| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
(༡༩) ༤. ཨརཉྙཝགྒོ
(19) 4. Araññavaggo
༡. ཨཱརཉྙིཀསུཏྟཾ
1. Āraññikasuttaṃ
༡༨༡. ‘‘པཉྩིམེ , བྷིཀྑཝེ, ཨཱརཉྙིཀཱ 1། ཀཏམེ པཉྩ? མནྡཏྟཱ མོམཱུཧཏྟཱ ཨཱརཉྙིཀོ ཧོཏི, པཱཔིཙྪོ ཨིཙྪཱཔཀཏོ ཨཱརཉྙིཀོ ཧོཏི, ཨུམྨཱདཱ ཙིཏྟཀྑེཔཱ ཨཱརཉྙིཀོ ཧོཏི, ཝཎྞིཏཾ བུདྡྷེཧི བུདྡྷསཱཝཀེཧཱིཏི ཨཱརཉྙིཀོ ཧོཏི, ཨཔྤིཙྪཏཾཡེཝ ནིསྶཱཡ སནྟུཊྛིཾཡེཝ ནིསྶཱཡ སལླེཁཾཡེཝ ནིསྶཱཡ པཝིཝེཀཾཡེཝ ནིསྶཱཡ ཨིདམཏྠིཏཾཡེཝ 2 ནིསྶཱཡ ཨཱརཉྙིཀོ ཧོཏི། ཨིམེ ཁོ, བྷིཀྑཝེ, པཉྩ ཨཱརཉྙིཀཱ། ཨིམེསཾ ཁོ, བྷིཀྑཝེ, པཉྩནྣཾ ཨཱརཉྙིཀཱནཾ ཡྭཱཡཾ ཨཱརཉྙིཀོ ཨཔྤིཙྪཏཾཡེཝ ནིསྶཱཡ སནྟུཊྛིཾཡེཝ ནིསྶཱཡ སལླེཁཾཡེཝ ནིསྶཱཡ པཝིཝེཀཾཡེཝ ནིསྶཱཡ ཨིདམཏྠིཏཾཡེཝ ནིསྶཱཡ ཨཱརཉྙིཀོ ཧོཏི, ཨཡཾ ཨིམེསཾ པཉྩནྣཾ ཨཱརཉྙིཀཱནཾ ཨགྒོ ཙ སེཊྛོ ཙ མོཀྑོ 3 ཙ ཨུཏྟམོ ཙ པཝརོ ཙ།
181. ‘‘Pañcime , bhikkhave, āraññikā 4. Katame pañca? Mandattā momūhattā āraññiko hoti, pāpiccho icchāpakato āraññiko hoti, ummādā cittakkhepā āraññiko hoti, vaṇṇitaṃ buddhehi buddhasāvakehīti āraññiko hoti, appicchataṃyeva nissāya santuṭṭhiṃyeva nissāya sallekhaṃyeva nissāya pavivekaṃyeva nissāya idamatthitaṃyeva 5 nissāya āraññiko hoti. Ime kho, bhikkhave, pañca āraññikā. Imesaṃ kho, bhikkhave, pañcannaṃ āraññikānaṃ yvāyaṃ āraññiko appicchataṃyeva nissāya santuṭṭhiṃyeva nissāya sallekhaṃyeva nissāya pavivekaṃyeva nissāya idamatthitaṃyeva nissāya āraññiko hoti, ayaṃ imesaṃ pañcannaṃ āraññikānaṃ aggo ca seṭṭho ca mokkho 6 ca uttamo ca pavaro ca.
‘‘སེཡྻཐཱཔི, བྷིཀྑཝེ, གཝཱ ཁཱིརཾ, ཁཱིརམྷཱ དདྷི, དདྷིམྷཱ ནཝནཱིཏཾ, ནཝནཱིཏམྷཱ སཔྤི, སཔྤིམྷཱ སཔྤིམཎྜོ, སཔྤིམཎྜོ 7 ཏཏྠ ཨགྒམཀྑཱཡཏི; ཨེཝམེཝཾ ཁོ, བྷིཀྑཝེ, ཨིམེསཾ པཉྩནྣཾ ཨཱརཉྙིཀཱནཾ ཡྭཱཡཾ ཨཱརཉྙིཀོ ཨཔྤིཙྪཏཾཡེཝ ནིསྶཱཡ སནྟུཊྛིཾཡེཝ ནིསྶཱཡ སལླེཁཾཡེཝ ནིསྶཱཡ པཝིཝེཀཾཡེཝ ནིསྶཱཡ ཨིདམཏྠིཏཾཡེཝ ནིསྶཱཡ ཨཱརཉྙིཀོ ཧོཏི, ཨཡཾ ཨིམེསཾ པཉྩནྣཾ ཨཱརཉྙིཀཱནཾ ཨགྒོ ཙ སེཊྛོ ཙ མོཀྑོ ཙ ཨུཏྟམོ ཙ པཝརོ ཙཱ’’ཏི། པཋམཾ།
‘‘Seyyathāpi, bhikkhave, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo, sappimaṇḍo 8 tattha aggamakkhāyati; evamevaṃ kho, bhikkhave, imesaṃ pañcannaṃ āraññikānaṃ yvāyaṃ āraññiko appicchataṃyeva nissāya santuṭṭhiṃyeva nissāya sallekhaṃyeva nissāya pavivekaṃyeva nissāya idamatthitaṃyeva nissāya āraññiko hoti, ayaṃ imesaṃ pañcannaṃ āraññikānaṃ aggo ca seṭṭho ca mokkho ca uttamo ca pavaro cā’’ti. Paṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡. ཨཱརཉྙིཀསུཏྟཝཎྞནཱ • 1. Āraññikasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡. ཨཱརཉྙིཀསུཏྟཝཎྞནཱ • 1. Āraññikasuttavaṇṇanā
