| Library / Tipiṭaka / തിപിടക • Tipiṭaka / ധമ്മസങ്ഗണീപാളി • Dhammasaṅgaṇīpāḷi |
ദുകഅത്ഥുദ്ധാരോ
Dukaatthuddhāro
ഹേതുഗോച്ഛകം
Hetugocchakaṃ
൧൪൪൧. കതമേ ധമ്മാ ഹേതൂ? തയോ കുസലഹേതൂ, തയോ അകുസലഹേതൂ, തയോ അബ്യാകതഹേതൂ. അലോഭോ കുസലഹേതു, അദോസോ കുസലഹേതു, ചതൂസു ഭൂമീസു കുസലേസു ഉപ്പജ്ജന്തി. അമോഹോ കുസലഹേതു, കാമാവചരകുസലതോ ചത്താരോ ഞാണവിപ്പയുത്തേ ചിത്തുപ്പാദേ ഠപേത്വാ, ചതൂസു ഭൂമീസു കുസലേസു ഉപ്പജ്ജതി.
1441. Katame dhammā hetū? Tayo kusalahetū, tayo akusalahetū, tayo abyākatahetū. Alobho kusalahetu, adoso kusalahetu, catūsu bhūmīsu kusalesu uppajjanti. Amoho kusalahetu, kāmāvacarakusalato cattāro ñāṇavippayutte cittuppāde ṭhapetvā, catūsu bhūmīsu kusalesu uppajjati.
ലോഭോ അട്ഠസു ലോഭസഹഗതേസു ചിത്തുപ്പാദേസു ഉപ്പജ്ജതി. ദോസോ ദ്വീസു ദോമനസ്സസഹഗതേസു ചിത്തുപ്പാദേസു ഉപ്പജ്ജതി. മോഹോ സബ്ബാകുസലേസു ഉപ്പജ്ജതി.
Lobho aṭṭhasu lobhasahagatesu cittuppādesu uppajjati. Doso dvīsu domanassasahagatesu cittuppādesu uppajjati. Moho sabbākusalesu uppajjati.
അലോഭോ വിപാകഹേതു അദോസോ വിപാകഹേതു, കാമാവചരസ്സ വിപാകതോ അഹേതുകേ ചിത്തുപ്പാദേ ഠപേത്വാ, ചതൂസു ഭൂമീസു വിപാകേസു ഉപ്പജ്ജന്തി. അമോഹോ വിപാകഹേതു, കാമാവചരസ്സ വിപാകതോ അഹേതുകേ ചിത്തുപ്പാദേ ഠപേത്വാ, ചത്താരോ ഞാണവിപ്പയുത്തേ ചിത്തുപ്പാദേ ഠപേത്വാ, ചതൂസു ഭൂമീസു വിപാകേസു ഉപ്പജ്ജതി.
Alobho vipākahetu adoso vipākahetu, kāmāvacarassa vipākato ahetuke cittuppāde ṭhapetvā, catūsu bhūmīsu vipākesu uppajjanti. Amoho vipākahetu, kāmāvacarassa vipākato ahetuke cittuppāde ṭhapetvā, cattāro ñāṇavippayutte cittuppāde ṭhapetvā, catūsu bhūmīsu vipākesu uppajjati.
അലോഭോ കിരിയഹേതു അദോസോ കിരിയഹേതു, കാമാവചരകിരിയതോ അഹേതുകേ ചിത്തുപ്പാദേ ഠപേത്വാ, തീസു ഭൂമീസു കിരിയേസു ഉപ്പജ്ജന്തി . അമോഹോ കിരിയഹേതു, കാമാവചരകിരിയതോ അഹേതുകേ ചിത്തുപ്പാദേ ഠപേത്വാ, ചത്താരോ ഞാണവിപ്പയുത്തേ ചിത്തുപ്പാദേ ഠപേത്വാ, തീസു ഭൂമീസു കിരിയേസു ഉപ്പജ്ജതി – ഇമേ ധമ്മാ ഹേതൂ.
Alobho kiriyahetu adoso kiriyahetu, kāmāvacarakiriyato ahetuke cittuppāde ṭhapetvā, tīsu bhūmīsu kiriyesu uppajjanti . Amoho kiriyahetu, kāmāvacarakiriyato ahetuke cittuppāde ṭhapetvā, cattāro ñāṇavippayutte cittuppāde ṭhapetvā, tīsu bhūmīsu kiriyesu uppajjati – ime dhammā hetū.
൧൪൪൨. കതമേ ധമ്മാ ന ഹേതൂ? ഠപേത്വാ ഹേതൂ, ചതൂസു ഭൂമീസു കുസലം, അകുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ ന ഹേതൂ.
1442. Katame dhammā na hetū? Ṭhapetvā hetū, catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na hetū.
൧൪൪൩. കതമേ ധമ്മാ സഹേതുകാ? വിചികിച്ഛാസഹഗതം ഉദ്ധച്ചസഹഗതം മോഹം ഠപേത്വാ അവസേസം അകുസലം, ചതൂസു ഭൂമീസു കുസലം, കാമാവചരസ്സ വിപാകതോ അഹേതുകേ ചിത്തുപ്പാദേ ഠപേത്വാ ചതൂസു ഭൂമീസു വിപാകോ, കാമാവചരകിരിയതോ അഹേതുകേ ചിത്തുപ്പാദേ ഠപേത്വാ തീസു ഭൂമീസു കിരിയാബ്യാകതം – ഇമേ ധമ്മാ സഹേതുകാ.
1443. Katame dhammā sahetukā? Vicikicchāsahagataṃ uddhaccasahagataṃ mohaṃ ṭhapetvā avasesaṃ akusalaṃ, catūsu bhūmīsu kusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ – ime dhammā sahetukā.
൧൪൪൪. കതമേ ധമ്മാ അഹേതുകാ? വിചികിച്ഛാസഹഗതോ മോഹോ, ഉദ്ധച്ചസഹഗതോ മോഹോ, ദ്വേപഞ്ചവിഞ്ഞാണാനി, തിസ്സോ ച മനോധാതുയോ, പഞ്ച ച അഹേതുകമനോവിഞ്ഞാണധാതുയോ, രൂപഞ്ച, നിബ്ബാനഞ്ച – ഇമേ ധമ്മാ അഹേതുകാ.
1444. Katame dhammā ahetukā? Vicikicchāsahagato moho, uddhaccasahagato moho, dvepañcaviññāṇāni, tisso ca manodhātuyo, pañca ca ahetukamanoviññāṇadhātuyo, rūpañca, nibbānañca – ime dhammā ahetukā.
൧൪൪൫. കതമേ ധമ്മാ ഹേതുസമ്പയുത്താ? വിചികിച്ഛാസഹഗതം ഉദ്ധച്ചസഹഗതം മോഹം ഠപേത്വാ അവസേസം അകുസലം, ചതൂസു ഭൂമീസു കുസലം, കാമാവചരസ്സ വിപാകതോ അഹേതുകേ ചിത്തുപ്പാദേ ഠപേത്വാ ചതൂസു ഭൂമീസു വിപാകോ, കാമാവചരകിരിയതോ അഹേതുകേ ചിത്തുപ്പാദേ ഠപേത്വാ തീസു ഭൂമീസു കിരിയാബ്യാകതം – ഇമേ ധമ്മാ ഹേതുസമ്പയുത്താ.
1445. Katame dhammā hetusampayuttā? Vicikicchāsahagataṃ uddhaccasahagataṃ mohaṃ ṭhapetvā avasesaṃ akusalaṃ, catūsu bhūmīsu kusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ – ime dhammā hetusampayuttā.
൧൪൪൬. കതമേ ധമ്മാ ഹേതുവിപ്പയുത്താ? വിചികിച്ഛാസഹഗതോ മോഹോ, ഉദ്ധച്ചസഹഗതോ മോഹോ, ദ്വേപഞ്ചവിഞ്ഞാണാനി തിസ്സോ ച മനോധാതുയോ പഞ്ച ച അഹേതുകമനോവിഞ്ഞാണധാതുയോ, രൂപഞ്ച, നിബ്ബാനഞ്ച – ഇമേ ധമ്മാ ഹേതുവിപ്പയുത്താ.
1446. Katame dhammā hetuvippayuttā? Vicikicchāsahagato moho, uddhaccasahagato moho, dvepañcaviññāṇāni tisso ca manodhātuyo pañca ca ahetukamanoviññāṇadhātuyo, rūpañca, nibbānañca – ime dhammā hetuvippayuttā.
൧൪൪൭. കതമേ ധമ്മാ ഹേതൂ ചേവ സഹേതുകാ ച? യത്ഥ ദ്വേ തയോ ഹേതൂ ഏകതോ ഉപ്പജ്ജന്തി – ഇമേ ധമ്മാ ഹേതൂ ചേവ സഹേതുകാ ച.
1447. Katame dhammā hetū ceva sahetukā ca? Yattha dve tayo hetū ekato uppajjanti – ime dhammā hetū ceva sahetukā ca.
൧൪൪൮. കതമേ ധമ്മാ സഹേതുകാ ചേവ ന ച ഹേതൂ? ചതൂസു ഭൂമീസു കുസലം, അകുസലം, കാമാവചരസ്സ വിപാകതോ അഹേതുകേ ചിത്തുപ്പാദേ ഠപേത്വാ ചതൂസു ഭൂമീസു വിപാകോ, കാമാവചരകിരിയതോ അഹേതുകേ ചിത്തുപ്പാദേ ഠപേത്വാ തീസു ഭൂമീസു കിരിയാബ്യാകതം, ഏത്ഥുപ്പന്നേ ഹേതൂ ഠപേത്വാ – ഇമേ ധമ്മാ സഹേതുകാ ചേവ ന ച ഹേതൂ. അഹേതുകാ ധമ്മാ ന വത്തബ്ബാ – ഹേതൂ ചേവ സഹേതുകാ ചാതിപി, സഹേതുകാ ചേവ ന ച ഹേതൂതിപി.
1448. Katame dhammā sahetukā ceva na ca hetū? Catūsu bhūmīsu kusalaṃ, akusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ, etthuppanne hetū ṭhapetvā – ime dhammā sahetukā ceva na ca hetū. Ahetukā dhammā na vattabbā – hetū ceva sahetukā cātipi, sahetukā ceva na ca hetūtipi.
൧൪൪൯. കതമേ ധമ്മാ ഹേതൂ ചേവ ഹേതുസമ്പയുത്താ ച? യത്ഥ ദ്വേ തയോ ഹേതൂ ഏകതോ ഉപ്പജ്ജന്തി – ഇമേ ധമ്മാ ഹേതൂ ചേവ ഹേതുസമ്പയുത്താ ച.
1449. Katame dhammā hetū ceva hetusampayuttā ca? Yattha dve tayo hetū ekato uppajjanti – ime dhammā hetū ceva hetusampayuttā ca.
൧൪൫൦. കതമേ ധമ്മാ ഹേതുസമ്പയുത്താ ചേവ ന ച ഹേതൂ? ചതൂസു ഭൂമീസു കുസലം, അകുസലം, കാമാവചരസ്സ വിപാകതോ അഹേതുകേ ചിത്തുപ്പാദേ ഠപേത്വാ ചതൂസു ഭൂമീസു വിപാകോ, കാമാവചരകിരിയതോ അഹേതുകേ ചിത്തുപ്പാദേ ഠപേത്വാ തീസു ഭൂമീസു കിരിയാബ്യാകതം, ഏത്ഥുപ്പന്നേ ഹേതൂ ഠപേത്വാ – ഇമേ ധമ്മാ ഹേതുസമ്പയുത്താ ചേവ ന ച ഹേതൂ. ഹേതുവിപ്പയുത്താ ധമ്മാ ന വത്തബ്ബാ – ഹേതൂ ചേവ ഹേതുസമ്പയുത്താ ചാതിപി, ഹേതുസമ്പയുത്താ ചേവ ന ച ഹേതൂതിപി.
1450. Katame dhammā hetusampayuttā ceva na ca hetū? Catūsu bhūmīsu kusalaṃ, akusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ, etthuppanne hetū ṭhapetvā – ime dhammā hetusampayuttā ceva na ca hetū. Hetuvippayuttā dhammā na vattabbā – hetū ceva hetusampayuttā cātipi, hetusampayuttā ceva na ca hetūtipi.
൧൪൫൧. കതമേ ധമ്മാ ന ഹേതൂ സഹേതുകാ? ചതൂസു ഭൂമീസു കുസലം, അകുസലം, കാമാവചരസ്സ വിപാകതോ അഹേതുകേ ചിത്തുപ്പാദേ ഠപേത്വാ ചതൂസു ഭൂമീസു വിപാകോ, കാമാവചരകിരിയതോ അഹേതുകേ ചിത്തുപ്പാദേ ഠപേത്വാ തീസു ഭൂമീസു കിരിയാബ്യാകതം, ഏത്ഥുപ്പന്നേ ഹേതൂ ഠപേത്വാ – ഇമേ ധമ്മാ ന ഹേതൂ സഹേതുകാ.
1451. Katame dhammā na hetū sahetukā? Catūsu bhūmīsu kusalaṃ, akusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ, etthuppanne hetū ṭhapetvā – ime dhammā na hetū sahetukā.
൧൪൫൨. കതമേ ധമ്മാ ന ഹേതൂ അഹേതുകാ? ദ്വേപഞ്ചവിഞ്ഞാണാനി, തിസ്സോ ച മനോധാതുയോ, പഞ്ച ച അഹേതുകമനോവിഞ്ഞാണധാതുയോ, രൂപഞ്ച, നിബ്ബാനഞ്ച – ഇമേ ധമ്മാ ന ഹേതൂ അഹേതുകാ . ഹേതൂ ധമ്മാ ന വത്തബ്ബാ – ന ഹേതൂ സഹേതുകാതിപി, ന ഹേതൂ അഹേതുകാതിപി.
1452. Katame dhammā na hetū ahetukā? Dvepañcaviññāṇāni, tisso ca manodhātuyo, pañca ca ahetukamanoviññāṇadhātuyo, rūpañca, nibbānañca – ime dhammā na hetū ahetukā . Hetū dhammā na vattabbā – na hetū sahetukātipi, na hetū ahetukātipi.
ചൂളന്തരദുകം
Cūḷantaradukaṃ
൧൪൫൩. കതമേ ധമ്മാ സപ്പച്ചയാ? ചതൂസു ഭൂമീസു കുസലം, അകുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ സപ്പച്ചയാ.
1453. Katame dhammā sappaccayā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā sappaccayā.
൧൪൫൪. കതമേ ധമ്മാ അപ്പച്ചയാ? നിബ്ബാനം – ഇമേ ധമ്മാ അപ്പച്ചയാ.
1454. Katame dhammā appaccayā? Nibbānaṃ – ime dhammā appaccayā.
൧൪൫൫. കതമേ ധമ്മാ സങ്ഖതാ? ചതൂസു ഭൂമീസു കുസലം, അകുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ സങ്ഖതാ.
1455. Katame dhammā saṅkhatā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṅkhatā.
൧൪൫൬. കതമേ ധമ്മാ അസങ്ഖതാ? നിബ്ബാനം – ഇമേ ധമ്മാ അസങ്ഖതാ.
1456. Katame dhammā asaṅkhatā? Nibbānaṃ – ime dhammā asaṅkhatā.
൧൪൫൭. കതമേ ധമ്മാ സനിദസ്സനാ? രൂപായതനം – ഇമേ ധമ്മാ സനിദസ്സനാ.
1457. Katame dhammā sanidassanā? Rūpāyatanaṃ – ime dhammā sanidassanā.
൧൪൫൮. കതമേ ധമ്മാ അനിദസ്സനാ? ചക്ഖായതനം …പേ॰… ഫോട്ഠബ്ബായതനം, ചതൂസു ഭൂമീസു കുസലം, അകുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, യഞ്ച രൂപം അനിദസ്സനം അപ്പടിഘം ധമ്മായതനപരിയാപന്നം, നിബ്ബാനഞ്ച – ഇമേ ധമ്മാ അനിദസ്സനാ.
1458. Katame dhammā anidassanā? Cakkhāyatanaṃ …pe… phoṭṭhabbāyatanaṃ, catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, yañca rūpaṃ anidassanaṃ appaṭighaṃ dhammāyatanapariyāpannaṃ, nibbānañca – ime dhammā anidassanā.
