| Library / Tipiṭaka / तिपिटक • Tipiṭaka / थेरगाथापाळि • Theragāthāpāḷi |
७. (अपर)-गोतमत्थेरगाथा
7. (Apara)-gotamattheragāthā
५८७.
587.
‘‘विजानेय्य सकं अत्थं, अवलोकेय्याथ पावचनं।
‘‘Vijāneyya sakaṃ atthaṃ, avalokeyyātha pāvacanaṃ;
यञ्चेत्थ अस्स पतिरूपं, सामञ्ञं अज्झुपगतस्स॥
Yañcettha assa patirūpaṃ, sāmaññaṃ ajjhupagatassa.
५८८.
588.
‘‘मित्तं इध च कल्याणं, सिक्खा विपुलं समादानं।
‘‘Mittaṃ idha ca kalyāṇaṃ, sikkhā vipulaṃ samādānaṃ;
सुस्सूसा च गरूनं, एतं समणस्स पतिरूपं॥
Sussūsā ca garūnaṃ, etaṃ samaṇassa patirūpaṃ.
५८९.
589.
‘‘बुद्धेसु सगारवता, धम्मे अपचिति यथाभूतं।
‘‘Buddhesu sagāravatā, dhamme apaciti yathābhūtaṃ;
सङ्घे च चित्तिकारो, एतं समणस्स पतिरूपं॥
Saṅghe ca cittikāro, etaṃ samaṇassa patirūpaṃ.
५९०.
590.
‘‘आचारगोचरे युत्तो, आजीवो सोधितो अगारय्हो।
‘‘Ācāragocare yutto, ājīvo sodhito agārayho;
चित्तस्स च सण्ठपनं, एतं समणस्स पतिरूपं॥
Cittassa ca saṇṭhapanaṃ, etaṃ samaṇassa patirūpaṃ.
५९१.
591.
‘‘चारित्तं अथ वारित्तं, इरियापथियं पसादनियं।
‘‘Cārittaṃ atha vārittaṃ, iriyāpathiyaṃ pasādaniyaṃ;
अधिचित्ते च आयोगो, एतं समणस्स पतिरूपं॥
Adhicitte ca āyogo, etaṃ samaṇassa patirūpaṃ.
५९२.
592.
‘‘आरञ्ञकानि सेनासनानि, पन्तानि अप्पसद्दानि।
‘‘Āraññakāni senāsanāni, pantāni appasaddāni;
भजितब्बानि मुनिना, एतं समणस्स पतिरूपं॥
Bhajitabbāni muninā, etaṃ samaṇassa patirūpaṃ.
५९३.
593.
‘‘सीलञ्च बाहुसच्चञ्च, धम्मानं पविचयो यथाभूतं।
‘‘Sīlañca bāhusaccañca, dhammānaṃ pavicayo yathābhūtaṃ;
सच्चानं अभिसमयो, एतं समणस्स पतिरूपं॥
Saccānaṃ abhisamayo, etaṃ samaṇassa patirūpaṃ.
५९४.
594.
‘‘भावेय्य च अनिच्चन्ति, अनत्तसञ्ञं असुभसञ्ञञ्च।
‘‘Bhāveyya ca aniccanti, anattasaññaṃ asubhasaññañca;
लोकम्हि च अनभिरतिं, एतं समणस्स पतिरूपं॥
Lokamhi ca anabhiratiṃ, etaṃ samaṇassa patirūpaṃ.
५९५.
595.
‘‘भावेय्य च बोज्झङ्गे, इद्धिपादानि इन्द्रियानि बलानि।
‘‘Bhāveyya ca bojjhaṅge, iddhipādāni indriyāni balāni;
अट्ठङ्गमग्गमरियं, एतं समणस्स पतिरूपं॥
Aṭṭhaṅgamaggamariyaṃ, etaṃ samaṇassa patirūpaṃ.
५९६.
596.
‘‘तण्हं पजहेय्य मुनि, समूलके आसवे पदालेय्य।
‘‘Taṇhaṃ pajaheyya muni, samūlake āsave padāleyya;
विहरेय्य विप्पमुत्तो, एतं समणस्स पतिरूप’’न्ति॥
Vihareyya vippamutto, etaṃ samaṇassa patirūpa’’nti.
… गोतमो थेरो…।
… Gotamo thero….
दसकनिपातो निट्ठितो।
Dasakanipāto niṭṭhito.
तत्रुद्दानं –
Tatruddānaṃ –
काळुदायी च सो थेरो, एकविहारी च कप्पिनो।
Kāḷudāyī ca so thero, ekavihārī ca kappino;
चूळपन्थको कप्पो च, उपसेनो च गोतमो।
Cūḷapanthako kappo ca, upaseno ca gotamo;
सत्तिमे दसके थेरा, गाथायो चेत्थ सत्ततीति॥
Sattime dasake therā, gāthāyo cettha sattatīti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / थेरगाथा-अट्ठकथा • Theragāthā-aṭṭhakathā / ७. (अपर)-गोतमत्थेरगाथावण्णना • 7. (Apara)-gotamattheragāthāvaṇṇanā
