| Library / Tipiṭaka / ತಿಪಿಟಕ • Tipiṭaka / ಸಮ್ಮೋಹವಿನೋದನೀ-ಅಟ್ಠಕಥಾ • Sammohavinodanī-aṭṭhakathā |
ನಿಗಮನಕಥಾ
Nigamanakathā
ಏತ್ತಾವತಾ ಚ –
Ettāvatā ca –
ಅಭಿಧಮ್ಮಂ ದೇಸೇನ್ತೋ, ಧಮ್ಮಗರು ಧಮ್ಮಗಾರವಯುತ್ತಾನಂ।
Abhidhammaṃ desento, dhammagaru dhammagāravayuttānaṃ;
ದೇವಾನಂ ದೇವಪುರೇ, ದೇವಗಣಸಹಸ್ಸಪರಿವಾರೋ॥
Devānaṃ devapure, devagaṇasahassaparivāro.
ದುತಿಯಂ ಅದುತಿಯಪುರಿಸೋ, ಯಂ ಆಹ ವಿಭಙ್ಗಪಕರಣಂ ನಾಥೋ।
Dutiyaṃ adutiyapuriso, yaṃ āha vibhaṅgapakaraṇaṃ nātho;
ಅಟ್ಠಾರಸಹಿ ವಿಭಙ್ಗೇಹಿ, ಮಣ್ಡಿತಮಣ್ಡಪೇಯ್ಯಗುಣೋ॥
Aṭṭhārasahi vibhaṅgehi, maṇḍitamaṇḍapeyyaguṇo.
ಅತ್ಥಪ್ಪಕಾಸನತ್ಥಂ, ತಸ್ಸಾಹಂ ಯಾಚಿತೋ ಠಿತಗುಣೇನ।
Atthappakāsanatthaṃ, tassāhaṃ yācito ṭhitaguṇena;
ಯತಿನಾ ಅದನ್ಧಗತಿನಾ, ಸುಬುದ್ಧಿನಾ ಬುದ್ಧಘೋಸೇನ॥
Yatinā adandhagatinā, subuddhinā buddhaghosena.
ಯಂ ಆರಭಿಂ ರಚಯಿತುಂ, ಅಟ್ಠಕಥಂ ಸುನಿಪುಣೇಸು ಅತ್ಥೇಸು।
Yaṃ ārabhiṃ racayituṃ, aṭṭhakathaṃ sunipuṇesu atthesu;
ಸಮ್ಮೋಹವಿನೋದನತೋ, ಸಮ್ಮೋಹವಿನೋದನಿಂ ನಾಮ॥
Sammohavinodanato, sammohavinodaniṃ nāma.
ಪೋರಾಣಟ್ಠಕಥಾನಂ, ಸಾರಂ ಆದಾಯ ಸಾ ಅಯಂ ನಿಟ್ಠಂ।
Porāṇaṭṭhakathānaṃ, sāraṃ ādāya sā ayaṃ niṭṭhaṃ;
ಪತ್ತಾ ಅನನ್ತರಾಯೇನ, ಪಾಳಿಯಾ ಭಾಣವಾರೇಹಿ॥
Pattā anantarāyena, pāḷiyā bhāṇavārehi.
ಚತ್ತಾಲೀಸಾಯ ಯಥಾ, ಏಕೇನ ಚ ಏವಮೇವ ಸಬ್ಬೇಪಿ।
Cattālīsāya yathā, ekena ca evameva sabbepi;
ನಿಟ್ಠಂ ವಜನ್ತು ವಿಮಲಾ, ಮನೋರಥಾ ಸಬ್ಬಸತ್ತಾನಂ॥
Niṭṭhaṃ vajantu vimalā, manorathā sabbasattānaṃ.
ಸದ್ಧಮ್ಮಸ್ಸ ಠಿತತ್ಥಂ, ಯಞ್ಚ ಇಮಂ ರಚಯತಾ ಮಯಾ ಪುಞ್ಞಂ।
Saddhammassa ṭhitatthaṃ, yañca imaṃ racayatā mayā puññaṃ;
ಪತ್ತಂ ತೇನ ಸಮತ್ತಂ, ಪಾಪುಣತು ಸದೇವಕೋ ಲೋಕೋ॥
Pattaṃ tena samattaṃ, pāpuṇatu sadevako loko.
ಸುಚಿರಂ ತಿಟ್ಠತು ಧಮ್ಮೋ, ಧಮ್ಮಾಭಿರತೋ ಸದಾ ಭವತು ಲೋಕೋ।
Suciraṃ tiṭṭhatu dhammo, dhammābhirato sadā bhavatu loko;
ನಿಚ್ಚಂ ಖೇಮಸುಭಿಕ್ಖಾದಿ-ಸಮ್ಪದಾ ಜನಪದಾ ಹೋನ್ತೂತಿ॥
Niccaṃ khemasubhikkhādi-sampadā janapadā hontūti.
