| Library / Tipiṭaka / තිපිටක • Tipiṭaka / ජාතකපාළි • Jātakapāḷi |
415. කුම්මාසපිණ්ඩිජාතකං (7-2-10)
415. Kummāsapiṇḍijātakaṃ (7-2-10)
142.
142.
න කිරත්ථි අනොමදස්සිසු, පාරිචරියා බුද්ධෙසු අප්පිකා 1;
Na kiratthi anomadassisu, pāricariyā buddhesu appikā 2;
සුක්ඛාය අලොණිකාය ච, පස්සඵලං කුම්මාසපිණ්ඩියා.
Sukkhāya aloṇikāya ca, passaphalaṃ kummāsapiṇḍiyā.
143.
143.
හත්ථිගවස්සා චිමෙ බහූ 3, ධනධඤ්ඤං පථවී ච කෙවලා;
Hatthigavassā cime bahū 4, dhanadhaññaṃ pathavī ca kevalā;
නාරියො චිමා අච්ඡරූපමා, පස්සඵලං කුම්මාසපිණ්ඩියා.
Nāriyo cimā accharūpamā, passaphalaṃ kummāsapiṇḍiyā.
144.
144.
අභික්ඛණං රාජකුඤ්ජර, ගාථා භාසසි කොසලාධිප;
Abhikkhaṇaṃ rājakuñjara, gāthā bhāsasi kosalādhipa;
පුච්ඡාමි තං රට්ඨවඩ්ඪන, බාළ්හං පීතිමනො පභාසසි.
Pucchāmi taṃ raṭṭhavaḍḍhana, bāḷhaṃ pītimano pabhāsasi.
145.
145.
ඉමස්මිඤ්ඤෙව නගරෙ, කුලෙ අඤ්ඤතරෙ අහුං;
Imasmiññeva nagare, kule aññatare ahuṃ;
පරකම්මකරො ආසිං, භතකො සීලසංවුතො.
Parakammakaro āsiṃ, bhatako sīlasaṃvuto.
146.
146.
කම්මාය නික්ඛමන්තොහං, චතුරො සමණෙද්දසං;
Kammāya nikkhamantohaṃ, caturo samaṇeddasaṃ;
ආචාරසීලසම්පන්නෙ, සීතිභූතෙ අනාසවෙ.
Ācārasīlasampanne, sītibhūte anāsave.
147.
147.
තෙසු චිත්තං පසාදෙත්වා, නිසීදෙත්වා 5 පණ්ණසන්ථතෙ;
Tesu cittaṃ pasādetvā, nisīdetvā 6 paṇṇasanthate;
අදං බුද්ධාන කුම්මාසං, පසන්නො සෙහි පාණිභි.
Adaṃ buddhāna kummāsaṃ, pasanno sehi pāṇibhi.
148.
148.
තස්ස කම්මස්ස කුසලස්ස, ඉදං මෙ එදිසං ඵලං;
Tassa kammassa kusalassa, idaṃ me edisaṃ phalaṃ;
අනුභොමි ඉදං රජ්ජං, ඵීතං ධරණිමුත්තමං.
Anubhomi idaṃ rajjaṃ, phītaṃ dharaṇimuttamaṃ.
149.
149.
දදං භුඤ්ජ මා ච පමාදො 7, චක්කං වත්තය කොසලාධිප;
Dadaṃ bhuñja mā ca pamādo 8, cakkaṃ vattaya kosalādhipa;
මා රාජ අධම්මිකො අහු, ධම්මං පාලය කොසලාධිප.
Mā rāja adhammiko ahu, dhammaṃ pālaya kosalādhipa.
150.
150.
සොහං තදෙව පුනප්පුනං, වටුමං ආචරිස්සාමි සොභනෙ;
Sohaṃ tadeva punappunaṃ, vaṭumaṃ ācarissāmi sobhane;
අරියාචරිතං සුකොසලෙ, අරහන්තො මෙ මනාපාව පස්සිතුං.
Ariyācaritaṃ sukosale, arahanto me manāpāva passituṃ.
151.
151.
දෙවී විය අච්ඡරූපමා, මජ්ඣෙ නාරිගණස්ස සොභසි;
Devī viya accharūpamā, majjhe nārigaṇassa sobhasi;
කිං කම්මමකාසි භද්දකං, කෙනාසි වණ්ණවතී සුකොසලෙ.
Kiṃ kammamakāsi bhaddakaṃ, kenāsi vaṇṇavatī sukosale.
152.
152.
අම්බට්ඨකුලස්ස ඛත්තිය, දාස්යාහං පරපෙසියා අහුං;
Ambaṭṭhakulassa khattiya, dāsyāhaṃ parapesiyā ahuṃ;
සඤ්ඤතා ච 9 ධම්මජීවිනී, සීලවතී ච අපාපදස්සනා.
Saññatā ca 10 dhammajīvinī, sīlavatī ca apāpadassanā.
153.
153.
උද්ධටභත්තං අහං තදා, චරමානස්ස අදාසි භික්ඛුනො;
Uddhaṭabhattaṃ ahaṃ tadā, caramānassa adāsi bhikkhuno;
විත්තා සුමනා සයං අහං, තස්ස කම්මස්ස ඵලං මමෙදිසන්ති.
Vittā sumanā sayaṃ ahaṃ, tassa kammassa phalaṃ mamedisanti.
කුම්මාසපිණ්ඩිජාතකං දසමං.
Kummāsapiṇḍijātakaṃ dasamaṃ.
Footnotes:
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / ජාතක-අට්ඨකථා • Jātaka-aṭṭhakathā / [415] 10. කුම්මාසපිණ්ඩිජාතකවණ්ණනා • [415] 10. Kummāsapiṇḍijātakavaṇṇanā
