| Library / Tipiṭaka / តិបិដក • Tipiṭaka / មជ្ឈិមនិកាយ (អដ្ឋកថា) • Majjhimanikāya (aṭṭhakathā) |
២. អគ្គិវច្ឆសុត្តវណ្ណនា
2. Aggivacchasuttavaṇṇanā
១៨៧. ឯវំ មេ សុតន្តិ អគ្គិវច្ឆសុត្តំ។ តត្ថ ន ខោ អហន្តិ បឋមវារេ នាហំ សស្សតទិដ្ឋិកោតិ វទតិ, ទុតិយេ នាហំ ឧច្ឆេទទិដ្ឋិកោតិ។ ឯវំ អន្តានន្តិកាទិវសេន សព្ពវារេសុ បដិក្ខេបោ វេទិតព្ពោ។ ហោតិ ច ន ច ហោតីតិ អយំ បនេត្ថ ឯកច្ចសស្សតវាទោ។ នេវ ហោតិ ន ន ហោតីតិ អយំ អមរាវិក្ខេបោតិ វេទិតព្ពោ។
187.Evaṃme sutanti aggivacchasuttaṃ. Tattha na kho ahanti paṭhamavāre nāhaṃ sassatadiṭṭhikoti vadati, dutiye nāhaṃ ucchedadiṭṭhikoti. Evaṃ antānantikādivasena sabbavāresu paṭikkhepo veditabbo. Hoti ca na ca hotīti ayaṃ panettha ekaccasassatavādo. Neva hoti na na hotīti ayaṃ amarāvikkhepoti veditabbo.
១៨៩. សទុក្ខន្តិ កិលេសទុក្ខេន ចេវ វិបាកទុក្ខេន ច សទុក្ខំ។ សវិឃាតន្តិ តេសំយេវ ទ្វិន្នំ វសេន សឧបឃាតកំ។ សឧបាយាសន្តិ តេសំយេវ វសេន សឧបាយាសំ។ សបរិឡាហន្តិ តេសំយេវ វសេន សបរិឡាហំ។
189.Sadukkhanti kilesadukkhena ceva vipākadukkhena ca sadukkhaṃ. Savighātanti tesaṃyeva dvinnaṃ vasena saupaghātakaṃ. Saupāyāsanti tesaṃyeva vasena saupāyāsaṃ. Sapariḷāhanti tesaṃyeva vasena sapariḷāhaṃ.
កិញ្ចិ ទិដ្ឋិគតន្តិ កាចិ ឯកា ទិដ្ឋិបិ រុច្ចិត្វា ខមាបេត្វា គហិតា អត្ថីតិ បុច្ឆតិ។ អបនីតន្តិ នីហដំ អបវិទ្ធំ។ ទិដ្ឋន្តិ បញ្ញាយ ទិដ្ឋំ។ តស្មាតិ យស្មា បញ្ចន្នំ ខន្ធានំ ឧទយវយំ អទ្ទស, តស្មា។ សព្ពមញ្ញិតានន្តិ សព្ពេសំ តិណ្ណម្បិ តណ្ហាទិដ្ឋិមានមញ្ញិតានំ។ មថិតានន្តិ តេសំយេវ វេវចនំ។ ឥទានិ តានិ វិភជិត្វា ទស្សេន្តោ សព្ពអហំការ-មមំការ-មានានុសយានន្តិ អាហ។ ឯត្ថ ហិ អហំការោ ទិដ្ឋិ, មមំការោ តណ្ហា, មានានុសយោ មានោ។ អនុបាទា វិមុត្តោតិ ចតូហិ ឧបាទានេហិ កញ្ចិ ធម្មំ អនុបាទិយិត្វា វិមុត្តោ។
Kiñci diṭṭhigatanti kāci ekā diṭṭhipi ruccitvā khamāpetvā gahitā atthīti pucchati. Apanītanti nīhaṭaṃ apaviddhaṃ. Diṭṭhanti paññāya diṭṭhaṃ. Tasmāti yasmā pañcannaṃ khandhānaṃ udayavayaṃ addasa, tasmā. Sabbamaññitānanti sabbesaṃ tiṇṇampi taṇhādiṭṭhimānamaññitānaṃ. Mathitānanti tesaṃyeva vevacanaṃ. Idāni tāni vibhajitvā dassento sabbaahaṃkāra-mamaṃkāra-mānānusayānanti āha. Ettha hi ahaṃkāro diṭṭhi, mamaṃkāro taṇhā, mānānusayo māno. Anupādā vimuttoti catūhi upādānehi kañci dhammaṃ anupādiyitvā vimutto.