൧൪൫൯. കതമേ ധമ്മാ സപ്പടിഘാ? ചക്ഖായതനം…പേ॰… ഫോട്ഠബ്ബായതനം – ഇമേ ധമ്മാ സപ്പടിഘാ.
1459. Katame dhammā sappaṭighā? Cakkhāyatanaṃ…pe… phoṭṭhabbāyatanaṃ – ime dhammā sappaṭighā.
൧൪൬൦. കതമേ ധമ്മാ അപ്പടിഘാ? ചതൂസു ഭൂമീസു കുസലം, അകുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, യഞ്ച രൂപം അനിദസ്സനം അപ്പടിഘം ധമ്മായതനപരിയാപന്നം, നിബ്ബാനഞ്ച – ഇമേ ധമ്മാ അപ്പടിഘാ.
1460. Katame dhammā appaṭighā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, yañca rūpaṃ anidassanaṃ appaṭighaṃ dhammāyatanapariyāpannaṃ, nibbānañca – ime dhammā appaṭighā.
൧൪൬൧. കതമേ ധമ്മാ രൂപിനോ? ചത്താരോ ച മഹാഭൂതാ, ചതുന്നഞ്ച മഹാഭൂതാനം ഉപാദായ രൂപം – ഇമേ ധമ്മാ രൂപിനോ.
1461. Katame dhammā rūpino? Cattāro ca mahābhūtā, catunnañca mahābhūtānaṃ upādāya rūpaṃ – ime dhammā rūpino.
൧൪൬൨. കതമേ ധമ്മാ അരൂപിനോ? ചതൂസു ഭൂമീസു കുസലം, അകുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, നിബ്ബാനഞ്ച – ഇമേ ധമ്മാ അരൂപിനോ.
1462. Katame dhammā arūpino? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, nibbānañca – ime dhammā arūpino.
൧൪൬൩. കതമേ ധമ്മാ ലോകിയാ? തീസു ഭൂമീസു കുസലം, അകുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ ലോകിയാ.
1463. Katame dhammā lokiyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā lokiyā.
൧൪൬൪. കതമേ ധമ്മാ ലോകുത്തരാ? ചത്താരോ മഗ്ഗാ അപരിയാപന്നാ, ചത്താരി ച സാമഞ്ഞഫലാനി, നിബ്ബാനഞ്ച – ഇമേ ധമ്മാ ലോകുത്തരാ. സബ്ബേ 1 ധമ്മാ കേനചി വിഞ്ഞേയ്യാ, കേനചി ന വിഞ്ഞേയ്യാ.
1464. Katame dhammā lokuttarā? Cattāro maggā apariyāpannā, cattāri ca sāmaññaphalāni, nibbānañca – ime dhammā lokuttarā. Sabbe 2 dhammā kenaci viññeyyā, kenaci na viññeyyā.
ആസവഗോച്ഛകം
Āsavagocchakaṃ
൧൪൬൫. കതമേ ധമ്മാ ആസവാ? ചത്താരോ ആസവാ – കാമാസവോ, ഭവാസവോ, ദിട്ഠാസവോ, അവിജ്ജാസവോ. കാമാസവോ അട്ഠസു ലോഭസഹഗതേസു ചിത്തുപ്പാദേസു ഉപ്പജ്ജതി ഭവാസവോ ചതൂസു ദിട്ഠിഗതവിപ്പയുത്തലോഭസഹഗതേസു ചിത്തുപ്പാദേസു ഉപ്പജ്ജതി ദിട്ഠാസവോ ചതൂസു ദിട്ഠിഗതസമ്പയുത്തേസു ചിത്തുപ്പാദേസു ഉപ്പജ്ജതി. അവിജ്ജാസവോ സബ്ബാകുസലേസു ഉപ്പജ്ജതി – ഇമേ ധമ്മാ ആസവാ.
1465. Katame dhammā āsavā? Cattāro āsavā – kāmāsavo, bhavāsavo, diṭṭhāsavo, avijjāsavo. Kāmāsavo aṭṭhasu lobhasahagatesu cittuppādesu uppajjati bhavāsavo catūsu diṭṭhigatavippayuttalobhasahagatesu cittuppādesu uppajjati diṭṭhāsavo catūsu diṭṭhigatasampayuttesu cittuppādesu uppajjati. Avijjāsavo sabbākusalesu uppajjati – ime dhammā āsavā.
൧൪൬൬. കതമേ ധമ്മാ നോ ആസവാ? ഠപേത്വാ ആസവേ അവസേസം അകുസലം, ചതൂസു ഭൂമീസു കുസലം , ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ നോ ആസവാ.
1466. Katame dhammā no āsavā? Ṭhapetvā āsave avasesaṃ akusalaṃ, catūsu bhūmīsu kusalaṃ , catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no āsavā.
൧൪൬൭. കതമേ ധമ്മാ സാസവാ? തീസു ഭൂമീസു കുസലം, അകുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ സാസവാ.
1467. Katame dhammā sāsavā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā sāsavā.
൧൪൬൮. കതമേ ധമ്മാ അനാസവാ? ചത്താരോ മഗ്ഗാ അപരിയാപന്നാ, ചത്താരി ച സാമഞ്ഞഫലാനി, നിബ്ബാനഞ്ച – ഇമേ ധമ്മാ അനാസവാ.
1468. Katame dhammā anāsavā? Cattāro maggā apariyāpannā, cattāri ca sāmaññaphalāni, nibbānañca – ime dhammā anāsavā.
൧൪൬൯. കതമേ ധമ്മാ ആസവസമ്പയുത്താ? ദ്വേ ദോമനസ്സസഹഗതചിത്തുപ്പാദാ ഏത്ഥുപ്പന്നം മോഹം ഠപേത്വാ, വിചികിച്ഛാസഹഗതം ഉദ്ധച്ചസഹഗതം മോഹം ഠപേത്വാ, അവസേസം അകുസലം – ഇമേ ധമ്മാ ആസവസമ്പയുത്താ.
1469. Katame dhammā āsavasampayuttā? Dve domanassasahagatacittuppādā etthuppannaṃ mohaṃ ṭhapetvā, vicikicchāsahagataṃ uddhaccasahagataṃ mohaṃ ṭhapetvā, avasesaṃ akusalaṃ – ime dhammā āsavasampayuttā.
൧൪൭൦. കതമേ ധമ്മാ ആസവവിപ്പയുത്താ? ദ്വീസു ദോമനസ്സസഹഗതേസു ചിത്തുപ്പാദേസു ഉപ്പന്നോ മോഹോ, വിചികിച്ഛാസഹഗതോ മോഹോ, ഉദ്ധച്ചസഹഗതോ മോഹോ, ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ ആസവവിപ്പയുത്താ.
1470. Katame dhammā āsavavippayuttā? Dvīsu domanassasahagatesu cittuppādesu uppanno moho, vicikicchāsahagato moho, uddhaccasahagato moho, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā āsavavippayuttā.
൧൪൭൧. കതമേ ധമ്മാ ആസവാ ചേവ സാസവാ ച? തേവ ആസവാ ആസവാ ചേവ സാസവാ ച.
1471. Katame dhammā āsavā ceva sāsavā ca? Teva āsavā āsavā ceva sāsavā ca.
൧൪൭൨. കതമേ ധമ്മാ സാസവാ ചേവ നോ ച ആസവാ? ഠപേത്വാ ആസവേ, അവസേസം അകുസലം, തീസു ഭൂമീസു കുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ സാസവാ ചേവ നോ ച ആസവാ. അനാസവാ ധമ്മാ ന വത്തബ്ബാ – ആസവാ ചേവ സാസവാ ചാതിപി, സാസവാ ചേവ നോ ച ആസവാതിപി.
1472. Katame dhammā sāsavā ceva no ca āsavā? Ṭhapetvā āsave, avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā sāsavā ceva no ca āsavā. Anāsavā dhammā na vattabbā – āsavā ceva sāsavā cātipi, sāsavā ceva no ca āsavātipi.
൧൪൭൩. കതമേ ധമ്മാ ആസവാ ചേവ ആസവസമ്പയുത്താ ച? യത്ഥ ദ്വേ തയോ ആസവാ ഏകതോ ഉപ്പജ്ജന്തി – ഇമേ ധമ്മാ ആസവാ ചേവ ആസവസമ്പയുത്താ ച.
1473. Katame dhammā āsavā ceva āsavasampayuttā ca? Yattha dve tayo āsavā ekato uppajjanti – ime dhammā āsavā ceva āsavasampayuttā ca.
൧൪൭൪. കതമേ ധമ്മാ ആസവസമ്പയുത്താ ചേവ നോ ച ആസവാ? ഠപേത്വാ ആസവേ, അവസേസം അകുസലം – ഇമേ ധമ്മാ ആസവസമ്പയുത്താ ചേവ നോ ച ആസവാ. ആസവവിപ്പയുത്താ ധമ്മാ ന വത്തബ്ബാ – ആസവാ ചേവ ആസവസമ്പയുത്താ ചാതിപി, ആസവസമ്പയുത്താ ചേവ നോ ച ആസവാതിപി.
1474. Katame dhammā āsavasampayuttā ceva no ca āsavā? Ṭhapetvā āsave, avasesaṃ akusalaṃ – ime dhammā āsavasampayuttā ceva no ca āsavā. Āsavavippayuttā dhammā na vattabbā – āsavā ceva āsavasampayuttā cātipi, āsavasampayuttā ceva no ca āsavātipi.
൧൪൭൫. കതമേ ധമ്മാ ആസവവിപ്പയുത്താ സാസവാ? ദ്വീസു ദോമനസ്സസഹഗതേസു ചിത്തുപ്പാദേസു ഉപ്പന്നോ മോഹോ, വിചികിച്ഛാസഹഗതോ മോഹോ, ഉദ്ധച്ചസഹഗതോ മോഹോ, തീസു ഭൂമീസു കുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ ആസവവിപ്പയുത്താ സാസവാ.
1475. Katame dhammā āsavavippayuttā sāsavā? Dvīsu domanassasahagatesu cittuppādesu uppanno moho, vicikicchāsahagato moho, uddhaccasahagato moho, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā āsavavippayuttā sāsavā.
൧൪൭൬. കതമേ ധമ്മാ ആസവവിപ്പയുത്താ അനാസവാ? ചത്താരോ മഗ്ഗാ അപരിയാപന്നാ, ചത്താരി ച സാമഞ്ഞഫലാനി, നിബ്ബാനഞ്ച – ഇമേ ധമ്മാ ആസവവിപ്പയുത്താ അനാസവാ. ആസവസമ്പയുത്താ ധമ്മാ ന വത്തബ്ബാ – ആസവവിപ്പയുത്താ സാസവാതിപി, ആസവവിപ്പയുത്താ അനാസവാതിപി.
1476. Katame dhammā āsavavippayuttā anāsavā? Cattāro maggā apariyāpannā, cattāri ca sāmaññaphalāni, nibbānañca – ime dhammā āsavavippayuttā anāsavā. Āsavasampayuttā dhammā na vattabbā – āsavavippayuttā sāsavātipi, āsavavippayuttā anāsavātipi.
സംയോജനഗോച്ഛകം
Saṃyojanagocchakaṃ
൧൪൭൭. കതമേ ധമ്മാ സംയോജനാ? ദസ സംയോജനാനി – കാമരാഗസംയോജനം, പടിഘസംയോജനം, മാനസംയോജനം, ദിട്ഠിസംയോജനം, വിചികിച്ഛാസംയോജനം, സീലബ്ബതപരാമാസസംയോജനം, ഭവരാഗസംയോജനം, ഇസ്സാസംയോജനം, മച്ഛരിയസംയോജനം, അവിജ്ജാസംയോജനം. കാമരാഗസംയോജനം അട്ഠസു ലോഭസഹഗതേസു ചിത്തുപ്പാദേസു ഉപ്പജ്ജതി. പടിഘസംയോജനം ദ്വീസു ദോമനസ്സസഹഗതേസു ചിത്തുപ്പാദേസു ഉപ്പജ്ജതി. മാനസംയോജനം ചതൂസു ദിട്ഠിഗതവിപ്പയുത്തലോഭസഹഗതേസു ചിത്തുപ്പാദേസു ഉപ്പജ്ജതി. ദിട്ഠിസംയോജനം ചതൂസു ദിട്ഠിഗതസമ്പയുത്തേസു ചിത്തുപ്പാദേസു ഉപ്പജ്ജതി. വിചികിച്ഛാസംയോജനം വിചികിച്ഛാസഹഗതേസു ചിത്തുപ്പാദേസു ഉപ്പജ്ജതി. സീലബ്ബതപരാമാസസംയോജനം ചതൂസു ദിട്ഠിഗതസമ്പയുത്തേസു ചിത്തുപ്പാദേസു ഉപ്പജ്ജതി. ഭവരാഗസംയോജനം ചതൂസു ദിട്ഠിഗതവിപ്പയുത്തലോഭസഹഗതേസു ചിത്തുപ്പാദേസു ഉപ്പജ്ജതി. ഇസ്സാസംയോജനഞ്ച മച്ഛരിയസംയോജനഞ്ച ദ്വീസു ദോമനസ്സസഹഗതേസു ചിത്തുപ്പാദേസു ഉപ്പജ്ജന്തി. അവിജ്ജാസംയോജനം സബ്ബാകുസലേസു ഉപ്പജ്ജതി – ഇമേ ധമ്മാ സംയോജനാ.
1477. Katame dhammā saṃyojanā? Dasa saṃyojanāni – kāmarāgasaṃyojanaṃ, paṭighasaṃyojanaṃ, mānasaṃyojanaṃ, diṭṭhisaṃyojanaṃ, vicikicchāsaṃyojanaṃ, sīlabbataparāmāsasaṃyojanaṃ, bhavarāgasaṃyojanaṃ, issāsaṃyojanaṃ, macchariyasaṃyojanaṃ, avijjāsaṃyojanaṃ. Kāmarāgasaṃyojanaṃ aṭṭhasu lobhasahagatesu cittuppādesu uppajjati. Paṭighasaṃyojanaṃ dvīsu domanassasahagatesu cittuppādesu uppajjati. Mānasaṃyojanaṃ catūsu diṭṭhigatavippayuttalobhasahagatesu cittuppādesu uppajjati. Diṭṭhisaṃyojanaṃ catūsu diṭṭhigatasampayuttesu cittuppādesu uppajjati. Vicikicchāsaṃyojanaṃ vicikicchāsahagatesu cittuppādesu uppajjati. Sīlabbataparāmāsasaṃyojanaṃ catūsu diṭṭhigatasampayuttesu cittuppādesu uppajjati. Bhavarāgasaṃyojanaṃ catūsu diṭṭhigatavippayuttalobhasahagatesu cittuppādesu uppajjati. Issāsaṃyojanañca macchariyasaṃyojanañca dvīsu domanassasahagatesu cittuppādesu uppajjanti. Avijjāsaṃyojanaṃ sabbākusalesu uppajjati – ime dhammā saṃyojanā.
൧൪൭൮. കതമേ ധമ്മാ നോ സംയോജനാ. ഠപേത്വാ സംയോജനേ അവസേസം അകുസലം, ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ നോ സംയോജനാ.
1478. Katame dhammā no saṃyojanā. Ṭhapetvā saṃyojane avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no saṃyojanā.
൧൪൭൯. കതമേ ധമ്മാ സംയോജനിയാ? തീസു ഭൂമീസു കുസലം, അകുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ സംയോജനിയാ.
1479. Katame dhammā saṃyojaniyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṃyojaniyā.
൧൪൮൦. കതമേ ധമ്മാ അസംയോജനിയാ? ചത്താരോ മഗ്ഗാ അപരിയാപന്നാ, ചത്താരി ച സാമഞ്ഞഫലാനി, നിബ്ബാനഞ്ച – ഇമേ ധമ്മാ അസംയോജനിയാ.
1480. Katame dhammā asaṃyojaniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā asaṃyojaniyā.
൧൪൮൧. കതമേ ധമ്മാ സംയോജനസമ്പയുത്താ? ഉദ്ധച്ചസഹഗതം മോഹം ഠപേത്വാ അവസേസം അകുസലം – ഇമേ ധമ്മാ സംയോജനസമ്പയുത്താ.
