| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೮. ದುಸ್ಸೀಲಪಞ್ಹೋ
8. Dussīlapañho
೮. ‘‘ಭನ್ತೇ ನಾಗಸೇನ, ಗಿಹಿದುಸ್ಸೀಲಸ್ಸ ಚ ಸಮಣದುಸ್ಸೀಲಸ್ಸ ಚ ಕೋ ವಿಸೇಸೋ, ಕಿಂ ನಾನಾಕರಣಂ, ಉಭೋಪೇತೇ ಸಮಸಮಗತಿಕಾ, ಉಭಿನ್ನಮ್ಪಿ ಸಮಸಮೋ ವಿಪಾಕೋ ಹೋತಿ, ಉದಾಹು ಕಿಞ್ಚಿ ನಾನಾಕಾರಣಂ ಅತ್ಥೀ’’ತಿ?
8. ‘‘Bhante nāgasena, gihidussīlassa ca samaṇadussīlassa ca ko viseso, kiṃ nānākaraṇaṃ, ubhopete samasamagatikā, ubhinnampi samasamo vipāko hoti, udāhu kiñci nānākāraṇaṃ atthī’’ti?
‘‘ದಸ ಯಿಮೇ, ಮಹಾರಾಜ, ಗುಣಾ ಸಮಣದುಸ್ಸೀಲಸ್ಸ ಗಿಹಿದುಸ್ಸೀಲತೋ ವಿಸೇಸೇನ ಅತಿರೇಕಾ, ದಸಹಿ ಚ ಕಾರಣೇಹಿ ಉತ್ತರಿಂ ದಕ್ಖಿಣಂ ವಿಸೋಧೇತಿ।
‘‘Dasa yime, mahārāja, guṇā samaṇadussīlassa gihidussīlato visesena atirekā, dasahi ca kāraṇehi uttariṃ dakkhiṇaṃ visodheti.
‘‘ಕತಮೇ ದಸ ಗುಣಾ ಸಮಣದುಸ್ಸೀಲಸ್ಸ ಗಿಹಿದುಸ್ಸೀಲತೋ ವಿಸೇಸೇನ ಅತಿರೇಕಾ? ಇಧ, ಮಹಾರಾಜ, ಸಮಣದುಸ್ಸೀಲೋ ಬುದ್ಧೇ ಸಗಾರವೋ ಹೋತಿ, ಧಮ್ಮೇ ಸಗಾರವೋ ಹೋತಿ, ಸಙ್ಘೇ ಸಗಾರವೋ ಹೋತಿ, ಸಬ್ರಹ್ಮಚಾರೀಸು ಸಗಾರವೋ ಹೋತಿ, ಉದ್ದೇಸಪರಿಪುಚ್ಛಾಯ ವಾಯಮತಿ, ಸವನಬಹುಲೋ ಹೋತಿ, ಭಿನ್ನಸೀಲೋಪಿ, ಮಹಾರಾಜ, ದುಸ್ಸೀಲೋ ಪರಿಸಗತೋ ಆಕಪ್ಪಂ ಉಪಟ್ಠಪೇತಿ, ಗರಹಭಯಾ ಕಾಯಿಕಂ ವಾಚಸಿಕಂ ರಕ್ಖತಿ, ಪಧಾನಾಭಿಮುಖಞ್ಚಸ್ಸ ಹೋತಿ ಚಿತ್ತಂ, ಭಿಕ್ಖುಸಾಮಞ್ಞಂ ಉಪಗತೋ ಹೋತಿ। ಕರೋನ್ತೋಪಿ, ಮಹಾರಾಜ, ಸಮಣದುಸ್ಸೀಲೋ ಪಾಪಂ ಪಟಿಚ್ಛನ್ನಂ ಆಚರತಿ। ಯಥಾ, ಮಹಾರಾಜ, ಇತ್ಥೀ ಸಪತಿಕಾ ನಿಲೀಯಿತ್ವಾ ರಹಸ್ಸೇನೇವ ಪಾಪಮಾಚರತಿ; ಏವಮೇವ ಖೋ, ಮಹಾರಾಜ, ಕರೋನ್ತೋಪಿ ಸಮಣದುಸ್ಸೀಲೋ ಪಾಪಂ ಪಟಿಚ್ಛನ್ನಂ ಆಚರತಿ। ಇಮೇ ಖೋ, ಮಹಾರಾಜ, ದಸ ಗುಣಾ ಸಮಣದುಸ್ಸೀಲಸ್ಸ ಗಿಹಿದುಸ್ಸೀಲತೋ ವಿಸೇಸೇನ ಅತಿರೇಕಾ।
‘‘Katame dasa guṇā samaṇadussīlassa gihidussīlato visesena atirekā? Idha, mahārāja, samaṇadussīlo buddhe sagāravo hoti, dhamme sagāravo hoti, saṅghe sagāravo hoti, sabrahmacārīsu sagāravo hoti, uddesaparipucchāya vāyamati, savanabahulo hoti, bhinnasīlopi, mahārāja, dussīlo parisagato ākappaṃ upaṭṭhapeti, garahabhayā kāyikaṃ vācasikaṃ rakkhati, padhānābhimukhañcassa hoti cittaṃ, bhikkhusāmaññaṃ upagato hoti. Karontopi, mahārāja, samaṇadussīlo pāpaṃ paṭicchannaṃ ācarati. Yathā, mahārāja, itthī sapatikā nilīyitvā rahasseneva pāpamācarati; evameva kho, mahārāja, karontopi samaṇadussīlo pāpaṃ paṭicchannaṃ ācarati. Ime kho, mahārāja, dasa guṇā samaṇadussīlassa gihidussīlato visesena atirekā.
‘‘ಕತಮೇಹಿ ದಸಹಿ ಕಾರಣೇಹಿ ಉತ್ತರಿಂ ದಕ್ಖಿಣಂ ವಿಸೋಧೇತಿ? ಅನವಜ್ಜಕವಚಧಾರಣತಾಯಪಿ ದಕ್ಖಿಣಂ ವಿಸೋಧೇತಿ, ಇಸಿಸಾಮಞ್ಞಭಣ್ಡುಲಿಙ್ಗಧಾರಣತೋಪಿ ದಕ್ಖಿಣಂ ವಿಸೋಧೇತಿ, ಸಙ್ಘಸಮಯಮನುಪ್ಪವಿಟ್ಠತಾಯಪಿ ದಕ್ಖಿಣಂ ವಿಸೋಧೇತಿ, ಬುದ್ಧಧಮ್ಮಸಙ್ಘಸರಣಗತತಾಯಪಿ ದಕ್ಖಿಣಂ ವಿಸೋಧೇತಿ, ಪಧಾನಾಸಯನಿಕೇತವಾಸಿತಾಯಪಿ ದಕ್ಖಿಣಂ ವಿಸೋಧೇತಿ, ಜಿನಸಾಸನಧರ 1 ಪರಿಯೇಸನತೋಪಿ ದಕ್ಖಿಣಂ ವಿಸೋಧೇತಿ, ಪವರಧಮ್ಮದೇಸನತೋಪಿ ದಕ್ಖಿಣಂ ವಿಸೋಧೇತಿ, ಧಮ್ಮದೀಪಗತಿಪರಾಯಣತಾಯಪಿ ದಕ್ಖಿಣಂ ವಿಸೋಧೇತಿ, ‘ಅಗ್ಗೋ ಬುದ್ಧೋ’ತಿ ಏಕನ್ತಉಜುದಿಟ್ಠಿತಾಯಪಿ ದಕ್ಖಿಣಂ ವಿಸೋಧೇತಿ, ಉಪೋಸಥಸಮಾದಾನತೋಪಿ ದಕ್ಖಿಣಂ ವಿಸೋಧೇತಿ। ಇಮೇಹಿ ಖೋ, ಮಹಾರಾಜ, ದಸಹಿ ಕಾರಣೇಹಿ ಉತ್ತರಿಂ ದಕ್ಖಿಣಂ ವಿಸೋಧೇತಿ ।
‘‘Katamehi dasahi kāraṇehi uttariṃ dakkhiṇaṃ visodheti? Anavajjakavacadhāraṇatāyapi dakkhiṇaṃ visodheti, isisāmaññabhaṇḍuliṅgadhāraṇatopi dakkhiṇaṃ visodheti, saṅghasamayamanuppaviṭṭhatāyapi dakkhiṇaṃ visodheti, buddhadhammasaṅghasaraṇagatatāyapi dakkhiṇaṃ visodheti, padhānāsayaniketavāsitāyapi dakkhiṇaṃ visodheti, jinasāsanadhara 2 pariyesanatopi dakkhiṇaṃ visodheti, pavaradhammadesanatopi dakkhiṇaṃ visodheti, dhammadīpagatiparāyaṇatāyapi dakkhiṇaṃ visodheti, ‘aggo buddho’ti ekantaujudiṭṭhitāyapi dakkhiṇaṃ visodheti, uposathasamādānatopi dakkhiṇaṃ visodheti. Imehi kho, mahārāja, dasahi kāraṇehi uttariṃ dakkhiṇaṃ visodheti .
