| Library / Tipiṭaka / តិបិដក • Tipiṭaka / ជាតកបាឡិ • Jātakapāḷi |
៤២៩. មហាសុវជាតកំ (៣)
429. Mahāsuvajātakaṃ (3)
២០.
20.
ទុមោ យទា ហោតិ ផលូបបន្នោ, ភុញ្ជន្តិ នំ វិហង្គមា 1 សម្បតន្តា;
Dumo yadā hoti phalūpapanno, bhuñjanti naṃ vihaṅgamā 2 sampatantā;
ខីណន្តិ ញត្វាន ទុមំ ផលច្ចយេ 3, ទិសោទិសំ យន្តិ តតោ វិហង្គមា។
Khīṇanti ñatvāna dumaṃ phalaccaye 4, disodisaṃ yanti tato vihaṅgamā.
២១.
21.
ចរ ចារិកំ លោហិតតុណ្ឌ មាមរិ, កិំ ត្វំ សុវ សុក្ខទុមម្ហិ ឈាយសិ;
Cara cārikaṃ lohitatuṇḍa māmari, kiṃ tvaṃ suva sukkhadumamhi jhāyasi;
តទិង្ឃ មំ ព្រូហិ វសន្តសន្និភ, កស្មា សុវ សុក្ខទុមំ ន រិញ្ចសិ។
Tadiṅgha maṃ brūhi vasantasannibha, kasmā suva sukkhadumaṃ na riñcasi.
២២.
22.
យេ វេ សខីនំ សខារោ ភវន្តិ, បាណច្ចយេ 5 ទុក្ខសុខេសុ ហំស;
Ye ve sakhīnaṃ sakhāro bhavanti, pāṇaccaye 6 dukkhasukhesu haṃsa;
ខីណំ អខីណន្តិ ន តំ ជហន្តិ, សន្តោ សតំ ធម្មមនុស្សរន្តា។
Khīṇaṃ akhīṇanti na taṃ jahanti, santo sataṃ dhammamanussarantā.
២៣.
23.
សោហំ សតំ អញ្ញតរោស្មិ ហំស, ញាតី ច មេ ហោតិ សខា ច រុក្ខោ;
Sohaṃ sataṃ aññatarosmi haṃsa, ñātī ca me hoti sakhā ca rukkho;
តំ នុស្សហេ ជីវិកត្ថោ បហាតុំ, ខីណន្តិ ញត្វាន ន ហេស ធម្មោ 7។
Taṃ nussahe jīvikattho pahātuṃ, khīṇanti ñatvāna na hesa dhammo 8.
២៤.
24.
សចេតំ ធម្មំ រោចេសិ, បាសំសោសិ វិជានតំ។
Sacetaṃ dhammaṃ rocesi, pāsaṃsosi vijānataṃ.
២៥.
25.
សោ តេ សុវ វរំ ទម្មិ, បត្តយាន វិហង្គម;
So te suva varaṃ dammi, pattayāna vihaṅgama;
វរំ វរស្សុ វក្កង្គ, យំ កិញ្ចិ មនសិច្ឆសិ។
Varaṃ varassu vakkaṅga, yaṃ kiñci manasicchasi.
២៦.
26.
វរញ្ច មេ ហំស ភវំ ទទេយ្យ, អយញ្ច រុក្ខោ បុនរាយុំ លភេថ;
Varañca me haṃsa bhavaṃ dadeyya, ayañca rukkho punarāyuṃ labhetha;
សោ សាខវា ផលិមា សំវិរូឡ្ហោ, មធុត្ថិកោ តិដ្ឋតុ សោភមានោ។
So sākhavā phalimā saṃvirūḷho, madhutthiko tiṭṭhatu sobhamāno.
២៧.
27.
តំ បស្ស សម្ម ផលិមំ ឧឡារំ, សហាវ តេ ហោតុ ឧទុម្ពរេន;
Taṃ passa samma phalimaṃ uḷāraṃ, sahāva te hotu udumbarena;
សោ សាខវា ផលិមា សំវិរូឡ្ហោ, មធុត្ថិកោ តិដ្ឋតុ សោភមានោ។
So sākhavā phalimā saṃvirūḷho, madhutthiko tiṭṭhatu sobhamāno.
២៨.
28.
ឯវំ សក្ក សុខី ហោហិ, សហ សព្ពេហិ ញាតិភិ;
Evaṃ sakka sukhī hohi, saha sabbehi ñātibhi;
យថាហមជ្ជ សុខិតោ, ទិស្វាន សផលំ ទុមំ។
Yathāhamajja sukhito, disvāna saphalaṃ dumaṃ.
២៩.
29.
សុវស្ស ច វរំ ទត្វា, កត្វាន សផលំ ទុមំ;
Suvassa ca varaṃ datvā, katvāna saphalaṃ dumaṃ;
បក្កាមិ សហ ភរិយាយ, ទេវានំ នន្ទនំ វនន្តិ។
Pakkāmi saha bhariyāya, devānaṃ nandanaṃ vananti.
មហាសុវជាតកំ តតិយំ។
Mahāsuvajātakaṃ tatiyaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ជាតក-អដ្ឋកថា • Jātaka-aṭṭhakathā / [៤២៩] ៣. មហាសុវជាតកវណ្ណនា • [429] 3. Mahāsuvajātakavaṇṇanā
