| Library / Tipiṭaka / තිපිටක • Tipiṭaka / අඞ්ගුත්තරනිකාය • Aṅguttaranikāya |
5. මලසුත්තං
5. Malasuttaṃ
15. ‘‘අට්ඨිමානි , භික්ඛවෙ, මලානි. කතමානි අට්ඨ? අසජ්ඣායමලා, භික්ඛවෙ, මන්තා; අනුට්ඨානමලා, භික්ඛවෙ, ඝරා; මලං, භික්ඛවෙ, වණ්ණස්ස කොසජ්ජං; පමාදො, භික්ඛවෙ, රක්ඛතො මලං; මලං, භික්ඛවෙ, ඉත්ථියා දුච්චරිතං; මච්ඡෙරං, භික්ඛවෙ, දදතො මලං; මලා, භික්ඛවෙ, පාපකා අකුසලා ධම්මා අස්මිං ලොකෙ පරම්හි ච; තතො 1, භික්ඛවෙ, මලා මලතරං අවිජ්ජා පරමං මලං. ඉමානි ඛො, භික්ඛවෙ, අට්ඨ මලානී’’ති.
15. ‘‘Aṭṭhimāni , bhikkhave, malāni. Katamāni aṭṭha? Asajjhāyamalā, bhikkhave, mantā; anuṭṭhānamalā, bhikkhave, gharā; malaṃ, bhikkhave, vaṇṇassa kosajjaṃ; pamādo, bhikkhave, rakkhato malaṃ; malaṃ, bhikkhave, itthiyā duccaritaṃ; maccheraṃ, bhikkhave, dadato malaṃ; malā, bhikkhave, pāpakā akusalā dhammā asmiṃ loke paramhi ca; tato 2, bhikkhave, malā malataraṃ avijjā paramaṃ malaṃ. Imāni kho, bhikkhave, aṭṭha malānī’’ti.
‘‘අසජ්ඣායමලා මන්තා, අනුට්ඨානමලා ඝරා;
‘‘Asajjhāyamalā mantā, anuṭṭhānamalā gharā;
මලං වණ්ණස්ස කොසජ්ජං, පමාදො රක්ඛතො මලං.
Malaṃ vaṇṇassa kosajjaṃ, pamādo rakkhato malaṃ.
‘‘මලිත්ථියා දුච්චරිතං, මච්ඡෙරං දදතො මලං;
‘‘Malitthiyā duccaritaṃ, maccheraṃ dadato malaṃ;
මලා වෙ පාපකා ධම්මා, අස්මිං ලොකෙ පරම්හි ච;
Malā ve pāpakā dhammā, asmiṃ loke paramhi ca;
තතො මලා මලතරං, අවිජ්ජා පරමං මල’’න්ති. පඤ්චමං;
Tato malā malataraṃ, avijjā paramaṃ mala’’nti. pañcamaṃ;
Footnotes:
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / අඞ්ගුත්තරනිකාය (අට්ඨකථා) • Aṅguttaranikāya (aṭṭhakathā) / 5. මලසුත්තවණ්ණනා • 5. Malasuttavaṇṇanā
ටීකා • Tīkā / සුත්තපිටක (ටීකා) • Suttapiṭaka (ṭīkā) / අඞ්ගුත්තරනිකාය (ටීකා) • Aṅguttaranikāya (ṭīkā) / 5-8. මලසුත්තාදිවණ්ණනා • 5-8. Malasuttādivaṇṇanā