‘‘ಸುವಿಪನ್ನೋಪಿ ಹಿ, ಮಹಾರಾಜ, ಸಮಣದುಸ್ಸೀಲೋ ದಾಯಕಾನಂ ದಕ್ಖಿಣಂ ವಿಸೋಧೇತಿ। ಯಥಾ, ಮಹಾರಾಜ, ಉದಕಂ ಸುಬಹಲಮ್ಪಿ ಕಲಲಕದ್ದಮರಜೋಜಲ್ಲಂ ಅಪನೇತಿ; ಏವಮೇವ ಖೋ, ಮಹಾರಾಜ, ಸುವಿಪನ್ನೋಪಿ ಸಮಣದುಸ್ಸೀಲೋ ದಾಯಕಾನಂ ದಕ್ಖಿಣಂ ವಿಸೋಧೇತಿ।
‘‘Suvipannopi hi, mahārāja, samaṇadussīlo dāyakānaṃ dakkhiṇaṃ visodheti. Yathā, mahārāja, udakaṃ subahalampi kalalakaddamarajojallaṃ apaneti; evameva kho, mahārāja, suvipannopi samaṇadussīlo dāyakānaṃ dakkhiṇaṃ visodheti.
‘‘ಯಥಾ ವಾ ಪನ, ಮಹಾರಾಜ, ಉಣ್ಹೋದಕಂ ಸುಕುಧಿತಮ್ಪಿ 3 ಜ್ಜಲನ್ತಂ ಮಹನ್ತಂ ಅಗ್ಗಿಕ್ಖನ್ಧಂ ನಿಬ್ಬಾಪೇತಿ, ಏವಮೇವ ಖೋ, ಮಹಾರಾಜ, ಸುವಿಪನ್ನೋಪಿ ಸಮಣದುಸ್ಸೀಲೋ ದಾಯಕಾನಂ ದಕ್ಖಿಣಂ ವಿಸೋಧೇತಿ।
‘‘Yathā vā pana, mahārāja, uṇhodakaṃ sukudhitampi 4 jjalantaṃ mahantaṃ aggikkhandhaṃ nibbāpeti, evameva kho, mahārāja, suvipannopi samaṇadussīlo dāyakānaṃ dakkhiṇaṃ visodheti.
‘‘ಯಥಾ ವಾ ಪನ, ಮಹಾರಾಜ, ಭೋಜನಂ ವಿರಸಮ್ಪಿ ಖುದಾದುಬ್ಬಲ್ಯಂ ಅಪನೇತಿ, ಏವಮೇವ ಖೋ, ಮಹಾರಾಜ, ಸುವಿಪನ್ನೋಪಿ ಸಮಣದುಸ್ಸೀಲೋ ದಾಯಕಾನಂ ದಕ್ಖಿಣಂ ವಿಸೋಧೇತಿ।
‘‘Yathā vā pana, mahārāja, bhojanaṃ virasampi khudādubbalyaṃ apaneti, evameva kho, mahārāja, suvipannopi samaṇadussīlo dāyakānaṃ dakkhiṇaṃ visodheti.
