| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೧೦. ಕಠಿನತಪನಪಞ್ಹೋ
10. Kaṭhinatapanapañho
೧೦. ‘‘ಭನ್ತೇ ನಾಗಸೇನ, ಕಿಸ್ಸ ಹೇಮನ್ತೇ ಸೂರಿಯೋ ಕಠಿನಂ ತಪತಿ, ನೋ ತಥಾ ಗಿಮ್ಹೇ’’ತಿ? ‘‘ಗಿಮ್ಹೇ, ಮಹಾರಾಜ, ಅನುಪಹತಂ ಹೋತಿ ರಜೋಜಲ್ಲಂ, ವಾತಕ್ಖುಭಿತಾ ರೇಣೂ ಗಗನಾನುಗತಾ ಹೋನ್ತಿ, ಆಕಾಸೇಪಿ ಅಬ್ಭಾ ಸುಬಹಲಾ ಹೋನ್ತಿ, ಮಹಾವಾತೋ ಚ ಅಧಿಮತ್ತಂ ವಾಯತಿ, ತೇ ಸಬ್ಬೇ ನಾನಾಕುಲಾ ಸಮಾಯುತಾ ಸೂರಿಯರಂಸಿಯೋ ಪಿದಹನ್ತಿ, ತೇನ ಗಿಮ್ಹೇ ಸೂರಿಯೋ ಮನ್ದಂ ತಪತಿ।
10. ‘‘Bhante nāgasena, kissa hemante sūriyo kaṭhinaṃ tapati, no tathā gimhe’’ti? ‘‘Gimhe, mahārāja, anupahataṃ hoti rajojallaṃ, vātakkhubhitā reṇū gaganānugatā honti, ākāsepi abbhā subahalā honti, mahāvāto ca adhimattaṃ vāyati, te sabbe nānākulā samāyutā sūriyaraṃsiyo pidahanti, tena gimhe sūriyo mandaṃ tapati.
‘‘ಹೇಮನ್ತೇ ಪನ, ಮಹಾರಾಜ, ಹೇಟ್ಠಾ ಪಥವೀ ನಿಬ್ಬುತಾ ಹೋತಿ, ಉಪರಿ ಮಹಾಮೇಘೋ ಉಪಟ್ಠಿತೋ ಹೋತಿ, ಉಪಸನ್ತಂ ಹೋತಿ ರಜೋಜಲ್ಲಂ, ರೇಣು ಚ ಸನ್ತಸನ್ತಂ ಗಗನೇ ಚರತಿ, ವಿಗತವಲಾಹಕೋ ಚ ಹೋತಿ ಆಕಾಸೋ, ವಾತೋ ಚ ಮನ್ದಮನ್ದಂ ವಾಯತಿ, ಏತೇಸಂ ಉಪರತಿಯಾ ವಿಸುದ್ಧಾ 1 ಹೋನ್ತಿ ಸೂರಿಯರಂಸಿಯೋ, ಉಪಘಾತವಿಮುತ್ತಸ್ಸ ಸೂರಿಯಸ್ಸ ತಾಪೋ ಅತಿ ವಿಯ ತಪತಿ। ಇದಮೇತ್ಥ, ಮಹಾರಾಜ, ಕಾರಣಂ, ಯೇನ ಕಾರಣೇನ ಸೂರಿಯೋ ಹೇಮನ್ತೇ ಕಠಿನಂ ತಪತಿ, ನೋ ತಥಾ ಗಿಮ್ಹೇ’’ತಿ। ‘‘ಸಬ್ಬೀತಿಮುತ್ತೋ, ಭನ್ತೇ, ಸೂರಿಯೋ ಕಠಿನಂ ತಪತಿ, ಮೇಘಾದಿಸಹಗತೋ ಕಠಿನಂ ನ ತಪತೀ’’ತಿ।
‘‘Hemante pana, mahārāja, heṭṭhā pathavī nibbutā hoti, upari mahāmegho upaṭṭhito hoti, upasantaṃ hoti rajojallaṃ, reṇu ca santasantaṃ gagane carati, vigatavalāhako ca hoti ākāso, vāto ca mandamandaṃ vāyati, etesaṃ uparatiyā visuddhā 2 honti sūriyaraṃsiyo, upaghātavimuttassa sūriyassa tāpo ati viya tapati. Idamettha, mahārāja, kāraṇaṃ, yena kāraṇena sūriyo hemante kaṭhinaṃ tapati, no tathā gimhe’’ti. ‘‘Sabbītimutto, bhante, sūriyo kaṭhinaṃ tapati, meghādisahagato kaṭhinaṃ na tapatī’’ti.
ಕಠಿನತಪನಪಞ್ಹೋ ದಸಮೋ।
Kaṭhinatapanapañho dasamo.
ನಿಪ್ಪಪಞ್ಚವಗ್ಗೋ ದುತಿಯೋ।
Nippapañcavaggo dutiyo.
ಇಮಸ್ಮಿಂ ವಗ್ಗೇ ದಸ ಪಞ್ಹಾ।
Imasmiṃ vagge dasa pañhā.
Footnotes:
