| Library / Tipiṭaka / ತಿಪಿಟಕ • Tipiṭaka / ಕಥಾವತ್ಥುಪಾಳಿ • Kathāvatthupāḷi |
೯. ನವಮವಗ್ಗೋ
9. Navamavaggo
(೯೩) ೧೦. ನ ಯಥಾಚಿತ್ತಸ್ಸ ಕಾಯಕಮ್ಮನ್ತಿಕಥಾ
(93) 10. Na yathācittassa kāyakammantikathā
೫೬೬. ನ ಯಥಾಚಿತ್ತಸ್ಸ ಕಾಯಕಮ್ಮನ್ತಿ? ಆಮನ್ತಾ। ಅಫಸ್ಸಕಸ್ಸ ಕಾಯಕಮ್ಮಂ…ಪೇ॰… ಅಚಿತ್ತಕಸ್ಸ ಕಾಯಕಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ॰… ನನು ಸಫಸ್ಸಕಸ್ಸ ಕಾಯಕಮ್ಮಂ…ಪೇ॰… ಸಚಿತ್ತಕಸ್ಸ ಕಾಯಕಮ್ಮನ್ತಿ? ಆಮನ್ತಾ। ಹಞ್ಚಿ ಸಫಸ್ಸಕಸ್ಸ ಕಾಯಕಮ್ಮಂ…ಪೇ॰… ಸಚಿತ್ತಕಸ್ಸ ಕಾಯಕಮ್ಮಂ, ನೋ ಚ ವತ ರೇ ವತ್ತಬ್ಬೇ – ‘‘ನ ಯಥಾಚಿತ್ತಸ್ಸ ಕಾಯಕಮ್ಮ’’ನ್ತಿ।
566. Na yathācittassa kāyakammanti? Āmantā. Aphassakassa kāyakammaṃ…pe… acittakassa kāyakammanti? Na hevaṃ vattabbe…pe… nanu saphassakassa kāyakammaṃ…pe… sacittakassa kāyakammanti? Āmantā. Hañci saphassakassa kāyakammaṃ…pe… sacittakassa kāyakammaṃ, no ca vata re vattabbe – ‘‘na yathācittassa kāyakamma’’nti.
ನ ಯಥಾಚಿತ್ತಸ್ಸ ಕಾಯಕಮ್ಮನ್ತಿ? ಆಮನ್ತಾ। ಅನಾವಟ್ಟೇನ್ತಸ್ಸ ಕಾಯಕಮ್ಮಂ…ಪೇ॰… ಅಪ್ಪಣಿದಹನ್ತಸ್ಸ ಕಾಯಕಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ॰… ನನು ಆವಟ್ಟೇನ್ತಸ್ಸ ಕಾಯಕಮ್ಮಂ…ಪೇ॰… ಪಣಿದಹನ್ತಸ್ಸ ಕಾಯಕಮ್ಮನ್ತಿ? ಆಮನ್ತಾ। ಹಞ್ಚಿ ಆವಟ್ಟೇನ್ತಸ್ಸ ಕಾಯಕಮ್ಮಂ…ಪೇ॰… ಪಣಿದಹನ್ತಸ್ಸ ಕಾಯಕಮ್ಮಂ, ನೋ ಚ ವತ ರೇ ವತ್ತಬ್ಬೇ – ‘‘ನ ಯಥಾಚಿತ್ತಸ್ಸ ಕಾಯಕಮ್ಮ’’ನ್ತಿ।
Na yathācittassa kāyakammanti? Āmantā. Anāvaṭṭentassa kāyakammaṃ…pe… appaṇidahantassa kāyakammanti? Na hevaṃ vattabbe…pe… nanu āvaṭṭentassa kāyakammaṃ…pe… paṇidahantassa kāyakammanti? Āmantā. Hañci āvaṭṭentassa kāyakammaṃ…pe… paṇidahantassa kāyakammaṃ, no ca vata re vattabbe – ‘‘na yathācittassa kāyakamma’’nti.
ನ ಯಥಾಚಿತ್ತಸ್ಸ ಕಾಯಕಮ್ಮನ್ತಿ? ಆಮನ್ತಾ। ನನು ಕಾಯಕಮ್ಮಂ ಚಿತ್ತಸಮುಟ್ಠಾನಂ ಚಿತ್ತೇನ ಸಹಜಾತಂ ಚಿತ್ತೇನ ಸಹ ಏಕುಪ್ಪಾದನ್ತಿ? ಆಮನ್ತಾ । ಹಞ್ಚಿ ಕಾಯಕಮ್ಮಂ ಚಿತ್ತಸಮುಟ್ಠಾನಂ ಚಿತ್ತೇನ ಸಹಜಾತಂ ಚಿತ್ತೇನ ಸಹ ಏಕುಪ್ಪಾದಂ, ನೋ ಚ ವತ ರೇ ವತ್ತಬ್ಬೇ – ‘‘ನ ಯಥಾಚಿತ್ತಸ್ಸ ಕಾಯಕಮ್ಮ’’ನ್ತಿ।
Na yathācittassa kāyakammanti? Āmantā. Nanu kāyakammaṃ cittasamuṭṭhānaṃ cittena sahajātaṃ cittena saha ekuppādanti? Āmantā . Hañci kāyakammaṃ cittasamuṭṭhānaṃ cittena sahajātaṃ cittena saha ekuppādaṃ, no ca vata re vattabbe – ‘‘na yathācittassa kāyakamma’’nti.
