| Library / Tipiṭaka / તિપિટક • Tipiṭaka / પઞ્ચપકરણ-અટ્ઠકથા • Pañcapakaraṇa-aṭṭhakathā |
૨. દુકપટ્ઠાનવણ્ણના
2. Dukapaṭṭhānavaṇṇanā
દુકપટ્ઠાનેપિ સબ્બદુકેસુ પઞ્હાવિસ્સજ્જનાનિ ચેવ ગણના ચ પાળિયં આગતનયેનેવ વેદિતબ્બા. અપિચેત્થ સહેતુકહેતુસમ્પયુત્તદુકાનં વિસ્સજ્જનં હેતુદુકવિસ્સજ્જનસદિસં; તથા હેતૂચેવસહેતુકહેતૂચેવહેતુસમ્પયુત્તદુકાનં, તથા સપ્પચ્ચયસઙ્ખતદુકાનં. ઇદં દુકં યથા સપ્પચ્ચયદુકં, એવં કાતબ્બન્તિ ઇદં યસ્મા સપ્પચ્ચયો વિય અપ્પચ્ચયેન સઙ્ખતોપિ, અસઙ્ખતેન સદ્ધિં યોજનં ન લબ્ભતિ, તસ્મા વુત્તં. સારમ્મણચિત્તસમ્પયુત્તસંસટ્ઠદુકાપિ સદિસવિસ્સજ્જનાયેવ; તથા આસવઓઘયોગગોચ્છકા. એતે હિ તયો અઞ્ઞમઞ્ઞં સદિસવિસ્સજ્જનાયેવ. અપિચ લોકિયસાસવસંયોજનિયગન્થનિયનીવરણિયપરામટ્ઠસઙ્કિલેસિકદુકા આસવવિપ્પયુત્તસાસવસંયોજનવિપ્પયુત્તસંયોજનિયગન્થવિપ્પયુત્તગન્થનિયનીવરણવિપ્પયુત્તનીવરણિયપરામાસવિપ્પયુત્તપરામટ્ઠકિલેસવિપ્પયુત્તસઙ્કિલેસિકપરિયાપન્નસઉત્તરદુકાત ઇમેપિ દુકા સમાના.
Dukapaṭṭhānepi sabbadukesu pañhāvissajjanāni ceva gaṇanā ca pāḷiyaṃ āgatanayeneva veditabbā. Apicettha sahetukahetusampayuttadukānaṃ vissajjanaṃ hetudukavissajjanasadisaṃ; tathā hetūcevasahetukahetūcevahetusampayuttadukānaṃ, tathā sappaccayasaṅkhatadukānaṃ. Idaṃ dukaṃ yathā sappaccayadukaṃ, evaṃ kātabbanti idaṃ yasmā sappaccayo viya appaccayena saṅkhatopi, asaṅkhatena saddhiṃ yojanaṃ na labbhati, tasmā vuttaṃ. Sārammaṇacittasampayuttasaṃsaṭṭhadukāpi sadisavissajjanāyeva; tathā āsavaoghayogagocchakā. Ete hi tayo aññamaññaṃ sadisavissajjanāyeva. Apica lokiyasāsavasaṃyojaniyaganthaniyanīvaraṇiyaparāmaṭṭhasaṅkilesikadukā āsavavippayuttasāsavasaṃyojanavippayuttasaṃyojaniyaganthavippayuttaganthaniyanīvaraṇavippayuttanīvaraṇiyaparāmāsavippayuttaparāmaṭṭhakilesavippayuttasaṅkilesikapariyāpannasauttaradukāta imepi dukā samānā.
