| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
২. দেসনাসুত্তং
2. Desanāsuttaṃ
৩৯. ৰুত্তঞ্হেতং ভগৰতা, ৰুত্তমরহতাতি মে সুতং –
39. Vuttañhetaṃ bhagavatā, vuttamarahatāti me sutaṃ –
‘‘তথাগতস্স, ভিক্খৰে, অরহতো সম্মাসম্বুদ্ধস্স দ্ৰে ধম্মদেসনা পরিযাযেন ভৰন্তি। কতমা দ্ৰে? ‘পাপং পাপকতো পস্সথা’তি – অযং পঠমা ধম্মদেসনা; ‘পাপং পাপকতো দিস্ৰা তত্থ নিব্বিন্দথ ৰিরজ্জথ ৰিমুচ্চথা’তি – অযং দুতিযা ধম্মদেসনা। তথাগতস্স, ভিক্খৰে, অরহতো সম্মাসম্বুদ্ধস্স ইমা দ্ৰে ধম্মদেসনা পরিযাযেন ভৰন্তী’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Tathāgatassa, bhikkhave, arahato sammāsambuddhassa dve dhammadesanā pariyāyena bhavanti. Katamā dve? ‘Pāpaṃ pāpakato passathā’ti – ayaṃ paṭhamā dhammadesanā; ‘pāpaṃ pāpakato disvā tattha nibbindatha virajjatha vimuccathā’ti – ayaṃ dutiyā dhammadesanā. Tathāgatassa, bhikkhave, arahato sammāsambuddhassa imā dve dhammadesanā pariyāyena bhavantī’’ti. Etamatthaṃ bhagavā avoca. Tatthetaṃ iti vuccati –
‘‘তথাগতস্স বুদ্ধস্স, সব্বভূতানুকম্পিনো।
‘‘Tathāgatassa buddhassa, sabbabhūtānukampino;
পরিযাযৰচনং পস্স, দ্ৰে চ ধম্মা পকাসিতা॥
Pariyāyavacanaṃ passa, dve ca dhammā pakāsitā.
ততো ৰিরত্তচিত্তাসে, দুক্খস্সন্তং করিস্সথা’’তি॥
Tato virattacittāse, dukkhassantaṃ karissathā’’ti.
অযম্পি অত্থো ৰুত্তো ভগৰতা, ইতি মে সুতন্তি। দুতিযং।
Ayampi attho vutto bhagavatā, iti me sutanti. Dutiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ২. দেসনাসুত্তৰণ্ণনা • 2. Desanāsuttavaṇṇanā