1481. Katame dhammā saṃyojanasampayuttā? Uddhaccasahagataṃ mohaṃ ṭhapetvā avasesaṃ akusalaṃ – ime dhammā saṃyojanasampayuttā.
൧൪൮൨. കതമേ ധമ്മാ സംയോജനവിപ്പയുത്താ? ഉദ്ധച്ചസഹഗതോ മോഹോ, ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ സംയോജനവിപ്പയുത്താ.
1482. Katame dhammā saṃyojanavippayuttā? Uddhaccasahagato moho, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā saṃyojanavippayuttā.
൧൪൮൩. കതമേ ധമ്മാ സംയോജനാ ചേവ സംയോജനിയാ ച? താനേവ സംയോജനാനി സംയോജനാ ചേവ സംയോജനിയാ ച.
1483. Katame dhammā saṃyojanā ceva saṃyojaniyā ca? Tāneva saṃyojanāni saṃyojanā ceva saṃyojaniyā ca.
൧൪൮൪. കതമേ ധമ്മാ സംയോജനിയാ ചേവ നോ ച സംയോജനാ? ഠപേത്വാ സംയോജനേ അവസേസം അകുസലം, തീസു ഭൂമീസു കുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ സംയോജനിയാ ചേവ നോ ച സംയോജനാ. അസംയോജനിയാ ധമ്മാ ന വത്തബ്ബാ – സംയോജനാ ചേവ സംയോജനിയാ ചാതിപി, സംയോജനിയാ ചേവ നോ ച സംയോജനാതിപി.
1484. Katame dhammā saṃyojaniyā ceva no ca saṃyojanā? Ṭhapetvā saṃyojane avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṃyojaniyā ceva no ca saṃyojanā. Asaṃyojaniyā dhammā na vattabbā – saṃyojanā ceva saṃyojaniyā cātipi, saṃyojaniyā ceva no ca saṃyojanātipi.
൧൪൮൫. കതമേ ധമ്മാ സംയോജനാ ചേവ സംയോജനസമ്പയുത്താ ച? യത്ഥ ദ്വേ തീണി സംയോജനാനി ഏകതോ ഉപ്പജ്ജന്തി – ഇമേ ധമ്മാ സംയോജനാ ചേവ സംയോജനസമ്പയുത്താ ച.
1485. Katame dhammā saṃyojanā ceva saṃyojanasampayuttā ca? Yattha dve tīṇi saṃyojanāni ekato uppajjanti – ime dhammā saṃyojanā ceva saṃyojanasampayuttā ca.
൧൪൮൬. കതമേ ധമ്മാ സംയോജനസമ്പയുത്താ ചേവ നോ ച സംയോജനാ? ഠപേത്വാ സംയോജനേ, അവസേസം അകുസലം – ഇമേ ധമ്മാ സംയോജനസമ്പയുത്താ ചേവ നോ ച സംയോജനാ. സംയോജനവിപ്പയുത്താ ധമ്മാ ന വത്തബ്ബാ – സംയോജനാ ചേവ സംയോജനസമ്പയുത്താ ചാതിപി, സംയോജനസമ്പയുത്താ ചേവ നോ ച സംയോജനാതിപി.
1486. Katame dhammā saṃyojanasampayuttā ceva no ca saṃyojanā? Ṭhapetvā saṃyojane, avasesaṃ akusalaṃ – ime dhammā saṃyojanasampayuttā ceva no ca saṃyojanā. Saṃyojanavippayuttā dhammā na vattabbā – saṃyojanā ceva saṃyojanasampayuttā cātipi, saṃyojanasampayuttā ceva no ca saṃyojanātipi.
൧൪൮൭. കതമേ ധമ്മാ സംയോജനവിപ്പയുത്താ സംയോജനിയാ? ഉദ്ധച്ചസഹഗതോ മോഹോ, തീസു ഭൂമീസു കുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ സംയോജനവിപ്പയുത്താ സംയോജനിയാ.
1487. Katame dhammā saṃyojanavippayuttā saṃyojaniyā? Uddhaccasahagato moho, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṃyojanavippayuttā saṃyojaniyā.
൧൪൮൮. കതമേ ധമ്മാ സംയോജനവിപ്പയുത്താ അസംയോജനിയാ? ചത്താരോ മഗ്ഗാ അപരിയാപന്നാ, ചത്താരി ച സാമഞ്ഞഫലാനി, നിബ്ബാനഞ്ച – ഇമേ ധമ്മാ സംയോജനവിപ്പയുത്താ അസംയോജനിയാ. സംയോജനസമ്പയുത്താ ധമ്മാ ന വത്തബ്ബാ – സംയോജനവിപ്പയുത്താ സംയോജനിയാതിപി, സംയോജനവിപ്പയുത്താ അസംയോജനിയാതിപി.
1488. Katame dhammā saṃyojanavippayuttā asaṃyojaniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā saṃyojanavippayuttā asaṃyojaniyā. Saṃyojanasampayuttā dhammā na vattabbā – saṃyojanavippayuttā saṃyojaniyātipi, saṃyojanavippayuttā asaṃyojaniyātipi.
ഗന്ഥഗോച്ഛകം
Ganthagocchakaṃ
൧൪൮൯. കതമേ ധമ്മാ ഗന്ഥാ? ചത്താരോ ഗന്ഥാ – അഭിജ്ഝാകായഗന്ഥോ, ബ്യാപാദോ കായഗന്ഥോ, സീലബ്ബതപരാമാസോ കായഗന്ഥോ, ഇദംസച്ചാഭിനിവേസോ കായഗന്ഥോ. അഭിജ്ഝാകായഗന്ഥോ അട്ഠസു ലോഭസഹഗതേസു ചിത്തുപ്പാദേസു ഉപ്പജ്ജതി. ബ്യാപാദോ കായഗന്ഥോ ദ്വീസു ദോമനസ്സസഹഗതേസു ചിത്തുപ്പാദേസു ഉപ്പജ്ജതി. സീലബ്ബതപരാമാസോ കായഗന്ഥോ ച ഇദംസച്ചാഭിനിവേസോ കായഗന്ഥോ ച ചതൂസു ദിട്ഠിഗതസമ്പയുത്തേസു ചിത്തുപ്പാദേസു ഉപ്പജ്ജന്തി – ഇമേ ധമ്മാ ഗന്ഥാ.
1489. Katame dhammā ganthā? Cattāro ganthā – abhijjhākāyagantho, byāpādo kāyagantho, sīlabbataparāmāso kāyagantho, idaṃsaccābhiniveso kāyagantho. Abhijjhākāyagantho aṭṭhasu lobhasahagatesu cittuppādesu uppajjati. Byāpādo kāyagantho dvīsu domanassasahagatesu cittuppādesu uppajjati. Sīlabbataparāmāso kāyagantho ca idaṃsaccābhiniveso kāyagantho ca catūsu diṭṭhigatasampayuttesu cittuppādesu uppajjanti – ime dhammā ganthā.
൧൪൯൦. കതമേ ധമ്മാ നോ ഗന്ഥാ? ഠപേത്വാ ഗന്ഥേ, അവസേസം അകുസലം, ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ നോ ഗന്ഥാ.
1490. Katame dhammā no ganthā? Ṭhapetvā ganthe, avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no ganthā.
൧൪൯൧. കതമേ ധമ്മാ ഗന്ഥനിയാ? തീസു ഭൂമീസു കുസലം, അകുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ ഗന്ഥനിയാ.
1491. Katame dhammā ganthaniyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā ganthaniyā.
൧൪൯൨. കതമേ ധമ്മാ അഗന്ഥനിയാ? ചത്താരോ മഗ്ഗാ അപരിയാപന്നാ, ചത്താരി ച സാമഞ്ഞഫലാനി, നിബ്ബാനഞ്ച – ഇമേ ധമ്മാ അഗന്ഥനിയാ.
1492. Katame dhammā aganthaniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā aganthaniyā.
൧൪൯൩. കതമേ ധമ്മാ ഗന്ഥസമ്പയുത്താ? ചത്താരോ ദിട്ഠിഗതസമ്പയുത്തചിത്തുപ്പാദാ , ചത്താരോ ദിട്ഠിഗതവിപ്പയുത്തലോഭസഹഗതചിത്തുപ്പാദാ, ഏത്ഥുപ്പന്നം ലോഭം ഠപേത്വാ, ദ്വേ ദോമനസ്സസഹഗതചിത്തുപ്പാദാ, ഏത്ഥുപ്പന്നം പടിഘം ഠപേത്വാ – ഇമേ ധമ്മാ ഗന്ഥസമ്പയുത്താ.
1493. Katame dhammā ganthasampayuttā? Cattāro diṭṭhigatasampayuttacittuppādā , cattāro diṭṭhigatavippayuttalobhasahagatacittuppādā, etthuppannaṃ lobhaṃ ṭhapetvā, dve domanassasahagatacittuppādā, etthuppannaṃ paṭighaṃ ṭhapetvā – ime dhammā ganthasampayuttā.
൧൪൯൪. കതമേ ധമ്മാ ഗന്ഥവിപ്പയുത്താ? ചതൂസു ദിട്ഠിഗതവിപ്പയുത്തലോഭസഹഗതേസു ചിത്തുപ്പാദേസു ഉപ്പന്നോ ലോഭോ, ദ്വീസു ദോമനസ്സസഹഗതേസു ചിത്തുപ്പാദേസു ഉപ്പന്നം പടിഘം, വിചികിച്ഛാസഹഗതോ ചിത്തുപ്പാദോ, ഉദ്ധച്ചസഹഗതോ ചിത്തുപ്പാദോ, ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ ഗന്ഥവിപ്പയുത്താ.
1494. Katame dhammā ganthavippayuttā? Catūsu diṭṭhigatavippayuttalobhasahagatesu cittuppādesu uppanno lobho, dvīsu domanassasahagatesu cittuppādesu uppannaṃ paṭighaṃ, vicikicchāsahagato cittuppādo, uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā ganthavippayuttā.
൧൪൯൫. കതമേ ധമ്മാ ഗന്ഥാ ചേവ ഗന്ഥനിയാ ച? തേവ ഗന്ഥാ ഗന്ഥാ ചേവ ഗന്ഥനിയാ ച.
1495. Katame dhammā ganthā ceva ganthaniyā ca? Teva ganthā ganthā ceva ganthaniyā ca.
൧൪൯൬. കതമേ ധമ്മാ ഗന്ഥനിയാ ചേവ നോ ച ഗന്ഥാ? ഠപേത്വാ ഗന്ഥേ അവസേസം അകുസലം, തീസു ഭൂമീസു കുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ ഗന്ഥനിയാ ചേവ നോ ച ഗന്ഥാ. അഗന്ഥനിയാ ധമ്മാ ന വത്തബ്ബാ – ഗന്ഥാ ചേവ ഗന്ഥനിയാ ചാതിപി, ഗന്ഥനിയാ ചേവ നോ ച ഗന്ഥാതിപി.
1496. Katame dhammā ganthaniyā ceva no ca ganthā? Ṭhapetvā ganthe avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā ganthaniyā ceva no ca ganthā. Aganthaniyā dhammā na vattabbā – ganthā ceva ganthaniyā cātipi, ganthaniyā ceva no ca ganthātipi.
൧൪൯൭. കതമേ ധമ്മാ ഗന്ഥാ ചേവ ഗന്ഥസമ്പയുത്താ ച? യത്ഥ ദിട്ഠി ച ലോഭോ ച ഏകതോ ഉപ്പജ്ജന്തി – ഇമേ ധമ്മാ ഗന്ഥാ ചേവ ഗന്ഥസമ്പയുത്താ ച.
1497. Katame dhammā ganthā ceva ganthasampayuttā ca? Yattha diṭṭhi ca lobho ca ekato uppajjanti – ime dhammā ganthā ceva ganthasampayuttā ca.
൧൪൯൮. കതമേ ധമ്മാ ഗന്ഥസമ്പയുത്താ ചേവ നോ ച ഗന്ഥാ? അട്ഠ ലോഭസഹഗതചിത്തുപ്പാദാ ദ്വേ ദോമനസ്സസഹഗതചിത്തുപ്പാദാ, ഏത്ഥുപ്പന്നേ ഗന്ഥേ ഠപേത്വാ – ഇമേ ധമ്മാ ഗന്ഥസമ്പയുത്താ ചേവ നോ ച ഗന്ഥാ. ഗന്ഥവിപ്പയുത്താ ധമ്മാ ന വത്തബ്ബാ – ഗന്ഥാ ചേവ ഗന്ഥസമ്പയുത്താ ചാതിപി, ഗന്ഥസമ്പയുത്താ ചേവ നോ ച ഗന്ഥാതിപി.
1498. Katame dhammā ganthasampayuttā ceva no ca ganthā? Aṭṭha lobhasahagatacittuppādā dve domanassasahagatacittuppādā, etthuppanne ganthe ṭhapetvā – ime dhammā ganthasampayuttā ceva no ca ganthā. Ganthavippayuttā dhammā na vattabbā – ganthā ceva ganthasampayuttā cātipi, ganthasampayuttā ceva no ca ganthātipi.
൧൪൯൯. കതമേ ധമ്മാ ഗന്ഥവിപ്പയുത്താ ഗന്ഥനിയാ? ചതൂസു ദിട്ഠിഗതവിപ്പയുത്തലോഭസഹഗതേസു ചിത്തുപ്പാദേസു ഉപ്പന്നോ ലോഭോ, ദ്വീസു ദോമനസ്സസഹഗതേസു ചിത്തുപ്പാദേസു ഉപ്പന്നം പടിഘം, വിചികിച്ഛാസഹഗതോ ചിത്തുപ്പാദോ, ഉദ്ധച്ചസഹഗതോ ചിത്തുപ്പാദോ, തീസു ഭൂമീസു കുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ ഗന്ഥവിപ്പയുത്താ ഗന്ഥനിയാ.
1499. Katame dhammā ganthavippayuttā ganthaniyā? Catūsu diṭṭhigatavippayuttalobhasahagatesu cittuppādesu uppanno lobho, dvīsu domanassasahagatesu cittuppādesu uppannaṃ paṭighaṃ, vicikicchāsahagato cittuppādo, uddhaccasahagato cittuppādo, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā ganthavippayuttā ganthaniyā.
൧൫൦൦. കതമേ ധമ്മാ ഗന്ഥവിപ്പയുത്താ അഗന്ഥനിയാ? ചത്താരോ മഗ്ഗാ അപരിയാപന്നാ, ചത്താരി ച സാമഞ്ഞഫലാനി, നിബ്ബാനഞ്ച – ഇമേ ധമ്മാ ഗന്ഥവിപ്പയുത്താ അഗന്ഥനിയാ. ഗന്ഥസമ്പയുത്താ ധമ്മാ ന വത്തബ്ബാ – ഗന്ഥവിപ്പയുത്താ ഗന്ഥനിയാതിപി, ഗന്ഥവിപ്പയുത്താ അഗന്ഥനിയാതിപി.
1500. Katame dhammā ganthavippayuttā aganthaniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā ganthavippayuttā aganthaniyā. Ganthasampayuttā dhammā na vattabbā – ganthavippayuttā ganthaniyātipi, ganthavippayuttā aganthaniyātipi.
ഓഘഗോച്ഛകം
Oghagocchakaṃ
൧൫൦൧. കതമേ ധമ്മാ ഓഘാ…പേ॰….
1501. Katame dhammā oghā…pe….
യോഗഗോച്ഛകം
Yogagocchakaṃ
൧൫൦൨. കതമേ ധമ്മാ യോഗാ…പേ॰….
