| Library / Tipiṭaka / तिपिटक • Tipiṭaka / चरियापिटकपाळि • Cariyāpiṭakapāḷi |
९. अलीनसत्तुचरिया
9. Alīnasattucariyā
७४.
74.
राजा जयद्दिसो नाम, सीलगुणमुपागतो॥
Rājā jayaddiso nāma, sīlaguṇamupāgato.
७५.
75.
‘‘तस्स रञ्ञो अहं पुत्तो, सुतधम्मो सुसीलवा।
‘‘Tassa rañño ahaṃ putto, sutadhammo susīlavā;
अलीनसत्तो गुणवा, अनुरक्खपरिजनो सदा॥
Alīnasatto guṇavā, anurakkhaparijano sadā.
७६.
76.
‘‘पिता मे मिगवं गन्त्वा, पोरिसादं उपागमि।
‘‘Pitā me migavaṃ gantvā, porisādaṃ upāgami;
सो मे पितुमग्गहेसि, ‘भक्खोसि मम मा चलि’॥
So me pitumaggahesi, ‘bhakkhosi mama mā cali’.
७७.
77.
‘‘तस्स तं वचनं सुत्वा, भीतो तसितवेधितो।
‘‘Tassa taṃ vacanaṃ sutvā, bhīto tasitavedhito;
ऊरुक्खम्भो अहु तस्स, दिस्वान पोरिसादकं॥
Ūrukkhambho ahu tassa, disvāna porisādakaṃ.
७८.
78.
‘‘मिगवं गहेत्वा मुञ्चस्सु, कत्वा आगमनं पुन।
‘‘Migavaṃ gahetvā muñcassu, katvā āgamanaṃ puna;
ब्राह्मणस्स धनं दत्वा, पिता आमन्तयी ममं॥
Brāhmaṇassa dhanaṃ datvā, pitā āmantayī mamaṃ.
७९.
79.
‘‘‘रज्जं पुत्त पटिपज्ज, मा पमज्जि पुरं इदं।
‘‘‘Rajjaṃ putta paṭipajja, mā pamajji puraṃ idaṃ;
कतं मे पोरिसादेन, मम आगमनं पुन’॥
Kataṃ me porisādena, mama āgamanaṃ puna’.
८०.
80.
‘‘मातापितू च वन्दित्वा, निम्मिनित्वान अत्तना।
‘‘Mātāpitū ca vanditvā, nimminitvāna attanā;
निक्खिपित्वा धनुं खग्गं, पोरिसादं उपागमिं॥
Nikkhipitvā dhanuṃ khaggaṃ, porisādaṃ upāgamiṃ.
८१.
81.
‘‘ससत्थहत्थूपगतं, कदाचि सो तसिस्सति।
‘‘Sasatthahatthūpagataṃ, kadāci so tasissati;
८२.
82.
‘‘सीलखण्डभया मय्हं, तस्स देस्सं न ब्याहरिं।
‘‘Sīlakhaṇḍabhayā mayhaṃ, tassa dessaṃ na byāhariṃ;
मेत्तचित्तो हितवादी, इदं वचनमब्रविं॥
Mettacitto hitavādī, idaṃ vacanamabraviṃ.
८३.
83.
‘‘‘उज्जालेहि महाअग्गिं, पपतिस्सामि रुक्खतो।
‘‘‘Ujjālehi mahāaggiṃ, papatissāmi rukkhato;
८४.
84.
‘‘इति सीलवतं हेतु, नारक्खिं मम जीवितं।
‘‘Iti sīlavataṃ hetu, nārakkhiṃ mama jīvitaṃ;
पब्बाजेसिं चहं तस्स, सदा पाणातिपातिक’’न्ति॥
Pabbājesiṃ cahaṃ tassa, sadā pāṇātipātika’’nti.
अलीनसत्तुचरियं नवमं।
Alīnasattucariyaṃ navamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / चरियापिटक-अट्ठकथा • Cariyāpiṭaka-aṭṭhakathā / ९. अलीनसत्तुचरियावण्णना • 9. Alīnasattucariyāvaṇṇanā
