| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
༢. དུཏིཡཨནིཡཏསིཀྑཱཔདཝཎྞནཱ
2. Dutiyaaniyatasikkhāpadavaṇṇanā
ནཧེཝ ཁོ པན པཊིཙྪནྣནྟི ཨེཏྠ པན ཡམྤི བཧི པརིཀྑིཏྟཾ ཨནྟོ ཝིཝཊཾ པརིཝེཎངྒཎཱདི, ཏམྤི ཨནྟོགདྷནྟི ཝེདིཏབྦཾ། ‘‘ཨེཝརཱུཔཉྷི ཋཱནཾ ཨཔྤཊིཙྪནྣེཡེཝ གཧིཏ’’ནྟི མཧཱཔཙྩརིཡཾ (པཱརཱ॰ ཨཊྛ॰ ༢.༤༥༣) ཝུཏྟཾ། སངྒྷཱདིསེསེན ཝཱཏི ཀཱཡསཾསགྒདུཊྛུལློབྷཱསནསངྑཱཏེན སངྒྷཱདིསེསེན ཝཱ། ཏེནེཝ ཧི པདབྷཱཛནེ ‘‘སཱ ཙེ ཨེཝཾ ཝདེཡྻ ‘ཨཡྻོ, མཡཱ དིཊྛོ ནིསིནྣོ མཱཏུགཱམེན སདྡྷིཾ ཀཱཡསཾསགྒཾ སམཱཔཛྫནྟོ’’’ཏིཨཱདི (པཱརཱ॰ ༤༥༥) ཝུཏྟཾ། ཨིདཾ སིཀྑཱཔདཾ དུཊྛུལླཝཱཙཱཝསེན ཨཱགཏཾ། དུཊྛུལླཝཱཙཉྩ སུཏྭཱ ཏཾ མཱཏུགཱམོཔི ན པཊིཙྪཱདེཏི། ཏཐཱ ཧི དུཊྛུལླཝཱཙཱསིཀྑཱཔདེ (པཱརཱ॰ ༢༨༣ ཨཱདཡོ) ཡཱ པན ཏཱ ཨིཏྠིཡོ ཧིརིམནཱ, ཏཱ ནིཀྑམིཏྭཱ བྷིཀྑཱུ ཨུཛ྄ཛྷཱཔེསུཾ, ཏསྨཱ ཨིདྷ ཨིཏྠཱིཔི ཨནཱཔཏྟིཾ ཀརོཏཱིཏི ཨཱཧ ‘‘ཨིཏྠཱིཔཱི’’ཏི། ཨཐ ཝཱ ཨིདྷ ཨཔྤཊིཙྪནྣཏྟཱ ཨིཏྠཱིཔི ཨནཱཔཏྟིཾ ཀརོཏི, པཋམེ པན པཊིཙྪནྣཏྟཱ ཨིཏྠིསཏམྤི ཨནཱཔཏྟིཾ ན ཀརོཏཱིཏི ཨེཝམེཏྠ ཨཏྠོ དཊྛབྦོ། ཨནནྡྷོ ཨབདྷིརོཏི ཨེཏྠ ཀཱཡསཾསགྒཝསེན ཨནནྡྷོ ཝུཏྟོ, དུཊྛུལླཝཱཙཱཝསེན ཨབདྷིརོ།
Naheva kho pana paṭicchannanti ettha pana yampi bahi parikkhittaṃ anto vivaṭaṃ pariveṇaṅgaṇādi, tampi antogadhanti veditabbaṃ. ‘‘Evarūpañhi ṭhānaṃ appaṭicchanneyeva gahita’’nti mahāpaccariyaṃ (pārā. aṭṭha. 2.453) vuttaṃ. Saṅghādisesena vāti kāyasaṃsaggaduṭṭhullobhāsanasaṅkhātena saṅghādisesena vā. Teneva hi padabhājane ‘‘sā ce evaṃ vadeyya ‘ayyo, mayā diṭṭho nisinno mātugāmena saddhiṃ kāyasaṃsaggaṃ samāpajjanto’’’tiādi (pārā. 455) vuttaṃ. Idaṃ sikkhāpadaṃ duṭṭhullavācāvasena āgataṃ. Duṭṭhullavācañca sutvā taṃ mātugāmopi na paṭicchādeti. Tathā hi duṭṭhullavācāsikkhāpade (pārā. 283 ādayo) yā pana tā itthiyo hirimanā, tā nikkhamitvā bhikkhū ujjhāpesuṃ, tasmā idha itthīpi anāpattiṃ karotīti āha ‘‘itthīpī’’ti. Atha vā idha appaṭicchannattā itthīpi anāpattiṃ karoti, paṭhame pana paṭicchannattā itthisatampi anāpattiṃ na karotīti evamettha attho daṭṭhabbo. Anandho abadhiroti ettha kāyasaṃsaggavasena anandho vutto, duṭṭhullavācāvasena abadhiro.