1502. Katame dhammā yogā…pe….
നീവരണഗോച്ഛകം
Nīvaraṇagocchakaṃ
൧൫൦൩. കതമേ ധമ്മാ നീവരണാ? ഛ നീവരണാ – കാമച്ഛന്ദനീവരണം, ബ്യാപാദനീവരണം, ഥിനമിദ്ധനീവരണം, ഉദ്ധച്ചകുക്കുച്ചനീവരണം, വിചികിച്ഛാനീവരണം, അവിജ്ജാനീവരണം . കാമച്ഛന്ദനീവരണം അട്ഠസു ലോഭസഹഗതേസു ചിത്തുപ്പാദേസു ഉപ്പജ്ജതി, ബ്യാപാദനീവരണം ദ്വീസു ദോമനസ്സസഹഗതേസു ചിത്തുപ്പാദേസു ഉപ്പജ്ജതി, ഥിനമിദ്ധനീവരണം സസങ്ഖാരികേസു അകുസലേസു ഉപ്പജ്ജതി, ഉദ്ധച്ചനീവരണം ഉദ്ധച്ചസഹഗതേസു ചിത്തുപ്പാദേസു ഉപ്പജ്ജതി, കുക്കുച്ചനീവരണം ദ്വീസു ദോമനസ്സസഹഗതേസു ചിത്തുപ്പാദേസു ഉപ്പജ്ജതി, വിചികിച്ഛാനീവരണം വിചികിച്ഛാസഹഗതേസു ചിത്തുപ്പാദേസു ഉപ്പജ്ജതി, അവിജ്ജാനീവരണം സബ്ബാകുസലേസു ഉപ്പജ്ജതി – ഇമേ ധമ്മാ നീവരണാ.
1503. Katame dhammā nīvaraṇā? Cha nīvaraṇā – kāmacchandanīvaraṇaṃ, byāpādanīvaraṇaṃ, thinamiddhanīvaraṇaṃ, uddhaccakukkuccanīvaraṇaṃ, vicikicchānīvaraṇaṃ, avijjānīvaraṇaṃ . Kāmacchandanīvaraṇaṃ aṭṭhasu lobhasahagatesu cittuppādesu uppajjati, byāpādanīvaraṇaṃ dvīsu domanassasahagatesu cittuppādesu uppajjati, thinamiddhanīvaraṇaṃ sasaṅkhārikesu akusalesu uppajjati, uddhaccanīvaraṇaṃ uddhaccasahagatesu cittuppādesu uppajjati, kukkuccanīvaraṇaṃ dvīsu domanassasahagatesu cittuppādesu uppajjati, vicikicchānīvaraṇaṃ vicikicchāsahagatesu cittuppādesu uppajjati, avijjānīvaraṇaṃ sabbākusalesu uppajjati – ime dhammā nīvaraṇā.
൧൫൦൪. കതമേ ധമ്മാ നോ നീവരണാ? ഠപേത്വാ നീവരണേ അവസേസം അകുസലം, ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ നോ നീവരണാ.
1504. Katame dhammā no nīvaraṇā? Ṭhapetvā nīvaraṇe avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no nīvaraṇā.
൧൫൦൫. കതമേ ധമ്മാ നീവരണിയാ? തീസു ഭൂമീസു കുസലം, അകുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ നീവരണിയാ.
1505. Katame dhammā nīvaraṇiyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā nīvaraṇiyā.
൧൫൦൬. കതമേ ധമ്മാ അനീവരണിയാ? ചത്താരോ മഗ്ഗാ അപരിയാപന്നാ, ചത്താരി ച സാമഞ്ഞഫലാനി, നിബ്ബാനഞ്ച – ഇമേ ധമ്മാ അനീവരണിയാ.
1506. Katame dhammā anīvaraṇiyā? Cattāro maggā apariyāpannā, cattāri ca sāmaññaphalāni, nibbānañca – ime dhammā anīvaraṇiyā.
൧൫൦൭. കതമേ ധമ്മാ നീവരണസമ്പയുത്താ? ദ്വാദസ അകുസലചിത്തുപ്പാദാ – ഇമേ ധമ്മാ നീവരണസമ്പയുത്താ.
1507. Katame dhammā nīvaraṇasampayuttā? Dvādasa akusalacittuppādā – ime dhammā nīvaraṇasampayuttā.
൧൫൦൮. കതമേ ധമ്മാ നീവരണവിപ്പയുത്താ? ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ നീവരണവിപ്പയുത്താ.
1508. Katame dhammā nīvaraṇavippayuttā? Catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā nīvaraṇavippayuttā.
൧൫൦൯. കതമേ ധമ്മാ നീവരണാ ചേവ നീവരണിയാ ച? താനേവ നീവരണാനി നീവരണാ ചേവ നീവരണിയാ ച.
1509. Katame dhammā nīvaraṇā ceva nīvaraṇiyā ca? Tāneva nīvaraṇāni nīvaraṇā ceva nīvaraṇiyā ca.
൧൫൧൦. കതമേ ധമ്മാ നീവരണിയാ ചേവ നോ ച നീവരണാ? ഠപേത്വാ നീവരണേ, അവസേസം അകുസലം, തീസു ഭൂമീസു കുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ നീവരണിയാ ചേവ നോ ച നീവരണാ. അനീവരണിയാ ധമ്മാ ന വത്തബ്ബാ – നീവരണാ ചേവ നീവരണിയാ ചാതിപി, നീവരണിയാ ചേവ നോ ച നീവരണാതിപി.
1510. Katame dhammā nīvaraṇiyā ceva no ca nīvaraṇā? Ṭhapetvā nīvaraṇe, avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā nīvaraṇiyā ceva no ca nīvaraṇā. Anīvaraṇiyā dhammā na vattabbā – nīvaraṇā ceva nīvaraṇiyā cātipi, nīvaraṇiyā ceva no ca nīvaraṇātipi.
൧൫൧൧. കതമേ ധമ്മാ നീവരണാ ചേവ നീവരണസമ്പയുത്താ ച? യത്ഥ ദ്വേ തീണി നീവരണാനി ഏകതോ ഉപ്പജ്ജന്തി – ഇമേ ധമ്മാ നീവരണാ ചേവ നീവരണസമ്പയുത്താ ച.
1511. Katame dhammā nīvaraṇā ceva nīvaraṇasampayuttā ca? Yattha dve tīṇi nīvaraṇāni ekato uppajjanti – ime dhammā nīvaraṇā ceva nīvaraṇasampayuttā ca.
൧൫൧൨. കതമേ ധമ്മാ നീവരണസമ്പയുത്താ ചേവ നോ ച നീവരണാ? ഠപേത്വാ നീവരണേ, അവസേസം അകുസലം – ഇമേ ധമ്മാ നീവരണസമ്പയുത്താ ചേവ നോ ച നീവരണാ. നീവരണവിപ്പയുത്താ ധമ്മാ ന വത്തബ്ബാ – നീവരണാ ചേവ നീവരണസമ്പയുത്താ ചാതിപി, നീവരണസമ്പയുത്താ ചേവ നോ ച നീവരണാതിപി.
1512. Katame dhammā nīvaraṇasampayuttā ceva no ca nīvaraṇā? Ṭhapetvā nīvaraṇe, avasesaṃ akusalaṃ – ime dhammā nīvaraṇasampayuttā ceva no ca nīvaraṇā. Nīvaraṇavippayuttā dhammā na vattabbā – nīvaraṇā ceva nīvaraṇasampayuttā cātipi, nīvaraṇasampayuttā ceva no ca nīvaraṇātipi.
൧൫൧൩. കതമേ ധമ്മാ നീവരണവിപ്പയുത്താ നീവരണിയാ? തീസു ഭൂമീസു കുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ നീവരണവിപ്പയുത്താ നീവരണിയാ.
1513. Katame dhammā nīvaraṇavippayuttā nīvaraṇiyā? Tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā nīvaraṇavippayuttā nīvaraṇiyā.
൧൫൧൪. കതമേ ധമ്മാ നീവരണവിപ്പയുത്താ അനീവരണിയാ? ചത്താരോ മഗ്ഗാ അപരിയാപന്നാ, ചത്താരി ച സാമഞ്ഞഫലാനി, നിബ്ബാനഞ്ച – ഇമേ ധമ്മാ നീവരണവിപ്പയുത്താ അനീവരണിയാ. നീവരണസമ്പയുത്താ ധമ്മാ ന വത്തബ്ബാ – നീവരണവിപ്പയുത്താ നീവരണിയാതിപി, നീവരണവിപ്പയുത്താ അനീവരണിയാതിപി.
1514. Katame dhammā nīvaraṇavippayuttā anīvaraṇiyā? Cattāro maggā apariyāpannā, cattāri ca sāmaññaphalāni, nibbānañca – ime dhammā nīvaraṇavippayuttā anīvaraṇiyā. Nīvaraṇasampayuttā dhammā na vattabbā – nīvaraṇavippayuttā nīvaraṇiyātipi, nīvaraṇavippayuttā anīvaraṇiyātipi.
പരാമാസഗോച്ഛകം
Parāmāsagocchakaṃ
൧൫൧൫. കതമേ ധമ്മാ പരാമാസാ? ദിട്ഠിപരാമാസോ ചതൂസു ദിട്ഠിഗതസമ്പയുത്തേസു ചിത്തുപ്പാദേസു ഉപ്പജ്ജതി – ഇമേ ധമ്മാ പരാമാസാ.
1515. Katame dhammā parāmāsā? Diṭṭhiparāmāso catūsu diṭṭhigatasampayuttesu cittuppādesu uppajjati – ime dhammā parāmāsā.
൧൫൧൬. കതമേ ധമ്മാ നോ പരാമാസാ? ഠപേത്വാ പരാമാസം അവസേസം അകുസലം, ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ നോ പരാമാസാ.
1516. Katame dhammā no parāmāsā? Ṭhapetvā parāmāsaṃ avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no parāmāsā.
൧൫൧൭. കതമേ ധമ്മാ പരാമട്ഠാ? തീസു ഭൂമീസു കുസലം, അകുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ പരാമട്ഠാ.
1517. Katame dhammā parāmaṭṭhā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā parāmaṭṭhā.
൧൫൧൮. കതമേ ധമ്മാ അപരാമട്ഠാ? ചത്താരോ മഗ്ഗാ അപരിയാപന്നാ, ചത്താരി ച സാമഞ്ഞഫലാനി നിബ്ബാനഞ്ച – ഇമേ ധമ്മാ അപരാമട്ഠാ.
1518. Katame dhammā aparāmaṭṭhā? Cattāro maggā apariyāpannā, cattāri ca sāmaññaphalāni nibbānañca – ime dhammā aparāmaṭṭhā.
൧൫൧൯. കതമേ ധമ്മാ പരാമാസസമ്പയുത്താ? ചത്താരോ ദിട്ഠിഗതസമ്പയുത്തചിത്തുപ്പാദാ, ഏത്ഥുപ്പന്നം പരാമാസം ഠപേത്വാ – ഇമേ ധമ്മാ പരാമാസസമ്പയുത്താ.
1519. Katame dhammā parāmāsasampayuttā? Cattāro diṭṭhigatasampayuttacittuppādā, etthuppannaṃ parāmāsaṃ ṭhapetvā – ime dhammā parāmāsasampayuttā.
൧൫൨൦. കതമേ ധമ്മാ പരാമാസവിപ്പയുത്താ? ചത്താരോ ദിട്ഠിഗതവിപ്പയുത്തലോഭസഹഗതചിത്തുപ്പാദാ , ദ്വേ ദോമനസ്സസഹഗതചിത്തുപ്പാദാ, വിചികിച്ഛാസഹഗതോ ചിത്തുപ്പാദോ, ഉദ്ധച്ചസഹഗതോ ചിത്തുപ്പാദോ, ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ പരാമാസവിപ്പയുത്താ. പരാമാസോ ന വത്തബ്ബോ – പരാമാസസമ്പയുത്തോതിപി, പരാമാസവിപ്പയുത്തോതിപി.
1520. Katame dhammā parāmāsavippayuttā? Cattāro diṭṭhigatavippayuttalobhasahagatacittuppādā , dve domanassasahagatacittuppādā, vicikicchāsahagato cittuppādo, uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā parāmāsavippayuttā. Parāmāso na vattabbo – parāmāsasampayuttotipi, parāmāsavippayuttotipi.
൧൫൨൧. കതമേ ധമ്മാ പരാമാസാ ചേവ പരാമട്ഠാ ച? സോ ഏവ പരാമാസോ പരാമാസോ ചേവ പരാമട്ഠോ ച.
1521. Katame dhammā parāmāsā ceva parāmaṭṭhā ca? So eva parāmāso parāmāso ceva parāmaṭṭho ca.
൧൫൨൨. കതമേ ധമ്മാ പരാമട്ഠാ ചേവ നോ ച പരാമാസാ? ഠപേത്വാ പരാമാസം അവസേസം അകുസലം, തീസു ഭൂമീസു കുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ പരാമട്ഠാ ചേവ നോ ച പരാമാസാ. അപരാമട്ഠാ ധമ്മാ ന വത്തബ്ബാ – പരാമാസാ ചേവ പരാമട്ഠാ ചാതിപി, പരാമട്ഠാ ചേവ നോ ച പരാമാസാതിപി.
1522. Katame dhammā parāmaṭṭhā ceva no ca parāmāsā? Ṭhapetvā parāmāsaṃ avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā parāmaṭṭhā ceva no ca parāmāsā. Aparāmaṭṭhā dhammā na vattabbā – parāmāsā ceva parāmaṭṭhā cātipi, parāmaṭṭhā ceva no ca parāmāsātipi.
൧൫൨൩. കതമേ ധമ്മാ പരാമാസവിപ്പയുത്താ പരാമട്ഠാ? ചത്താരോ ദിട്ഠിഗതവിപ്പയുത്തലോഭസഹഗതചിത്തുപ്പാദാ, ദ്വേ ദോമനസ്സസഹഗതചിത്തുപ്പാദാ, വിചികിച്ഛാസഹഗതോ ചിത്തുപ്പാദോ, ഉദ്ധച്ചസഹഗതോ ചിത്തുപ്പാദോ, തീസു ഭൂമീസു കുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ പരാമാസവിപ്പയുത്താ പരാമട്ഠാ.
1523. Katame dhammā parāmāsavippayuttā parāmaṭṭhā? Cattāro diṭṭhigatavippayuttalobhasahagatacittuppādā, dve domanassasahagatacittuppādā, vicikicchāsahagato cittuppādo, uddhaccasahagato cittuppādo, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā parāmāsavippayuttā parāmaṭṭhā.
൧൫൨൪. കതമേ ധമ്മാ പരാമാസവിപ്പയുത്താ അപരാമട്ഠാ? ചത്താരോ മഗ്ഗാ അപരിയാപന്നാ, ചത്താരി ച സാമഞ്ഞഫലാനി, നിബ്ബാനഞ്ച – ഇമേ ധമ്മാ പരാമാസവിപ്പയുത്താ അപരാമട്ഠാ. പരാമാസാ ച പരാമാസസമ്പയുത്താ ച ധമ്മാ ന വത്തബ്ബാ – പരാമാസവിപ്പയുത്താ പരാമട്ഠാതിപി, പരാമാസവിപ്പയുത്താ അപരാമട്ഠാതിപി.
1524. Katame dhammā parāmāsavippayuttā aparāmaṭṭhā? Cattāro maggā apariyāpannā, cattāri ca sāmaññaphalāni, nibbānañca – ime dhammā parāmāsavippayuttā aparāmaṭṭhā. Parāmāsā ca parāmāsasampayuttā ca dhammā na vattabbā – parāmāsavippayuttā parāmaṭṭhātipi, parāmāsavippayuttā aparāmaṭṭhātipi.
മഹന്തരദുകം
Mahantaradukaṃ
൧൫൨൫. കതമേ ധമ്മാ സാരമ്മണാ? ചതൂസു ഭൂമീസു കുസലം, അകുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം – ഇമേ ധമ്മാ സാരമ്മണാ.
1525. Katame dhammā sārammaṇā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ – ime dhammā sārammaṇā.
൧൫൨൬. കതമേ ധമ്മാ അനാരമ്മണാ? രൂപഞ്ച, നിബ്ബാനഞ്ച – ഇമേ ധമ്മാ അനാരമ്മണാ.
1526. Katame dhammā anārammaṇā? Rūpañca, nibbānañca – ime dhammā anārammaṇā.
൧൫൨൭. കതമേ ധമ്മാ ചിത്താ? ചക്ഖുവിഞ്ഞാണം, സോതവിഞ്ഞാണം, ഘാനവിഞ്ഞാണം, ജിവ്ഹാവിഞ്ഞാണം, കായവിഞ്ഞാണം, മനോധാതു, മനോവിഞ്ഞാണധാതു – ഇമേ ധമ്മാ ചിത്താ.
