| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၆. စာရိတ္တသိက္ခာပဒဝဏ္ဏနာ
6. Cārittasikkhāpadavaṇṇanā
အန္တောဥပစာရသီမာယ ဒသ္သနူပစာရေ ဘိက္ခုံ ဒိသ္ဝာတိ ယတ္ထ ဌိတသ္သ ကုလာနိ ပယိရုပာသနစိတ္တံ ဥပ္ပန္နံ, တတော ပဋ္ဌာယ ဂစ္ဆန္တော အန္တောဥပစာရသီမာယ ဒသ္သနူပစာရေ ဘိက္ခုံ ပသ္သေ ဝာ အဘိမုခေ ဝာ ဒိသ္ဝာ။ ပကတိဝစနေနာတိ ယံ ဒ္ဝာဒသဟတ္ထဗ္ဘန္တရေ ဌိတေန သောတုံ သက္ကာ, တာဒိသေန ဝစနေန, ဣတော စိတော စ ပရိယေသိတ္ဝာ အာရောစနကိစ္စံ ပန နတ္ထိ။ ယော ဟိ ဧဝံ ပရိယေသိတဗ္ဗော, သော အသန္တောယေဝ။ တေနာဟ ‘‘တာဒိသ’’န္တိအာဒိ။ အနာပုစ္ဆိတ္ဝာတိ အနာရောစေတ္ဝာ။
Antoupacārasīmāya dassanūpacāre bhikkhuṃ disvāti yattha ṭhitassa kulāni payirupāsanacittaṃ uppannaṃ, tato paṭṭhāya gacchanto antoupacārasīmāya dassanūpacāre bhikkhuṃ passe vā abhimukhe vā disvā. Pakativacanenāti yaṃ dvādasahatthabbhantare ṭhitena sotuṃ sakkā, tādisena vacanena, ito cito ca pariyesitvā ārocanakiccaṃ pana natthi. Yo hi evaṃ pariyesitabbo, so asantoyeva. Tenāha ‘‘tādisa’’ntiādi. Anāpucchitvāti anārocetvā.
အန္တရာရာမဘိက္ခုနုပသ္သယတိတ္ထိယသေယ္ယပဋိက္ကမနဘတ္တိယဃရာနီတိ ဧတ္ထ အန္တရာရာမန္တိ အန္တောဂာမေ ဝိဟာရော။ ပဋိက္ကမနန္တိ အာသနသာလာ။ ဘတ္တိယဃရန္တိ နိမန္တိတဃရံ ဝာ သလာကဘတ္တာဒိဒာယကာနံ ဝာ ဃရံ။ အာပဒာသူတိ ဇီဝိတဗ္ရဟ္မစရိယန္တရာယေသု။ ကိရိယာကိရိယန္တိ ဧတ္ထ ကုလေသု စာရိတ္တာပဇ္ဇနံ ကိရိယံ, အနာပုစ္ဆနံ အကိရိယန္တိ ဝေဒိတဗ္ဗံ။
Antarārāmabhikkhunupassayatitthiyaseyyapaṭikkamanabhattiyagharānīti ettha antarārāmanti antogāme vihāro. Paṭikkamananti āsanasālā. Bhattiyagharanti nimantitagharaṃ vā salākabhattādidāyakānaṃ vā gharaṃ. Āpadāsūti jīvitabrahmacariyantarāyesu. Kiriyākiriyanti ettha kulesu cārittāpajjanaṃ kiriyaṃ, anāpucchanaṃ akiriyanti veditabbaṃ.
စာရိတ္တသိက္ခာပဒဝဏ္ဏနာ နိဋ္ဌိတာ။
Cārittasikkhāpadavaṇṇanā niṭṭhitā.
