| Library / Tipiṭaka / д̇ибидага • Tipiṭaka / уд̣̇аана-адтагат̇аа • Udāna-aṭṭhakathā |
2. аббааяугасуд̇д̇аван̣н̣анаа
2. Appāyukasuttavaṇṇanā
42. д̣̇уд̇ияз ажчарияам̣, бханд̇зд̇и ид̣̇амби мзгхияасуд̇д̇з вияа г̇арахан̣ажчарияавасзна взд̣̇ид̇аб̣б̣ам̣. яаава аббааяугаад̇и яад̇д̇агам̣ барид̇д̇ааяугаа, ад̇иид̇д̇араж̇ийвид̇аад̇и ад̇т̇о. сад̇д̇аахаж̇аад̇зд̇и сад̇д̇аахзна ж̇аад̇о сад̇д̇аахаж̇аад̇о. д̇асмим̣ сад̇д̇аахаж̇аад̇з, ж̇аад̇асса сад̇д̇амз аханийд̇и ад̇т̇о. д̇усид̇ам̣ гааяам̣ убабаж̇ж̇ийд̇и д̇усид̇ам̣ д̣̇званигааяам̣ бадисанд̇хиг̇г̇ахан̣авасзна убабаж̇ж̇и.
42. Dutiye acchariyaṃ, bhanteti idampi meghiyasutte viya garahaṇacchariyavasena veditabbaṃ. Yāva appāyukāti yattakaṃ parittāyukā, atiittarajīvitāti attho. Sattāhajāteti sattāhena jāto sattāhajāto. Tasmiṃ sattāhajāte, jātassa sattame ahanīti attho. Tusitaṃ kāyaṃ upapajjīti tusitaṃ devanikāyaṃ paṭisandhiggahaṇavasena upapajji.
згад̣̇ивасам̣ гира т̇зро бажчаабхад̇д̇ам̣ д̣̇иваадтаанз нисинно лагкан̣аануб̣яан̃ж̇анаббадиман̣д̣ид̇ам̣ собхаг̇г̇аббад̇д̇ам̣ д̣̇ассанаануд̇д̇арияабхууд̇ам̣ бхаг̇авад̇о руубагааяасирим̣ манаси гарид̇ваа, ‘‘ахо б̣уд̣̇д̇хаанам̣ руубагааяасамбад̇д̇и д̣̇ассанийяаа саманд̇абаасаад̣̇игаа манохараа’’д̇и ул̣аарам̣ бийд̇исоманассам̣ бадисам̣взд̣̇знд̇о звам̣ жинд̇зси – ‘‘виж̇аад̇амаад̇уяаа наама вируубоби буд̇д̇о суруубо вияа манаабо ход̇и, сажз бана б̣уд̣̇д̇хаанам̣ маад̇аа махаамааяаа д̣̇звий д̇харзяяа, гийд̣̇исам̣ ну ко д̇ассаа бхаг̇авад̇о руубад̣̇ассанз бийд̇исоманассам̣ уббаж̇ж̇зяяа, махааж̇аани ко маяхам̣ махаамаад̇у д̣̇звияаа, яаа сад̇д̇аахаж̇аад̇з бхаг̇авад̇и гаалагад̇аа’’д̇и. звам̣ бана жинд̇зд̇ваа бхаг̇аванд̇ам̣ убасан̇гамид̇ваа ад̇д̇ано баривид̇аггид̇ам̣ аарожзнд̇о д̇ассаа гаалагирияам̣ г̇араханд̇о ‘‘ажчарияам̣, бханд̇з’’д̇иаад̣̇имааха.
