| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៥. អសង្កមនបដិសន្ទហនបញ្ហោ
5. Asaṅkamanapaṭisandahanapañho
៥. រាជា អាហ ‘‘ភន្តេ នាគសេន, ន ច សង្កមតិ បដិសន្ទហតិ ចា’’តិ? ‘‘អាម, មហារាជ, ន ច សង្កមតិ បដិសន្ទហតិ ចា’’តិ។ ‘‘កថំ, ភន្តេ នាគសេន, ន ច សង្កមតិ បដិសន្ទហតិ ច, ឱបម្មំ ករោហី’’តិ? ‘‘យថា, មហារាជ, កោចិទេវ បុរិសោ បទីបតោ បទីបំ បទីបេយ្យ, កិំនុ ខោ សោ, មហារាជ, បទីបោ បទីបម្ហា សង្កន្តោ’’តិ? ‘‘ន ហិ, ភន្តេ’’តិ។ ‘‘ឯវមេវ ខោ, មហារាជ, ន ច សង្កមតិ បដិសន្ទហតិ ចា’’តិ។
5. Rājā āha ‘‘bhante nāgasena, na ca saṅkamati paṭisandahati cā’’ti? ‘‘Āma, mahārāja, na ca saṅkamati paṭisandahati cā’’ti. ‘‘Kathaṃ, bhante nāgasena, na ca saṅkamati paṭisandahati ca, opammaṃ karohī’’ti? ‘‘Yathā, mahārāja, kocideva puriso padīpato padīpaṃ padīpeyya, kiṃnu kho so, mahārāja, padīpo padīpamhā saṅkanto’’ti? ‘‘Na hi, bhante’’ti. ‘‘Evameva kho, mahārāja, na ca saṅkamati paṭisandahati cā’’ti.
‘‘ភិយ្យោ ឱបម្មំ ករោហី’’តិ។ ‘‘អភិជានាសិ នុ, ត្វំ មហារាជ, ទហរកោ សន្តោ សិលោកាចរិយស្ស សន្តិកេ កិញ្ចិ សិលោកំ គហិត’’ន្តិ? ‘‘អាម, ភន្តេ’’តិ ។ ‘‘កិំនុ ខោ, មហារាជ, សោ សិលោកោ អាចរិយម្ហា សង្កន្តោ’’តិ? ‘‘ន ហិ, ភន្តេ’’តិ។ ‘‘ឯវមេវ ខោ, មហារាជ, ន ច សង្កមតិ បដិសន្ទហតិ ចាតិ។
‘‘Bhiyyo opammaṃ karohī’’ti. ‘‘Abhijānāsi nu, tvaṃ mahārāja, daharako santo silokācariyassa santike kiñci silokaṃ gahita’’nti? ‘‘Āma, bhante’’ti . ‘‘Kiṃnu kho, mahārāja, so siloko ācariyamhā saṅkanto’’ti? ‘‘Na hi, bhante’’ti. ‘‘Evameva kho, mahārāja, na ca saṅkamati paṭisandahati cāti.
‘‘កល្លោសិ, ភន្តេ នាគសេនា’’តិ។
‘‘Kallosi, bhante nāgasenā’’ti.
អសង្កមនបដិសន្ទហនបញ្ហោ បញ្ចមោ។
Asaṅkamanapaṭisandahanapañho pañcamo.