1527. Katame dhammā cittā? Cakkhuviññāṇaṃ, sotaviññāṇaṃ, ghānaviññāṇaṃ, jivhāviññāṇaṃ, kāyaviññāṇaṃ, manodhātu, manoviññāṇadhātu – ime dhammā cittā.
൧൫൨൮. കതമേ ധമ്മാ നോ ചിത്താ? വേദനാക്ഖന്ധോ, സഞ്ഞാക്ഖന്ധോ, സങ്ഖാരക്ഖന്ധോ, രൂപഞ്ച, നിബ്ബാനഞ്ച – ഇമേ ധമ്മാ നോ ചിത്താ.
1528. Katame dhammā no cittā? Vedanākkhandho, saññākkhandho, saṅkhārakkhandho, rūpañca, nibbānañca – ime dhammā no cittā.
൧൫൨൯. കതമേ ധമ്മാ ചേതസികാ? വേദനാക്ഖന്ധോ, സഞ്ഞാക്ഖന്ധോ, സങ്ഖാരക്ഖന്ധോ – ഇമേ ധമ്മാ ചേതസികാ.
1529. Katame dhammā cetasikā? Vedanākkhandho, saññākkhandho, saṅkhārakkhandho – ime dhammā cetasikā.
൧൫൩൦. കതമേ ധമ്മാ അചേതസികാ? ചിത്തഞ്ച, രൂപഞ്ച, നിബ്ബാനഞ്ച – ഇമേ ധമ്മാ അചേതസികാ.
1530. Katame dhammā acetasikā? Cittañca, rūpañca, nibbānañca – ime dhammā acetasikā.
൧൫൩൧. കതമേ ധമ്മാ ചിത്തസമ്പയുത്താ? വേദനാക്ഖന്ധോ, സഞ്ഞാക്ഖന്ധോ, സങ്ഖാരക്ഖന്ധോ – ഇമേ ധമ്മാ ചിത്തസമ്പയുത്താ.
1531. Katame dhammā cittasampayuttā? Vedanākkhandho, saññākkhandho, saṅkhārakkhandho – ime dhammā cittasampayuttā.
൧൫൩൨. കതമേ ധമ്മാ ചിത്തവിപ്പയുത്താ? രൂപഞ്ച, നിബ്ബാനഞ്ച – ഇമേ ധമ്മാ ചിത്തവിപ്പയുത്താ. ചിത്തം ന വത്തബ്ബം – ചിത്തേന സമ്പയുത്തന്തിപി, ചിത്തേന വിപ്പയുത്തന്തിപി.
1532. Katame dhammā cittavippayuttā? Rūpañca, nibbānañca – ime dhammā cittavippayuttā. Cittaṃ na vattabbaṃ – cittena sampayuttantipi, cittena vippayuttantipi.
൧൫൩൩. കതമേ ധമ്മാ ചിത്തസംസട്ഠാ? വേദനാക്ഖന്ധോ, സഞ്ഞാക്ഖന്ധോ, സങ്ഖാരക്ഖന്ധോ – ഇമേ ധമ്മാ ചിത്തസംസട്ഠാ.
1533. Katame dhammā cittasaṃsaṭṭhā? Vedanākkhandho, saññākkhandho, saṅkhārakkhandho – ime dhammā cittasaṃsaṭṭhā.
൧൫൩൪. കതമേ ധമ്മാ ചിത്തവിസംസട്ഠാ? രൂപഞ്ച, നിബ്ബാനഞ്ച – ഇമേ ധമ്മാ ചിത്തവിസംസട്ഠാ. ചിത്തം ന വത്തബ്ബം – ചിത്തേന സംസട്ഠന്തിപി, ചിത്തേന വിസംസട്ഠന്തിപി.
1534. Katame dhammā cittavisaṃsaṭṭhā? Rūpañca, nibbānañca – ime dhammā cittavisaṃsaṭṭhā. Cittaṃ na vattabbaṃ – cittena saṃsaṭṭhantipi, cittena visaṃsaṭṭhantipi.
൧൫൩൫. കതമേ ധമ്മാ ചിത്തസമുട്ഠാനാ? വേദനാക്ഖന്ധോ, സഞ്ഞാക്ഖന്ധോ, സങ്ഖാരക്ഖന്ധോ, കായവിഞ്ഞത്തി, വചീവിഞ്ഞത്തി, യം വാ പനഞ്ഞമ്പി അത്ഥി രൂപം ചിത്തജം ചിത്തഹേതുകം ചിത്തസമുട്ഠാനം – രൂപായതനം സദ്ദായതനം ഗന്ധായതനം രസായതനം ഫോട്ഠബ്ബായതനം ആകാസധാതു ആപോധാതു രൂപസ്സ ലഹുതാ രൂപസ്സ മുദുതാ രൂപസ്സ കമ്മഞ്ഞതാ രൂപസ്സ ഉപചയോ രൂപസ്സ സന്തതി കബളീകാരോ ആഹാരോ – ഇമേ ധമ്മാ ചിത്തസമുട്ഠാനാ.
1535. Katame dhammā cittasamuṭṭhānā? Vedanākkhandho, saññākkhandho, saṅkhārakkhandho, kāyaviññatti, vacīviññatti, yaṃ vā panaññampi atthi rūpaṃ cittajaṃ cittahetukaṃ cittasamuṭṭhānaṃ – rūpāyatanaṃ saddāyatanaṃ gandhāyatanaṃ rasāyatanaṃ phoṭṭhabbāyatanaṃ ākāsadhātu āpodhātu rūpassa lahutā rūpassa mudutā rūpassa kammaññatā rūpassa upacayo rūpassa santati kabaḷīkāro āhāro – ime dhammā cittasamuṭṭhānā.
൧൫൩൬. കതമേ ധമ്മാ നോ ചിത്തസമുട്ഠാനാ? ചിത്തഞ്ച, അവസേസഞ്ച രൂപം, നിബ്ബാനഞ്ച – ഇമേ ധമ്മാ നോ ചിത്തസമുട്ഠാനാ.
1536. Katame dhammā no cittasamuṭṭhānā? Cittañca, avasesañca rūpaṃ, nibbānañca – ime dhammā no cittasamuṭṭhānā.
൧൫൩൭. കതമേ ധമ്മാ ചിത്തസഹഭുനോ? വേദനാക്ഖന്ധോ, സഞ്ഞാക്ഖന്ധോ, സങ്ഖാരക്ഖന്ധോ, കായവിഞ്ഞത്തി, വചീവിഞ്ഞത്തി – ഇമേ ധമ്മാ ചിത്തസഹഭുനോ.
1537. Katame dhammā cittasahabhuno? Vedanākkhandho, saññākkhandho, saṅkhārakkhandho, kāyaviññatti, vacīviññatti – ime dhammā cittasahabhuno.
൧൫൩൮. കതമേ ധമ്മാ നോ ചിത്തസഹഭുനോ? ചിത്തഞ്ച, അവസേസഞ്ച രൂപം, നിബ്ബാനഞ്ച – ഇമേ ധമ്മാ നോ ചിത്തസഹഭുനോ.
1538. Katame dhammā no cittasahabhuno? Cittañca, avasesañca rūpaṃ, nibbānañca – ime dhammā no cittasahabhuno.
൧൫൩൯. കതമേ ധമ്മാ ചിത്താനുപരിവത്തിനോ? വേദനാക്ഖന്ധോ, സഞ്ഞാക്ഖന്ധോ, സങ്ഖാരക്ഖന്ധോ, കായവിഞ്ഞത്തി, വചീവിഞ്ഞത്തി – ഇമേ ധമ്മാ ചിത്താനുപരിവത്തിനോ.
1539. Katame dhammā cittānuparivattino? Vedanākkhandho, saññākkhandho, saṅkhārakkhandho, kāyaviññatti, vacīviññatti – ime dhammā cittānuparivattino.
൧൫൪൦. കതമേ ധമ്മാ നോ ചിത്താനുപരിവത്തിനോ? ചിത്തഞ്ച, അവസേസഞ്ച രൂപം, നിബ്ബാനഞ്ച – ഇമേ ധമ്മാ നോ ചിത്താനുപരിവത്തിനോ.
1540. Katame dhammā no cittānuparivattino? Cittañca, avasesañca rūpaṃ, nibbānañca – ime dhammā no cittānuparivattino.
൧൫൪൧. കതമേ ധമ്മാ ചിത്തസംസട്ഠസമുട്ഠാനാ? വേദനാക്ഖന്ധോ , സഞ്ഞാക്ഖന്ധോ, സങ്ഖാരക്ഖന്ധോ – ഇമേ ധമ്മാ ചിത്തസംസട്ഠസമുട്ഠാനാ.
1541. Katame dhammā cittasaṃsaṭṭhasamuṭṭhānā? Vedanākkhandho , saññākkhandho, saṅkhārakkhandho – ime dhammā cittasaṃsaṭṭhasamuṭṭhānā.
൧൫൪൨. കതമേ ധമ്മാ നോ ചിത്തസംസട്ഠസമുട്ഠാനാ? ചിത്തഞ്ച, രൂപഞ്ച, നിബ്ബാനഞ്ച – ഇമേ ധമ്മാ നോ ചിത്തസംസട്ഠസമുട്ഠാനാ.
1542. Katame dhammā no cittasaṃsaṭṭhasamuṭṭhānā? Cittañca, rūpañca, nibbānañca – ime dhammā no cittasaṃsaṭṭhasamuṭṭhānā.
൧൫൪൩. കതമേ ധമ്മാ ചിത്തസംസട്ഠസമുട്ഠാനസഹഭുനോ? വേദനാക്ഖന്ധോ, സഞ്ഞാക്ഖന്ധോ, സങ്ഖാരക്ഖന്ധോ – ഇമേ ധമ്മാ ചിത്തസംസട്ഠസമുട്ഠാനസഹഭുനോ.
1543. Katame dhammā cittasaṃsaṭṭhasamuṭṭhānasahabhuno? Vedanākkhandho, saññākkhandho, saṅkhārakkhandho – ime dhammā cittasaṃsaṭṭhasamuṭṭhānasahabhuno.
൧൫൪൪. കതമേ ധമ്മാ നോ ചിത്തസംസട്ഠസമുട്ഠാനസഹഭുനോ? ചിത്തഞ്ച, രൂപഞ്ച , നിബ്ബാനഞ്ച – ഇമേ ധമ്മാ നോ ചിത്തസംസട്ഠസമുട്ഠാനസഹഭുനോ.
1544. Katame dhammā no cittasaṃsaṭṭhasamuṭṭhānasahabhuno? Cittañca, rūpañca , nibbānañca – ime dhammā no cittasaṃsaṭṭhasamuṭṭhānasahabhuno.
൧൫൪൫. കതമേ ധമ്മാ ചിത്തസംസട്ഠസമുട്ഠാനാനുപരിവത്തിനോ? വേദനാക്ഖന്ധോ, സഞ്ഞാക്ഖന്ധോ, സങ്ഖാരക്ഖന്ധോ – ഇമേ ധമ്മാ ചിത്തസംസട്ഠസമുട്ഠാനാനുപരിവത്തിനോ.
1545. Katame dhammā cittasaṃsaṭṭhasamuṭṭhānānuparivattino? Vedanākkhandho, saññākkhandho, saṅkhārakkhandho – ime dhammā cittasaṃsaṭṭhasamuṭṭhānānuparivattino.
൧൫൪൬. കതമേ ധമ്മാ നോ ചിത്തസംസട്ഠസമുട്ഠാനാനുപരിവത്തിനോ? ചിത്തഞ്ച, രൂപഞ്ച, നിബ്ബാനഞ്ച – ഇമേ ധമ്മാ നോ ചിത്തസംസട്ഠസമുട്ഠാനാനുപരിവത്തിനോ.
1546. Katame dhammā no cittasaṃsaṭṭhasamuṭṭhānānuparivattino? Cittañca, rūpañca, nibbānañca – ime dhammā no cittasaṃsaṭṭhasamuṭṭhānānuparivattino.
൧൫൪൭. കതമേ ധമ്മാ അജ്ഝത്തികാ? ചക്ഖായതനം…പേ॰… മനായതനം – ഇമേ ധമ്മാ അജ്ഝത്തികാ.
1547. Katame dhammā ajjhattikā? Cakkhāyatanaṃ…pe… manāyatanaṃ – ime dhammā ajjhattikā.
൧൫൪൮. കതമേ ധമ്മാ ബാഹിരാ? രൂപായതനം…പേ॰… ധമ്മായതനം – ഇമേ ധമ്മാ ബാഹിരാ.
1548. Katame dhammā bāhirā? Rūpāyatanaṃ…pe… dhammāyatanaṃ – ime dhammā bāhirā.
൧൫൪൯. കതമേ ധമ്മാ ഉപാദാ? ചക്ഖായതനം…പേ॰… കബളീകാരോ ആഹാരോ – ഇമേ ധമ്മാ ഉപാദാ.
1549. Katame dhammā upādā? Cakkhāyatanaṃ…pe… kabaḷīkāro āhāro – ime dhammā upādā.
൧൫൫൦. കതമേ ധമ്മാ നോ ഉപാദാ? ചതൂസു ഭൂമീസു കുസലം, അകുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, ചത്താരോ ച മഹാഭൂതാ, നിബ്ബാനഞ്ച – ഇമേ ധമ്മാ നോ ഉപാദാ.
1550. Katame dhammā no upādā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, cattāro ca mahābhūtā, nibbānañca – ime dhammā no upādā.
൧൫൫൧. കതമേ ധമ്മാ ഉപാദിണ്ണാ? തീസു ഭൂമീസു വിപാകോ, യഞ്ച രൂപം കമ്മസ്സ കതത്താ – ഇമേ ധമ്മാ ഉപാദിണ്ണാ.
1551. Katame dhammā upādiṇṇā? Tīsu bhūmīsu vipāko, yañca rūpaṃ kammassa katattā – ime dhammā upādiṇṇā.
൧൫൫൨. കതമേ ധമ്മാ അനുപാദിണ്ണാ? തീസു ഭൂമീസു കുസലം, അകുസലം, തീസു ഭൂമീസു കിരിയാബ്യാകതം, യഞ്ച രൂപം ന കമ്മസ്സ കതത്താ, ചത്താരോ മഗ്ഗാ അപരിയാപന്നാ, ചത്താരി ച സാമഞ്ഞഫലാനി, നിബ്ബാനഞ്ച – ഇമേ ധമ്മാ അനുപാദിണ്ണാ.
1552. Katame dhammā anupādiṇṇā? Tīsu bhūmīsu kusalaṃ, akusalaṃ, tīsu bhūmīsu kiriyābyākataṃ, yañca rūpaṃ na kammassa katattā, cattāro maggā apariyāpannā, cattāri ca sāmaññaphalāni, nibbānañca – ime dhammā anupādiṇṇā.
ഉപാദാനഗോച്ഛകം
Upādānagocchakaṃ
൧൫൫൩. കതമേ ധമ്മാ ഉപാദാനാ? ചത്താരി ഉപാദാനാനി – കാമുപാദാനം , ദിട്ഠുപാദാനം, സീലബ്ബതുപാദാനം, അത്തവാദുപാദാനം. കാമുപാദാനം അട്ഠസു ലോഭസഹഗതേസു ചിത്തുപ്പാദേസു ഉപ്പജ്ജതി. ദിട്ഠുപാദാനഞ്ച സീലബ്ബതുപാദാനഞ്ച അത്തവാദുപാദാനഞ്ച ചതൂസു ദിട്ഠിഗതസമ്പയുത്തേസു ചിത്തുപ്പാദേസു ഉപ്പജ്ജന്തി – ഇമേ ധമ്മാ ഉപാദാനാ.
1553. Katame dhammā upādānā? Cattāri upādānāni – kāmupādānaṃ , diṭṭhupādānaṃ, sīlabbatupādānaṃ, attavādupādānaṃ. Kāmupādānaṃ aṭṭhasu lobhasahagatesu cittuppādesu uppajjati. Diṭṭhupādānañca sīlabbatupādānañca attavādupādānañca catūsu diṭṭhigatasampayuttesu cittuppādesu uppajjanti – ime dhammā upādānā.
൧൫൫൪. കതമേ ധമ്മാ നോ ഉപാദാനാ? ഠപേത്വാ ഉപാദാനേ അവസേസം അകുസലം, ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ നോ ഉപാദാനാ.
