| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
ឯកុត្តរិកនយោ ទសកវារវណ្ណនា
Ekuttarikanayo dasakavāravaṇṇanā
៣៣០. ទសកេសុ អដ្ឋានេ វា បនាតិ អការណេ វា បន។ តត្ថាតិ នវកេសុ។ ‘‘នត្ថិ ទិន្នន្តិអាទិវសេនា’’តិ អាទិសទ្ទេន ‘‘នត្ថិ យិដ្ឋំ នត្ថិ ហុត’’ន្តិអាទយោ (ធ. ស. ១២២១; ម. និ. ៩៤.២២៥; ៣.៩១, ១១៦; សំ. និ. ៣.២១០; អ. និ. ១០.១៧៦) នវ នត្ថិកា សង្គហេតព្ពា។ ‘‘សស្សតោ លោកោតិ អាទិវសេនា’’តិអាទិសទ្ទេន (ទី. និ. ១.៣១; ម. និ. ១.២៦៩) ‘‘អសស្សតោ លោកោ’’តិអាទយោ (ម. និ. ១.២៦៩) នវ អន្តគ្គាហិកេ សង្គណ្ហាតិ។ វិបរីតា សម្មត្តាតិ ទសហិ មិច្ឆត្តេហិ វិបរីតា ទស សម្មត្តា សម្មាទិដ្ឋិ សម្មាសង្កប្បោ សម្មាវាចា សម្មាកម្មន្តោ សម្មាអាជីវោ សម្មាវាយាមោ សម្មាសតិ សម្មាសមាធិ សម្មាញាណំ សម្មាវិមុត្តីតិ។
330. Dasakesu aṭṭhāne vā panāti akāraṇe vā pana. Tatthāti navakesu. ‘‘Natthi dinnantiādivasenā’’ti ādisaddena ‘‘natthi yiṭṭhaṃ natthi huta’’ntiādayo (dha. sa. 1221; ma. ni. 94.225; 3.91, 116; saṃ. ni. 3.210; a. ni. 10.176) nava natthikā saṅgahetabbā. ‘‘Sassato lokoti ādivasenā’’tiādisaddena (dī. ni. 1.31; ma. ni. 1.269) ‘‘asassato loko’’tiādayo (ma. ni. 1.269) nava antaggāhike saṅgaṇhāti. Viparītā sammattāti dasahi micchattehi viparītā dasa sammattā sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi sammāñāṇaṃ sammāvimuttīti.
ទស អាទីនវា និទ្ទិដ្ឋាតិ សម្ពន្ធោ។ ឧន្ទូរក្ខាយិតន្តិ មូសិកេន ខាទិតំ។ ឯត្ថ ហិ ខេធាតុ ខាទនត្ថោ ហោតិ។ អគ្គិទឌ្ឍន្តិ អគ្គិនា ទឌ្ឍំ។ ឯតេសូតិ ឯតេសុ ទសសុ បំសុកូលេសុ។ ឧទកសាដិកំ វា សំកច្ចិកំ វាតិ ភិក្ខុនីនំ ឧទកសាដិកំ វា សំកច្ចិកំ វា។ ឯត្ថ វាសទ្ទោ អនិយមវិកប្បត្ថោ។
Dasa ādīnavā niddiṭṭhāti sambandho. Undūrakkhāyitanti mūsikena khāditaṃ. Ettha hi khedhātu khādanattho hoti. Aggidaḍḍhanti agginā daḍḍhaṃ. Etesūti etesu dasasu paṃsukūlesu. Udakasāṭikaṃ vā saṃkaccikaṃ vāti bhikkhunīnaṃ udakasāṭikaṃ vā saṃkaccikaṃ vā. Ettha vāsaddo aniyamavikappattho.
បណ្ណសន្ថារោ តិណសន្ថារេន សង្គហិតោ។ សព្ពត្ថាតិ សព្ពេសុ ទសកេសុ។
Paṇṇasanthāro tiṇasanthārena saṅgahito. Sabbatthāti sabbesu dasakesu.
ឥតិ ទសកវារវណ្ណនាយ យោជនា សមត្តា។
Iti dasakavāravaṇṇanāya yojanā samattā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / បរិវារបាឡិ • Parivārapāḷi / ១០. ទសកវារោ • 10. Dasakavāro
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā / ទសកវារវណ្ណនា • Dasakavāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ទសកវារវណ្ណនា • Dasakavāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ទសកវារវណ្ណនា • Dasakavāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ឆក្កវារាទិវណ្ណនា • Chakkavārādivaṇṇanā
