| Library / Tipiṭaka / ཏིཔིཊཀ • Tipiṭaka / ཝཛིརབུདྡྷི-ཊཱིཀཱ • Vajirabuddhi-ṭīkā |
༩. མཧལླཀཝིཧཱརསིཀྑཱཔདཝཎྞནཱ
9. Mahallakavihārasikkhāpadavaṇṇanā
༡༣༥. ཡཱཝ དྭཱརཀོསཱཏི དྭཱརསམཱིཔཱ, ཡཱཝ བྷིཏྟཱིཏི ཨཏྠོ, ཏཾ སུཝུཏྟཾ། ཀཝཱཊཝིཏྠཱརཔྤམཱཎོཏི ཧཏྠཔཱསསྶཱདྷིཔྤེཏཏྟཱ, སམནྟཱ ཀཝཱཊཝིཏྠཱརཔྤམཱཎཨུཔཙཱརསྶ གཧིཏཏྟཱ ཨཔརིཔཱུརཨུཔཙཱརཱཔི ཧོཏི། ཨཱལོཀཾ ཀརོཏཱིཏི ཨཱལོཀཾ སནྡྷེཏི པིདྷེཏཱིཏི སནྡྷི ཨེཝ ཨཱལོཀསནྡྷིནཱམཀཱ ཧོནྟི། ཝཱཏཔཱནཀཝཱཊལེཔཀམྨེ ཨཔྤཧརིཏཊྛཱནཀིཙྩཾ ནཏྠི།
135.Yāvadvārakosāti dvārasamīpā, yāva bhittīti attho, taṃ suvuttaṃ. Kavāṭavitthārappamāṇoti hatthapāsassādhippetattā, samantā kavāṭavitthārappamāṇaupacārassa gahitattā aparipūraupacārāpi hoti. Ālokaṃ karotīti ālokaṃ sandheti pidhetīti sandhi eva ālokasandhināmakā honti. Vātapānakavāṭalepakamme appaharitaṭṭhānakiccaṃ natthi.
༡༣༦. ཨིཊྛཀཱཏི ཚདནཀཔཱལཱསིལཱདིཨིཊྛཀཱ། ཚདནཱུཔརཱིཏི ཨེཏྠ པཋམཾ ཏཱཝ ཨེཀཝཱརཾ ཨཔརིསེསཾ ཚཱདེཏྭཱ པུན ཚཱདནདཎྜཀེ བནྡྷིཏྭཱ དུཏིཡཝཱརཾ ཏཐེཝ ཚཱདེཏབྦཾ། ‘‘ཏཏིཡཝཱརཙཏུཏྠཝཱརེ སམྤཏྟེ དྭེ མགྒེ ཨདྷིཊྛཧིཏྭཱ ཏཏིཡམགྒཾ ཨཱཎཱཔེཏྭཱ པཀྐམིཏབྦ’’ནྟི ཝུཏྟཾ, ཏཾ ‘‘པུནཔྤུནཾ ཚཱདཱཔེཏཱི’’ཏི ཨིམིནཱ ཡུཛྫཏི།
136.Iṭṭhakāti chadanakapālāsilādiiṭṭhakā. Chadanūparīti ettha paṭhamaṃ tāva ekavāraṃ aparisesaṃ chādetvā puna chādanadaṇḍake bandhitvā dutiyavāraṃ tatheva chādetabbaṃ. ‘‘Tatiyavāracatutthavāre sampatte dve magge adhiṭṭhahitvā tatiyamaggaṃ āṇāpetvā pakkamitabba’’nti vuttaṃ, taṃ ‘‘punappunaṃ chādāpetī’’ti iminā yujjati.
པོརཱཎཱ པན ‘‘པཋམཝཱརེཡེཝ ཏཡོ མགྒེ ཨདྷིཊྛཱཏུཾ ཝཊྚཏི, ཙཏུཏྠཏོ པཊྛཱཡ ཨཱཔཏྟི པཱཙིཏྟིཡཾ, ཙཏུཏྠལེཔཏོ པཊྛཱཡ ཨཱཔཏྟཱི’’ཏི ཝདནྟི། ཏཏྠ ཚདནེ ཝུཏྟཝིདྷིནིདཱནེན སམེཏི, ལེཔེ ཝུཏྟཝིདྷིཏིཀཙྪེདེན སམེཏི། ཏཐཱཔི སོ ན ཡུཏྟོཝ། ནིདཱནེ, ཨཊྛཀཐཱཡཉྩ སིདྡྷལེཔཏྟཱ སབྦསོཝཱཔི ཨཙྪནྣེ, ཚནྣེཝཱཔི ཨནེཀསོ པརིཡཱཡསྶ ཏཏིཡསྶེཝ ཨདྷིཊྛཱནནྟི ནོ སམེཏཱིཏི ཨཱཙརིཡོ། ‘‘དྭེ མགྒེ’’ཏི, ‘‘དྭེ ཚདནེ’’ཏི ཙ ‘‘ཏཏིཡཝཱརཏོ པཊྛཱཡ ཨེཝཾ ཚཱདཱཔེཧཱི’ཏི ཨཱཎཱཔེཏྭཱ པཀྐམིཏབྦ’’ནྟི ཙ ཨུཔཏིསྶཏྠེརོ ཝདཏི ཀིར།
Porāṇā pana ‘‘paṭhamavāreyeva tayo magge adhiṭṭhātuṃ vaṭṭati, catutthato paṭṭhāya āpatti pācittiyaṃ, catutthalepato paṭṭhāya āpattī’’ti vadanti. Tattha chadane vuttavidhinidānena sameti, lepe vuttavidhitikacchedena sameti. Tathāpi so na yuttova. Nidāne, aṭṭhakathāyañca siddhalepattā sabbasovāpi acchanne, channevāpi anekaso pariyāyassa tatiyasseva adhiṭṭhānanti no sametīti ācariyo. ‘‘Dve magge’’ti, ‘‘dve chadane’’ti ca ‘‘tatiyavārato paṭṭhāya evaṃ chādāpehī’ti āṇāpetvā pakkamitabba’’nti ca upatissatthero vadati kira.
མཧལླཀཝིཧཱརསིཀྑཱཔདཝཎྞནཱ ནིཊྛིཏཱ།
Mahallakavihārasikkhāpadavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༢. བྷཱུཏགཱམཝགྒོ • 2. Bhūtagāmavaggo
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༩. མཧལླཀཝིཧཱརསིཀྑཱཔདཝཎྞནཱ • 9. Mahallakavihārasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༩. མཧལླཀཝིཧཱརསིཀྑཱཔདཝཎྞནཱ • 9. Mahallakavihārasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༩. མཧལླཀཝིཧཱརསིཀྑཱཔདཝཎྞནཱ • 9. Mahallakavihārasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༩. མཧལླཀཝིཧཱརསིཀྑཱཔདཾ • 9. Mahallakavihārasikkhāpadaṃ
