| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
24. අඤ්ජනීනිද්දෙසවණ්ණනා
24. Añjanīniddesavaṇṇanā
182. වට්ටා වා අට්ඨසොළසංසා වා මට්ඨා පුප්ඵලතාදීහි අචිත්තකා අඤ්ජනී වට්ටතීති අත්ථො. තිස්සොපි වට්ටන්ති, එකාය වා ද්වීසු වා කථා එව නත්ථීති අධිප්පායො. ලෙඛාති වට්ටලෙඛා. බන්ධිතුන්ති පිධානකබන්ධනත්ථං.
182. Vaṭṭā vā aṭṭhasoḷasaṃsā vā maṭṭhā pupphalatādīhi acittakā añjanī vaṭṭatīti attho. Tissopi vaṭṭanti, ekāya vā dvīsu vā kathā eva natthīti adhippāyo. Lekhāti vaṭṭalekhā. Bandhitunti pidhānakabandhanatthaṃ.
183. රූපන්ති සකුණරූපාදි. යදි ච එදිසං අඤ්ඤෙහි කතං ලභති, ඝංසිත්වා වා ඡින්දිත්වා වා යථා වා න පඤ්ඤායති, තථා සුත්තෙන වෙඨෙත්වා වළඤ්ජෙතබ්බං.
183.Rūpanti sakuṇarūpādi. Yadi ca edisaṃ aññehi kataṃ labhati, ghaṃsitvā vā chinditvā vā yathā vā na paññāyati, tathā suttena veṭhetvā vaḷañjetabbaṃ.
184. ථවිකාති අඤ්ජනිථවිකා. අඤ්ජනිසලාකාපි ලබ්භතීති සම්බන්ධො.
184.Thavikāti añjanithavikā. Añjanisalākāpi labbhatīti sambandho.
185-6. අට්ඨීති (මහාව. 266; මහාව. අට්ඨ. 264) මනුස්සට්ඨිං ඨපෙත්වා අවසෙසට්ඨි. විසාණදන්තෙසු අකප්පියං නාම නත්ථි. ආමලකකක්කාදීහි කතා ඵලමයා. තම්මයාති ඉධ වුත්තෙහෙව නිබ්බත්තා. අඤ්ජනීවිනිච්ඡයො.
185-6.Aṭṭhīti (mahāva. 266; mahāva. aṭṭha. 264) manussaṭṭhiṃ ṭhapetvā avasesaṭṭhi. Visāṇadantesu akappiyaṃ nāma natthi. Āmalakakakkādīhi katā phalamayā. Tammayāti idha vutteheva nibbattā. Añjanīvinicchayo.
අඤ්ජනීනිද්දෙසවණ්ණනා නිට්ඨිතා.
Añjanīniddesavaṇṇanā niṭṭhitā.
