| Library / Tipiṭaka / ติปิฎก • Tipiṭaka / ปริวารปาฬิ • Parivārapāḷi |
อปรคาถาสงฺคณิกํ
Aparagāthāsaṅgaṇikaṃ
๑. โจทนาทิปุจฺฉาวิสฺสชฺชนา
1. Codanādipucchāvissajjanā
๓๕๙.
359.
โจทนา กิมตฺถาย, สารณา กิสฺส การณา;
Codanā kimatthāya, sāraṇā kissa kāraṇā;
สโงฺฆ กิมตฺถาย, มติกมฺมํ ปน กิสฺส การณาฯ
Saṅgho kimatthāya, matikammaṃ pana kissa kāraṇā.
โจทนา สารณตฺถาย, นิคฺคหตฺถาย สารณา;
Codanā sāraṇatthāya, niggahatthāya sāraṇā;
สโงฺฆ ปริคฺคหตฺถาย, มติกมฺมํ ปน ปาฎิเยกฺกํฯ
Saṅgho pariggahatthāya, matikammaṃ pana pāṭiyekkaṃ.
มา โข ตุริโต อภณิ, มา โข จณฺฑิกโต ภณิ;
Mā kho turito abhaṇi, mā kho caṇḍikato bhaṇi;
มา โข ปฎิฆํ ชนยิ, สเจ อนุวิชฺชโก ตุวํฯ
Mā kho paṭighaṃ janayi, sace anuvijjako tuvaṃ.
มา โข สหสา อภณิ, กถํ วิคฺคาหิกํ อนตฺถสํหิตํ;
Mā kho sahasā abhaṇi, kathaṃ viggāhikaṃ anatthasaṃhitaṃ;
สุเตฺต วินเย อนุโลเม, ปญฺญเตฺต อนุโลมิเกฯ
Sutte vinaye anulome, paññatte anulomike.
อนุโยควตฺตํ นิสามย, กุสเลน พุทฺธิมตา กตํ;
Anuyogavattaṃ nisāmaya, kusalena buddhimatā kataṃ;
สุวุตฺตํ สิกฺขาปทานุโลมิกํ, คติํ น นาเสโนฺต สมฺปรายิกํ;
Suvuttaṃ sikkhāpadānulomikaṃ, gatiṃ na nāsento samparāyikaṃ;
หิเตสี อนุยุญฺชสฺสุ, กาเลนตฺถูปสํหิตํฯ
Hitesī anuyuñjassu, kālenatthūpasaṃhitaṃ.
จุทิตสฺส จ โจทกสฺส จ;
Cuditassa ca codakassa ca;
สหสา โวหารํ มา ปธาเรสิ;
Sahasā vohāraṃ mā padhāresi;
โจทโก อาห อาปโนฺนติ;
Codako āha āpannoti;
จุทิตโก อาห อนาปโนฺนติฯ
Cuditako āha anāpannoti.
อุโภ อนุกฺขิปโนฺต, ปฎิญฺญานุสนฺธิเตน การเย;
Ubho anukkhipanto, paṭiññānusandhitena kāraye;
ปฎิญฺญา ลชฺชีสุ กตา, อลชฺชีสุ เอวํ น วิชฺชติ;
Paṭiññā lajjīsu katā, alajjīsu evaṃ na vijjati;
พหุมฺปิ อลชฺชี ภาเสยฺย, วตฺตานุสนฺธิเตน 1 การเยฯ
Bahumpi alajjī bhāseyya, vattānusandhitena 2 kāraye.
อลชฺชี กีทิโส โหติ, ปฎิญฺญา ยสฺส น รูหติ;
Alajjī kīdiso hoti, paṭiññā yassa na rūhati;
เอตญฺจ 3 ตาหํ ปุจฺฉามิ, กีทิโส วุจฺจติ อลชฺชี ปุคฺคโลฯ
Etañca 4 tāhaṃ pucchāmi, kīdiso vuccati alajjī puggalo.
สญฺจิจฺจ อาปตฺติํ อาปชฺชติ, อาปตฺติํ ปริคูหติ;
Sañcicca āpattiṃ āpajjati, āpattiṃ parigūhati;
อคติคมนญฺจ คจฺฉติ, เอทิโส วุจฺจติ อลชฺชีปุคฺคโลฯ
Agatigamanañca gacchati, ediso vuccati alajjīpuggalo.
สจฺจํ อหมฺปิ ชานามิ, เอทิโส วุจฺจติ อลชฺชีปุคฺคโล;
Saccaṃ ahampi jānāmi, ediso vuccati alajjīpuggalo;
อญฺญญฺจ ตาหํ ปุจฺฉามิ, กีทิโส วุจฺจติ ลชฺชีปุคฺคโลฯ
Aññañca tāhaṃ pucchāmi, kīdiso vuccati lajjīpuggalo.
สญฺจิจฺจ อาปตฺติํ นาปชฺชติ, อาปตฺติํ น ปริคูหติ;
Sañcicca āpattiṃ nāpajjati, āpattiṃ na parigūhati;
อคติคมนํ น คจฺฉติ, เอทิโส วุจฺจติ ลชฺชีปุคฺคโลฯ
Agatigamanaṃ na gacchati, ediso vuccati lajjīpuggalo.