ನ ಯಥಾಚಿತ್ತಸ್ಸ ಕಾಯಕಮ್ಮನ್ತಿ? ಆಮನ್ತಾ। ನ ಅಭಿಕ್ಕಮಿತುಕಾಮೋ ಅಭಿಕ್ಕಮತಿ, ನ ಪಟಿಕ್ಕಮಿತುಕಾಮೋ ಪಟಿಕ್ಕಮತಿ, ನ ಆಲೋಕೇತುಕಾಮೋ ಆಲೋಕೇತಿ, ನ ವಿಲೋಕೇತುಕಾಮೋ ವಿಲೋಕೇತಿ, ನ ಸಮಿಞ್ಜಿತುಕಾಮೋ ಸಮಿಞ್ಜೇತಿ, ನ ಪಸಾರೇತುಕಾಮೋ ಪಸಾರೇತೀತಿ? ನ ಹೇವಂ ವತ್ತಬ್ಬೇ…ಪೇ॰…। ನನು ಅಭಿಕ್ಕಮಿತುಕಾಮೋ ಅಭಿಕ್ಕಮತಿ, ಪಟಿಕ್ಕಮಿತುಕಾಮೋ ಪಟಿಕ್ಕಮತಿ, ಆಲೋಕೇತುಕಾಮೋ ಆಲೋಕೇತಿ, ವಿಲೋಕೇತುಕಾಮೋ ವಿಲೋಕೇತಿ, ಸಮಿಞ್ಜಿತುಕಾಮೋ ಸಮಿಞ್ಜೇತಿ, ಪಸಾರೇತುಕಾಮೋ ಪಸಾರೇತೀತಿ? ಆಮನ್ತಾ। ಹಞ್ಚಿ ಅಭಿಕ್ಕಮಿತುಕಾಮೋ ಅಭಿಕ್ಕಮತಿ…ಪೇ॰… ಪಸಾರೇತುಕಾಮೋ ಪಸಾರೇತಿ, ನೋ ಚ ವತ ರೇ ವತ್ತಬ್ಬೇ – ‘‘ನ ಯಥಾಚಿತ್ತಸ್ಸ ಕಾಯಕಮ್ಮ’’ನ್ತಿ।
Na yathācittassa kāyakammanti? Āmantā. Na abhikkamitukāmo abhikkamati, na paṭikkamitukāmo paṭikkamati, na āloketukāmo āloketi, na viloketukāmo viloketi, na samiñjitukāmo samiñjeti, na pasāretukāmo pasāretīti? Na hevaṃ vattabbe…pe…. Nanu abhikkamitukāmo abhikkamati, paṭikkamitukāmo paṭikkamati, āloketukāmo āloketi, viloketukāmo viloketi, samiñjitukāmo samiñjeti, pasāretukāmo pasāretīti? Āmantā. Hañci abhikkamitukāmo abhikkamati…pe… pasāretukāmo pasāreti, no ca vata re vattabbe – ‘‘na yathācittassa kāyakamma’’nti.
೫೬೭. ನ ವತ್ತಬ್ಬಂ – ‘‘ನ ಯಥಾಚಿತ್ತಸ್ಸ ಕಾಯಕಮ್ಮ’’ನ್ತಿ? ಆಮನ್ತಾ। ನನು ಅತ್ಥಿ ಕೋಚಿ ‘‘ಅಞ್ಞತ್ರ ಗಚ್ಛಿಸ್ಸಾಮೀ’’ತಿ ಅಞ್ಞತ್ರ ಗಚ್ಛತಿ…ಪೇ॰… ‘‘ಅಞ್ಞಂ ಪಸಾರೇಸ್ಸಾಮೀ’’ತಿ ಅಞ್ಞಂ ಪಸಾರೇತೀತಿ? ಆಮನ್ತಾ। ಹಞ್ಚಿ ಅತ್ಥಿ ಕೋಚಿ ‘‘ಅಞ್ಞತ್ರ ಗಚ್ಛಿಸ್ಸಾಮೀ’’ತಿ ಅಞ್ಞತ್ರ ಗಚ್ಛತಿ…ಪೇ॰… ‘‘ಅಞ್ಞಂ ಪಸಾರೇಸ್ಸಾಮೀ’’ತಿ ಅಞ್ಞಂ ಪಸಾರೇತಿ, ತೇನ ವತ ರೇ ವತ್ತಬ್ಬೇ – ‘‘ನ ಯಥಾಚಿತ್ತಸ್ಸ ಕಾಯಕಮ್ಮ’’ನ್ತಿ।
567. Na vattabbaṃ – ‘‘na yathācittassa kāyakamma’’nti? Āmantā. Nanu atthi koci ‘‘aññatra gacchissāmī’’ti aññatra gacchati…pe… ‘‘aññaṃ pasāressāmī’’ti aññaṃ pasāretīti? Āmantā. Hañci atthi koci ‘‘aññatra gacchissāmī’’ti aññatra gacchati…pe… ‘‘aññaṃ pasāressāmī’’ti aññaṃ pasāreti, tena vata re vattabbe – ‘‘na yathācittassa kāyakamma’’nti.
ನ ಯಥಾಚಿತ್ತಸ್ಸ ಕಾಯಕಮ್ಮನ್ತಿಕಥಾ ನಿಟ್ಠಿತಾ।
Na yathācittassa kāyakammantikathā niṭṭhitā.
Related texts:
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೧೦. ನಯಥಾಚಿತ್ತಸ್ಸ ಕಾಯಕಮ್ಮನ್ತಿಕಥಾವಣ್ಣನಾ • 10. Nayathācittassa kāyakammantikathāvaṇṇanā
