| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
១០. និព្ពានសុខជាននបញ្ហោ
10. Nibbānasukhajānanapañho
១០. រាជា អាហ ‘‘ភន្តេ នាគសេន, យោ ន លភតិ និព្ពានំ, ជានាតិ សោ ‘សុខំ និព្ពាន’’’ន្តិ? ‘‘អាម, មហារាជ, យោ ន លភតិ និព្ពានំ, ជានាតិ សោ ‘សុខំ និព្ពាន’’’ន្តិ។ ‘‘កថំ, ភន្តេ នាគសេន, អលភន្តោ ជានាតិ ‘សុខំ និព្ពាន’’’ន្តិ? ‘‘តំ កិំ មញ្ញសិ, មហារាជ, យេសំ នច្ឆិន្នា ហត្ថបាទា , ជានេយ្យុំ តេ, មហារាជ, ‘ទុក្ខំ ហត្ថបាទច្ឆេទន’’’ន្តិ? ‘‘អាម, ភន្តេ, ជានេយ្យុ’’ន្តិ។ ‘‘កថំ ជានេយ្យុ’’ន្តិ? ‘‘អញ្ញេសំ, ភន្តេ, ឆិន្នហត្ថបាទានំ បរិទេវិតសទ្ទំ សុត្វា ជានន្តិ ‘ទុក្ខំ ហត្ថបាទច្ឆេទន’’’ន្តិ ។ ‘‘ឯវមេវ ខោ, មហារាជ, យេសំ ទិដ្ឋំ និព្ពានំ, តេសំ សទ្ទំ សុត្វា ជានាតិ ‘សុខំ និព្ពាន’’’ន្តិ។
10. Rājā āha ‘‘bhante nāgasena, yo na labhati nibbānaṃ, jānāti so ‘sukhaṃ nibbāna’’’nti? ‘‘Āma, mahārāja, yo na labhati nibbānaṃ, jānāti so ‘sukhaṃ nibbāna’’’nti. ‘‘Kathaṃ, bhante nāgasena, alabhanto jānāti ‘sukhaṃ nibbāna’’’nti? ‘‘Taṃ kiṃ maññasi, mahārāja, yesaṃ nacchinnā hatthapādā , jāneyyuṃ te, mahārāja, ‘dukkhaṃ hatthapādacchedana’’’nti? ‘‘Āma, bhante, jāneyyu’’nti. ‘‘Kathaṃ jāneyyu’’nti? ‘‘Aññesaṃ, bhante, chinnahatthapādānaṃ paridevitasaddaṃ sutvā jānanti ‘dukkhaṃ hatthapādacchedana’’’nti . ‘‘Evameva kho, mahārāja, yesaṃ diṭṭhaṃ nibbānaṃ, tesaṃ saddaṃ sutvā jānāti ‘sukhaṃ nibbāna’’’nti.
‘‘កល្លោសិ, ភន្តេ នាគសេនា’’តិ។
‘‘Kallosi, bhante nāgasenā’’ti.
និព្ពានសុខជាននបញ្ហោ ទសមោ។
Nibbānasukhajānanapañho dasamo.
និព្ពានវគ្គោ ចតុត្ថោ។
Nibbānavaggo catuttho.
ឥមស្មិំ វគ្គេ ទស បញ្ហា។
Imasmiṃ vagge dasa pañhā.