1554. Katame dhammā no upādānā? Ṭhapetvā upādāne avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no upādānā.
൧൫൫൫. കതമേ ധമ്മാ ഉപാദാനിയാ? തീസു ഭൂമീസു കുസലം, അകുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ ഉപാദാനിയാ.
1555. Katame dhammā upādāniyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā upādāniyā.
൧൫൫൬. കതമേ ധമ്മാ അനുപാദാനിയാ? ചത്താരോ മഗ്ഗാ അപരിയാപന്നാ, ചത്താരി ച സാമഞ്ഞഫലാനി, നിബ്ബാനഞ്ച – ഇമേ ധമ്മാ അനുപാദാനിയാ.
1556. Katame dhammā anupādāniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā anupādāniyā.
൧൫൫൭. കതമേ ധമ്മാ ഉപാദാനസമ്പയുത്താ? ചത്താരോ ദിട്ഠിഗതസമ്പയുത്തലോഭസഹഗതചിത്തുപ്പാദാ, ചത്താരോ ദിട്ഠിഗതവിപ്പയുത്തലോഭസഹഗതചിത്തുപ്പാദാ, ഏത്ഥുപ്പന്നം ലോഭം ഠപേത്വാ – ഇമേ ധമ്മാ ഉപാദാനസമ്പയുത്താ.
1557. Katame dhammā upādānasampayuttā? Cattāro diṭṭhigatasampayuttalobhasahagatacittuppādā, cattāro diṭṭhigatavippayuttalobhasahagatacittuppādā, etthuppannaṃ lobhaṃ ṭhapetvā – ime dhammā upādānasampayuttā.
൧൫൫൮. കതമേ ധമ്മാ ഉപാദാനവിപ്പയുത്താ? ചതൂസു ദിട്ഠിഗതവിപ്പയുത്തലോഭസഹഗതേസു ചിത്തുപ്പാദേസു ഉപ്പന്നോ ലോഭോ, ദ്വേ ദോമനസ്സസഹഗതചിത്തുപ്പാദാ, വിചികിച്ഛാസഹഗതോ ചിത്തുപ്പാദോ, ഉദ്ധച്ചസഹഗതോ ചിത്തുപ്പാദോ, ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ ഉപാദാനവിപ്പയുത്താ.
1558. Katame dhammā upādānavippayuttā? Catūsu diṭṭhigatavippayuttalobhasahagatesu cittuppādesu uppanno lobho, dve domanassasahagatacittuppādā, vicikicchāsahagato cittuppādo, uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā upādānavippayuttā.
൧൫൫൯. കതമേ ധമ്മാ ഉപാദാനാ ചേവ ഉപാദാനിയാ ച? താനേവ ഉപാദാനാനി ഉപാദാനാ ചേവ ഉപാദാനിയാ ച.
1559. Katame dhammā upādānā ceva upādāniyā ca? Tāneva upādānāni upādānā ceva upādāniyā ca.
൧൫൬൦. കതമേ ധമ്മാ ഉപാദാനിയാ ചേവ നോ ച ഉപാദാനാ? ഠപേത്വാ ഉപാദാനേ അവസേസം അകുസലം, തീസു ഭൂമീസു കുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ ഉപാദാനിയാ ചേവ നോ ച ഉപാദാനാ . അനുപാദാനിയാ ധമ്മാ ന വത്തബ്ബാ – ഉപാദാനാ ചേവ ഉപാദാനിയാ ചാതിപി, ഉപാദാനിയാ ചേവ നോ ച ഉപാദാനാതിപി.
1560. Katame dhammā upādāniyā ceva no ca upādānā? Ṭhapetvā upādāne avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā upādāniyā ceva no ca upādānā . Anupādāniyā dhammā na vattabbā – upādānā ceva upādāniyā cātipi, upādāniyā ceva no ca upādānātipi.
൧൫൬൧. കതമേ ധമ്മാ ഉപാദാനാ ചേവ ഉപാദാനസമ്പയുത്താ ച? യത്ഥ ദിട്ഠി ച ലോഭോ ച ഏകതോ ഉപ്പജ്ജന്തി – ഇമേ ധമ്മാ ഉപാദാനാ ചേവ ഉപാദാനസമ്പയുത്താ ച.
1561. Katame dhammā upādānā ceva upādānasampayuttā ca? Yattha diṭṭhi ca lobho ca ekato uppajjanti – ime dhammā upādānā ceva upādānasampayuttā ca.
൧൫൬൨. കതമേ ധമ്മാ ഉപാദാനസമ്പയുത്താ ചേവ നോ ച ഉപാദാനാ? അട്ഠ ലോഭസഹഗതചിത്തുപ്പാദാ, ഏത്ഥുപ്പന്നേ ഉപാദാനേ ഠപേത്വാ – ഇമേ ധമ്മാ ഉപാദാനസമ്പയുത്താ ചേവ നോ ച ഉപാദാനാ. ഉപാദാനവിപ്പയുത്താ ധമ്മാ ന വത്തബ്ബാ – ഉപാദാനാ ചേവ ഉപാദാനസമ്പയുത്താ ചാതിപി, ഉപാദാനസമ്പയുത്താ ചേവ നോ ച ഉപാദാനാതിപി.
1562. Katame dhammā upādānasampayuttā ceva no ca upādānā? Aṭṭha lobhasahagatacittuppādā, etthuppanne upādāne ṭhapetvā – ime dhammā upādānasampayuttā ceva no ca upādānā. Upādānavippayuttā dhammā na vattabbā – upādānā ceva upādānasampayuttā cātipi, upādānasampayuttā ceva no ca upādānātipi.
൧൫൬൩. കതമേ ധമ്മാ ഉപാദാനവിപ്പയുത്താ ഉപാദാനിയാ? ചതൂസു ദിട്ഠിഗതവിപ്പയുത്തലോഭസഹഗതേസു ചിത്തുപ്പാദേസു ഉപ്പന്നോ ലോഭോ, ദ്വേ ദോമനസ്സസഹഗതചിത്തുപ്പാദാ, വിചികിച്ഛാസഹഗതോ ചിത്തുപ്പാദോ, ഉദ്ധച്ചസഹഗതോ ചിത്തുപ്പാദോ, തീസു ഭൂമീസു കുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ ഉപാദാനവിപ്പയുത്താ ഉപാദാനിയാ.
1563. Katame dhammā upādānavippayuttā upādāniyā? Catūsu diṭṭhigatavippayuttalobhasahagatesu cittuppādesu uppanno lobho, dve domanassasahagatacittuppādā, vicikicchāsahagato cittuppādo, uddhaccasahagato cittuppādo, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā upādānavippayuttā upādāniyā.
൧൫൬൪. കതമേ ധമ്മാ ഉപാദാനവിപ്പയുത്താ അനുപാദാനിയാ? ചത്താരോ മഗ്ഗാ അപരിയാപന്നാ, ചത്താരി ച സാമഞ്ഞഫലാനി, നിബ്ബാനഞ്ച – ഇമേ ധമ്മാ ഉപാദാനവിപ്പയുത്താ അനുപാദാനിയാ. ഉപാദാനസമ്പയുത്താ ധമ്മാ ന വത്തബ്ബാ – ഉപാദാനവിപ്പയുത്താ ഉപാദാനിയാതിപി, ഉപാദാനവിപ്പയുത്താ അനുപാദാനിയാതിപി.
1564. Katame dhammā upādānavippayuttā anupādāniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā upādānavippayuttā anupādāniyā. Upādānasampayuttā dhammā na vattabbā – upādānavippayuttā upādāniyātipi, upādānavippayuttā anupādāniyātipi.
കിലേസഗോച്ഛകം
Kilesagocchakaṃ
൧൫൬൫. കതമേ ധമ്മാ കിലേസാ? ദസ കിലേസവത്ഥൂനി – ലോഭോ, ദോസോ, മോഹോ, മാനോ, ദിട്ഠി, വിചികിച്ഛാ, ഥിനം, ഉദ്ധച്ചം, അഹിരികം, അനോത്തപ്പം. ലോഭോ അട്ഠസു ലോഭസഹഗതേസു ചിത്തുപ്പാദേസു ഉപ്പജ്ജതി. ദോസോ ദ്വീസു ദോമനസ്സസഹഗതേസു ചിത്തുപ്പാദേസു ഉപ്പജ്ജതി. മോഹോ സബ്ബാകുസലേസു ഉപ്പജ്ജതി. മാനോ ചതൂസു ദിട്ഠിഗതവിപ്പയുത്തലോഭസഹഗതേസു ചിത്തുപ്പാദേസു ഉപ്പജ്ജതി. ദിട്ഠി ചതൂസു ദിട്ഠിഗതസമ്പയുത്തേസു ചിത്തുപ്പാദേസു ഉപ്പജ്ജതി. വിചികിച്ഛാ വിചികിച്ഛാസഹഗതേസു ചിത്തുപ്പാദേസു ഉപ്പജ്ജതി. ഥിനം സസങ്ഖാരികേസു അകുസലേസു ഉപ്പജ്ജതി. ഉദ്ധച്ചഞ്ച അഹിരികഞ്ച അനോത്തപ്പഞ്ച സബ്ബാകുസലേസു ഉപ്പജ്ജന്തി – ഇമേ ധമ്മാ കിലേസാ.
1565. Katame dhammā kilesā? Dasa kilesavatthūni – lobho, doso, moho, māno, diṭṭhi, vicikicchā, thinaṃ, uddhaccaṃ, ahirikaṃ, anottappaṃ. Lobho aṭṭhasu lobhasahagatesu cittuppādesu uppajjati. Doso dvīsu domanassasahagatesu cittuppādesu uppajjati. Moho sabbākusalesu uppajjati. Māno catūsu diṭṭhigatavippayuttalobhasahagatesu cittuppādesu uppajjati. Diṭṭhi catūsu diṭṭhigatasampayuttesu cittuppādesu uppajjati. Vicikicchā vicikicchāsahagatesu cittuppādesu uppajjati. Thinaṃ sasaṅkhārikesu akusalesu uppajjati. Uddhaccañca ahirikañca anottappañca sabbākusalesu uppajjanti – ime dhammā kilesā.
൧൫൬൬. കതമേ ധമ്മാ നോ കിലേസാ? ഠപേത്വാ കിലേസേ അവസേസം അകുസലം, ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ നോ കിലേസാ.
1566. Katame dhammā no kilesā? Ṭhapetvā kilese avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no kilesā.
൧൫൬൭. കതമേ ധമ്മാ സംകിലേസികാ? തീസു ഭൂമീസു കുസലം, അകുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം സബ്ബഞ്ച രൂപം – ഇമേ ധമ്മാ സംകിലേസികാ.
1567. Katame dhammā saṃkilesikā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ sabbañca rūpaṃ – ime dhammā saṃkilesikā.
൧൫൬൮. കതമേ ധമ്മാ അസംകിലേസികാ? ചത്താരോ മഗ്ഗാ അപരിയാപന്നാ, ചത്താരി ച സാമഞ്ഞഫലാനി, നിബ്ബാനഞ്ച – ഇമേ ധമ്മാ അസംകിലേസികാ.
1568. Katame dhammā asaṃkilesikā? Cattāro maggā apariyāpannā, cattāri ca sāmaññaphalāni, nibbānañca – ime dhammā asaṃkilesikā.
൧൫൬൯. കതമേ ധമ്മാ സംകിലിട്ഠാ? ദ്വാദസ അകുസലചിത്തുപ്പാദാ – ഇമേ ധമ്മാ സംകിലിട്ഠാ.
1569. Katame dhammā saṃkiliṭṭhā? Dvādasa akusalacittuppādā – ime dhammā saṃkiliṭṭhā.
൧൫൭൦. കതമേ ധമ്മാ അസംകിലിട്ഠാ? ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ അസംകിലിട്ഠാ.
1570. Katame dhammā asaṃkiliṭṭhā? Catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā asaṃkiliṭṭhā.
൧൫൭൧. കതമേ ധമ്മാ കിലേസസമ്പയുത്താ? ദ്വാദസ അകുസലചിത്തുപ്പാദാ – ഇമേ ധമ്മാ കിലേസസമ്പയുത്താ.
1571. Katame dhammā kilesasampayuttā? Dvādasa akusalacittuppādā – ime dhammā kilesasampayuttā.
൧൫൭൨. കതമേ ധമ്മാ കിലേസവിപ്പയുത്താ? ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ കിലേസവിപ്പയുത്താ.
1572. Katame dhammā kilesavippayuttā? Catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā kilesavippayuttā.
൧൫൭൩. കതമേ ധമ്മാ കിലേസാ ചേവ സംകിലേസികാ ച? തേവ കിലേസാ കിലേസാ ചേവ സംകിലേസികാ ച.
1573. Katame dhammā kilesā ceva saṃkilesikā ca? Teva kilesā kilesā ceva saṃkilesikā ca.
൧൫൭൪. കതമേ ധമ്മാ സംകിലേസികാ ചേവ നോ ച കിലേസാ? ഠപേത്വാ കിലേസേ അവസേസം അകുസലം, തീസു ഭൂമീസു കുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ സംകിലേസികാ ചേവ നോ ച കിലേസാ. അസംകിലേസികാ ധമ്മാ ന വത്തബ്ബാ – കിലേസാ ചേവ സംകിലേസികാ ചാതിപി, സംകിലേസികാ ചേവ നോ ച കിലേസാതിപി.
1574. Katame dhammā saṃkilesikā ceva no ca kilesā? Ṭhapetvā kilese avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṃkilesikā ceva no ca kilesā. Asaṃkilesikā dhammā na vattabbā – kilesā ceva saṃkilesikā cātipi, saṃkilesikā ceva no ca kilesātipi.
൧൫൭൫. കതമേ ധമ്മാ കിലേസാ ചേവ സംകിലിട്ഠാ ച? തേവ കിലേസാ കിലേസാ ചേവ സംകിലിട്ഠാ ച.
1575. Katame dhammā kilesā ceva saṃkiliṭṭhā ca? Teva kilesā kilesā ceva saṃkiliṭṭhā ca.
൧൫൭൬. കതമേ ധമ്മാ സംകിലിട്ഠാ ചേവ നോ ച കിലേസാ? ഠപേത്വാ കിലേസേ അവസേസം അകുസലം – ഇമേ ധമ്മാ സംകിലിട്ഠാ ചേവ നോ ച കിലേസാ . അസംകിലിട്ഠാ ധമ്മാ ന വത്തബ്ബാ – കിലേസാ ചേവ സംകിലിട്ഠാ ചാതിപി, സംകിലിട്ഠാ ചേവ നോ ച കിലേസാതിപി.
1576. Katame dhammā saṃkiliṭṭhā ceva no ca kilesā? Ṭhapetvā kilese avasesaṃ akusalaṃ – ime dhammā saṃkiliṭṭhā ceva no ca kilesā . Asaṃkiliṭṭhā dhammā na vattabbā – kilesā ceva saṃkiliṭṭhā cātipi, saṃkiliṭṭhā ceva no ca kilesātipi.
൧൫൭൭. കതമേ ധമ്മാ കിലേസാ ചേവ കിലേസസമ്പയുത്താ ച? യത്ഥ ദ്വേ തയോ കിലേസാ ഏകതോ ഉപ്പജ്ജന്തി – ഇമേ ധമ്മാ കിലേസാ ചേവ കിലേസസമ്പയുത്താ ച.
1577. Katame dhammā kilesā ceva kilesasampayuttā ca? Yattha dve tayo kilesā ekato uppajjanti – ime dhammā kilesā ceva kilesasampayuttā ca.
൧൫൭൮. കതമേ ധമ്മാ കിലേസസമ്പയുത്താ ചേവ നോ ച കിലേസാ? ഠപേത്വാ കിലേസേ അവസേസം അകുസലം – ഇമേ ധമ്മാ കിലേസസമ്പയുത്താ ചേവ നോ ച കിലേസാ. കിലേസവിപ്പയുത്താ ധമ്മാ ന വത്തബ്ബാ – കിലേസാ ചേവ കിലേസസമ്പയുത്താ ചാതിപി, കിലേസസമ്പയുത്താ ചേവ നോ ച കിലേസാതിപി.
