| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༡༠. ཁནྡྷསུཏྟཾ
10. Khandhasuttaṃ
༣༡༡. སཱཝཏྠིནིདཱནཾ། ‘‘རཱུཔཾ, བྷིཀྑཝེ, ཨནིཙྩཾ ཝིཔརིཎཱམི ཨཉྙཐཱབྷཱཝི; ཝེདནཱ ཨནིཙྩཱ ཝིཔརིཎཱམཱི ཨཉྙཐཱབྷཱཝཱི; སཉྙཱ… སངྑཱརཱ ཨནིཙྩཱ ཝིཔརིཎཱམིནོ ཨཉྙཐཱབྷཱཝིནོ; ཝིཉྙཱཎཾ ཨནིཙྩཾ ཝིཔརིཎཱམི ཨཉྙཐཱབྷཱཝི ། ཡོ, བྷིཀྑཝེ, ཨིམེ དྷམྨེ ཨེཝཾ སདྡཧཏི ཨདྷིམུཙྩཏི, ཨཡཾ ཝུཙྩཏི སདྡྷཱནུསཱརཱི, ཨོཀྐནྟོ སམྨཏྟནིཡཱམཾ , སཔྤུརིསབྷཱུམིཾ ཨོཀྐནྟོ, ཝཱིཏིཝཏྟོ པུཐུཛྫནབྷཱུམིཾ; ཨབྷབྦོ ཏཾ ཀམྨཾ ཀཱཏུཾ, ཡཾ ཀམྨཾ ཀཏྭཱ ནིརཡཾ ཝཱ ཏིརཙྪཱནཡོནིཾ ཝཱ པེཏྟིཝིསཡཾ ཝཱ ཨུཔཔཛྫེཡྻ; ཨབྷབྦོ ཙ ཏཱཝ ཀཱལཾ ཀཱཏུཾ ཡཱཝ ན སོཏཱཔཏྟིཕལཾ སཙྪིཀརོཏི’’།
311. Sāvatthinidānaṃ. ‘‘Rūpaṃ, bhikkhave, aniccaṃ vipariṇāmi aññathābhāvi; vedanā aniccā vipariṇāmī aññathābhāvī; saññā… saṅkhārā aniccā vipariṇāmino aññathābhāvino; viññāṇaṃ aniccaṃ vipariṇāmi aññathābhāvi . Yo, bhikkhave, ime dhamme evaṃ saddahati adhimuccati, ayaṃ vuccati saddhānusārī, okkanto sammattaniyāmaṃ , sappurisabhūmiṃ okkanto, vītivatto puthujjanabhūmiṃ; abhabbo taṃ kammaṃ kātuṃ, yaṃ kammaṃ katvā nirayaṃ vā tiracchānayoniṃ vā pettivisayaṃ vā upapajjeyya; abhabbo ca tāva kālaṃ kātuṃ yāva na sotāpattiphalaṃ sacchikaroti’’.
‘‘ཡསྶ ཁོ, བྷིཀྑཝེ, ཨིམེ དྷམྨཱ ཨེཝཾ པཉྙཱཡ མཏྟསོ ནིཛ྄ཛྷཱནཾ ཁམནྟི, ཨཡཾ ཝུཙྩཏི – ‘དྷམྨཱནུསཱརཱི, ཨོཀྐནྟོ སམྨཏྟནིཡཱམཾ, སཔྤུརིསབྷཱུམིཾ ཨོཀྐནྟོ, ཝཱིཏིཝཏྟོ པུཐུཛྫནབྷཱུམིཾ; ཨབྷབྦོ ཏཾ ཀམྨཾ ཀཱཏུཾ, ཡཾ ཀམྨཾ ཀཏྭཱ ནིརཡཾ ཝཱ ཏིརཙྪཱནཡོནིཾ ཝཱ པེཏྟིཝིསཡཾ ཝཱ ཨུཔཔཛྫེཡྻ; ཨབྷབྦོ ཙ ཏཱཝ ཀཱལཾ ཀཱཏུཾ ཡཱཝ ན སོཏཱཔཏྟིཕལཾ སཙྪིཀརོཏི’། ཡོ, བྷིཀྑཝེ, ཨིམེ དྷམྨེ ཨེཝཾ པཛཱནཱཏི ཨེཝཾ པསྶཏི, ཨཡཾ ཝུཙྩཏི – ‘སོཏཱཔནྣོ ཨཝིནིཔཱཏདྷམྨོ ནིཡཏོ སམྦོདྷིཔརཱཡནོ’’’ཏི། དསམཾ།
‘‘Yassa kho, bhikkhave, ime dhammā evaṃ paññāya mattaso nijjhānaṃ khamanti, ayaṃ vuccati – ‘dhammānusārī, okkanto sammattaniyāmaṃ, sappurisabhūmiṃ okkanto, vītivatto puthujjanabhūmiṃ; abhabbo taṃ kammaṃ kātuṃ, yaṃ kammaṃ katvā nirayaṃ vā tiracchānayoniṃ vā pettivisayaṃ vā upapajjeyya; abhabbo ca tāva kālaṃ kātuṃ yāva na sotāpattiphalaṃ sacchikaroti’. Yo, bhikkhave, ime dhamme evaṃ pajānāti evaṃ passati, ayaṃ vuccati – ‘sotāpanno avinipātadhammo niyato sambodhiparāyano’’’ti. Dasamaṃ.
ཏསྶུདྡཱནཾ –
Tassuddānaṃ –
ཙཀྑུ རཱུཔཉྩ ཝིཉྙཱཎཾ, ཕསྶོ ཙ ཝེདནཱཡ ཙ།
Cakkhu rūpañca viññāṇaṃ, phasso ca vedanāya ca;
སཉྙཱ ཙ ཙེཏནཱ ཏཎྷཱ, དྷཱཏུ ཁནྡྷེན ཏེ དསཱཏི༎
Saññā ca cetanā taṇhā, dhātu khandhena te dasāti.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡-༡༠. ཙཀྑུསུཏྟཱདིཝཎྞནཱ • 1-10. Cakkhusuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡-༡༠. ཙཀྑུསུཏྟཱདིཝཎྞནཱ • 1-10. Cakkhusuttādivaṇṇanā
