| Library / Tipiṭaka / តិបិដក • Tipiṭaka / ជាតកបាឡិ • Jātakapāḷi |
៤៧១. មេណ្ឌកបញ្ហជាតកំ (៨)
471. Meṇḍakapañhajātakaṃ (8)
៩៤.
94.
យេសំ ន កទាចិ ភូតបុព្ពំ, សខ្យំ 1 សត្តបទម្បិមស្មិ លោកេ;
Yesaṃ na kadāci bhūtapubbaṃ, sakhyaṃ 2 sattapadampimasmi loke;
ជាតា អមិត្តា ទុវេ សហាយា, បដិសន្ធាយ ចរន្តិ កិស្ស ហេតុ។
Jātā amittā duve sahāyā, paṭisandhāya caranti kissa hetu.
៩៥.
95.
យទិ មេ អជ្ជ បាតរាសកាលេ, បញ្ហំ ន សក្កុណេយ្យាថ វត្តុមេតំ;
Yadi me ajja pātarāsakāle, pañhaṃ na sakkuṇeyyātha vattumetaṃ;
រដ្ឋា បព្ពាជយិស្សាមិ វោ សព្ពេ, ន ហិ មត្ថោ ទុប្បញ្ញជាតិកេហិ។
Raṭṭhā pabbājayissāmi vo sabbe, na hi mattho duppaññajātikehi.
៩៦.
96.
មហាជនសមាគមម្ហិ ឃោរេ, ជនកោលាហលសង្គមម្ហិ ជាតេ;
Mahājanasamāgamamhi ghore, janakolāhalasaṅgamamhi jāte;
វិក្ខិត្តមនា អនេកចិត្តា, បញ្ហំ ន សក្កុណោម វត្តុមេតំ។
Vikkhittamanā anekacittā, pañhaṃ na sakkuṇoma vattumetaṃ.
៩៧.
97.
ឯកគ្គចិត្តាវ ឯកមេកា, រហសិ គតា អត្ថំ និចិន្តយិត្វា 3;
Ekaggacittāva ekamekā, rahasi gatā atthaṃ nicintayitvā 4;
បវិវេកេ សម្មសិត្វាន ធីរា, អថ វក្ខន្តិ ជនិន្ទ ឯតមត្ថំ។
Paviveke sammasitvāna dhīrā, atha vakkhanti janinda etamatthaṃ.
៩៨.
98.
ឧគ្គបុត្ត-រាជបុត្តិយានំ, ឧរព្ភស្ស មំសំ បិយំ មនាបំ;
Uggaputta-rājaputtiyānaṃ, urabbhassa maṃsaṃ piyaṃ manāpaṃ;
ន សុនខស្ស តេ អទេន្តិ មំសំ, អថ មេណ្ឌស្ស សុណេន សខ្យមស្ស។
Na sunakhassa te adenti maṃsaṃ, atha meṇḍassa suṇena sakhyamassa.
៩៩.
99.
ចម្មំ វិហនន្តិ ឯឡកស្ស, អស្សបិដ្ឋត្ថរស្សុខស្ស 5 ហេតុ;
Cammaṃ vihananti eḷakassa, assapiṭṭhattharassukhassa 6 hetu;
ន ច តេ សុនខស្ស អត្ថរន្តិ, អថ មេណ្ឌស្ស សុណេន សខ្យមស្ស។
Na ca te sunakhassa attharanti, atha meṇḍassa suṇena sakhyamassa.
១០០.
100.
អាវេល្លិតសិង្គិកោ ហិ មេណ្ឌោ, ន ច សុនខស្ស វិសាណកានិ អត្ថិ;
Āvellitasiṅgiko hi meṇḍo, na ca sunakhassa visāṇakāni atthi;
តិណភក្ខោ មំសភោជនោ ច, អថ មេណ្ឌស្ស សុណេន សខ្យមស្ស។
Tiṇabhakkho maṃsabhojano ca, atha meṇḍassa suṇena sakhyamassa.
១០១.
101.
តិណមាសិ បលាសមាសិ មេណ្ឌោ, ន ច សុនខោ តិណមាសិ នោ បលាសំ;
Tiṇamāsi palāsamāsi meṇḍo, na ca sunakho tiṇamāsi no palāsaṃ;
គណ្ហេយ្យ សុណោ សសំ ពិឡារំ, អថ មេណ្ឌស្ស សុណេន សខ្យមស្ស។
Gaṇheyya suṇo sasaṃ biḷāraṃ, atha meṇḍassa suṇena sakhyamassa.
១០២.
102.
អដ្ឋឌ្ឍបទោ ចតុប្បទស្ស, មេណ្ឌោ អដ្ឋនខោ អទិស្សមានោ;
Aṭṭhaḍḍhapado catuppadassa, meṇḍo aṭṭhanakho adissamāno;
ឆាទិយមាហរតី អយំ ឥមស្ស, មំសំ អាហរតី អយំ អមុស្ស។
Chādiyamāharatī ayaṃ imassa, maṃsaṃ āharatī ayaṃ amussa.
១០៣.
103.
បាសាទវរគតោ វិទេហសេដ្ឋោ, វិតិហារំ អញ្ញមញ្ញភោជនានំ;
Pāsādavaragato videhaseṭṭho, vitihāraṃ aññamaññabhojanānaṃ;
១០៤.
104.
លាភា វត មេ អនប្បរូបា, យស្ស មេទិសា បណ្ឌិតា កុលម្ហិ;
Lābhā vata me anapparūpā, yassa medisā paṇḍitā kulamhi;
បញ្ហស្ស គម្ភីរគតំ និបុណមត្ថំ, បដិវិជ្ឈន្តិ សុភាសិតេន ធីរា។
Pañhassa gambhīragataṃ nipuṇamatthaṃ, paṭivijjhanti subhāsitena dhīrā.
១០៥.
105.
អស្សតរិរថញ្ច ឯកមេកំ, ផីតំ គាមវរញ្ច ឯកមេកំ;
Assatarirathañca ekamekaṃ, phītaṃ gāmavarañca ekamekaṃ;
សព្ពេសំ វោ ទម្មិ បណ្ឌិតានំ, បរមប្បតីតមនោ សុភាសិតេនាតិ។
Sabbesaṃ vo dammi paṇḍitānaṃ, paramappatītamano subhāsitenāti.
មេណ្ឌកបញ្ហជាតកំ អដ្ឋមំ។
Meṇḍakapañhajātakaṃ aṭṭhamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ជាតក-អដ្ឋកថា • Jātaka-aṭṭhakathā / [៤៧១] ៨. មេណ្ឌកបញ្ហជាតកវណ្ណនា • [471] 8. Meṇḍakapañhajātakavaṇṇanā