‘‘ಭಾಸಿತಮ್ಪೇತಂ, ಮಹಾರಾಜ, ತಥಾಗತೇನ ದೇವಾತಿದೇವೇನ ಮಜ್ಝಿಮನಿಕಾಯವರಲಞ್ಛಕೇ ದಕ್ಖಿಣವಿಭಙ್ಗೇ ವೇಯ್ಯಾಕರಣೇ –
‘‘Bhāsitampetaṃ, mahārāja, tathāgatena devātidevena majjhimanikāyavaralañchake dakkhiṇavibhaṅge veyyākaraṇe –
‘‘‘ಯೋ ಸೀಲವಾ ದುಸ್ಸೀಲೇಸು ದದಾತಿ ದಾನಂ, ಧಮ್ಮೇನ ಲದ್ಧಂ ಸುಪಸನ್ನಚಿತ್ತೋ।
‘‘‘Yo sīlavā dussīlesu dadāti dānaṃ, dhammena laddhaṃ supasannacitto;
ಅಭಿಸದ್ದಹಂ ಕಮ್ಮಫಲಂ ಉಳಾರಂ, ಸಾ ದಕ್ಖಿಣಾ ದಾಯಕತೋ ವಿಸುಜ್ಝತೀ’’’ತಿ 5॥
Abhisaddahaṃ kammaphalaṃ uḷāraṃ, sā dakkhiṇā dāyakato visujjhatī’’’ti 6.
‘‘ಅಚ್ಛರಿಯಂ , ಭನ್ತೇ ನಾಗಸೇನ, ಅಬ್ಭುತಂ, ಭನ್ತೇ ನಾಗಸೇನ, ತಾವತಕಂ ಮಯಂ ಪಞ್ಹಂ ಅಪುಚ್ಛಿಮ್ಹ, ತಂ ತ್ವಂ ಓಪಮ್ಮೇಹಿ ಕಾರಣೇಹಿ ವಿಭಾವೇನ್ತೋ ಅಮತಮಧುರಂ ಸವನೂಪಗಂ ಅಕಾಸಿ। ಯಥಾ ನಾಮ, ಭನ್ತೇ, ಸೂದೋ ವಾ ಸೂದನ್ತೇವಾಸೀ ವಾ ತಾವತಕಂ ಮಂಸಂ ಲಭಿತ್ವಾ ನಾನಾವಿಧೇಹಿ ಸಮ್ಭಾರೇಹಿ ಸಮ್ಪಾದೇತ್ವಾ ರಾಜೂಪಭೋಗಂ ಕರೋತಿ; ಏವಮೇವ ಖೋ, ಭನ್ತೇ ನಾಗಸೇನ, ತಾವತಕಂ ಮಯಂ ಪಞ್ಹಂ ಅಪುಚ್ಛಿಮ್ಹ, ತಂ ತ್ವಂ ಓಪಮ್ಮೇಹಿ ಕಾರಣೇಹಿ ವಿಭಾವೇತ್ವಾ ಅಮತಮಧುರಂ ಸವನೂಪಗಂ ಅಕಾಸೀ’’ತಿ।
‘‘Acchariyaṃ , bhante nāgasena, abbhutaṃ, bhante nāgasena, tāvatakaṃ mayaṃ pañhaṃ apucchimha, taṃ tvaṃ opammehi kāraṇehi vibhāvento amatamadhuraṃ savanūpagaṃ akāsi. Yathā nāma, bhante, sūdo vā sūdantevāsī vā tāvatakaṃ maṃsaṃ labhitvā nānāvidhehi sambhārehi sampādetvā rājūpabhogaṃ karoti; evameva kho, bhante nāgasena, tāvatakaṃ mayaṃ pañhaṃ apucchimha, taṃ tvaṃ opammehi kāraṇehi vibhāvetvā amatamadhuraṃ savanūpagaṃ akāsī’’ti.
ದುಸ್ಸೀಲಪಞ್ಹೋ ಅಟ್ಠಮೋ।
Dussīlapañho aṭṭhamo.
Footnotes:
