| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
༧. ཨཱམཀདྷཉྙསིཀྑཱཔདཝཎྞནཱ
7. Āmakadhaññasikkhāpadavaṇṇanā
ཏསྨཱཏི ཡསྨཱ ཝིཉྙཏྟི ཙེཝ བྷོཛནཉྩ པམཱཎཾ, ཏསྨཱ། ན ཀེཝལཉྩེཏྠ པཊིགྒཧཎེཡེཝ དུཀྐཊཾ ཧོཏི, པཊིགྒཎྷིཏྭཱ པན ཨརཉྙཏོ ཨཱཧརཎེཔི སུཀྑཱཔནེཔི ཝདྡལིདིཝསེ བྷཛྫནཏྠཱཡ ཨུདྡྷནསཛྫནེཔི ཀཔལླསཛྫནེཔི དབྦིསཛྫནེཔི དཱརཱུནི ཨཱདཱཡ ཨགྒིཀརཎེཔི ཀཔལླམྷི དྷཉྙཔཀྑིཔནེཔི དབྦིཡཱ སངྒྷཊྚནེསུཔི ཀོཊྚནཏྠཾ ཨུདུཀྑལམུསལཱདིསཛྫནེསུཔི ཀོཊྚནཔཔྥོཊནདྷོཝནཱདཱིསུཔི ཡཱཝ མུཁེ ཋཔེཏྭཱ ཨཛ྄ཛྷོཧརཎཏྠཾ དནྟེཧི སངྑཱདཏི, ཏཱཝ སབྦཔྤཡོགེསུ དུཀྐཊཱནཱིཏི ཨཱཧ ‘‘པཊིགྒཧཎཏོ པཊྛཱཡ ཡཱཝ དནྟེཧི སཾཁཱདནཾ, ཏཱཝ པུབྦཔྤཡོགེསུ དུཀྐཊཱནཱི’’ཏི།
Tasmāti yasmā viññatti ceva bhojanañca pamāṇaṃ, tasmā. Na kevalañcettha paṭiggahaṇeyeva dukkaṭaṃ hoti, paṭiggaṇhitvā pana araññato āharaṇepi sukkhāpanepi vaddalidivase bhajjanatthāya uddhanasajjanepi kapallasajjanepi dabbisajjanepi dārūni ādāya aggikaraṇepi kapallamhi dhaññapakkhipanepi dabbiyā saṅghaṭṭanesupi koṭṭanatthaṃ udukkhalamusalādisajjanesupi koṭṭanapapphoṭanadhovanādīsupi yāva mukhe ṭhapetvā ajjhoharaṇatthaṃ dantehi saṅkhādati, tāva sabbappayogesu dukkaṭānīti āha ‘‘paṭiggahaṇato paṭṭhāya yāva dantehi saṃkhādanaṃ, tāva pubbappayogesu dukkaṭānī’’ti.
ཨཱམཀདྷཉྙསིཀྑཱཔདཝཎྞནཱ ནིཊྛིཏཱ།
Āmakadhaññasikkhāpadavaṇṇanā niṭṭhitā.
