| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៦. អាកាសង្គបញ្ហោ
6. Ākāsaṅgapañho
៦. ‘‘ភន្តេ នាគសេន, ‘អាកាសស្ស បញ្ច អង្គានិ គហេតព្ពានី’តិ យំ វទេសិ, កតមានិ តានិ បញ្ច អង្គានិ គហេតព្ពានី’’តិ? ‘‘យថា, មហារាជ, អាកាសោ សព្ពសោ អគយ្ហោ, ឯវមេវ ខោ, មហារាជ, យោគិនា យោគាវចរេន សព្ពសោ កិលេសេហិ អគយ្ហេន ភវិតព្ពំ។ ឥទំ, មហារាជ, អាកាសស្ស បឋមំ អង្គំ គហេតព្ពំ។
6. ‘‘Bhante nāgasena, ‘ākāsassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, ākāso sabbaso agayho, evameva kho, mahārāja, yoginā yogāvacarena sabbaso kilesehi agayhena bhavitabbaṃ. Idaṃ, mahārāja, ākāsassa paṭhamaṃ aṅgaṃ gahetabbaṃ.
‘‘បុន ចបរំ, មហារាជ, អាកាសោ ឥសិតាបសភូតទិជគណានុសញ្ចរិតោ, ឯវមេវ ខោ, មហារាជ, យោគិនា យោគាវចរេន ‘អនិច្ចំ ទុក្ខំ អនត្តា’តិ សង្ខារេសុ មានសំ សញ្ចារយិតព្ពំ។ ឥទំ, មហារាជ, អាកាសស្ស ទុតិយំ អង្គំ គហេតព្ពំ។
‘‘Puna caparaṃ, mahārāja, ākāso isitāpasabhūtadijagaṇānusañcarito, evameva kho, mahārāja, yoginā yogāvacarena ‘aniccaṃ dukkhaṃ anattā’ti saṅkhāresu mānasaṃ sañcārayitabbaṃ. Idaṃ, mahārāja, ākāsassa dutiyaṃ aṅgaṃ gahetabbaṃ.
‘‘បុន ចបរំ, មហារាជ, អាកាសោ សន្តាសនីយោ, ឯវមេវ ខោ, មហារាជ , យោគិនា យោគាវចរេន សព្ពភវបដិសន្ធីសុ មានសំ ឧព្ពេជយិតព្ពំ, អស្សាទោ ន កាតព្ពោ។ ឥទំ, មហារាជ, អាកាសស្ស តតិយំ អង្គំ គហេតព្ពំ។
‘‘Puna caparaṃ, mahārāja, ākāso santāsanīyo, evameva kho, mahārāja , yoginā yogāvacarena sabbabhavapaṭisandhīsu mānasaṃ ubbejayitabbaṃ, assādo na kātabbo. Idaṃ, mahārāja, ākāsassa tatiyaṃ aṅgaṃ gahetabbaṃ.
‘‘បុន ចបរំ, មហារាជ, អាកាសោ អនន្តោ អប្បមាណោ អបរិមេយ្យោ, ឯវមេវ ខោ, មហារាជ, យោគិនា យោគាវចរេន អនន្តសីលេន អបរិមិតញាណេន ភវិតព្ពំ។ ឥទំ, មហារាជ, អាកាសស្ស ចតុត្ថំ អង្គំ គហេតព្ពំ។
‘‘Puna caparaṃ, mahārāja, ākāso ananto appamāṇo aparimeyyo, evameva kho, mahārāja, yoginā yogāvacarena anantasīlena aparimitañāṇena bhavitabbaṃ. Idaṃ, mahārāja, ākāsassa catutthaṃ aṅgaṃ gahetabbaṃ.
‘‘បុន ចបរំ, មហារាជ, អាកាសោ អលគ្គោ អសត្តោ អប្បតិដ្ឋិតោ អបលិពុទ្ធោ, ឯវមេវ ខោ , មហារាជ, យោគិនា យោគាវចរេន កុលេ គណេ លាភេ អាវាសេ បលិពោធេ បច្ចយេ សព្ពកិលេសេសុ ច សព្ពត្ថ អលគ្គេន ភវិតព្ពំ, អនាសត្តេន អប្បតិដ្ឋិតេន អបលិពុទ្ធេន ភវិតព្ពំ។ ឥទំ, មហារាជ, អាកាសស្ស បញ្ចមំ អង្គំ គហេតព្ពំ។ ភាសិតម្បេតំ, មហារាជ, ភគវតា ទេវាតិទេវេន សកំ បុត្តំ រាហុលំ ឱវទន្តេន – ‘សេយ្យថាបិ, រាហុល 1, អាកាសោ ន កត្ថចិ បតិដ្ឋិតោ, ឯវមេវ ខោ ត្វំ, រាហុល, អាកាសសមំ ភាវនំ ភាវេហិ, អាកាសសមំ ហិ តេ, រាហុល, ភាវនំ ភាវយតោ ឧប្បន្នា មនាបាមនាបា ផស្សា ចិត្តំ បរិយាទាយ ឋស្សន្តី’’’តិ។
‘‘Puna caparaṃ, mahārāja, ākāso alaggo asatto appatiṭṭhito apalibuddho, evameva kho , mahārāja, yoginā yogāvacarena kule gaṇe lābhe āvāse palibodhe paccaye sabbakilesesu ca sabbattha alaggena bhavitabbaṃ, anāsattena appatiṭṭhitena apalibuddhena bhavitabbaṃ. Idaṃ, mahārāja, ākāsassa pañcamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena sakaṃ puttaṃ rāhulaṃ ovadantena – ‘seyyathāpi, rāhula 2, ākāso na katthaci patiṭṭhito, evameva kho tvaṃ, rāhula, ākāsasamaṃ bhāvanaṃ bhāvehi, ākāsasamaṃ hi te, rāhula, bhāvanaṃ bhāvayato uppannā manāpāmanāpā phassā cittaṃ pariyādāya ṭhassantī’’’ti.
អាកាសង្គបញ្ហោ ឆដ្ឋោ។
Ākāsaṅgapañho chaṭṭho.
Footnotes:
