| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
១៦. នានាធម្មានំ ឯកកិច្ចអភិនិប្ផាទនបញ្ហោ
16. Nānādhammānaṃ ekakiccaabhinipphādanapañho
១៦. រាជា អាហ ‘‘ភន្តេ នាគសេន, ឥមេ ធម្មា នានា សន្តា ឯកំ អត្ថំ អភិនិប្ផាទេន្តី’’តិ? ‘‘អាម, មហារាជ, ឥមេ ធម្មា នានា សន្តា ឯកំ អត្ថំ អភិនិប្ផាទេន្តិ, កិលេសេ ហនន្តី’’តិ។
16. Rājā āha ‘‘bhante nāgasena, ime dhammā nānā santā ekaṃ atthaṃ abhinipphādentī’’ti? ‘‘Āma, mahārāja, ime dhammā nānā santā ekaṃ atthaṃ abhinipphādenti, kilese hanantī’’ti.
‘‘កថំ, ភន្តេ, ឥមេ ធម្មា នានា សន្តា ឯកំ អត្ថំ អភិនិប្ផាទេន្តិ, កិលេសេ ហនន្តិ? ឱបម្មំ ករោហី’’តិ។ ‘‘យថា, មហារាជ, សេនា នានា សន្តា ហត្ថី ច អស្សា ច រថា ច បត្តី ច ឯកំ អត្ថំ អភិនិប្ផាទេន្តិ, សង្គាមេ បរសេនំ អភិវិជិនន្តិ។ ឯវមេវ ខោ, មហារាជ, ឥមេ ធម្មា នានា សន្តា ឯកំ អត្ថំ អភិនិប្ផាទេន្តិ, កិលេសេ ហនន្តី’’តិ។
‘‘Kathaṃ, bhante, ime dhammā nānā santā ekaṃ atthaṃ abhinipphādenti, kilese hananti? Opammaṃ karohī’’ti. ‘‘Yathā, mahārāja, senā nānā santā hatthī ca assā ca rathā ca pattī ca ekaṃ atthaṃ abhinipphādenti, saṅgāme parasenaṃ abhivijinanti. Evameva kho, mahārāja, ime dhammā nānā santā ekaṃ atthaṃ abhinipphādenti, kilese hanantī’’ti.
‘‘កល្លោសិ, ភន្តេ នាគសេនា’’តិ។
‘‘Kallosi, bhante nāgasenā’’ti.
នានាធម្មានំ ឯកកិច្ចអភិនិប្ផាទនបញ្ហោ សោឡសមោ។
Nānādhammānaṃ ekakiccaabhinipphādanapañho soḷasamo.
មហាវគ្គោ បឋមោ។
Mahāvaggo paṭhamo.
ឥមស្មិំ វគ្គេ សោឡស បញ្ហា។
Imasmiṃ vagge soḷasa pañhā.
