| Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya |
౪. బాహిరఅనిచ్చనన్దిక్ఖయసుత్తం
4. Bāhiraaniccanandikkhayasuttaṃ
౧౫౯. ‘‘రూపే, భిక్ఖవే, యోనిసో మనసి కరోథ; రూపానిచ్చతఞ్చ యథాభూతం సమనుపస్సథ. రూపే, భిక్ఖవే, భిక్ఖు యోనిసో మనసికరోన్తో, రూపానిచ్చతఞ్చ యథాభూతం సమనుపస్సన్తో రూపేసుపి నిబ్బిన్దతి. నన్దిక్ఖయా రాగక్ఖయో; రాగక్ఖయా నన్దిక్ఖయో. నన్దిరాగక్ఖయా చిత్తం సువిముత్తన్తి వుచ్చతి. సద్దే… గన్ధే… రసే… ఫోట్ఠబ్బే… ధమ్మే, భిక్ఖవే, యోనిసో మనసి కరోథ; ధమ్మానిచ్చతఞ్చ యథాభూతం సమనుపస్సథ. ధమ్మే, భిక్ఖవే, భిక్ఖు యోనిసో మనసికరోన్తో, ధమ్మానిచ్చతఞ్చ యథాభూతం సమనుపస్సన్తో ధమ్మేసుపి నిబ్బిన్దతి. నన్దిక్ఖయా రాగక్ఖయో; రాగక్ఖయా నన్దిక్ఖయో . నన్దిరాగక్ఖయా చిత్తం సువిముత్తన్తి వుచ్చతీ’’తి. చతుత్థం.
159. ‘‘Rūpe, bhikkhave, yoniso manasi karotha; rūpāniccatañca yathābhūtaṃ samanupassatha. Rūpe, bhikkhave, bhikkhu yoniso manasikaronto, rūpāniccatañca yathābhūtaṃ samanupassanto rūpesupi nibbindati. Nandikkhayā rāgakkhayo; rāgakkhayā nandikkhayo. Nandirāgakkhayā cittaṃ suvimuttanti vuccati. Sadde… gandhe… rase… phoṭṭhabbe… dhamme, bhikkhave, yoniso manasi karotha; dhammāniccatañca yathābhūtaṃ samanupassatha. Dhamme, bhikkhave, bhikkhu yoniso manasikaronto, dhammāniccatañca yathābhūtaṃ samanupassanto dhammesupi nibbindati. Nandikkhayā rāgakkhayo; rāgakkhayā nandikkhayo . Nandirāgakkhayā cittaṃ suvimuttanti vuccatī’’ti. Catutthaṃ.
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౧-౪. అజ్ఝత్తనన్దిక్ఖయసుత్తాదివణ్ణనా • 1-4. Ajjhattanandikkhayasuttādivaṇṇanā
టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౧-౪. అజ్ఝత్తనన్దిక్ఖయసుత్తాదివణ్ణనా • 1-4. Ajjhattanandikkhayasuttādivaṇṇanā
