| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೬. ಕಾಮದಸುತ್ತಂ
6. Kāmadasuttaṃ
೮೭. ಸಾವತ್ಥಿನಿದಾನಂ । ಏಕಮನ್ತಂ ಠಿತೋ ಖೋ ಕಾಮದೋ ದೇವಪುತ್ತೋ ಭಗವನ್ತಂ ಏತದವೋಚ – ‘‘ದುಕ್ಕರಂ ಭಗವಾ, ಸುದುಕ್ಕರಂ ಭಗವಾ’’ತಿ।
87. Sāvatthinidānaṃ . Ekamantaṃ ṭhito kho kāmado devaputto bhagavantaṃ etadavoca – ‘‘dukkaraṃ bhagavā, sudukkaraṃ bhagavā’’ti.
‘‘ದುಕ್ಕರಂ ವಾಪಿ ಕರೋನ್ತಿ (ಕಾಮದಾತಿ ಭಗವಾ),
‘‘Dukkaraṃ vāpi karonti (kāmadāti bhagavā),
ಸೇಖಾ ಸೀಲಸಮಾಹಿತಾ।
Sekhā sīlasamāhitā;
ಠಿತತ್ತಾ ಅನಗಾರಿಯುಪೇತಸ್ಸ,
Ṭhitattā anagāriyupetassa,
ತುಟ್ಠಿ ಹೋತಿ ಸುಖಾವಹಾ’’ತಿ॥
Tuṭṭhi hoti sukhāvahā’’ti.
‘‘ದುಲ್ಲಭಾ ಭಗವಾ ಯದಿದಂ ತುಟ್ಠೀ’’ತಿ।
‘‘Dullabhā bhagavā yadidaṃ tuṭṭhī’’ti.
‘‘ದುಲ್ಲಭಂ ವಾಪಿ ಲಭನ್ತ್ನ್ತ್ತಿ (ಕಾಮದಾತಿ ಭಗವಾ),
‘‘Dullabhaṃ vāpi labhantntti (kāmadāti bhagavā),
ಚಿತ್ತವೂಪಸಮೇ ರತಾ।
Cittavūpasame ratā;
ಯೇಸಂ ದಿವಾ ಚ ರತ್ತೋ ಚ,
Yesaṃ divā ca ratto ca,
ಭಾವನಾಯ ರತೋ ಮನೋ’’ತಿ॥
Bhāvanāya rato mano’’ti.
‘‘ದುಸ್ಸಮಾದಹಂ ಭಗವಾ ಯದಿದಂ ಚಿತ್ತ’’ನ್ತಿ।
‘‘Dussamādahaṃ bhagavā yadidaṃ citta’’nti.
‘‘ದುಸ್ಸಮಾದಹಂ ವಾಪಿ ಸಮಾದಹನ್ತ್ನ್ತ್ತಿ (ಕಾಮದಾತಿ ಭಗವಾ),
‘‘Dussamādahaṃ vāpi samādahantntti (kāmadāti bhagavā),
ಇನ್ದ್ರಿಯೂಪಸಮೇ ರತಾ।
Indriyūpasame ratā;
ತೇ ಛೇತ್ವಾ ಮಚ್ಚುನೋ ಜಾಲಂ,
Te chetvā maccuno jālaṃ,
ಅರಿಯಾ ಗಚ್ಛನ್ತಿ ಕಾಮದಾ’’ತಿ॥
Ariyā gacchanti kāmadā’’ti.
‘‘ದುಗ್ಗಮೋ ಭಗವಾ ವಿಸಮೋ ಮಗ್ಗೋ’’ತಿ।
‘‘Duggamo bhagavā visamo maggo’’ti.
‘‘ದುಗ್ಗಮೇ ವಿಸಮೇ ವಾಪಿ, ಅರಿಯಾ ಗಚ್ಛನ್ತಿ ಕಾಮದ।
‘‘Duggame visame vāpi, ariyā gacchanti kāmada;
ಅನರಿಯಾ ವಿಸಮೇ ಮಗ್ಗೇ, ಪಪತನ್ತಿ ಅವಂಸಿರಾ।
Anariyā visame magge, papatanti avaṃsirā;
ಅರಿಯಾನಂ ಸಮೋ ಮಗ್ಗೋ, ಅರಿಯಾ ಹಿ ವಿಸಮೇ ಸಮಾ’’ತಿ॥
Ariyānaṃ samo maggo, ariyā hi visame samā’’ti.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೬. ಕಾಮದಸುತ್ತವಣ್ಣನಾ • 6. Kāmadasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೬. ಕಾಮದಸುತ್ತವಣ್ಣನಾ • 6. Kāmadasuttavaṇṇanā
