| Library / Tipiṭaka / តិបិដក • Tipiṭaka / ចរិយាបិដកបាឡិ • Cariyāpiṭakapāḷi |
៧. មាតង្គចរិយា
7. Mātaṅgacariyā
៦០.
60.
‘‘បុនាបរំ យទា ហោមិ, ជដិលោ ឧគ្គតាបនោ;
‘‘Punāparaṃ yadā homi, jaṭilo uggatāpano;
មាតង្គោ នាម នាមេន, សីលវា សុសមាហិតោ។
Mātaṅgo nāma nāmena, sīlavā susamāhito.
៦១.
61.
‘‘អហញ្ច ព្រាហ្មណោ ឯកោ, គង្គាកូលេ វសាមុភោ;
‘‘Ahañca brāhmaṇo eko, gaṅgākūle vasāmubho;
អហំ វសាមិ ឧបរិ, ហេដ្ឋា វសតិ ព្រាហ្មណោ។
Ahaṃ vasāmi upari, heṭṭhā vasati brāhmaṇo.
៦២.
62.
‘‘វិចរន្តោ អនុកូលម្ហិ, ឧទ្ធំ មេ អស្សមទ្ទស;
‘‘Vicaranto anukūlamhi, uddhaṃ me assamaddasa;
តត្ថ មំ បរិភាសេត្វា, អភិសបិ មុទ្ធផាលនំ។
Tattha maṃ paribhāsetvā, abhisapi muddhaphālanaṃ.
៦៣.
63.
‘‘យទិហំ តស្ស បកុប្បេយ្យំ, យទិ សីលំ ន គោបយេ;
‘‘Yadihaṃ tassa pakuppeyyaṃ, yadi sīlaṃ na gopaye;
ឱលោកេត្វានហំ តស្ស, ករេយ្យំ ឆារិកំ វិយ។
Oloketvānahaṃ tassa, kareyyaṃ chārikaṃ viya.
៦៤.
64.
‘‘យំ សោ តទា មំ អភិសបិ, កុបិតោ ទុដ្ឋមានសោ;
‘‘Yaṃ so tadā maṃ abhisapi, kupito duṭṭhamānaso;
តស្សេវ មត្ថកេ និបតិ, យោគេន តំ បមោចយិំ។
Tasseva matthake nipati, yogena taṃ pamocayiṃ.
៦៥.
65.
‘‘អនុរក្ខិំ មម សីលំ, នារក្ខិំ មម ជីវិតំ;
‘‘Anurakkhiṃ mama sīlaṃ, nārakkhiṃ mama jīvitaṃ;
សីលវា ហិ តទា អាសិំ, ពោធិយាយេវ ការណា’’តិ។
Sīlavā hi tadā āsiṃ, bodhiyāyeva kāraṇā’’ti.
មាតង្គចរិយំ សត្តមំ។
Mātaṅgacariyaṃ sattamaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ចរិយាបិដក-អដ្ឋកថា • Cariyāpiṭaka-aṭṭhakathā / ៧. មាតង្គចរិយាវណ្ណនា • 7. Mātaṅgacariyāvaṇṇanā
