| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
២. ពុទ្ធស្ស អនុត្តរភាវបញ្ហោ
2. Buddhassa anuttarabhāvapañho
២. រាជា អាហ ‘‘ភន្តេ នាគសេន, ពុទ្ធោ អនុត្តរោ’’តិ? ‘‘អាម, មហារាជ, ភគវា អនុត្តរោ’’តិ។ ‘‘កថំ, ភន្តេ នាគសេន, អទិដ្ឋបុព្ពំ ជានាសិ ‘ពុទ្ធោ អនុត្តរោ’’’តិ? ‘‘តំ កិំ មញ្ញសិ, មហារាជ, យេហិ អទិដ្ឋបុព្ពោ មហាសមុទ្ទោ, ជានេយ្យុំ តេ, មហារាជ, មហន្តោ ខោ មហាសមុទ្ទោ គម្ភីរោ អប្បមេយ្យោ ទុប្បរិយោគាហោ, យត្ថិមា បញ្ច មហានទិយោ សតតំ សមិតំ អប្បេន្តិ, សេយ្យថិទំ, គង្គា យមុនា អចិរវតី សរភូ មហី, នេវ តស្ស ឩនត្តំ វា បូរត្តំ វា បញ្ញាយតី’’តិ ? ‘‘អាម, ភន្តេ, ជានេយ្យុ’’ន្តិ។ ‘‘ឯវមេវ ខោ, មហារាជ, សាវកេ មហន្តេ បរិនិព្ពុតេ បស្សិត្វា ជានាមិ ‘ភគវា អនុត្តរោ’’’តិ។
2. Rājā āha ‘‘bhante nāgasena, buddho anuttaro’’ti? ‘‘Āma, mahārāja, bhagavā anuttaro’’ti. ‘‘Kathaṃ, bhante nāgasena, adiṭṭhapubbaṃ jānāsi ‘buddho anuttaro’’’ti? ‘‘Taṃ kiṃ maññasi, mahārāja, yehi adiṭṭhapubbo mahāsamuddo, jāneyyuṃ te, mahārāja, mahanto kho mahāsamuddo gambhīro appameyyo duppariyogāho, yatthimā pañca mahānadiyo satataṃ samitaṃ appenti, seyyathidaṃ, gaṅgā yamunā aciravatī sarabhū mahī, neva tassa ūnattaṃ vā pūrattaṃ vā paññāyatī’’ti ? ‘‘Āma, bhante, jāneyyu’’nti. ‘‘Evameva kho, mahārāja, sāvake mahante parinibbute passitvā jānāmi ‘bhagavā anuttaro’’’ti.
‘‘កល្លោសិ, ភន្តេ នាគសេនា’’តិ។
‘‘Kallosi, bhante nāgasenā’’ti.
ពុទ្ធស្ស អនុត្តរភាវបញ្ហោ ទុតិយោ។
Buddhassa anuttarabhāvapañho dutiyo.