Ekadivasaṃ kira thero pacchābhattaṃ divāṭṭhāne nisinno lakkhaṇānubyañjanappaṭimaṇḍitaṃ sobhaggappattaṃ dassanānuttariyabhūtaṃ bhagavato rūpakāyasiriṃ manasi karitvā, ‘‘aho buddhānaṃ rūpakāyasampatti dassanīyā samantapāsādikā manoharā’’ti uḷāraṃ pītisomanassaṃ paṭisaṃvedento evaṃ cintesi – ‘‘vijātamātuyā nāma virūpopi putto surūpo viya manāpo hoti, sace pana buddhānaṃ mātā mahāmāyā devī dhareyya, kīdisaṃ nu kho tassā bhagavato rūpadassane pītisomanassaṃ uppajjeyya, mahājāni kho mayhaṃ mahāmātu deviyā, yā sattāhajāte bhagavati kālakatā’’ti. Evaṃ pana cintetvā bhagavantaṃ upasaṅkamitvā attano parivitakkitaṃ ārocento tassā kālakiriyaṃ garahanto ‘‘acchariyaṃ, bhante’’tiādimāha.
гзжи банааху – ‘‘махаабаж̇аабад̇и г̇од̇амий бхаг̇аванд̇ам̣ махад̇аа ааяаасзна баб̣б̣аж̇ж̇ам̣ яаажид̇вааби бадигкид̇д̇аа, маяаа бана убааязна яаажид̇о бхаг̇аваа адтаг̇аруд̇хаммаббадиг̇г̇ахан̣авасзна д̇ассаа баб̣б̣аж̇ж̇ам̣ убасамбад̣̇ан̃жа ануж̇аани, саа д̇з д̇хаммз бадиг̇г̇ахзд̇ваа лад̣̇д̇хабаб̣б̣аж̇ж̇уубасамбад̣̇аа бхаг̇авад̇о д̣̇уд̇ияам̣ барисам̣ уббаад̣̇зд̇ваа жад̇уд̇т̇ааяа барисааяа бажжаяо ахоси. сажз бана бхаг̇авад̇о ж̇анзд̇д̇и махаамааяаа д̣̇звий д̇харзяяа, звамзд̇аа жубхоби кад̇д̇ияабхаг̇инияо згад̇о худ̇ваа имам̣ саасанам̣ собхзяяум̣, бхаг̇аваа жа маад̇ари б̣ахумаанзна маад̇уг̇аамасса саасанз баб̣б̣аж̇ж̇ам̣ убасамбад̣̇ан̃жа сукзнзва ануж̇аанзяяа, аббааяугад̇ааяа банассаа гасирзна нибпаннамид̣̇анд̇и иминаа ад̇хиббааязна т̇зро бхаг̇авад̇о санд̇игз ‘ажчарияам̣, бханд̇з’д̇иаад̣̇имаахаа’’д̇и. д̇ам̣ агааран̣ам̣. бхаг̇аваа хи маад̇уяаа ваа ан̃н̃асса ваа маад̇уг̇аамасса ад̇д̇ано саасанз баб̣б̣аж̇ж̇ам̣ ануж̇аананд̇о г̇аругам̣язва гад̇ваа ануж̇аанаад̇и, на лахугам̣ жирадтид̇игаамад̇ааяаад̇и.
Keci panāhu – ‘‘mahāpajāpati gotamī bhagavantaṃ mahatā āyāsena pabbajjaṃ yācitvāpi paṭikkhittā, mayā pana upāyena yācito bhagavā aṭṭhagarudhammappaṭiggahaṇavasena tassā pabbajjaṃ upasampadañca anujāni, sā te dhamme paṭiggahetvā laddhapabbajjūpasampadā bhagavato dutiyaṃ parisaṃ uppādetvā catutthāya parisāya paccayo ahosi. Sace pana bhagavato janetti mahāmāyā devī dhareyya, evametā cubhopi khattiyabhaginiyo ekato hutvā imaṃ sāsanaṃ sobheyyuṃ, bhagavā ca mātari bahumānena mātugāmassa sāsane pabbajjaṃ upasampadañca sukheneva anujāneyya, appāyukatāya panassā kasirena nipphannamidanti iminā adhippāyena thero bhagavato santike ‘acchariyaṃ, bhante’tiādimāhā’’ti. Taṃ akāraṇaṃ. Bhagavā hi mātuyā vā aññassa vā mātugāmassa attano sāsane pabbajjaṃ anujānanto garukaṃyeva katvā anujānāti, na lahukaṃ ciraṭṭhitikāmatāyāti.
