Only Dharma. Since 1992
Library / Tipiṭaka / ติปิฎก • Tipiṭaka / องฺคุตฺตรนิกาย • Aṅguttaranikāya

๑๐. มหาสาลปุตฺตสุตฺตํ

10. Mahāsālaputtasuttaṃ

๔๐. ‘‘หิมวนฺตํ, ภิกฺขเว, ปพฺพตราชํ นิสฺสาย มหาสาลา ปญฺจหิ วฑฺฒีหิ วฑฺฒนฺติฯ กตมาหิ ปญฺจหิ? สาขาปตฺตปลาเสน วฑฺฒนฺติ; ตเจน วฑฺฒนฺติ; ปปฎิกาย วฑฺฒนฺติ; เผคฺคุนา วฑฺฒนฺติ; สาเรน วฑฺฒนฺติฯ หิมวนฺตํ, ภิกฺขเว, ปพฺพตราชํ นิสฺสาย มหาสาลา อิมาหิ ปญฺจหิ วฑฺฒีหิ วฑฺฒนฺติฯ เอวเมวํ โข, ภิกฺขเว, สทฺธํ กุลปุตฺตํ นิสฺสาย อโนฺตชโน ปญฺจหิ วฑฺฒีหิ วฑฺฒติฯ กตมาหิ ปญฺจหิ? สทฺธาย วฑฺฒติ; สีเลน วฑฺฒติ; สุเตน วฑฺฒติ; จาเคน วฑฺฒติ; ปญฺญาย วฑฺฒติฯ สทฺธํ, ภิกฺขเว, กุลปุตฺตํ นิสฺสาย อโนฺตชโน อิมาหิ ปญฺจหิ วฑฺฒีหิ วฑฺฒตี’’ติฯ

40. ‘‘Himavantaṃ, bhikkhave, pabbatarājaṃ nissāya mahāsālā pañcahi vaḍḍhīhi vaḍḍhanti. Katamāhi pañcahi? Sākhāpattapalāsena vaḍḍhanti; tacena vaḍḍhanti; papaṭikāya vaḍḍhanti; pheggunā vaḍḍhanti; sārena vaḍḍhanti. Himavantaṃ, bhikkhave, pabbatarājaṃ nissāya mahāsālā imāhi pañcahi vaḍḍhīhi vaḍḍhanti. Evamevaṃ kho, bhikkhave, saddhaṃ kulaputtaṃ nissāya antojano pañcahi vaḍḍhīhi vaḍḍhati. Katamāhi pañcahi? Saddhāya vaḍḍhati; sīlena vaḍḍhati; sutena vaḍḍhati; cāgena vaḍḍhati; paññāya vaḍḍhati. Saddhaṃ, bhikkhave, kulaputtaṃ nissāya antojano imāhi pañcahi vaḍḍhīhi vaḍḍhatī’’ti.

‘‘ยถา หิ ปพฺพโต เสโล, อรญฺญสฺมิํ พฺรหาวเน;

‘‘Yathā hi pabbato selo, araññasmiṃ brahāvane;

ตํ รุกฺขา อุปนิสฺสาย, วฑฺฒเนฺต เต วนปฺปตีฯ

Taṃ rukkhā upanissāya, vaḍḍhante te vanappatī.

‘‘ตเถว สีลสมฺปนฺนํ, สทฺธํ กุลปุตฺตํ อิมํ 1;

‘‘Tatheva sīlasampannaṃ, saddhaṃ kulaputtaṃ imaṃ 2;

อุปนิสฺสาย วฑฺฒนฺติ, ปุตฺตทารา จ พนฺธวา;

Upanissāya vaḍḍhanti, puttadārā ca bandhavā;

อมจฺจา ญาติสงฺฆา จ, เย จสฺส อนุชีวิโนฯ

Amaccā ñātisaṅghā ca, ye cassa anujīvino.

‘‘ตฺยสฺส สีลวโต สีลํ, จาคํ สุจริตานิ จ;

‘‘Tyassa sīlavato sīlaṃ, cāgaṃ sucaritāni ca;

ปสฺสมานานุกุพฺพนฺติ, เย ภวนฺติ วิจกฺขณาฯ

Passamānānukubbanti, ye bhavanti vicakkhaṇā.

‘‘อิมํ ธมฺมํ จริตฺวาน, มคฺคํ 3 สุคติคามินํ;

‘‘Imaṃ dhammaṃ caritvāna, maggaṃ 4 sugatigāminaṃ;

นนฺทิโน เทวโลกสฺมิํ, โมทนฺติ กามกามิโน’’ติฯ ทสมํ;

Nandino devalokasmiṃ, modanti kāmakāmino’’ti. dasamaṃ;

สุมนวโคฺค จตุโตฺถฯ

Sumanavaggo catuttho.

ตสฺสุทฺทานํ –

Tassuddānaṃ –

สุมนา จุนฺที อุคฺคโห, สีโห ทานานิสํสโก;

Sumanā cundī uggaho, sīho dānānisaṃsako;

กาลโภชนสทฺธา จ, ปุตฺตสาเลหิ เต ทสาติฯ

Kālabhojanasaddhā ca, puttasālehi te dasāti.




Next: ๕. มุณฺฑราชวโคฺค • 5. Muṇḍarājavaggo




Footnotes:
1. กุลปติํ อิธ (สี.), กุลปุตฺตํ อิธ (สฺยา.)
2. kulapatiṃ idha (sī.), kulaputtaṃ idha (syā.)
3. สคฺคํ (สฺยา. ก.)
4. saggaṃ (syā. ka.)



Related texts:



อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๑๐. มหาสาลปุตฺตสุตฺตวณฺณนา • 10. Mahāsālaputtasuttavaṇṇanā

ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๙-๑๐. ปุตฺตสุตฺตาทิวณฺณนา • 9-10. Puttasuttādivaṇṇanā


© 1991-2026 Titi Tudorancea Yoga Bulletin | Titi Tudorancea® is a Registered Trademark | Terms of use and privacy policy
Contact