| Library / Tipiṭaka / තිපිටක • Tipiṭaka / සුත්තනිපාතපාළි • Suttanipātapāḷi |
2. ගුහට්ඨකසුත්තං
2. Guhaṭṭhakasuttaṃ
778.
778.
සත්තො ගුහායං බහුනාභිඡන්නො, තිට්ඨං නරො මොහනස්මිං පගාළ්හො;
Satto guhāyaṃ bahunābhichanno, tiṭṭhaṃ naro mohanasmiṃ pagāḷho;
දූරෙ විවෙකා හි තථාවිධො සො, කාමා හි ලොකෙ න හි සුප්පහායා.
Dūre vivekā hi tathāvidho so, kāmā hi loke na hi suppahāyā.
779.
779.
ඉච්ඡානිදානා භවසාතබද්ධා, තෙ දුප්පමුඤ්චා න හි අඤ්ඤමොක්ඛා;
Icchānidānā bhavasātabaddhā, te duppamuñcā na hi aññamokkhā;
පච්ඡා පුරෙ වාපි අපෙක්ඛමානා, ඉමෙව කාමෙ පුරිමෙව ජප්පං.
Pacchā pure vāpi apekkhamānā, imeva kāme purimeva jappaṃ.
780.
780.
කාමෙසු ගිද්ධා පසුතා පමූළ්හා, අවදානියා තෙ විසමෙ නිවිට්ඨා;
Kāmesu giddhā pasutā pamūḷhā, avadāniyā te visame niviṭṭhā;
දුක්ඛූපනීතා පරිදෙවයන්ති, කිංසූ භවිස්සාම ඉතො චුතාසෙ.
Dukkhūpanītā paridevayanti, kiṃsū bhavissāma ito cutāse.
781.
781.
තස්මා හි සික්ඛෙථ ඉධෙව ජන්තු, යං කිඤ්චි ජඤ්ඤා විසමන්ති ලොකෙ;
Tasmā hi sikkhetha idheva jantu, yaṃ kiñci jaññā visamanti loke;
න තස්ස හෙතූ විසමං චරෙය්ය, අප්පඤ්හිදං ජීවිතමාහු ධීරා.
Na tassa hetū visamaṃ careyya, appañhidaṃ jīvitamāhu dhīrā.
782.
782.
පස්සාමි ලොකෙ පරිඵන්දමානං, පජං ඉමං තණ්හගතං භවෙසු;
Passāmi loke pariphandamānaṃ, pajaṃ imaṃ taṇhagataṃ bhavesu;
හීනා නරා මච්චුමුඛෙ ලපන්ති, අවීතතණ්හාසෙ භවාභවෙසු.
Hīnā narā maccumukhe lapanti, avītataṇhāse bhavābhavesu.
783.
783.
මමායිතෙ පස්සථ ඵන්දමානෙ, මච්ඡෙව අප්පොදකෙ ඛීණසොතෙ;
Mamāyite passatha phandamāne, maccheva appodake khīṇasote;
එතම්පි දිස්වා අමමො චරෙය්ය, භවෙසු ආසත්තිමකුබ්බමානො.
Etampi disvā amamo careyya, bhavesu āsattimakubbamāno.
784.
784.
උභොසු අන්තෙසු විනෙය්ය ඡන්දං, ඵස්සං පරිඤ්ඤාය අනානුගිද්ධො;
Ubhosu antesu vineyya chandaṃ, phassaṃ pariññāya anānugiddho;
යදත්තගරහී තදකුබ්බමානො, න ලිප්පතී 1 දිට්ඨසුතෙසු ධීරො.
Yadattagarahī tadakubbamāno, na lippatī 2 diṭṭhasutesu dhīro.
785.
785.
සඤ්ඤං පරිඤ්ඤා විතරෙය්ය ඔඝං, පරිග්ගහෙසු මුනි නොපලිත්තො;
Saññaṃ pariññā vitareyya oghaṃ, pariggahesu muni nopalitto;
අබ්බූළ්හසල්ලො චරමප්පමත්තො, නාසීසතී 3 ලොකමිමං පරඤ්චාති.
Abbūḷhasallo caramappamatto, nāsīsatī 4 lokamimaṃ parañcāti.
ගුහට්ඨකසුත්තං දුතියං නිට්ඨිතං.
Guhaṭṭhakasuttaṃ dutiyaṃ niṭṭhitaṃ.
Footnotes:
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / සුත්තනිපාත-අට්ඨකථා • Suttanipāta-aṭṭhakathā / 2. ගුහට්ඨකසුත්තවණ්ණනා • 2. Guhaṭṭhakasuttavaṇṇanā