કિલેસદુકં સંયોજનદુકસદિસં. સઙ્કિલિટ્ઠકિલેસસમ્પયુત્તનીવરણસમ્પયુત્તદસ્સનેનપહાતબ્બસરણદુકાપિ સમાના. તથાકિલેસા ચેવ સઙ્કિલિટ્ઠનીવરણા ચેવ નીવરણસમ્પયુત્તકિલેસા ચેવ કિલેસસમ્પયુત્તદુકા. ઇમિના નયેન સબ્બેસં અત્થતો સદિસાનં દુકાનં વિસ્સજ્જનાનિ સદિસાનેવ હોન્તીતિ વેદિતબ્બાનિ. સબ્બસ્મિમ્પિ પન પટ્ઠાને કેનચિવિઞ્ઞેય્યદુકં ન લબ્ભતિ. આસવા ચેવ આસવસમ્પયુત્તા ચ, સંયોજના ચેવ સંયોજનસમ્પયુત્તા ચ, ગન્થા ચેવ ગન્થસમ્પયુત્તા ચ, નીવરણા ચેવ નીવરણસમ્પયુત્તા ચ, કિલેસા ચેવ સઙ્કિલિટ્ઠા ચાતિ એવરૂપેસુ દુકેસુ વિપાકપચ્ચયો ચેવ નાનાક્ખણિકકમ્મપચ્ચયો ચ ન લબ્ભતિ. નહેતુસહેતુકનહેતુઅહેતુકેસુ હેતુપચ્ચયો નત્થિ. હેતૂ ચેવ હેતુસમ્પયુત્તા ચ, આસવા ચેવ આસવસમ્પયુત્તા ચ, ગન્થા ચેવ ગન્થસમ્પયુત્તા ચાતિ ઇમેસુ દુકેસુ નહેતુનઝાનનમગ્ગા ન લબ્ભન્તિ. સંયોજના ચેવ સંયોજનસમ્પયુત્તા ચ, નીવરણા ચેવ નીવરણસમ્પયુત્તા ચ, કિલેસા ચેવ કિલેસસમ્પયુત્તા ચ, કિલેસા ચેવ સઙ્કિલિટ્ઠા ચાતિ ઇમેસુ પન વિચિકિચ્છુદ્ધચ્ચસહગતસ્સ મોહસ્સ વસેન નહેતુપચ્ચયો લબ્ભતિ; નઝાનનમગ્ગપચ્ચયા ન લબ્ભન્તીતિ એવં સબ્બદુકેસુ લબ્ભમાનાલબ્ભમાનં ઉપપરિક્ખિત્વા પાળિવસેનેવ વારગણના વેદિતબ્બાતિ.
Kilesadukaṃ saṃyojanadukasadisaṃ. Saṅkiliṭṭhakilesasampayuttanīvaraṇasampayuttadassanenapahātabbasaraṇadukāpi samānā. Tathākilesā ceva saṅkiliṭṭhanīvaraṇā ceva nīvaraṇasampayuttakilesā ceva kilesasampayuttadukā. Iminā nayena sabbesaṃ atthato sadisānaṃ dukānaṃ vissajjanāni sadisāneva hontīti veditabbāni. Sabbasmimpi pana paṭṭhāne kenaciviññeyyadukaṃ na labbhati. Āsavā ceva āsavasampayuttā ca, saṃyojanā ceva saṃyojanasampayuttā ca, ganthā ceva ganthasampayuttā ca, nīvaraṇā ceva nīvaraṇasampayuttā ca, kilesā ceva saṅkiliṭṭhā cāti evarūpesu dukesu vipākapaccayo ceva nānākkhaṇikakammapaccayo ca na labbhati. Nahetusahetukanahetuahetukesu hetupaccayo natthi. Hetū ceva hetusampayuttā ca, āsavā ceva āsavasampayuttā ca, ganthā ceva ganthasampayuttā cāti imesu dukesu nahetunajhānanamaggā na labbhanti. Saṃyojanā ceva saṃyojanasampayuttā ca, nīvaraṇā ceva nīvaraṇasampayuttā ca, kilesā ceva kilesasampayuttā ca, kilesā ceva saṅkiliṭṭhā cāti imesu pana vicikicchuddhaccasahagatassa mohassa vasena nahetupaccayo labbhati; najhānanamaggapaccayā na labbhantīti evaṃ sabbadukesu labbhamānālabbhamānaṃ upaparikkhitvā pāḷivaseneva vāragaṇanā veditabbāti.
દુકપટ્ઠાનવણ્ણના.
Dukapaṭṭhānavaṇṇanā.
