| Library / Tipiṭaka / តិបិដក • Tipiṭaka / ឧទានបាឡិ • Udānapāḷi |
១០. ទុតិយទព្ពសុត្តំ
10. Dutiyadabbasuttaṃ
៨០. ឯវំ មេ សុតំ – ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តត្រ ខោ ភគវា ភិក្ខូ អាមន្តេសិ – ‘‘ភិក្ខវោ’’តិ។ ‘‘ភទន្តេ’’តិ តេ ភិក្ខូ ភគវតោ បច្ចស្សោសុំ។ ភគវា ឯតទវោច –
80. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ទព្ពស្ស, ភិក្ខវេ, មល្លបុត្តស្ស វេហាសំ អព្ភុគ្គន្ត្វា អាកាសេ អន្តលិក្ខេ បល្លង្កេន និសីទិត្វា តេជោធាតុំ សមាបជ្ជិត្វា វុដ្ឋហិត្វា បរិនិព្ពុតស្ស សរីរស្ស ឈាយមានស្ស ឌយ្ហមានស្ស នេវ ឆារិកា បញ្ញាយិត្ថ ន មសិ។ សេយ្យថាបិ នាម សប្បិស្ស វា តេលស្ស វា ឈាយមានស្ស ឌយ្ហមានស្ស នេវ ឆារិកា បញ្ញាយតិ ន មសិ; ឯវមេវ ខោ, ភិក្ខវេ, ទព្ពស្ស មល្លបុត្តស្ស វេហាសំ អព្ភុគ្គន្ត្វា អាកាសេ អន្តលិក្ខេ បល្លង្កេន និសីទិត្វា តេជោធាតុំ សមាបជ្ជិត្វា វុដ្ឋហិត្វា បរិនិព្ពុតស្ស សរីរស្ស ឈាយមានស្ស ឌយ្ហមានស្ស នេវ ឆារិកា បញ្ញាយិត្ថ ន មសី’’តិ។
‘‘Dabbassa, bhikkhave, mallaputtassa vehāsaṃ abbhuggantvā ākāse antalikkhe pallaṅkena nisīditvā tejodhātuṃ samāpajjitvā vuṭṭhahitvā parinibbutassa sarīrassa jhāyamānassa ḍayhamānassa neva chārikā paññāyittha na masi. Seyyathāpi nāma sappissa vā telassa vā jhāyamānassa ḍayhamānassa neva chārikā paññāyati na masi; evameva kho, bhikkhave, dabbassa mallaputtassa vehāsaṃ abbhuggantvā ākāse antalikkhe pallaṅkena nisīditvā tejodhātuṃ samāpajjitvā vuṭṭhahitvā parinibbutassa sarīrassa jhāyamānassa ḍayhamānassa neva chārikā paññāyittha na masī’’ti.
អថ ខោ ភគវា ឯតមត្ថំ វិទិត្វា តាយំ វេលាយំ ឥមំ ឧទានំ ឧទានេសិ –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
អនុបុព្ពូបសន្តស្ស, យថា ន ញាយតេ គតិ។
Anupubbūpasantassa, yathā na ñāyate gati.
ឯវំ សម្មាវិមុត្តានំ, កាមពន្ធោឃតារិនំ;
Evaṃ sammāvimuttānaṃ, kāmabandhoghatārinaṃ;
បញ្ញាបេតុំ គតិ នត្ថិ, បត្តានំ អចលំ សុខ’’ន្តិ។ ទសមំ;
Paññāpetuṃ gati natthi, pattānaṃ acalaṃ sukha’’nti. dasamaṃ;
តស្សុទ្ទានំ –
Tassuddānaṃ –
និព្ពានា ចតុរោ វុត្តា, ចុន្ទោ បាដលិគាមិយា;
Nibbānā caturo vuttā, cundo pāṭaligāmiyā;
ទ្វិធាបថោ វិសាខា ច, ទព្ពេន សហ តេ ទសាតិ។
Dvidhāpatho visākhā ca, dabbena saha te dasāti.
ឧទានេ វគ្គានមុទ្ទានំ –
Udāne vaggānamuddānaṃ –
វគ្គមិទំ បឋមំ វរពោធិ, វគ្គមិទំ ទុតិយំ មុចលិន្ទោ;
Vaggamidaṃ paṭhamaṃ varabodhi, vaggamidaṃ dutiyaṃ mucalindo;
នន្ទកវគ្គវរោ តតិយោ តុ, មេឃិយវគ្គវរោ ច ចតុត្ថោ។
Nandakavaggavaro tatiyo tu, meghiyavaggavaro ca catuttho.
បញ្ចមវគ្គវរន្តិធ សោណោ, ឆដ្ឋមវគ្គវរន្តិ ជច្ចន្ធោ 5;
Pañcamavaggavarantidha soṇo, chaṭṭhamavaggavaranti jaccandho 6;
សត្តមវគ្គវរន្តិ ច ចូឡោ, បាដលិគាមិយមដ្ឋមវគ្គោ 7។
Sattamavaggavaranti ca cūḷo, pāṭaligāmiyamaṭṭhamavaggo 8.
អសីតិមនូនកសុត្តវរំ, វគ្គមិទដ្ឋកំ សុវិភត្តំ;
Asītimanūnakasuttavaraṃ, vaggamidaṭṭhakaṃ suvibhattaṃ;
ទស្សិតំ ចក្ខុមតា វិមលេន, អទ្ធា ហិ តំ ឧទានមិតីទមាហុ 9។
Dassitaṃ cakkhumatā vimalena, addhā hi taṃ udānamitīdamāhu 10.
ឧទានបាឡិ និដ្ឋិតា។
Udānapāḷi niṭṭhitā.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឧទាន-អដ្ឋកថា • Udāna-aṭṭhakathā / ១០. ទុតិយទព្ពសុត្តវណ្ណនា • 10. Dutiyadabbasuttavaṇṇanā