ಪರಮವಿಸುದ್ಧಸದ್ಧಾಬುದ್ಧಿವೀರಿಯಪಟಿಮಣ್ಡಿತೇನ ಸೀಲಾಚಾರಜ್ಜವಮದ್ದವಾದಿಗುಣಸಮುದಯಸಮುದಿತೇನ ಸಕಸಮಯಸಮಯನ್ತರಗಹನಜ್ಝೋಗಾಹಣಸಮತ್ಥೇನ ಪಞ್ಞಾವೇಯ್ಯತ್ತಿಯಸಮನ್ನಾಗತೇನ ತಿಪಿಟಕಪರಿಯತ್ತಿಪ್ಪಭೇದೇ ಸಾಟ್ಠಕಥೇ ಸತ್ಥುಸಾಸನೇ ಅಪ್ಪಟಿಹತಞಾಣಪ್ಪಭಾವೇನ ಮಹಾವೇಯ್ಯಾಕರಣೇನ ಕರಣಸಮ್ಪತ್ತಿಜನಿತಸುಖವಿನಿಗ್ಗತಮಧುರೋದಾರವಚನಲಾವಣ್ಣಯುತ್ತೇನ ಯುತ್ತಮುತ್ತವಾದಿನಾ ವಾದೀವರೇನ ಮಹಾಕವಿನಾ ಪಭಿನ್ನಪಟಿಸಮ್ಭಿದಾಪರಿವಾರೇ ಛಳಭಿಞ್ಞಾಪಟಿಸಮ್ಭಿದಾದಿಪ್ಪಭೇದಗುಣಪಟಿಮಣ್ಡಿತೇ ಉತ್ತರಿಮನುಸ್ಸಧಮ್ಮೇ ಸುಪ್ಪತಿಟ್ಠಿತಬುದ್ಧೀನಂ ಥೇರವಂಸಪ್ಪದೀಪಾನಂ ಥೇರಾನಂ ಮಹಾವಿಹಾರವಾಸೀನಂ ವಂಸಾಲಙ್ಕಾರಭೂತೇನ ವಿಪುಲವಿಸುದ್ಧಬುದ್ಧಿನಾ ಬುದ್ಧಘೋಸೋತಿ ಗರೂಹಿ ಗಹಿತನಾಮಧೇಯ್ಯೇನ ಥೇರೇನ ಕತಾ ಅಯಂ ಸಮ್ಮೋಹವಿನೋದನೀ ನಾಮ ವಿಭಙ್ಗಟ್ಠಕಥಾ।
Paramavisuddhasaddhābuddhivīriyapaṭimaṇḍitena sīlācārajjavamaddavādiguṇasamudayasamuditena sakasamayasamayantaragahanajjhogāhaṇasamatthena paññāveyyattiyasamannāgatena tipiṭakapariyattippabhede sāṭṭhakathe satthusāsane appaṭihatañāṇappabhāvena mahāveyyākaraṇena karaṇasampattijanitasukhaviniggatamadhurodāravacanalāvaṇṇayuttena yuttamuttavādinā vādīvarena mahākavinā pabhinnapaṭisambhidāparivāre chaḷabhiññāpaṭisambhidādippabhedaguṇapaṭimaṇḍite uttarimanussadhamme suppatiṭṭhitabuddhīnaṃ theravaṃsappadīpānaṃ therānaṃ mahāvihāravāsīnaṃ vaṃsālaṅkārabhūtena vipulavisuddhabuddhinā buddhaghosoti garūhi gahitanāmadheyyena therena katā ayaṃ sammohavinodanī nāma vibhaṅgaṭṭhakathā.
ತಾವ ತಿಟ್ಠತು ಲೋಕಸ್ಮಿಂ, ಲೋಕನಿತ್ಥರಣೇಸಿನಂ।
Tāva tiṭṭhatu lokasmiṃ, lokanittharaṇesinaṃ;
ದಸ್ಸೇನ್ತೀ ಕುಲಪುತ್ತಾನಂ, ನಯಂ ಪಞ್ಞಾವಿಸುದ್ಧಿಯಾ॥
Dassentī kulaputtānaṃ, nayaṃ paññāvisuddhiyā.
ಯಾವ ಬುದ್ಧೋತಿ ನಾಮಮ್ಪಿ, ಸುದ್ಧಚಿತ್ತಸ್ಸ ತಾದಿನೋ।
Yāva buddhoti nāmampi, suddhacittassa tādino;
ಲೋಕಮ್ಹಿ ಲೋಕಜೇಟ್ಠಸ್ಸ, ಪವತ್ತತಿ ಮಹೇಸಿನೋತಿ॥
Lokamhi lokajeṭṭhassa, pavattati mahesinoti.
ಸಮ್ಮೋಹವಿನೋದನೀ ನಾಮ ವಿಭಙ್ಗ-ಅಟ್ಠಕಥಾ ನಿಟ್ಠಿತಾ।
Sammohavinodanī nāma vibhaṅga-aṭṭhakathā niṭṭhitā.