སམུཊྛཱནཱདཱིསུ ཨིདཾ སིཀྑཱཔདཾ ཏིསམུཊྛཱནཾ – ཀཱཡཙིཏྟཏོ ཝཱཙཱཙིཏྟཏོ ཀཱཡཝཱཙཱཙིཏྟཏོ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, སུཁམཛ྄ཛྷཏྟཝེདནཱཧི དྭིཝེདནཾ། ཏེནཱཧ ‘‘སམུཊྛཱནཱདཱིནི པནེཏྠ ཨདིནྣཱདཱནསདིསཱནེཝཱ’’ཏི། ཨེཏྠ ཙ ཀཱཡསཾསགྒཾ སམཱཔཛྫནྟོ དུཊྛུལླམྤི བྷཎཏི, དུཊྛུལླཾ བྷཎནྟོ ནིསཱིདཏི ཙཱཏི ‘‘ཀཱཡཝཱཙཱཙིཏྟཏོ ཙ སམུཊྛཱཏཱི’’ཏི ཝུཏྟཾ, དུཊྛུལླམེཝ ཝཱ སནྡྷཱཡ ཝུཏྟནྟི གཧེཏབྦཾ།
Samuṭṭhānādīsu idaṃ sikkhāpadaṃ tisamuṭṭhānaṃ – kāyacittato vācācittato kāyavācācittato samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, sukhamajjhattavedanāhi dvivedanaṃ. Tenāha ‘‘samuṭṭhānādīni panettha adinnādānasadisānevā’’ti. Ettha ca kāyasaṃsaggaṃ samāpajjanto duṭṭhullampi bhaṇati, duṭṭhullaṃ bhaṇanto nisīdati cāti ‘‘kāyavācācittato ca samuṭṭhātī’’ti vuttaṃ, duṭṭhullameva vā sandhāya vuttanti gahetabbaṃ.
དུཏིཡཨནིཡཏསིཀྑཱཔདཝཎྞནཱ ནིཊྛིཏཱ།
Dutiyaaniyatasikkhāpadavaṇṇanā niṭṭhitā.
‘‘ཨནིཡཏུདྡེསོ ཙཱཡཾ དིཊྛཱདིསམཱུལཀཙོདནཱཡ ཝཏྠུཾ པཊིཛཱནམཱནོཝ ཨཱཔཏྟིཡཱ ཀཱརེཏབྦོ, ན ཨིཏརོཏི ཨཱཔཏྟིརོཔནཱརོཔནལཀྑཎདསྶནཏྠཾ ཝུཏྟོ’’ཏི ཝདནྟི།
‘‘Aniyatuddeso cāyaṃ diṭṭhādisamūlakacodanāya vatthuṃ paṭijānamānova āpattiyā kāretabbo, na itaroti āpattiropanāropanalakkhaṇadassanatthaṃ vutto’’ti vadanti.
ཨིཏི ཀངྑཱཝིཏརཎིཡཱ པཱཏིམོཀྑཝཎྞནཱཡ
Iti kaṅkhāvitaraṇiyā pātimokkhavaṇṇanāya
ཝིནཡཏྠམཉྫཱུསཱཡཾ ལཱིནཏྠཔྤཀཱསནིཡཾ
Vinayatthamañjūsāyaṃ līnatthappakāsaniyaṃ
ཨནིཡཏཝཎྞནཱ ནིཊྛིཏཱ།
Aniyatavaṇṇanā niṭṭhitā.