สจฺจํ อหมฺปิ ชานามิ, เอทิโส วุจฺจติ ลชฺชีปุคฺคโล;
Saccaṃ ahampi jānāmi, ediso vuccati lajjīpuggalo;
อญฺญญฺจ ตาหํ ปุจฺฉามิ, กีทิโส วุจฺจติ อธมฺมโจทโกฯ
Aññañca tāhaṃ pucchāmi, kīdiso vuccati adhammacodako.
อกาเล โจเทติ อภูเตน;
Akāle codeti abhūtena;
ผรุเสน อนตฺถสํหิเตน;
Pharusena anatthasaṃhitena;
โทสนฺตโร โจเทติ โน เมตฺตาจิโตฺต;
Dosantaro codeti no mettācitto;
เอทิโส วุจฺจติ อธมฺมโจทโกฯ
Ediso vuccati adhammacodako.
สจฺจํ อหมฺปิ ชานามิ, เอทิโส วุจฺจติ อธมฺมโจทโก;
Saccaṃ ahampi jānāmi, ediso vuccati adhammacodako;
อญฺญญฺจ ตาหํ ปุจฺฉามิ, กีทิโส วุจฺจติ ธมฺมโจทโกฯ
Aññañca tāhaṃ pucchāmi, kīdiso vuccati dhammacodako.
กาเลน โจเทติ ภูเตน, สเณฺหน อตฺถสํหิเตน;
Kālena codeti bhūtena, saṇhena atthasaṃhitena;
เมตฺตาจิโตฺต โจเทติ โน โทสนฺตโร;
Mettācitto codeti no dosantaro;
เอทิโส วุจฺจติ ธมฺมโจทโกฯ
Ediso vuccati dhammacodako.
สจฺจํ อหมฺปิ ชานามิ, เอทิโส วุจฺจติ ธมฺมโจทโก;
Saccaṃ ahampi jānāmi, ediso vuccati dhammacodako;
อญฺญญฺจ ตาหํ ปุจฺฉามิ, กีทิโส วุจฺจติ พาลโจทโกฯ
Aññañca tāhaṃ pucchāmi, kīdiso vuccati bālacodako.
ปุพฺพาปรํ น ชานาติ, ปุพฺพาปรสฺส อโกวิโท;
Pubbāparaṃ na jānāti, pubbāparassa akovido;
อนุสนฺธิวจนปถํ น ชานาติ;
Anusandhivacanapathaṃ na jānāti;
อนุสนฺธิวจนปถสฺส อโกวิโท;
Anusandhivacanapathassa akovido;
เอทิโส วุจฺจติ พาลโจทโกฯ
Ediso vuccati bālacodako.
สจฺจํ อหมฺปิ ชานามิ, เอทิโส วุจฺจติ พาลโจทโก;
Saccaṃ ahampi jānāmi, ediso vuccati bālacodako;
อญฺญญฺจ ตาหํ ปุจฺฉามิ, กีทิโส วุจฺจติ ปณฺฑิตโจทโกฯ
Aññañca tāhaṃ pucchāmi, kīdiso vuccati paṇḍitacodako.
ปุพฺพาปรมฺปิ ชานาติ, ปุพฺพาปรสฺส โกวิโท;
Pubbāparampi jānāti, pubbāparassa kovido;
อนุสนฺธิวจนปถํ ชานาติ, อนุสนฺธิวจนปถสฺส โกวิโท;
Anusandhivacanapathaṃ jānāti, anusandhivacanapathassa kovido;
เอทิโส วุจฺจติ ปณฺฑิตโจทโกฯ
Ediso vuccati paṇḍitacodako.
สจฺจํ อหมฺปิ ชานามิ, เอทิโส วุจฺจติ ปณฺฑิตโจทโก;
Saccaṃ ahampi jānāmi, ediso vuccati paṇḍitacodako;
อญฺญญฺจ ตาหํ ปุจฺฉามิ, โจทนา กินฺติ วุจฺจติฯ
Aññañca tāhaṃ pucchāmi, codanā kinti vuccati.
สีลวิปตฺติยา โจเทติ, อโถ อาจารทิฎฺฐิยา;
Sīlavipattiyā codeti, atho ācāradiṭṭhiyā;
อาชีเวนปิ โจเทติ, โจทนา เตน วุจฺจตีติฯ
Ājīvenapi codeti, codanā tena vuccatīti.
อปรํ คาถาสงฺคณิกํ นิฎฺฐิตํฯ
Aparaṃ gāthāsaṅgaṇikaṃ niṭṭhitaṃ.
Footnotes:
Related texts:
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / ปริวาร-อฎฺฐกถา • Parivāra-aṭṭhakathā / โจทนาทิปุจฺฉาวิสฺสชฺชนาวณฺณนา • Codanādipucchāvissajjanāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ทุติยคาถาสงฺคณิกวณฺณนา • Dutiyagāthāsaṅgaṇikavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / โจทนาทิปุจฺฉาวิสฺสชฺชนาวณฺณนา • Codanādipucchāvissajjanāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / โจทนาทิปุจฺฉาวิสฺสชฺชนาวณฺณนา • Codanādipucchāvissajjanāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / โจทนาทิปุจฺฉาวิสฺสชฺชนาวณฺณนา • Codanādipucchāvissajjanāvaṇṇanā