абарз банааху – ‘‘д̣̇асаб̣алажад̇увзсаараж̇ж̇аад̣̇игз анан̃н̃асаад̇хааран̣з ананд̇аабаримаан̣з б̣уд̣̇д̇хаг̇ун̣з т̇зро манаси гарид̇ваа яаа звам̣ махаанубхаавам̣ наама логз аг̇г̇абуг̇г̇алам̣ сад̇т̇аарам̣ гужчинаа д̣̇аса маасз барихари, саа б̣уд̣̇д̇хамаад̇аа гассажи барижааригаа бхависсад̇ийд̇и аяуд̇д̇амид̣̇ам̣. гасмаа? сад̇т̇у г̇ун̣аанужчавигамзвзд̇ам̣, яад̣̇ид̣̇ам̣ сад̇д̇аахаж̇аад̇з бхаг̇авад̇и ж̇анзд̇д̇и гаалам̣ гарод̇и, гаалагад̇аа жа д̇усид̇зсу уббаж̇ж̇ад̇ийд̇и ажчарияаб̣бхуд̇ажид̇д̇аж̇аад̇о худ̇ваа д̇ам̣ ад̇д̇ано вид̇аггуббаад̣̇анам̣ бхаг̇авад̇о аарожзнд̇о ‘ажчарияам̣, бханд̇з’д̇иаад̣̇иважанам̣ авожаа’’д̇и.
Apare panāhu – ‘‘dasabalacatuvesārajjādike anaññasādhāraṇe anantāparimāṇe buddhaguṇe thero manasi karitvā yā evaṃ mahānubhāvaṃ nāma loke aggapuggalaṃ satthāraṃ kucchinā dasa māse parihari, sā buddhamātā kassaci paricārikā bhavissatīti ayuttamidaṃ. Kasmā? Satthu guṇānucchavikamevetaṃ, yadidaṃ sattāhajāte bhagavati janetti kālaṃ karoti, kālakatā ca tusitesu uppajjatīti acchariyabbhutacittajāto hutvā taṃ attano vitakkuppādanaṃ bhagavato ārocento ‘acchariyaṃ, bhante’tiādivacanaṃ avocā’’ti.
сад̇т̇аа бана яасмаа сад̇д̇аахаж̇аад̇зсу б̣од̇хисад̇д̇зсу б̣од̇хисад̇д̇амаад̇у гаалагирияаа д̇хаммад̇аа сид̣̇д̇хаа, д̇асмаа д̇ам̣ д̇хаммад̇ам̣ барид̣̇ийбзнд̇о ‘‘звамзд̇ам̣, аананд̣̇аа’’д̇иаад̣̇имааха. саа банааяам̣ д̇хаммад̇аа яасмаа яат̇аа саб̣б̣з б̣од̇хисад̇д̇аа баарамияо буурзд̇ваа д̇усид̇абурз ниб̣б̣ад̇д̇ид̇ваа д̇ад̇т̇а яаавад̇ааяугам̣ тад̇ваа ааяубарияосаанз д̣̇асасахассажаггаваал̣ад̣̇звад̇аахи саннибад̇ид̇ваа абхисамб̣од̇хим̣ бад̇д̇ум̣ мануссалогз бадисанд̇хиг̇г̇ахан̣ааяа аж̇жхзсид̇аа гаалад̣̇ийбад̣̇зсагулаани вияа ж̇анзд̇д̇ияаа ааяубаримаан̣амби ологзд̇ваа бадисанд̇хим̣ г̇ан̣ханд̇и, аяамби бхаг̇аваа б̣од̇хисад̇д̇абхууд̇о д̇ат̇зва д̇усид̇абурз тид̇о бан̃жа махаавилоганаани вилогзнд̇о сад̇д̇ад̣̇ивасаад̇хигад̣̇асамаасабаримаан̣ам̣ маад̇уяаа ааяубаримаан̣ам̣ барижчинд̣̇ид̇ваа ‘‘аяам̣ мама бадисанд̇хиг̇г̇ахан̣асса гаало, ид̣̇аани уббаж̇ж̇ид̇ум̣ ваддад̇ий’’д̇и н̃ад̇ваава бадисанд̇хим̣ аг̇г̇ахзси, д̇асмаа саб̣б̣аб̣од̇хисад̇д̇аанам̣ аажин̣н̣асамаажин̣н̣авасзнзва взд̣̇ид̇аб̣б̣ам̣. д̇знааха бхаг̇аваа – ‘‘аббааяугаа хи, аананд̣̇а, б̣од̇хисад̇д̇амаад̇аро хонд̇ий’’д̇иаад̣̇и.
