| Library / Tipiṭaka / तिपिटक • Tipiṭaka / थेरगाथापाळि • Theragāthāpāḷi |
९. नवकनिपातो
9. Navakanipāto
१. भूतत्थेरगाथा
1. Bhūtattheragāthā
५१८.
518.
‘‘यदा दुक्खं जरामरणन्ति पण्डितो, अविद्दसू यत्थ सिता पुथुज्जना।
‘‘Yadā dukkhaṃ jarāmaraṇanti paṇḍito, aviddasū yattha sitā puthujjanā;
दुक्खं परिञ्ञाय सतोव झायति, ततो रतिं परमतरं न विन्दति॥
Dukkhaṃ pariññāya satova jhāyati, tato ratiṃ paramataraṃ na vindati.
५१९.
519.
‘‘यदा दुक्खस्सावहनिं विसत्तिकं, पपञ्चसङ्घातदुखाधिवाहिनिं।
‘‘Yadā dukkhassāvahaniṃ visattikaṃ, papañcasaṅghātadukhādhivāhiniṃ;
तण्हं पहन्त्वान सतोव झायति, ततो रतिं परमतरं न विन्दति॥
Taṇhaṃ pahantvāna satova jhāyati, tato ratiṃ paramataraṃ na vindati.
५२०.
520.
‘‘यदा सिवं द्वेचतुरङ्गगामिनं, मग्गुत्तमं सब्बकिलेससोधनं।
‘‘Yadā sivaṃ dvecaturaṅgagāminaṃ, magguttamaṃ sabbakilesasodhanaṃ;
पञ्ञाय पस्सित्व सतोव झायति, ततो रतिं परमतरं न विन्दति॥
Paññāya passitva satova jhāyati, tato ratiṃ paramataraṃ na vindati.
५२१.
521.
‘‘यदा असोकं विरजं असङ्खतं, सन्तं पदं सब्बकिलेससोधनं।
‘‘Yadā asokaṃ virajaṃ asaṅkhataṃ, santaṃ padaṃ sabbakilesasodhanaṃ;
भावेति सञ्ञोजनबन्धनच्छिदं, ततो रतिं परमतरं न विन्दति॥
Bhāveti saññojanabandhanacchidaṃ, tato ratiṃ paramataraṃ na vindati.
५२२.
522.
‘‘यदा नभे गज्जति मेघदुन्दुभि, धाराकुला विहगपथे समन्ततो।
‘‘Yadā nabhe gajjati meghadundubhi, dhārākulā vihagapathe samantato;
भिक्खू च पब्भारगतोव झायति, ततो रतिं परमतरं न विन्दति॥
Bhikkhū ca pabbhāragatova jhāyati, tato ratiṃ paramataraṃ na vindati.
५२३.
523.
‘‘यदा नदीनं कुसुमाकुलानं, विचित्त-वानेय्य-वटंसकानं।
‘‘Yadā nadīnaṃ kusumākulānaṃ, vicitta-vāneyya-vaṭaṃsakānaṃ;
तीरे निसिन्नो सुमनोव झायति, ततो रतिं परमतरं न विन्दति॥
Tīre nisinno sumanova jhāyati, tato ratiṃ paramataraṃ na vindati.
५२४.
524.
‘‘यदा निसीथे रहितम्हि कानने, देवे गळन्तम्हि नदन्ति दाठिनो।
‘‘Yadā nisīthe rahitamhi kānane, deve gaḷantamhi nadanti dāṭhino;
भिक्खू च पब्भारगतोव झायति, ततो रतिं परमतरं न विन्दति॥
Bhikkhū ca pabbhāragatova jhāyati, tato ratiṃ paramataraṃ na vindati.
५२५.
525.
‘‘यदा वितक्के उपरुन्धियत्तनो, नगन्तरे नगविवरं समस्सितो।
‘‘Yadā vitakke uparundhiyattano, nagantare nagavivaraṃ samassito;
वीतद्दरो वीतखिलोव झायति, ततो रतिं परमतरं न विन्दति॥
Vītaddaro vītakhilova jhāyati, tato ratiṃ paramataraṃ na vindati.
५२६.
526.
‘‘यदा सुखी मलखिलसोकनासनो, निरग्गळो निब्बनथो विसल्लो।
‘‘Yadā sukhī malakhilasokanāsano, niraggaḷo nibbanatho visallo;
सब्बासवे ब्यन्तिकतोव झायति, ततो रतिं परमतरं न विन्दती’’ति॥
Sabbāsave byantikatova jhāyati, tato ratiṃ paramataraṃ na vindatī’’ti.
… भूतो थेरो…।
… Bhūto thero….
नवकनिपातो निट्ठितो।
Navakanipāto niṭṭhito.
तत्रुद्दानं –
Tatruddānaṃ –
भूतो तथद्दसो थेरो, एको खग्गविसाणवा।
Bhūto tathaddaso thero, eko khaggavisāṇavā;
नवकम्हि निपातम्हि, गाथायोपि इमा नवाति॥
Navakamhi nipātamhi, gāthāyopi imā navāti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / थेरगाथा-अट्ठकथा • Theragāthā-aṭṭhakathā / १. भूतत्थेरगाथावण्णना • 1. Bhūtattheragāthāvaṇṇanā
