| Library / Tipiṭaka / តិបិដក • Tipiṭaka / ជាតកបាឡិ • Jātakapāḷi |
៤៤៧. មហាធម្មបាលជាតកំ (៩)
447. Mahādhammapālajātakaṃ (9)
៩២.
92.
កិំ តេ វតំ កិំ បន ព្រហ្មចរិយំ, កិស្ស សុចិណ្ណស្ស អយំ វិបាកោ;
Kiṃ te vataṃ kiṃ pana brahmacariyaṃ, kissa suciṇṇassa ayaṃ vipāko;
អក្ខាហិ មេ ព្រាហ្មណ ឯតមត្ថំ, កស្មា នុ តុម្ហំ ទហរា ន មិយ្យរេ 1។
Akkhāhi me brāhmaṇa etamatthaṃ, kasmā nu tumhaṃ daharā na miyyare 2.
៩៣.
93.
ធម្មំ ចរាម ន មុសា ភណាម, បាបានិ កម្មានិ បរិវជ្ជយាម 3;
Dhammaṃ carāma na musā bhaṇāma, pāpāni kammāni parivajjayāma 4;
អនរិយំ បរិវជ្ជេមុ សព្ពំ, តស្មា ហិ អម្ហំ ទហរា ន មិយ្យរេ។
Anariyaṃ parivajjemu sabbaṃ, tasmā hi amhaṃ daharā na miyyare.
៩៤.
94.
សុណោម ធម្មំ អសតំ សតញ្ច, ន ចាបិ ធម្មំ អសតំ រោចយាម;
Suṇoma dhammaṃ asataṃ satañca, na cāpi dhammaṃ asataṃ rocayāma;
ហិត្វា អសន្តេ ន ជហាម សន្តេ, តស្មា ហិ អម្ហំ ទហរា ន មិយ្យរេ។
Hitvā asante na jahāma sante, tasmā hi amhaṃ daharā na miyyare.
៩៥.
95.
បុព្ពេវ ទានា សុមនា ភវាម, ទទម្បិ វេ អត្តមនា ភវាម;
Pubbeva dānā sumanā bhavāma, dadampi ve attamanā bhavāma;
ទត្វាបិ វេ នានុតប្បាម បច្ឆា, តស្មា ហិ អម្ហំ ទហរា ន មិយ្យរេ។
Datvāpi ve nānutappāma pacchā, tasmā hi amhaṃ daharā na miyyare.
៩៦.
96.
សមណេ មយំ ព្រាហ្មណេ អទ្ធិកេ ច, វនិព្ពកេ យាចនកេ ទលិទ្ទេ;
Samaṇe mayaṃ brāhmaṇe addhike ca, vanibbake yācanake dalidde;
អន្នេន បានេន អភិតប្បយាម, តស្មា ហិ អម្ហំ ទហរា ន មិយ្យរេ។
Annena pānena abhitappayāma, tasmā hi amhaṃ daharā na miyyare.
៩៧.
97.
មយញ្ច ភរិយំ នាតិក្កមាម, អម្ហេ ច ភរិយា នាតិក្កមន្តិ;
Mayañca bhariyaṃ nātikkamāma, amhe ca bhariyā nātikkamanti;
អញ្ញត្រ តាហិ ព្រហ្មចរិយំ ចរាម, តស្មា ហិ អម្ហំ ទហរា ន មិយ្យរេ។
Aññatra tāhi brahmacariyaṃ carāma, tasmā hi amhaṃ daharā na miyyare.
៩៨.
98.
បាណាតិបាតា វិរមាម សព្ពេ, លោកេ អទិន្នំ បរិវជ្ជយាម;
Pāṇātipātā viramāma sabbe, loke adinnaṃ parivajjayāma;
អមជ្ជបា នោបិ មុសា ភណាម, តស្មា ហិ អម្ហំ ទហរា ន មិយ្យរេ។
Amajjapā nopi musā bhaṇāma, tasmā hi amhaṃ daharā na miyyare.
៩៩.
99.
ឯតាសុ វេ ជាយរេ សុត្តមាសុ, មេធាវិនោ ហោន្តិ បហូតបញ្ញា;
Etāsu ve jāyare suttamāsu, medhāvino honti pahūtapaññā;
ពហុស្សុតា វេទគុនោ 5 ច ហោន្តិ, តស្មា ហិ អម្ហំ ទហរា ន មិយ្យរេ។
Bahussutā vedaguno 6 ca honti, tasmā hi amhaṃ daharā na miyyare.
១០០.
100.
មាតា បិតា ច 7 ភគិនី ភាតរោ ច, បុត្តា ច ទារា ច មយញ្ច សព្ពេ;
Mātā pitā ca 8 bhaginī bhātaro ca, puttā ca dārā ca mayañca sabbe;
ធម្មំ ចរាម បរលោកហេតុ, តស្មា ហិ អម្ហំ ទហរា ន មិយ្យរេ។
Dhammaṃ carāma paralokahetu, tasmā hi amhaṃ daharā na miyyare.
១០១.
101.
ទាសា ច ទាស្យោ 9 អនុជីវិនោ ច, បរិចារកា កម្មករា ច សព្ពេ;
Dāsā ca dāsyo 10 anujīvino ca, paricārakā kammakarā ca sabbe;
ធម្មំ ចរន្តិ បរលោកហេតុ, តស្មា ហិ អម្ហំ ទហរា ន មិយ្យរេ។
Dhammaṃ caranti paralokahetu, tasmā hi amhaṃ daharā na miyyare.
១០២.
102.
ធម្មោ ហវេ រក្ខតិ ធម្មចារិំ, ធម្មោ សុចិណ្ណោ សុខមាវហាតិ;
Dhammo have rakkhati dhammacāriṃ, dhammo suciṇṇo sukhamāvahāti;
ឯសានិសំសោ ធម្មេ សុចិណ្ណេ, ន ទុគ្គតិំ គច្ឆតិ ធម្មចារី។
Esānisaṃso dhamme suciṇṇe, na duggatiṃ gacchati dhammacārī.
១០៣.
103.
ធម្មោ ហវេ រក្ខតិ ធម្មចារិំ, ឆត្តំ មហន្តំ វិយ វស្សកាលេ;
Dhammo have rakkhati dhammacāriṃ, chattaṃ mahantaṃ viya vassakāle;
ធម្មេន គុត្តោ មម ធម្មបាលោ, អញ្ញស្ស អដ្ឋីនិ សុខី កុមារោតិ។
Dhammena gutto mama dhammapālo, aññassa aṭṭhīni sukhī kumāroti.
មហាធម្មបាលជាតកំ នវមំ។
Mahādhammapālajātakaṃ navamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ជាតក-អដ្ឋកថា • Jātaka-aṭṭhakathā / [៤៤៧] ៩. មហាធម្មបាលជាតកវណ្ណនា • [447] 9. Mahādhammapālajātakavaṇṇanā