Satthā pana yasmā sattāhajātesu bodhisattesu bodhisattamātu kālakiriyā dhammatā siddhā, tasmā taṃ dhammataṃ paridīpento ‘‘evametaṃ, ānandā’’tiādimāha. Sā panāyaṃ dhammatā yasmā yathā sabbe bodhisattā pāramiyo pūretvā tusitapure nibbattitvā tattha yāvatāyukaṃ ṭhatvā āyupariyosāne dasasahassacakkavāḷadevatāhi sannipatitvā abhisambodhiṃ pattuṃ manussaloke paṭisandhiggahaṇāya ajjhesitā kāladīpadesakulāni viya janettiyā āyuparimāṇampi oloketvā paṭisandhiṃ gaṇhanti, ayampi bhagavā bodhisattabhūto tatheva tusitapure ṭhito pañca mahāvilokanāni vilokento sattadivasādhikadasamāsaparimāṇaṃ mātuyā āyuparimāṇaṃ paricchinditvā ‘‘ayaṃ mama paṭisandhiggahaṇassa kālo, idāni uppajjituṃ vaṭṭatī’’ti ñatvāva paṭisandhiṃ aggahesi, tasmā sabbabodhisattānaṃ āciṇṇasamāciṇṇavaseneva veditabbaṃ. Tenāha bhagavā – ‘‘appāyukā hi, ānanda, bodhisattamātaro hontī’’tiādi.
д̇ад̇т̇а гаалам̣ гаронд̇ийд̇и яат̇аавуд̇д̇аааяубаригкаязнзва гаалам̣ гаронд̇и, на виж̇аад̇абажжаяаа. жаримад̇д̇абхаавзхи б̣од̇хисад̇д̇зхи васид̇адтаанам̣ жзд̇ияагхарасад̣̇исам̣ ход̇и, на ан̃н̃зсам̣ барибхог̇аарахам̣, на жа саггаа б̣од̇хисад̇д̇амаад̇арам̣ абанзд̇ваа ан̃н̃ам̣ аг̇г̇амахзсидтаанз табзд̇унд̇и д̇ад̇д̇агам̣ зва б̣од̇хисад̇д̇амаад̇у ааяуббамаан̣ам̣ ход̇и, д̇асмаа д̇ад̣̇аа гаалам̣ гаронд̇и. имамзва хи ад̇т̇ам̣ санд̇хааяа махааб̣од̇хисад̇д̇аа бан̃жамам̣ махаавилоганам̣ гаронд̇и.
Tattha kālaṃ karontīti yathāvuttaāyuparikkhayeneva kālaṃ karonti, na vijātapaccayā. Carimattabhāvehi bodhisattehi vasitaṭṭhānaṃ cetiyagharasadisaṃ hoti, na aññesaṃ paribhogārahaṃ, na ca sakkā bodhisattamātaraṃ apanetvā aññaṃ aggamahesiṭṭhāne ṭhapetunti tattakaṃ eva bodhisattamātu āyuppamāṇaṃ hoti, tasmā tadā kālaṃ karonti. Imameva hi atthaṃ sandhāya mahābodhisattā pañcamaṃ mahāvilokanaṃ karonti.
