthato ceva paramuttaro uttaro vinicchayo antarāyaṃ antarena ajjhattikaṃ, bāhiraṃ vā antarāyaṃ vinā yathā siddhiṃ upāgato pariniṭṭhānaṃ patto, tathā sattānaṃ dhammasaṃyutā kusalūpasaṃhitā saṅkappā manorathā sijjhantu antarāyaṃ vinā nippajjantu, etena uttaravinicchayaracanāmayena mahatā puññodayena catūhi saṅgahavatthūhi janaṃ rañjetīti ‘‘rājā’’ti saṅkhaṃ gato mahīpālo mahiṃ pathavisannissitaṃ janakāyaṃ sammā ñāyena dasa rājadhamme akopento pāletu. Devo pajjunno kāle thāvarajaṅgamānaṃ upayogārahakāle sammā pavassatu avuṭṭhiativuṭṭhikaṃ akatvā sammā pavacchatu.
༩༦༤. སེལིནྡོ སིནེརུཔབྦཏརཱཛཱ ཡཱཝ ཏིཊྛཏི ཡཱཝ ལོཀེ པཝཏྟཏི, ཙནྡོ སཀལཛནཔདནཡནསཱཡནོ ཡཱཝ ཝིརོཙཏི ཡཱཝ ཨཏྟནོ སབྷཱཝཾ ཛོཏེཏི, ཏཱཝ ཡསསྶིནོ གོཏམསྶ ཨརཧཏོ སམྨཱསམྦུདྡྷསྶ སདྡྷམྨོ པརིཡཏྟིཔཊིཔཏྟིཔཊིཝེདྷཝསེན ཏིཝིདྷོ སདྡྷམྨོ ཏིཊྛཏུ པཝཏྟཏུ།
964.Selindo sinerupabbatarājā yāva tiṭṭhati yāva loke pavattati, cando sakalajanapadanayanasāyano yāva virocati yāva attano sabhāvaṃ joteti, tāva yasassino gotamassa arahato sammāsambuddhassa saddhammo pariyattipaṭipattipaṭivedhavasena tividho saddhammo tiṭṭhatu pavattatu.
༩༦༥. སཱིཧཱདཱིནཾ, དཱཧཱདཱིནཉྩ བཱཧིརཛ྄ཛྷཏྟིཀཱནཾ པརིསྶཡཱནཾ ཁམནཾ སཧནཾ ཨབྷིབྷཝིཏྭཱ པཝཏྟནཾ ཁནྟི། སོརཙྩནྟི སོབྷནེ རཏོཏི སུརཏོ, སུརཏསྶ བྷཱཝོ སོརཙྩཾ། སུནྡརཾ ཨཁཎྜཏཱདིགུཎསམནྣཱགཏཾ སཱིལཾ ཨསྶཱཏི སུསཱིལོ། སུསཱིལསྶ བྷཱཝོ།
965. Sīhādīnaṃ, dāhādīnañca bāhirajjhattikānaṃ parissayānaṃ khamanaṃ sahanaṃ abhibhavitvā pavattanaṃ khanti. Soraccanti sobhane ratoti surato, suratassa bhāvo soraccaṃ. Sundaraṃ akhaṇḍatādiguṇasamannāgataṃ sīlaṃ assāti susīlo. Susīlassa bhāvo.
ནིགམནཀཐཱཝཎྞནཱ ནིཊྛིཏཱ།
Nigamanakathāvaṇṇanā niṭṭhitā.
ཨུཏྟརཝིནིཙྪཡཊཱིཀཱ ནིཊྛིཏཱ།
Uttaravinicchayaṭīkā niṭṭhitā.
ཨིཏི ཝིནཡཏྠསཱརསནྡཱིཔནཱི ནཱམ ཝིནཡཝིནིཙྪཡཝཎྞནཱ,
Iti vinayatthasārasandīpanī nāma vinayavinicchayavaṇṇanā,
ལཱིནཏྠཔཀཱསནཱི ནཱམ ཨུཏྟརཝིནིཙྪཡཝཎྞནཱ ཙ
Līnatthapakāsanī nāma uttaravinicchayavaṇṇanā ca
སམཏྟཱ།
Samattā.
པཙྪཱ ཋཔིཏགཱཐཱཡོ
Pacchā ṭhapitagāthāyo
ཐེརེན ཐིརཙིཏྟེན, སཱསནུཛྫོཏནཏྠིནཱ།
Therena thiracittena, sāsanujjotanatthinā;
པུཉྙཝཱ ཉཱཎཝཱ སཱིལཱི, སུཧཛྫོ མུདུཀོ ཏཐཱ༎
Puññavā ñāṇavā sīlī, suhajjo muduko tathā.
ཡོ སཱིཧལཱ༹རིམདྡེསུ, ཙནྡིམཱ སཱུརིཡོ ཝིཡ།
Yo sīhaḷārimaddesu, candimā sūriyo viya;
པཱཀཊོ སཱིཝལིཏྠེརོ, མཧཱཏེཛོ མཧཱཡསོ༎
Pākaṭo sīvalitthero, mahātejo mahāyaso.
ཏེན ནཱིཏཱ སཱིཧལཱ༹ ཡཱ, ཨིདྷ པཏྟཱ སུདྷཱིམཏཱ།
Tena nītā sīhaḷā yā, idha pattā sudhīmatā;
ཨེསཱ སཾཝཎྞནཱ སཱིཧ-ལ༹ཀྑརེན སུལིཀྑིཏཱ༎
Esā saṃvaṇṇanā sīha-ḷakkharena sulikkhitā.
རེཝཏོ ཨིཏི ནཱམེན, ཐེརེན ཐིརཙེཏསཱ།
Revato iti nāmena, therena thiracetasā;
ཨརིམདྡིཀེ རཀྑནྟེན, པརིཝཏྟེཏྭཱན སཱདྷུཀཾ༎
Arimaddike rakkhantena, parivattetvāna sādhukaṃ.
ལིཁཱཔིཏཱ ཧིཏཏྠཱཡ, བྷིཀྑཱུནཾ ཨརིམདྡིཀེ།
Likhāpitā hitatthāya, bhikkhūnaṃ arimaddike;
ཨེསཱ སཾཝཎྞནཱ སུཊྛུ, སནྣིཊྛཱནམུཔཱགཏཱ།
Esā saṃvaṇṇanā suṭṭhu, sanniṭṭhānamupāgatā;
ཏཐེཝ སབྦསཏྟཱནཾ, སབྦཏྠོ ཙ སམིཛ྄ཛྷཏཱུཏི༎
Tatheva sabbasattānaṃ, sabbattho ca samijjhatūti.
