| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၇. မဟာပေသကာရသိက္ခာပဒဝဏ္ဏနာ
7. Mahāpesakārasikkhāpadavaṇṇanā
စီဝရသာမိကေဟိ ပုဗ္ဗေ အပ္ပဝာရိတော ဟုတ္ဝာတိ ‘‘ကီဒိသေန တေ, ဘန္တေ, စီဝရေန အတ္ထော, ကီဒိသံ တေ စီဝရံ ဝာယာပေမိ, ဝဒ, ဘန္တေ, ယဒိစ္ဆသီ’’တိ စီဝရသာမိကေဟိ ပုဗ္ဗေ အဝုတ္တော ဟုတ္ဝာ။ ဧတ္ထ စ အာယတာဒီဟိ တီဟိ သုတ္တဝဍ္ဎနာကာရေန သဟ ဝာယနာကာရံ ဒသ္သေတိ, သုဝီတာဒီဟိ စတူဟိ ဝာယနာကာရမေဝ။ ‘‘ကိဉ္စိမတ္တံ အနုပဒဇ္ဇေယ္ယာမာ’’တိအာဒိ တသ္သ ကတ္တဗ္ဗာကာရမတ္တဒသ္သနံ, န ပန အင္ဂဒသ္သနံ သုတ္တဝဍ္ဎနဝသေနေဝ အာပဇ္ဇိတဗ္ဗတ္တာတိ အာဟ ‘‘န ဘိက္ခုနော ပိဏ္ဍပာတဒာနမတ္တေနာ’’တိအာဒိ။ ဧတ္ထ စ ‘‘ဣဒံ မေ, ဘန္တေ, စီဝရံ ပုဗ္ဗေ အပ္ပဝာရိတေန အညာတကသ္သ ဂဟပတိကသ္သ တန္တဝာယေ ဥပသင္ကမိတ္ဝာ စီဝရေ ဝိကပ္ပံ အာပန္နံ နိသ္သဂ္ဂိယ’’န္တိ (ပာရာ. ၆၄၃) ဣမိနာ နယေန နိသ္သဇ္ဇနဝိဓာနံ ဝေဒိတဗ္ဗံ။ တိကပာစိတ္တိယန္တိ အညာတကေ အညာတကသညိဝေမတိကဉာတကသညီနံ ဝသေန တီဏိ ပာစိတ္တိယာနိ။
Cīvarasāmikehipubbe appavārito hutvāti ‘‘kīdisena te, bhante, cīvarena attho, kīdisaṃ te cīvaraṃ vāyāpemi, vada, bhante, yadicchasī’’ti cīvarasāmikehi pubbe avutto hutvā. Ettha ca āyatādīhi tīhi suttavaḍḍhanākārena saha vāyanākāraṃ dasseti, suvītādīhi catūhi vāyanākārameva. ‘‘Kiñcimattaṃ anupadajjeyyāmā’’tiādi tassa kattabbākāramattadassanaṃ, na pana aṅgadassanaṃ suttavaḍḍhanavaseneva āpajjitabbattāti āha ‘‘na bhikkhuno piṇḍapātadānamattenā’’tiādi. Ettha ca ‘‘idaṃ me, bhante, cīvaraṃ pubbe appavāritena aññātakassa gahapatikassa tantavāye upasaṅkamitvā cīvare vikappaṃ āpannaṃ nissaggiya’’nti (pārā. 643) iminā nayena nissajjanavidhānaṃ veditabbaṃ. Tikapācittiyanti aññātake aññātakasaññivematikañātakasaññīnaṃ vasena tīṇi pācittiyāni.
မဟာပေသကာရသိက္ခာပဒဝဏ္ဏနာ နိဋ္ဌိတာ။
Mahāpesakārasikkhāpadavaṇṇanā niṭṭhitā.