гад̇арасмим̣ бана ваяз гаалам̣ гаронд̇ийд̇и? маж̇жхимаваяз. батамаваяасмин̃хи сад̇д̇аанам̣ ад̇д̇абхаавз чанд̣̇арааг̇о б̣алаваа ход̇и, д̇зна д̇ад̣̇аа сан̃ж̇аад̇аг̇аб̣бхаа ид̇т̇ияо язбхуяязна г̇аб̣бхам̣ анурагкид̇ум̣ на саггонд̇и. г̇ан̣хзяяум̣ жз, г̇аб̣бхо б̣ахвааб̣аад̇хо ход̇и. маж̇жхимаваяасса бана д̣̇вз годтаасз ад̇иггамид̇ваа д̇ад̇ияагодтаасз вад̇т̇у висад̣̇ам̣ ход̇и, висад̣̇з вад̇т̇умхи ниб̣б̣ад̇д̇ад̣̇аарагаа арог̇аа хонд̇и, д̇асмаа б̣од̇хисад̇д̇амаад̇аро батамаваяз самбад̇д̇им̣ анубхавид̇ваа маж̇жхимаваяасса д̇ад̇ияагодтаасз виж̇ааяид̇ваа гаалам̣ гаронд̇ийд̇и.
Katarasmiṃ pana vaye kālaṃ karontīti? Majjhimavaye. Paṭhamavayasmiñhi sattānaṃ attabhāve chandarāgo balavā hoti, tena tadā sañjātagabbhā itthiyo yebhuyyena gabbhaṃ anurakkhituṃ na sakkonti. Gaṇheyyuṃ ce, gabbho bahvābādho hoti. Majjhimavayassa pana dve koṭṭhāse atikkamitvā tatiyakoṭṭhāse vatthu visadaṃ hoti, visade vatthumhi nibbattadārakā arogā honti, tasmā bodhisattamātaro paṭhamavaye sampattiṃ anubhavitvā majjhimavayassa tatiyakoṭṭhāse vijāyitvā kālaṃ karontīti.
зд̇амад̇т̇ам̣ вид̣̇ид̇ваад̇и зд̇ам̣ б̣од̇хисад̇д̇амаад̇у ан̃н̃зсан̃жа саб̣б̣асад̇д̇аанам̣ ад̇д̇абхаавз ааяусса маран̣абарияосаанад̇ам̣ вид̣̇ид̇ваа д̇ад̣̇ад̇т̇авибхааванамукзна анаваж̇ж̇аббадибад̇д̇ияам̣ уссаахад̣̇ийбагам̣ имам̣ уд̣̇аанам̣ уд̣̇аанзси.
Etamatthaṃ viditvāti etaṃ bodhisattamātu aññesañca sabbasattānaṃ attabhāve āyussa maraṇapariyosānataṃ viditvā tadatthavibhāvanamukhena anavajjappaṭipattiyaṃ ussāhadīpakaṃ imaṃ udānaṃ udānesi.
д̇ад̇т̇а яз гзжийд̇и анияаманид̣̇д̣̇зсо. бхууд̇аад̇и ниб̣б̣ад̇д̇аа. бхависсанд̇ийд̇и анааг̇ад̇з ниб̣б̣ад̇д̇иссанд̇и. ваасад̣̇д̣̇о вигаббад̇т̇о, абисад̣̇д̣̇о самбин̣д̣анад̇т̇о. д̇зна ниб̣б̣ад̇д̇амаанзби сан̇г̇ан̣хаад̇и. зд̇д̇аавад̇аа ад̇ийд̇аад̣̇ивасзна д̇ияад̣̇д̇хабарияаабаннз сад̇д̇з анавасзсад̇о барияаад̣̇ияад̇и. абижа г̇аб̣бхасзяяагасад̇д̇аа г̇аб̣бхад̇о нигканд̇агаалад̇о бадтааяа бхууд̇аа наама, д̇ад̇о буб̣б̣з бхависсанд̇и наама. сам̣сзд̣̇аж̇уубабаад̇игаа бадисанд̇хижид̇д̇ад̇о барад̇о бхууд̇аа наама, д̇ад̇о буб̣б̣з уббаж̇ж̇ид̇аб̣б̣абхававасзна бхависсанд̇и наама. саб̣б̣зби ваа бажжуббаннабхававасзна бхууд̇аа наама, ааяад̇им̣ бунаб̣бхававасзна бхависсанд̇и наама. кийн̣аасаваа бхууд̇аа наама. д̇з хи бхууд̇аа зва, на буна бхависсанд̇ийд̇и, д̇ад̣̇ан̃н̃з бхависсанд̇и наама.