1578. Katame dhammā kilesasampayuttā ceva no ca kilesā? Ṭhapetvā kilese avasesaṃ akusalaṃ – ime dhammā kilesasampayuttā ceva no ca kilesā. Kilesavippayuttā dhammā na vattabbā – kilesā ceva kilesasampayuttā cātipi, kilesasampayuttā ceva no ca kilesātipi.
൧൫൭൯. കതമേ ധമ്മാ കിലേസവിപ്പയുത്താ സംകിലേസികാ? തീസു ഭൂമീസു കുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ കിലേസവിപ്പയുത്താ സംകിലേസികാ.
1579. Katame dhammā kilesavippayuttā saṃkilesikā? Tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā kilesavippayuttā saṃkilesikā.
൧൫൮൦. കതമേ ധമ്മാ കിലേസവിപ്പയുത്താ അസംകിലേസികാ? ചത്താരോ മഗ്ഗാ അപരിയാപന്നാ , ചത്താരി ച സാമഞ്ഞഫലാനി, നിബ്ബാനഞ്ച – ഇമേ ധമ്മാ കിലേസവിപ്പയുത്താ അസംകിലേസികാ. കിലേസസമ്പയുത്താ ധമ്മാ ന വത്തബ്ബാ – കിലേസവിപ്പയുത്താ സംകിലേസികാതിപി, കിലേസവിപ്പയുത്താ അസംകിലേസികാതിപി.
1580. Katame dhammā kilesavippayuttā asaṃkilesikā? Cattāro maggā apariyāpannā , cattāri ca sāmaññaphalāni, nibbānañca – ime dhammā kilesavippayuttā asaṃkilesikā. Kilesasampayuttā dhammā na vattabbā – kilesavippayuttā saṃkilesikātipi, kilesavippayuttā asaṃkilesikātipi.
പിട്ഠിദുകം
Piṭṭhidukaṃ
൧൫൮൧. കതമേ ധമ്മാ ദസ്സനേന പഹാതബ്ബാ? ചത്താരോ ദിട്ഠിഗതസമ്പയുത്തചിത്തുപ്പാദാ, വിചികിച്ഛാസഹഗതോ ചിത്തുപ്പാദോ – ഇമേ ധമ്മാ ദസ്സനേന പഹാതബ്ബാ. ചത്താരോ ദിട്ഠിഗതവിപ്പയുത്തലോഭസഹഗതചിത്തുപ്പാദാ, ദ്വേ ദോമനസ്സസഹഗതചിത്തുപ്പാദാ – ഇമേ ധമ്മാ സിയാ ദസ്സനേന പഹാതബ്ബാ, സിയാ ന ദസ്സനേന പഹാതബ്ബാ.
1581. Katame dhammā dassanena pahātabbā? Cattāro diṭṭhigatasampayuttacittuppādā, vicikicchāsahagato cittuppādo – ime dhammā dassanena pahātabbā. Cattāro diṭṭhigatavippayuttalobhasahagatacittuppādā, dve domanassasahagatacittuppādā – ime dhammā siyā dassanena pahātabbā, siyā na dassanena pahātabbā.
൧൫൮൨. കതമേ ധമ്മാ ന ദസ്സനേന പഹാതബ്ബാ? ഉദ്ധച്ചസഹഗതോ ചിത്തുപ്പാദോ, ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ ന ദസ്സനേന പഹാതബ്ബാ.
1582. Katame dhammā na dassanena pahātabbā? Uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na dassanena pahātabbā.
൧൫൮൩. കതമേ ധമ്മാ ഭാവനായ പഹാതബ്ബാ? ഉദ്ധച്ചസഹഗതോ ചിത്തുപ്പാദോ – ഇമേ ധമ്മാ ഭാവനായ പഹാതബ്ബാ. ചത്താരോ ദിട്ഠിഗതവിപ്പയുത്തലോഭസഹഗതചിത്തുപ്പാദാ, ദ്വേ ദോമനസ്സസഹഗതചിത്തുപ്പാദാ – ഇമേ ധമ്മാ സിയാ ഭാവനായ പഹാതബ്ബാ, സിയാ ന ഭാവനായ പഹാതബ്ബാ.
1583. Katame dhammā bhāvanāya pahātabbā? Uddhaccasahagato cittuppādo – ime dhammā bhāvanāya pahātabbā. Cattāro diṭṭhigatavippayuttalobhasahagatacittuppādā, dve domanassasahagatacittuppādā – ime dhammā siyā bhāvanāya pahātabbā, siyā na bhāvanāya pahātabbā.
൧൫൮൪. കതമേ ധമ്മാ ന ഭാവനായ പഹാതബ്ബാ? ചത്താരോ ദിട്ഠിഗതസമ്പയുത്തചിത്തുപ്പാദാ, വിചികിച്ഛാസഹഗതോ ചിത്തുപ്പാദോ, ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ ന ഭാവനായ പഹാതബ്ബാ.
1584. Katame dhammā na bhāvanāya pahātabbā? Cattāro diṭṭhigatasampayuttacittuppādā, vicikicchāsahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na bhāvanāya pahātabbā.
൧൫൮൫. കതമേ ധമ്മാ ദസ്സനേന പഹാതബ്ബഹേതുകാ? ചത്താരോ ദിട്ഠിഗതസമ്പയുത്തചിത്തുപ്പാദാ, വിചികിച്ഛാസഹഗതോ ചിത്തുപ്പാദോ, ഏത്ഥുപ്പന്നം മോഹം ഠപേത്വാ – ഇമേ ധമ്മാ ദസ്സനേന പഹാതബ്ബഹേതുകാ. ചത്താരോ ദിട്ഠിഗതവിപ്പയുത്തലോഭസഹഗതചിത്തുപ്പാദാ, ദ്വേ ദോമനസ്സസഹഗതചിത്തുപ്പാദാ – ഇമേ ധമ്മാ സിയാ ദസ്സനേന പഹാതബ്ബഹേതുകാ, സിയാ ന ദസ്സനേന പഹാതബ്ബഹേതുകാ.
1585. Katame dhammā dassanena pahātabbahetukā? Cattāro diṭṭhigatasampayuttacittuppādā, vicikicchāsahagato cittuppādo, etthuppannaṃ mohaṃ ṭhapetvā – ime dhammā dassanena pahātabbahetukā. Cattāro diṭṭhigatavippayuttalobhasahagatacittuppādā, dve domanassasahagatacittuppādā – ime dhammā siyā dassanena pahātabbahetukā, siyā na dassanena pahātabbahetukā.
൧൫൮൬. കതമേ ധമ്മാ ന ദസ്സനേന പഹാതബ്ബഹേതുകാ? വിചികിച്ഛാസഹഗതോ മോഹോ, ഉദ്ധച്ചസഹഗതോ ചിത്തുപ്പാദോ, ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ ന ദസ്സനേന പഹാതബ്ബഹേതുകാ.
1586. Katame dhammā na dassanena pahātabbahetukā? Vicikicchāsahagato moho, uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na dassanena pahātabbahetukā.
൧൫൮൭. കതമേ ധമ്മാ ഭാവനായ പഹാതബ്ബഹേതുകാ? ഉദ്ധച്ചസഹഗതോ ചിത്തുപ്പാദോ, ഏത്ഥുപ്പന്നം മോഹം ഠപേത്വാ – ഇമേ ധമ്മാ ഭാവനായ പഹാതബ്ബഹേതുകാ. ചത്താരോ ദിട്ഠിഗതവിപ്പയുത്തലോഭസഹഗതചിത്തുപ്പാദാ, ദ്വേ ദോമനസ്സസഹഗതചിത്തുപ്പാദാ – ഇമേ ധമ്മാ സിയാ ഭാവനായ പഹാതബ്ബഹേതുകാ, സിയാ ന ഭാവനായ പഹാതബ്ബഹേതുകാ.
1587. Katame dhammā bhāvanāya pahātabbahetukā? Uddhaccasahagato cittuppādo, etthuppannaṃ mohaṃ ṭhapetvā – ime dhammā bhāvanāya pahātabbahetukā. Cattāro diṭṭhigatavippayuttalobhasahagatacittuppādā, dve domanassasahagatacittuppādā – ime dhammā siyā bhāvanāya pahātabbahetukā, siyā na bhāvanāya pahātabbahetukā.
൧൫൮൮. കതമേ ധമ്മാ ന ഭാവനായ പഹാതബ്ബഹേതുകാ? ചത്താരോ ദിട്ഠിഗതസമ്പയുത്തചിത്തുപ്പാദാ, വിചികിച്ഛാസഹഗതോ ചിത്തുപ്പാദോ, ഉദ്ധച്ചസഹഗതോ മോഹോ, ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ ന ഭാവനായ പഹാതബ്ബഹേതുകാ.
1588. Katame dhammā na bhāvanāya pahātabbahetukā? Cattāro diṭṭhigatasampayuttacittuppādā, vicikicchāsahagato cittuppādo, uddhaccasahagato moho, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na bhāvanāya pahātabbahetukā.
൧൫൮൯. കതമേ ധമ്മാ സവിതക്കാ? കാമാവചരകുസലം, അകുസലം, കാമാവചരകുസലസ്സ വിപാകതോ ഏകാദസ ചിത്തുപ്പാദാ, അകുസലസ്സ വിപാകതോ ദ്വേ, കിരിയതോ ഏകാദസ, രൂപാവചരം പഠമം ഝാനം കുസലതോ ച വിപാകതോ ച കിരിയതോ ച ലോകുത്തരം പഠമം ഝാനം കുസലതോ ച വിപാകതോ ച, ഏത്ഥുപ്പന്നം വിതക്കം ഠപേത്വാ – ഇമേ ധമ്മാ സവിതക്കാ.
1589. Katame dhammā savitakkā? Kāmāvacarakusalaṃ, akusalaṃ, kāmāvacarakusalassa vipākato ekādasa cittuppādā, akusalassa vipākato dve, kiriyato ekādasa, rūpāvacaraṃ paṭhamaṃ jhānaṃ kusalato ca vipākato ca kiriyato ca lokuttaraṃ paṭhamaṃ jhānaṃ kusalato ca vipākato ca, etthuppannaṃ vitakkaṃ ṭhapetvā – ime dhammā savitakkā.
൧൫൯൦. കതമേ ധമ്മാ അവിതക്കാ? ദ്വേപഞ്ചവിഞ്ഞാണാനി, രൂപാവചരതികചതുക്കജ്ഝാനാ കുസലതോ ച വിപാകതോ ച കിരിയതോ ച, ചത്താരോ അരൂപാവചരാ കുസലതോ ച വിപാകതോ ച കിരിയതോ ച, ലോകുത്തരതികചതുക്കജ്ഝാനാ കുസലതോ ച വിപാകതോ ച, വിതക്കോ ച, രൂപഞ്ച, നിബ്ബാനഞ്ച – ഇമേ ധമ്മാ അവിതക്കാ.
1590. Katame dhammā avitakkā? Dvepañcaviññāṇāni, rūpāvacaratikacatukkajjhānā kusalato ca vipākato ca kiriyato ca, cattāro arūpāvacarā kusalato ca vipākato ca kiriyato ca, lokuttaratikacatukkajjhānā kusalato ca vipākato ca, vitakko ca, rūpañca, nibbānañca – ime dhammā avitakkā.
൧൫൯൧. കതമേ ധമ്മാ സവിചാരാ? കാമാവചരകുസലം , അകുസലം, കാമാവചരകുസലസ്സ വിപാകതോ ഏകാദസ ചിത്തുപ്പാദാ, അകുസലസ്സ വിപാകതോ ദ്വേ കിരിയതോ ഏകാദസ, രൂപാവചരഏകകദുകജ്ഝാനാ കുസലതോ ച വിപാകതോ ച കിരിയതോ ച, ലോകുത്തരഏകകദുകജ്ഝാനാ കുസലതോ ച വിപാകതോ ച, ഏത്ഥുപ്പന്നം വിചാരം ഠപേത്വാ – ഇമേ ധമ്മാ സവിചാരാ.
1591. Katame dhammā savicārā? Kāmāvacarakusalaṃ , akusalaṃ, kāmāvacarakusalassa vipākato ekādasa cittuppādā, akusalassa vipākato dve kiriyato ekādasa, rūpāvacaraekakadukajjhānā kusalato ca vipākato ca kiriyato ca, lokuttaraekakadukajjhānā kusalato ca vipākato ca, etthuppannaṃ vicāraṃ ṭhapetvā – ime dhammā savicārā.
൧൫൯൨. കതമേ ധമ്മാ അവിചാരാ? ദ്വേപഞ്ചവിഞ്ഞാണാനി, രൂപാവചരതികതികജ്ഝാനാ കുസലതോ ച വിപാകതോ ച കിരിയതോ ച, ചത്താരോ ആരുപ്പാ കുസലതോ ച വിപാകതോ ച കിരിയതോ ച, ലോകുത്തരതികതികജ്ഝാനാ കുസലതോ ച വിപാകതോ ച, വിചാരോ ച, രൂപഞ്ച, നിബ്ബാനഞ്ച – ഇമേ ധമ്മാ അവിചാരാ.
1592. Katame dhammā avicārā? Dvepañcaviññāṇāni, rūpāvacaratikatikajjhānā kusalato ca vipākato ca kiriyato ca, cattāro āruppā kusalato ca vipākato ca kiriyato ca, lokuttaratikatikajjhānā kusalato ca vipākato ca, vicāro ca, rūpañca, nibbānañca – ime dhammā avicārā.
൧൫൯൩. കതമേ ധമ്മാ സപ്പീതികാ? കാമാവചരകുസലതോ ചത്താരോ സോമനസ്സസഹഗതചിത്തുപ്പാദാ, അകുസലതോ ചത്താരോ, കാമാവചരകുസലസ്സ വിപാകതോ പഞ്ച, കിരിയതോ പഞ്ച, രൂപാവചരദുകതികജ്ഝാനാ കുസലതോ ച വിപാകതോ ച കിരിയതോ ച, ലോകുത്തരദുകതികജ്ഝാനാ കുസലതോ ച വിപാകതോ ച, ഏത്ഥുപ്പന്നം പീതിം ഠപേത്വാ – ഇമേ ധമ്മാ സപ്പീതികാ.
1593. Katame dhammā sappītikā? Kāmāvacarakusalato cattāro somanassasahagatacittuppādā, akusalato cattāro, kāmāvacarakusalassa vipākato pañca, kiriyato pañca, rūpāvacaradukatikajjhānā kusalato ca vipākato ca kiriyato ca, lokuttaradukatikajjhānā kusalato ca vipākato ca, etthuppannaṃ pītiṃ ṭhapetvā – ime dhammā sappītikā.
൧൫൯൪. കതമേ ധമ്മാ അപ്പീതികാ? കാമാവചരകുസലതോ ചത്താരോ ഉപേക്ഖാസഹഗതചിത്തുപ്പാദാ, അകുസലതോ അട്ഠ, കാമാവചരകുസലസ്സ വിപാകതോ ഏകാദസ, അകുസലസ്സ വിപാകതോ സത്ത, കിരിയതോ ഛ, രൂപാവചരദുകദുകജ്ഝാനാ കുസലതോ ച വിപാകതോ ച കിരിയതോ ച, ചത്താരോ ആരുപ്പാ കുസലതോ ച വിപാകതോ ച കിരിയതോ ച, ലോകുത്തരദുകദുകജ്ഝാനാ കുസലതോ ച വിപാകതോ ച പീതി ച, രൂപഞ്ച, നിബ്ബാനഞ്ച – ഇമേ ധമ്മാ അപ്പീതികാ.
1594. Katame dhammā appītikā? Kāmāvacarakusalato cattāro upekkhāsahagatacittuppādā, akusalato aṭṭha, kāmāvacarakusalassa vipākato ekādasa, akusalassa vipākato satta, kiriyato cha, rūpāvacaradukadukajjhānā kusalato ca vipākato ca kiriyato ca, cattāro āruppā kusalato ca vipākato ca kiriyato ca, lokuttaradukadukajjhānā kusalato ca vipākato ca pīti ca, rūpañca, nibbānañca – ime dhammā appītikā.
