| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. বিলঙ্গিকসুত্তং
4. Bilaṅgikasuttaṃ
১৯০. একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে। অস্সোসি খো বিলঙ্গিকভারদ্ৰাজো ব্রাহ্মণো – ‘‘ভারদ্ৰাজগোত্তো কির ব্রাহ্মণো সমণস্স গোতমস্স সন্তিকে অগারস্মা অনগারিযং পব্বজিতো’’তি কুপিতো অনত্তমনো যেন ভগৰা তেনুপসঙ্কমি; উপসঙ্কমিত্ৰা তুণ্হীভূতো একমন্তং অট্ঠাসি। অথ খো ভগৰা বিলঙ্গিকস্স ভারদ্ৰাজস্স ব্রাহ্মণস্স চেতসা চেতোপরিৰিতক্কমঞ্ঞায বিলঙ্গিকং ভারদ্ৰাজং ব্রাহ্মণং গাথায অজ্ঝভাসি –
190. Ekaṃ samayaṃ bhagavā rājagahe viharati veḷuvane kalandakanivāpe. Assosi kho bilaṅgikabhāradvājo brāhmaṇo – ‘‘bhāradvājagotto kira brāhmaṇo samaṇassa gotamassa santike agārasmā anagāriyaṃ pabbajito’’ti kupito anattamano yena bhagavā tenupasaṅkami; upasaṅkamitvā tuṇhībhūto ekamantaṃ aṭṭhāsi. Atha kho bhagavā bilaṅgikassa bhāradvājassa brāhmaṇassa cetasā cetoparivitakkamaññāya bilaṅgikaṃ bhāradvājaṃ brāhmaṇaṃ gāthāya ajjhabhāsi –
‘‘যো অপ্পদুট্ঠস্স নরস্স দুস্সতি,
‘‘Yo appaduṭṭhassa narassa dussati,
সুদ্ধস্স পোসস্স অনঙ্গণস্স।
Suddhassa posassa anaṅgaṇassa;
তমেৰ বালং পচ্চেতি পাপং,
Tameva bālaṃ pacceti pāpaṃ,
সুখুমো রজো পটিৰাতংৰ খিত্তো’’তি॥
Sukhumo rajo paṭivātaṃva khitto’’ti.
এৰং ৰুত্তে, ৰিলঙ্গিকভারদ্ৰাজো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম…পে॰… অব্ভঞ্ঞাসি। অঞ্ঞতরো চ পনাযস্মা ভারদ্ৰাজো অরহতং অহোসী’’তি।
Evaṃ vutte, vilaṅgikabhāradvājo brāhmaṇo bhagavantaṃ etadavoca – ‘‘abhikkantaṃ, bho gotama…pe… abbhaññāsi. Aññataro ca panāyasmā bhāradvājo arahataṃ ahosī’’ti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. বিলঙ্গীকসুত্তৰণ্ণনা • 4. Bilaṅgīkasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. বিলঙ্গিকসুত্তৰণ্ণনা • 4. Bilaṅgikasuttavaṇṇanā