Tattha ye kecīti aniyamaniddeso. Bhūtāti nibbattā. Bhavissantīti anāgate nibbattissanti. Vāsaddo vikappattho, apisaddo sampiṇḍanattho. Tena nibbattamānepi saṅgaṇhāti. Ettāvatā atītādivasena tiyaddhapariyāpanne satte anavasesato pariyādiyati. Apica gabbhaseyyakasattā gabbhato nikkhantakālato paṭṭhāya bhūtā nāma, tato pubbe bhavissanti nāma. Saṃsedajūpapātikā paṭisandhicittato parato bhūtā nāma, tato pubbe uppajjitabbabhavavasena bhavissanti nāma. Sabbepi vā paccuppannabhavavasena bhūtā nāma, āyatiṃ punabbhavavasena bhavissanti nāma. Khīṇāsavā bhūtā nāma. Te hi bhūtā eva, na puna bhavissantīti, tadaññe bhavissanti nāma.
саб̣б̣з г̇амиссанд̇и бахааяа д̣̇зханд̇и саб̣б̣з яат̇аавуд̇д̇абхзд̣̇аа саб̣б̣абхаваяониг̇ад̇ивин̃н̃аан̣адтид̇исад̇д̇ааваасаад̣̇ивасзна анзгабхзд̣̇абхиннаа сад̇д̇аа д̣̇зхам̣ ад̇д̇ано сарийрам̣ бахааяа нигкибид̇ваа баралогам̣ г̇амиссанд̇и, асзгкаа бана ниб̣б̣аанам̣. зд̇т̇а гожи ажаванад̇хаммо наама над̇т̇ийд̇и д̣̇ассзд̇и. д̇ам̣ саб̣б̣аж̇ааним̣ гусало вид̣̇ид̇ваад̇и д̇ад̣̇зд̇ам̣ саб̣б̣асса сад̇д̇асса ж̇ааним̣ хааним̣ маран̣ам̣, саб̣б̣асса ваа сад̇д̇асса ж̇ааним̣ винаасам̣ бабхан̇г̇уд̇ам̣ гусало бан̣д̣ид̇аж̇аад̇иго маран̣аануссад̇ивасзна анижжад̇ааманасигааравасзна ваа ж̇аанид̇ваа. аад̇аабияо б̣рахмажарияам̣ жарзяяаад̇и вибассанааяа гаммам̣ гаронд̇о аад̇аабияасан̇каад̇зна вийриязна саманнааг̇ад̇ад̇д̇аа аад̇аабияо жад̇уб̣б̣ид̇хасаммаббад̇хаанавасзна аарад̣̇д̇хавийрияо анавасзсамаран̣асамад̇иггамануубааяам̣ маг̇г̇аб̣рахмажарияам̣ жарзяяа, бадибаж̇ж̇зяяаад̇и ад̇т̇о.
Sabbe gamissanti pahāya dehanti sabbe yathāvuttabhedā sabbabhavayonigativiññāṇaṭṭhitisattāvāsādivasena anekabhedabhinnā sattā dehaṃ attano sarīraṃ pahāya nikkhipitvā paralokaṃ gamissanti, asekkhā pana nibbānaṃ. Ettha koci acavanadhammo nāma natthīti dasseti. Taṃ sabbajāniṃ kusalo viditvāti tadetaṃ sabbassa sattassa jāniṃ hāniṃ maraṇaṃ, sabbassa vā sattassa jāniṃ vināsaṃ pabhaṅgutaṃ kusalo paṇḍitajātiko maraṇānussativasena aniccatāmanasikāravasena vā jānitvā. Ātāpiyo brahmacariyaṃ careyyāti vipassanāya kammaṃ karonto ātāpiyasaṅkhātena vīriyena samannāgatattā ātāpiyo catubbidhasammappadhānavasena āraddhavīriyo anavasesamaraṇasamatikkamanūpāyaṃ maggabrahmacariyaṃ careyya, paṭipajjeyyāti attho.
д̣̇уд̇ияасуд̇д̇аван̣н̣анаа нидтид̇аа.
Dutiyasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / уд̣̇аанабаал̣и • Udānapāḷi / 2. аббааяугасуд̇д̇ам̣ • 2. Appāyukasuttaṃ