൧൫൯൫. കതമേ ധമ്മാ പീതിസഹഗതാ? കാമാവചരകുസലതോ ചത്താരോ സോമനസ്സസഹഗതചിത്തുപ്പാദാ, അകുസലതോ ചത്താരോ, കാമാവചരകുസലസ്സ വിപാകതോ പഞ്ച, കിരിയതോ പഞ്ച, രൂപാവചരദുകതികജ്ഝാനാ കുസലതോ ച വിപാകതോ ച കിരിയതോ ച, ലോകുത്തരദുകതികജ്ഝാനാ കുസലതോ ച വിപാകതോ ച, ഏത്ഥുപ്പന്നം പീതിം ഠപേത്വാ – ഇമേ ധമ്മാ പീതിസഹഗതാ.
1595. Katame dhammā pītisahagatā? Kāmāvacarakusalato cattāro somanassasahagatacittuppādā, akusalato cattāro, kāmāvacarakusalassa vipākato pañca, kiriyato pañca, rūpāvacaradukatikajjhānā kusalato ca vipākato ca kiriyato ca, lokuttaradukatikajjhānā kusalato ca vipākato ca, etthuppannaṃ pītiṃ ṭhapetvā – ime dhammā pītisahagatā.
൧൫൯൬. കതമേ ധമ്മാ ന പീതിസഹഗതാ? കാമാവചരകുസലതോ ചത്താരോ ഉപേക്ഖാസഹഗതചിത്തുപ്പാദാ, അകുസലതോ അട്ഠ, കാമാവചരകുസലസ്സ വിപാകതോ ഏകാദസ, അകുസലസ്സ വിപാകതോ സത്ത, കിരിയതോ ഛ, രൂപാവചരദുകദുകജ്ഝാനാ കുസലതോ ച വിപാകതോ ച കിരിയതോ ച, ചത്താരോ ആരുപ്പാ കുസലതോ ച വിപാകതോ ച കിരിയതോ ച, ലോകുത്തരദുകദുകജ്ഝാനാ കുസലതോ ച വിപാകതോ ച, പീതി ച, രൂപഞ്ച, നിബ്ബാനഞ്ച – ഇമേ ധമ്മാ ന പീതിസഹഗതാ.
1596. Katame dhammā na pītisahagatā? Kāmāvacarakusalato cattāro upekkhāsahagatacittuppādā, akusalato aṭṭha, kāmāvacarakusalassa vipākato ekādasa, akusalassa vipākato satta, kiriyato cha, rūpāvacaradukadukajjhānā kusalato ca vipākato ca kiriyato ca, cattāro āruppā kusalato ca vipākato ca kiriyato ca, lokuttaradukadukajjhānā kusalato ca vipākato ca, pīti ca, rūpañca, nibbānañca – ime dhammā na pītisahagatā.
൧൫൯൭. കതമേ ധമ്മാ സുഖസഹഗതാ? കാമാവചരകുസലതോ ചത്താരോ സോമനസ്സസഹഗതചിത്തുപ്പാദാ, അകുസലതോ ചത്താരോ, കാമാവചരകുസലസ്സ വിപാകതോ ഛ, കിരിയതോ പഞ്ച, രൂപാവചരതികചതുക്കജ്ഝാനാ കുസലതോ ച വിപാകതോ ച കിരിയതോ ച ലോകുത്തരതികചതുക്കജ്ഝാനാ കുസലതോ ച വിപാകതോ ച, ഏത്ഥുപ്പന്നം സുഖം ഠപേത്വാ – ഇമേ ധമ്മാ സുഖസഹഗതാ.
1597. Katame dhammā sukhasahagatā? Kāmāvacarakusalato cattāro somanassasahagatacittuppādā, akusalato cattāro, kāmāvacarakusalassa vipākato cha, kiriyato pañca, rūpāvacaratikacatukkajjhānā kusalato ca vipākato ca kiriyato ca lokuttaratikacatukkajjhānā kusalato ca vipākato ca, etthuppannaṃ sukhaṃ ṭhapetvā – ime dhammā sukhasahagatā.
൧൫൯൮. കതമേ ധമ്മാ ന സുഖസഹഗതാ? കാമാവചരകുസലതോ ചത്താരോ ഉപേക്ഖാസഹഗതചിത്തുപ്പാദാ, അകുസലതോ അട്ഠ, കാമാവചരകുസലസ്സ വിപാകതോ ദസ, അകുസലസ്സ വിപാകതോ സത്ത, കിരിയതോ ഛ, രൂപാവചരം ചതുത്ഥം ഝാനം കുസലതോ ച വിപാകതോ ച കിരിയതോ ച, ചത്താരോ ആരുപ്പാ കുസലതോ ച വിപാകതോ ച കിരിയതോ ച ലോകുത്തരം ചതുത്ഥം ഝാനം കുസലതോ ച വിപാകതോ ച, സുഖഞ്ച, രൂപഞ്ച, നിബ്ബാനഞ്ച – ഇമേ ധമ്മാ ന സുഖസഹഗതാ.
1598. Katame dhammā na sukhasahagatā? Kāmāvacarakusalato cattāro upekkhāsahagatacittuppādā, akusalato aṭṭha, kāmāvacarakusalassa vipākato dasa, akusalassa vipākato satta, kiriyato cha, rūpāvacaraṃ catutthaṃ jhānaṃ kusalato ca vipākato ca kiriyato ca, cattāro āruppā kusalato ca vipākato ca kiriyato ca lokuttaraṃ catutthaṃ jhānaṃ kusalato ca vipākato ca, sukhañca, rūpañca, nibbānañca – ime dhammā na sukhasahagatā.
൧൫൯൯. കതമേ ധമ്മാ ഉപേക്ഖാസഹഗതാ? കാമാവചരകുസലതോ ചത്താരോ ഉപേക്ഖാസഹഗതചിത്തുപ്പാദാ, അകുസലതോ ഛ, കാമാവചരകുസലസ്സ വിപാകതോ ദസ, അകുസലസ്സ വിപാകതോ ഛ, കിരിയതോ ഛ , രൂപാവചരം ചതുത്ഥം ഝാനം കുസലതോ ച വിപാകതോ ച കിരിയതോ ച, ചത്താരോ ആരുപ്പാ കുസലതോ ച വിപാകതോ ച കിരിയതോ ച, ലോകുത്തരം ചതുത്ഥം ഝാനം കുസലതോ ച വിപാകതോ ച, ഏത്ഥുപ്പന്നം ഉപേക്ഖം ഠപേത്വാ – ഇമേ ധമ്മാ ഉപേക്ഖാസഹഗതാ.
1599. Katame dhammā upekkhāsahagatā? Kāmāvacarakusalato cattāro upekkhāsahagatacittuppādā, akusalato cha, kāmāvacarakusalassa vipākato dasa, akusalassa vipākato cha, kiriyato cha , rūpāvacaraṃ catutthaṃ jhānaṃ kusalato ca vipākato ca kiriyato ca, cattāro āruppā kusalato ca vipākato ca kiriyato ca, lokuttaraṃ catutthaṃ jhānaṃ kusalato ca vipākato ca, etthuppannaṃ upekkhaṃ ṭhapetvā – ime dhammā upekkhāsahagatā.
൧൬൦൦. കതമേ ധമ്മാ ന ഉപേക്ഖാസഹഗതാ? കാമാവചരകുസലതോ ചത്താരോ സോമനസ്സസഹഗതചിത്തുപ്പാദാ, അകുസലതോ ഛ, കാമാവചരകുസലസ്സ വിപാകതോ ഛ, അകുസലസ്സ വിപാകതോ ഏകോ, കിരിയതോ പഞ്ച, രൂപാവചരതികചതുക്കജ്ഝാനാ കുസലതോ ച വിപാകതോ ച കിരിയതോ ച, ലോകുത്തരതികചതുക്കജ്ഝാനാ കുസലതോ ച വിപാകതോ ച, ഉപേക്ഖാ ച, രൂപഞ്ച, നിബ്ബാനഞ്ച – ഇമേ ധമ്മാ ന ഉപേക്ഖാസഹഗതാ.
1600. Katame dhammā na upekkhāsahagatā? Kāmāvacarakusalato cattāro somanassasahagatacittuppādā, akusalato cha, kāmāvacarakusalassa vipākato cha, akusalassa vipākato eko, kiriyato pañca, rūpāvacaratikacatukkajjhānā kusalato ca vipākato ca kiriyato ca, lokuttaratikacatukkajjhānā kusalato ca vipākato ca, upekkhā ca, rūpañca, nibbānañca – ime dhammā na upekkhāsahagatā.
൧൬൦൧. കതമേ ധമ്മാ കാമാവചരാ? കാമാവചരകുസലം, അകുസലം, സബ്ബോ കാമാവചരസ്സ വിപാകോ, കാമാവചരകിരിയാബ്യാകതം, സബ്ബഞ്ച രൂപം – ഇമേ ധമ്മാ കാമാവചരാ.
1601. Katame dhammā kāmāvacarā? Kāmāvacarakusalaṃ, akusalaṃ, sabbo kāmāvacarassa vipāko, kāmāvacarakiriyābyākataṃ, sabbañca rūpaṃ – ime dhammā kāmāvacarā.
൧൬൦൨. കതമേ ധമ്മാ ന കാമാവചരാ? രൂപാവചരാ , അരൂപാവചരാ, അപരിയാപന്നാ – ഇമേ ധമ്മാ ന കാമാവചരാ.
1602. Katame dhammā na kāmāvacarā? Rūpāvacarā , arūpāvacarā, apariyāpannā – ime dhammā na kāmāvacarā.
൧൬൦൩. കതമേ ധമ്മാ രൂപാവചരാ? രൂപാവചരചതുക്കപഞ്ചകജ്ഝാനാ കുസലതോ ച വിപാകതോ ച കിരിയതോ ച – ഇമേ ധമ്മാ രൂപാവചരാ.
1603. Katame dhammā rūpāvacarā? Rūpāvacaracatukkapañcakajjhānā kusalato ca vipākato ca kiriyato ca – ime dhammā rūpāvacarā.
൧൬൦൪. കതമേ ധമ്മാ ന രൂപാവചരാ? കാമാവചരാ, അരൂപാവചരാ, അപരിയാപന്നാ – ഇമേ ധമ്മാ ന രൂപാവചരാ.
1604. Katame dhammā na rūpāvacarā? Kāmāvacarā, arūpāvacarā, apariyāpannā – ime dhammā na rūpāvacarā.
൧൬൦൫. കതമേ ധമ്മാ അരൂപാവചരാ? ചത്താരോ ആരുപ്പാ കുസലതോ ച വിപാകതോ ച കിരിയതോ ച – ഇമേ ധമ്മാ അരൂപാവചരാ.
1605. Katame dhammā arūpāvacarā? Cattāro āruppā kusalato ca vipākato ca kiriyato ca – ime dhammā arūpāvacarā.
൧൬൦൬. കതമേ ധമ്മാ ന അരൂപാവചരാ? കാമാവചരാ, രൂപാവചരാ, അപരിയാപന്നാ – ഇമേ ധമ്മാ ന അരൂപാവചരാ.
1606. Katame dhammā na arūpāvacarā? Kāmāvacarā, rūpāvacarā, apariyāpannā – ime dhammā na arūpāvacarā.
൧൬൦൭. കതമേ ധമ്മാ പരിയാപന്നാ? തീസു ഭൂമീസു കുസലം, അകുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ പരിയാപന്നാ.
1607. Katame dhammā pariyāpannā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā pariyāpannā.
൧൬൦൮. കതമേ ധമ്മാ അപരിയാപന്നാ? ചത്താരോ മഗ്ഗാ അപരിയാപന്നാ, ചത്താരി ച സാമഞ്ഞഫലാനി, നിബ്ബാനഞ്ച – ഇമേ ധമ്മാ അപരിയാപന്നാ.
1608. Katame dhammā apariyāpannā? Cattāro maggā apariyāpannā, cattāri ca sāmaññaphalāni, nibbānañca – ime dhammā apariyāpannā.
൧൬൦൯. കതമേ ധമ്മാ നിയ്യാനികാ? ചത്താരോ മഗ്ഗാ അപരിയാപന്നാ – ഇമേ ധമ്മാ നിയ്യാനികാ.
1609. Katame dhammā niyyānikā? Cattāro maggā apariyāpannā – ime dhammā niyyānikā.
൧൬൧൦. കതമേ ധമ്മാ അനിയ്യാനികാ? തീസു ഭൂമീസു കുസലം, അകുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ അനിയ്യാനികാ.
1610. Katame dhammā aniyyānikā? Tīsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā aniyyānikā.
൧൬൧൧. കതമേ ധമ്മാ നിയതാ? ചത്താരോ ദിട്ഠിഗതസമ്പയുത്തചിത്തുപ്പാദാ, ദ്വേ ദോമനസ്സസഹഗതചിത്തുപ്പാദാ – ഇമേ ധമ്മാ സിയാ നിയതാ സിയാ അനിയതാ. ചത്താരോ മഗ്ഗാ അപരിയാപന്നാ – ഇമേ ധമ്മാ നിയതാ.
1611. Katame dhammā niyatā? Cattāro diṭṭhigatasampayuttacittuppādā, dve domanassasahagatacittuppādā – ime dhammā siyā niyatā siyā aniyatā. Cattāro maggā apariyāpannā – ime dhammā niyatā.
൧൬൧൨. കതമേ ധമ്മാ അനിയതാ? ചത്താരോ ദിട്ഠിഗതവിപ്പയുത്തലോഭസഹഗതചിത്തുപ്പാദാ, വിചികിച്ഛാസഹഗതോ ചിത്തുപ്പാദോ, ഉദ്ധച്ചസഹഗതോ ചിത്തുപ്പാദോ, തീസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ അനിയതാ.
1612. Katame dhammā aniyatā? Cattāro diṭṭhigatavippayuttalobhasahagatacittuppādā, vicikicchāsahagato cittuppādo, uddhaccasahagato cittuppādo, tīsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā aniyatā.
൧൬൧൩. കതമേ ധമ്മാ സഉത്തരാ? തീസു ഭൂമീസു കുസലം, അകുസലം, തീസു ഭൂമീസു വിപാകോ, തീസു ഭൂമീസു കിരിയാബ്യാകതം, സബ്ബഞ്ച രൂപം – ഇമേ ധമ്മാ സഉത്തരാ.
1613. Katame dhammā sauttarā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā sauttarā.
൧൬൧൪. കതമേ ധമ്മാ അനുത്തരാ? ചത്താരോ മഗ്ഗാ അപരിയാപന്നാ, ചത്താരി ച സാമഞ്ഞഫലാനി, നിബ്ബാനഞ്ച – ഇമേ ധമ്മാ അനുത്തരാ.
1614. Katame dhammā anuttarā? Cattāro maggā apariyāpannā, cattāri ca sāmaññaphalāni, nibbānañca – ime dhammā anuttarā.
൧൬൧൫. കതമേ ധമ്മാ സരണാ? ദ്വാദസ അകുസലചിത്തുപ്പാദാ – ഇമേ ധമ്മാ സരണാ.
1615. Katame dhammā saraṇā? Dvādasa akusalacittuppādā – ime dhammā saraṇā.
൧൬൧൬. കതമേ ധമ്മാ അരണാ? ചതൂസു ഭൂമീസു കുസലം, ചതൂസു ഭൂമീസു വിപാകോ, തീസു ഭൂമീസു കിരിയാബ്യാകതം, രൂപഞ്ച, നിബ്ബാനഞ്ച – ഇമേ ധമ്മാ അരണാ.
1616. Katame dhammā araṇā? Catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā araṇā.
അത്ഥുദ്ധാരോ നിട്ഠിതോ.
Atthuddhāro niṭṭhito.
ധമ്മസങ്ഗണീപകരണം നിട്ഠിതം.
Dhammasaṅgaṇīpakaraṇaṃ niṭṭhitaṃ.
Footnotes:
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / ധമ്മസങ്ഗണി-അട്ഠകഥാ • Dhammasaṅgaṇi-aṭṭhakathā / ദുകഅത്ഥുദ്ധാരവണ്ണനാ • Dukaatthuddhāravaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / ധമ്മസങ്ഗണീ-മൂലടീകാ • Dhammasaṅgaṇī-mūlaṭīkā / ദുകഅത്ഥുദ്ധാരവണ്ണനാ • Dukaatthuddhāravaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / ധമ്മസങ്ഗണീ-അനുടീകാ • Dhammasaṅgaṇī-anuṭīkā / ദുകഅത്ഥുദ്ധാരവണ്ണനാ • Dukaatthuddhāravaṇṇanā
