| Library / Tipiṭaka / तिपिटक • Tipiṭaka / थेरीगाथापाळि • Therīgāthāpāḷi |
१०. एकादसनिपातो
10. Ekādasanipāto
१. किसागोतमीथेरीगाथा
1. Kisāgotamītherīgāthā
२१३.
213.
‘‘कल्याणमित्तता मुनिना, लोकं आदिस्स वण्णिता।
‘‘Kalyāṇamittatā muninā, lokaṃ ādissa vaṇṇitā;
कल्याणमित्ते भजमानो, अपि बालो पण्डितो अस्स॥
Kalyāṇamitte bhajamāno, api bālo paṇḍito assa.
२१४.
214.
‘‘भजितब्बा सप्पुरिसा, पञ्ञा तथा वड्ढति भजन्तानं।
‘‘Bhajitabbā sappurisā, paññā tathā vaḍḍhati bhajantānaṃ;
भजमानो सप्पुरिसे, सब्बेहिपि दुक्खेहि पमुच्चेय्य॥
Bhajamāno sappurise, sabbehipi dukkhehi pamucceyya.
२१५.
215.
‘‘दुक्खञ्च विजानेय्य, दुक्खस्स च समुदयं निरोधं।
‘‘Dukkhañca vijāneyya, dukkhassa ca samudayaṃ nirodhaṃ;
अट्ठङ्गिकञ्च मग्गं, चत्तारिपि अरियसच्चानि॥
Aṭṭhaṅgikañca maggaṃ, cattāripi ariyasaccāni.
२१६.
216.
‘‘दुक्खो इत्थिभावो, अक्खातो पुरिसदम्मसारथिना।
‘‘Dukkho itthibhāvo, akkhāto purisadammasārathinā;
सपत्तिकम्पि हि दुक्खं, अप्पेकच्चा सकिं विजातायो॥
Sapattikampi hi dukkhaṃ, appekaccā sakiṃ vijātāyo.
२१७.
217.
‘‘गलके अपि कन्तन्ति, सुखुमालिनियो विसानि खादन्ति।
‘‘Galake api kantanti, sukhumāliniyo visāni khādanti;
जनमारकमज्झगता, उभोपि ब्यसनानि अनुभोन्ति॥
Janamārakamajjhagatā, ubhopi byasanāni anubhonti.
२१८.
218.
‘‘उपविजञ्ञा गच्छन्ती, अद्दसाहं पतिं मतं।
‘‘Upavijaññā gacchantī, addasāhaṃ patiṃ mataṃ;
पन्थम्हि विजायित्वान, अप्पत्ताव सकं घरं॥
Panthamhi vijāyitvāna, appattāva sakaṃ gharaṃ.
२१९.
219.
‘‘द्वे पुत्ता कालकता, पती च पन्थे मतो कपणिकाय।
‘‘Dve puttā kālakatā, patī ca panthe mato kapaṇikāya;
माता पिता च भाता, डय्हन्ति च एकचितकायं॥
Mātā pitā ca bhātā, ḍayhanti ca ekacitakāyaṃ.
२२०.
220.
‘‘खीणकुलीने कपणे, अनुभूतं ते दुखं अपरिमाणं।
‘‘Khīṇakulīne kapaṇe, anubhūtaṃ te dukhaṃ aparimāṇaṃ;
अस्सू च ते पवत्तं, बहूनि च जातिसहस्सानि॥
Assū ca te pavattaṃ, bahūni ca jātisahassāni.
२२१.
221.
‘‘वसिता सुसानमज्झे, अथोपि खादितानि पुत्तमंसानि।
‘‘Vasitā susānamajjhe, athopi khāditāni puttamaṃsāni;
हतकुलिका सब्बगरहिता, मतपतिका अमतमधिगच्छिं॥
Hatakulikā sabbagarahitā, matapatikā amatamadhigacchiṃ.
२२२.
222.
‘‘भावितो मे मग्गो, अरियो अट्ठङ्गिको अमतगामी।
‘‘Bhāvito me maggo, ariyo aṭṭhaṅgiko amatagāmī;
२२३.
223.
‘‘अहमम्हि कन्तसल्ला, ओहितभारा कतञ्हि करणीयं।
‘‘Ahamamhi kantasallā, ohitabhārā katañhi karaṇīyaṃ;
किसा गोतमी थेरी, विमुत्तचित्ता इमं भणी’’ति॥
Kisā gotamī therī, vimuttacittā imaṃ bhaṇī’’ti.
… किसा गोतमी थेरी…।
… Kisā gotamī therī….
एकादसनिपातो निट्ठितो।
Ekādasanipāto niṭṭhito.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / थेरीगाथा-अट्ठकथा • Therīgāthā-aṭṭhakathā / १. किसागोतमीथेरीगाथावण्णना • 1. Kisāgotamītherīgāthāvaṇṇanā
