| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
៥. អាបត្តិយា អទស្សនេ ឧក្ខេបនីយកម្មកថា
5. Āpattiyā adassane ukkhepanīyakammakathā
៤៦. សំសថាតិ ឯត្ថ សំសធាតុយា កថនត្ថំ ទស្សេន្តោ អាហ ‘‘អារោចេថា’’តិ។ តុម្ហេ សំសថ, កថេថាតិ អត្ថោ។
46.Saṃsathāti ettha saṃsadhātuyā kathanatthaṃ dassento āha ‘‘ārocethā’’ti. Tumhe saṃsatha, kathethāti attho.
៥០. ភណ្ឌនការកោ ហោតីតិអាទិ ការណូបចារវសេន វុត្តោតិ អាហ ‘‘ភណ្ឌនាទិបច្ចយា’’តិអាទិ។ ភណ្ឌនការកាទិ ការណំ, តេន អាបន្នា អាបត្តិ ផលំ, តស្សា អទស្សនេ ឧក្ខេបនីយកម្មំ កាតព្ពន្តិ អធិប្បាយោ។ តស្សាតិ អាបត្តិយា។
50.Bhaṇḍanakārako hotītiādi kāraṇūpacāravasena vuttoti āha ‘‘bhaṇḍanādipaccayā’’tiādi. Bhaṇḍanakārakādi kāraṇaṃ, tena āpannā āpatti phalaṃ, tassā adassane ukkhepanīyakammaṃ kātabbanti adhippāyo. Tassāti āpattiyā.
៥១. ឯត្ថាតិ ឧក្ខេបនីយកម្មេ។ តត្ថាតិ តេចត្តាលីសវត្តេសុ។ អនុទ្ធំសេតព្ពោតិ ឯត្ថ ធំសធាតុយា គត្យត្ថំ បដិក្ខិបន្តោ អាហ ‘‘ន ចោទេតព្ពោ’’តិ។ ‘‘រជោនុទ្ធំសតី’’តិអាទីសុ (ពុ. វំ. ២.១០១) ហិ ធំសធាតុ គត្យត្ថេ វត្តតិ។ ‘‘ន ភិក្ខុ ភិក្ខូហី’’តិ ឯត្ថ សោយេវ ភិក្ខុ តេហេវ ភិក្ខូហីតិ អត្ថំ និវារេន្តោ អាហ ‘‘អញ្ញោ ភិក្ខុ អញ្ញេហិ ភិក្ខូហី’’តិ។ ន គិហិទ្ធជោតិ ឯត្ថ គិហីនំ ធជោ គិហិទ្ធជោតិ វុត្តេ ឱទាតវត្ថាទីនីតិ អាហ ‘‘ឱទាតវត្ថានី’’តិអាទិ។ ន តិត្ថិយាទិបទត្តយន្តិ ‘‘ន តិត្ថិយា សេវិតព្ពា, ភិក្ខូ សេវិតព្ពា, ភិក្ខុសិក្ខាយ សិក្ខិតព្ព’’ន្តិ បទានំ តយំ។ ‘‘ន អបសាទេតព្ពោ’’តិ ឥមិនា ន អាសាទេតព្ពោតិ ឯត្ថ អាបុព្ពសទធាតុយា អបបុព្ពសទធាតុយា សមានភាវំ ទស្សេតិ។ ‘‘អន្តោ វា ពហិ វាតិ’’ ឯត្ថ កស្ស អន្តោ វា ពហិ វាតិ អាហ ‘‘វិហារស្សា’’តិ។ សេសំ សព្ពំវត្តន្តិ យោជនា។ ឥមិនាតិ អាបត្តិយា អទស្សនេ ឧក្ខេបនីយកម្មេន។
51.Etthāti ukkhepanīyakamme. Tatthāti tecattālīsavattesu. Anuddhaṃsetabboti ettha dhaṃsadhātuyā gatyatthaṃ paṭikkhipanto āha ‘‘na codetabbo’’ti. ‘‘Rajonuddhaṃsatī’’tiādīsu (bu. vaṃ. 2.101) hi dhaṃsadhātu gatyatthe vattati. ‘‘Na bhikkhu bhikkhūhī’’ti ettha soyeva bhikkhu teheva bhikkhūhīti atthaṃ nivārento āha ‘‘añño bhikkhu aññehi bhikkhūhī’’ti. Na gihiddhajoti ettha gihīnaṃ dhajo gihiddhajoti vutte odātavatthādīnīti āha ‘‘odātavatthānī’’tiādi. Na titthiyādipadattayanti ‘‘na titthiyā sevitabbā, bhikkhū sevitabbā, bhikkhusikkhāya sikkhitabba’’nti padānaṃ tayaṃ. ‘‘Na apasādetabbo’’ti iminā na āsādetabboti ettha āpubbasadadhātuyā apapubbasadadhātuyā samānabhāvaṃ dasseti. ‘‘Anto vā bahi vāti’’ ettha kassa anto vā bahi vāti āha ‘‘vihārassā’’ti. Sesaṃ sabbaṃvattanti yojanā. Imināti āpattiyā adassane ukkhepanīyakammena.
៦៥. តស្សាតិ អាបត្តិយា។ ឥធាតិ បាបិកាយ ទិដ្ឋិយា អប្បដិនិស្សគ្គេ កតេ ឧក្ខេបនីយកម្មេ។ អាបត្តិអទស្សនាទីសុ ឧទ្ធរិត្វា ខិបីយតិ អបនីយតិ អនេន វិនយកម្មេនាតិ ឧក្ខេបនីយំ, តមេវ កម្មំ ឧក្ខេបនីយកម្មំ។
65.Tassāti āpattiyā. Idhāti pāpikāya diṭṭhiyā appaṭinissagge kate ukkhepanīyakamme. Āpattiadassanādīsu uddharitvā khipīyati apanīyati anena vinayakammenāti ukkhepanīyaṃ, tameva kammaṃ ukkhepanīyakammaṃ.
ឥតិ កម្មក្ខន្ធកវណ្ណនាយ យោជនា សមត្តា។
Iti kammakkhandhakavaṇṇanāya yojanā samattā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / ចូឡវគ្គបាឡិ • Cūḷavaggapāḷi
៥. អាបត្តិយា អទស្សនេ ឧក្ខេបនីយកម្មំ • 5. Āpattiyā adassane ukkhepanīyakammaṃ
អាកង្ខមានឆក្កំ • Ākaṅkhamānachakkaṃ
តេចត្តាលីសវត្តំ • Tecattālīsavattaṃ
៧. បាបិកាយ ទិដ្ឋិយា អប្បដិនិស្សគ្គេ ឧក្ខេបនីយកម្មំ • 7. Pāpikāya diṭṭhiyā appaṭinissagge ukkhepanīyakammaṃ
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / ចូឡវគ្គ-អដ្ឋកថា • Cūḷavagga-aṭṭhakathā / អាបត្តិយា អទស្សនេ ឧក្ខេបនីយកម្មកថា • Āpattiyā adassane ukkhepanīyakammakathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / អាបត្តិយា អទស្សនេ ឧក្ខេបនីយកម្មកថាវណ្ណនា • Āpattiyā adassane ukkhepanīyakammakathāvaṇṇanā
