| Library / Tipiṭaka / ติปิฎก • Tipiṭaka / ชาตกปาฬิ • Jātakapāḷi |
๔๔๗. มหาธมฺมปาลชาตกํ (๙)
447. Mahādhammapālajātakaṃ (9)
๙๒.
92.
กิํ เต วตํ กิํ ปน พฺรหฺมจริยํ, กิสฺส สุจิณฺณสฺส อยํ วิปาโก;
Kiṃ te vataṃ kiṃ pana brahmacariyaṃ, kissa suciṇṇassa ayaṃ vipāko;
อกฺขาหิ เม พฺราหฺมณ เอตมตฺถํ, กสฺมา นุ ตุมฺหํ ทหรา น มิยฺยเร 1ฯ
Akkhāhi me brāhmaṇa etamatthaṃ, kasmā nu tumhaṃ daharā na miyyare 2.
๙๓.
93.
ธมฺมํ จราม น มุสา ภณาม, ปาปานิ กมฺมานิ ปริวชฺชยาม 3;
Dhammaṃ carāma na musā bhaṇāma, pāpāni kammāni parivajjayāma 4;
อนริยํ ปริวเชฺชมุ สพฺพํ, ตสฺมา หิ อมฺหํ ทหรา น มิยฺยเรฯ
Anariyaṃ parivajjemu sabbaṃ, tasmā hi amhaṃ daharā na miyyare.
๙๔.
94.
สุโณม ธมฺมํ อสตํ สตญฺจ, น จาปิ ธมฺมํ อสตํ โรจยาม;
Suṇoma dhammaṃ asataṃ satañca, na cāpi dhammaṃ asataṃ rocayāma;
หิตฺวา อสเนฺต น ชหาม สเนฺต, ตสฺมา หิ อมฺหํ ทหรา น มิยฺยเรฯ
Hitvā asante na jahāma sante, tasmā hi amhaṃ daharā na miyyare.
๙๕.
95.
ปุเพฺพว ทานา สุมนา ภวาม, ททมฺปิ เว อตฺตมนา ภวาม;
Pubbeva dānā sumanā bhavāma, dadampi ve attamanā bhavāma;
ทตฺวาปิ เว นานุตปฺปาม ปจฺฉา, ตสฺมา หิ อมฺหํ ทหรา น มิยฺยเรฯ
Datvāpi ve nānutappāma pacchā, tasmā hi amhaṃ daharā na miyyare.
๙๖.
96.
สมเณ มยํ พฺราหฺมเณ อทฺธิเก จ, วนิพฺพเก ยาจนเก ทลิเทฺท;
Samaṇe mayaṃ brāhmaṇe addhike ca, vanibbake yācanake dalidde;
อเนฺนน ปาเนน อภิตปฺปยาม, ตสฺมา หิ อมฺหํ ทหรา น มิยฺยเรฯ
Annena pānena abhitappayāma, tasmā hi amhaṃ daharā na miyyare.
๙๗.
97.
มยญฺจ ภริยํ นาติกฺกมาม, อเมฺห จ ภริยา นาติกฺกมนฺติ;
Mayañca bhariyaṃ nātikkamāma, amhe ca bhariyā nātikkamanti;
อญฺญตฺร ตาหิ พฺรหฺมจริยํ จราม, ตสฺมา หิ อมฺหํ ทหรา น มิยฺยเรฯ
Aññatra tāhi brahmacariyaṃ carāma, tasmā hi amhaṃ daharā na miyyare.
๙๘.
98.
ปาณาติปาตา วิรมาม สเพฺพ, โลเก อทินฺนํ ปริวชฺชยาม;
Pāṇātipātā viramāma sabbe, loke adinnaṃ parivajjayāma;
อมชฺชปา โนปิ มุสา ภณาม, ตสฺมา หิ อมฺหํ ทหรา น มิยฺยเรฯ
Amajjapā nopi musā bhaṇāma, tasmā hi amhaṃ daharā na miyyare.
๙๙.
99.
เอตาสุ เว ชายเร สุตฺตมาสุ, เมธาวิโน โหนฺติ ปหูตปญฺญา;
Etāsu ve jāyare suttamāsu, medhāvino honti pahūtapaññā;
พหุสฺสุตา เวทคุโน 5 จ โหนฺติ, ตสฺมา หิ อมฺหํ ทหรา น มิยฺยเรฯ
Bahussutā vedaguno 6 ca honti, tasmā hi amhaṃ daharā na miyyare.
๑๐๐.
100.
มาตา ปิตา จ 7 ภคินี ภาตโร จ, ปุตฺตา จ ทารา จ มยญฺจ สเพฺพ;
Mātā pitā ca 8 bhaginī bhātaro ca, puttā ca dārā ca mayañca sabbe;
ธมฺมํ จราม ปรโลกเหตุ, ตสฺมา หิ อมฺหํ ทหรา น มิยฺยเรฯ
Dhammaṃ carāma paralokahetu, tasmā hi amhaṃ daharā na miyyare.
๑๐๑.
101.
ทาสา จ ทาโสฺย 9 อนุชีวิโน จ, ปริจารกา กมฺมกรา จ สเพฺพ;
Dāsā ca dāsyo 10 anujīvino ca, paricārakā kammakarā ca sabbe;
ธมฺมํ จรนฺติ ปรโลกเหตุ, ตสฺมา หิ อมฺหํ ทหรา น มิยฺยเรฯ
Dhammaṃ caranti paralokahetu, tasmā hi amhaṃ daharā na miyyare.
๑๐๒.
102.
ธโมฺม หเว รกฺขติ ธมฺมจาริํ, ธโมฺม สุจิโณฺณ สุขมาวหาติ;
Dhammo have rakkhati dhammacāriṃ, dhammo suciṇṇo sukhamāvahāti;
เอสานิสํโส ธเมฺม สุจิเณฺณ, น ทุคฺคติํ คจฺฉติ ธมฺมจารีฯ
Esānisaṃso dhamme suciṇṇe, na duggatiṃ gacchati dhammacārī.
๑๐๓.
103.
ธโมฺม หเว รกฺขติ ธมฺมจาริํ, ฉตฺตํ มหนฺตํ วิย วสฺสกาเล;
Dhammo have rakkhati dhammacāriṃ, chattaṃ mahantaṃ viya vassakāle;
ธเมฺมน คุโตฺต มม ธมฺมปาโล, อญฺญสฺส อฎฺฐีนิ สุขี กุมาโรติฯ
Dhammena gutto mama dhammapālo, aññassa aṭṭhīni sukhī kumāroti.
มหาธมฺมปาลชาตกํ นวมํฯ
Mahādhammapālajātakaṃ navamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ชาตก-อฎฺฐกถา • Jātaka-aṭṭhakathā / [๔๔๗] ๙. มหาธมฺมปาลชาตกวณฺณนา • [447] 9. Mahādhammapālajātakavaṇṇanā
