| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৩. দুব্বণ্ণিযসুত্তৰণ্ণনা
3. Dubbaṇṇiyasuttavaṇṇanā
২৬৮. দুব্বণ্ণো দুদ্দসিকো ৰিরূপৰণ্ণো। ওকোটিমকোতি রস্সভাৰেন অৰরকোটিমকো। সক্কেন গহিতনামমেৰেতং, ন পন সো তথারূপো কোচি যক্খো। তেনাহ ‘‘একো রূপাৰচরব্রহ্মা’’তি। যদি এৰং কস্মা সো তথারূপো হুত্ৰা আগতোতি আহ ‘‘সক্কো কিরা’’তি। কথং পনেত্থ ঞাযতি ‘‘সো একো রূপাৰচরব্রহ্মা, ন পনেসো অৰরুদ্ধকযক্খো’’তি যুত্তিং দস্সেন্তো ‘‘অৰরুদ্ধকযক্খা পনা’’তিআদিমাহ। দেৰানং ৰচনং সুত্ৰা। ফরুসেনাতি ফরুসসমাচারেন। ‘‘কো নাম ময্হং আসনে সন্নিসিন্নো’’তি অক্খন্তিং অনুপ্পাদেন্তো খন্তিযং ঠত্ৰা। বলৰচিত্তীকারন্তি গরুতরং সক্কারবহুমানং। নীচৰুত্তিযাতি পরমনিপচ্চকারে সুৰূপসমনে চ দস্সিযমানে। সক্কস্স তায এৰ আচারসম্পত্তিযা সক্কাসনে ঠাতুং, অত্তনো চ আৰিকাতুং অসক্কোন্তো অন্তরধাযি। উপহতচিত্তোম্হীতি খন্তিমেত্তানুদ্দযাসব্ভাৰতো পরস্মিং উপহতচিত্তোম্হীতি সক্কো অত্তনো সভাৰং ৰদতি। কোধৰসে ৰত্তেতুন্তি কোধেন অত্তনো ৰসে নিব্বত্তেতুং ন সুকরোম্হি, অথ খো কোধং ময্হং ৰসে ন ৰত্তেমীতি অধিপ্পাযো। চিরং ন কুজ্ঝামীতি যদি মে কদাচি কোধো উপ্পজ্জেয্য, তং কোধং অনুৰত্তেন্তো চিরকালং ন কুজ্ঝামি । ন উপনয্হামীতি অন্তো সচে মে কোধো উপ্পজ্জেয্য, খিপ্পমেৰ চ নং পটিৰিনেয্যন্তি তং মে পুব্বেৰ ৰতং পরিপূরিতং।
268.Dubbaṇṇo duddasiko virūpavaṇṇo. Okoṭimakoti rassabhāvena avarakoṭimako. Sakkena gahitanāmamevetaṃ, na pana so tathārūpo koci yakkho. Tenāha ‘‘eko rūpāvacarabrahmā’’ti. Yadi evaṃ kasmā so tathārūpo hutvā āgatoti āha ‘‘sakko kirā’’ti. Kathaṃ panettha ñāyati ‘‘so eko rūpāvacarabrahmā, na paneso avaruddhakayakkho’’ti yuttiṃ dassento ‘‘avaruddhakayakkhā panā’’tiādimāha. Devānaṃ vacanaṃ sutvā. Pharusenāti pharusasamācārena. ‘‘Ko nāma mayhaṃ āsane sannisinno’’ti akkhantiṃ anuppādento khantiyaṃ ṭhatvā. Balavacittīkāranti garutaraṃ sakkārabahumānaṃ. Nīcavuttiyāti paramanipaccakāre suvūpasamane ca dassiyamāne. Sakkassa tāya eva ācārasampattiyā sakkāsane ṭhātuṃ, attano ca āvikātuṃ asakkonto antaradhāyi. Upahatacittomhīti khantimettānuddayāsabbhāvato parasmiṃ upahatacittomhīti sakko attano sabhāvaṃ vadati. Kodhavase vattetunti kodhena attano vase nibbattetuṃ na sukaromhi, atha kho kodhaṃ mayhaṃ vase na vattemīti adhippāyo. Ciraṃ na kujjhāmīti yadi me kadāci kodho uppajjeyya, taṃ kodhaṃ anuvattento cirakālaṃ na kujjhāmi . Na upanayhāmīti anto sace me kodho uppajjeyya, khippameva ca naṃ paṭivineyyanti taṃ me pubbeva vataṃ paripūritaṃ.
দুব্বণ্ণিযসুত্তৰণ্ণনা নিট্ঠিতা।
Dubbaṇṇiyasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ২. দুব্বণ্ণিযসুত্তং • 2. Dubbaṇṇiyasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. দুব্বণ্ণিযসুত্তৰণ্ণনা • 2. Dubbaṇṇiyasuttavaṇṇanā