១៩០. ន ឧបេតីតិ ន យុជ្ជតិ។ ឯត្ថ ច ‘‘ន ឧបបជ្ជតី’’តិ ឥទំ អនុជានិតព្ពំ សិយា។ យស្មា បន ឯវំ វុត្តេ សោ បរិព្ពាជកោ ឧច្ឆេទំ គណ្ហេយ្យ, ឧបបជ្ជតីតិ បន សស្សតមេវ, ឧបបជ្ជតិ ច ន ច ឧបបជ្ជតីតិ ឯកច្ចសស្សតំ, នេវ ឧបបជ្ជតិ ន ន ឧបបជ្ជតីតិ អមរាវិក្ខេបំ, តស្មា ភគវា – ‘‘អយំ អប្បតិដ្ឋោ អនាលម្ពោ ហោតុ, សុខបវេសនដ្ឋានំ មា លភតូ’’តិ អននុញ្ញាយ ឋត្វា អនុញ្ញម្បិ បដិក្ខិបិ។ អលន្តិ សមត្ថំ បរិយត្តំ ។ ធម្មោតិ បច្ចយាការធម្មោ។ អញ្ញត្រយោគេនាតិ អញ្ញត្ថ បយោគេន។ អញ្ញត្រាចរិយកេនាតិ បច្ចយាការំ អជានន្តានំ អញ្ញេសំ អាចរិយានំ សន្តិកេ វសន្តេន។
190.Na upetīti na yujjati. Ettha ca ‘‘na upapajjatī’’ti idaṃ anujānitabbaṃ siyā. Yasmā pana evaṃ vutte so paribbājako ucchedaṃ gaṇheyya, upapajjatīti pana sassatameva, upapajjati ca na ca upapajjatīti ekaccasassataṃ, neva upapajjati na na upapajjatīti amarāvikkhepaṃ, tasmā bhagavā – ‘‘ayaṃ appatiṭṭho anālambo hotu, sukhapavesanaṭṭhānaṃ mā labhatū’’ti ananuññāya ṭhatvā anuññampi paṭikkhipi. Alanti samatthaṃ pariyattaṃ . Dhammoti paccayākāradhammo. Aññatrayogenāti aññattha payogena. Aññatrācariyakenāti paccayākāraṃ ajānantānaṃ aññesaṃ ācariyānaṃ santike vasantena.
១៩១. តេន ហិ វច្ឆាតិ យស្មា ត្វំ សម្មោហមាបាទិន្តិ វទសិ, តស្មា តំយេវេត្ថ បដិបុច្ឆិស្សាមិ។ អនាហារោ និព្ពុតោតិ អប្បច្ចយោ និព្ពុតោ។
191.Tena hi vacchāti yasmā tvaṃ sammohamāpādinti vadasi, tasmā taṃyevettha paṭipucchissāmi. Anāhāronibbutoti appaccayo nibbuto.
១៩២. យេន រូបេនាតិ យេន រូបេន សត្តសង្ខាតំ តថាគតំ រូបីតិ បញ្ញាបេយ្យ។ គម្ភីរោតិ គុណគម្ភីរោ។ អប្បមេយ្យោតិ បមាណំ គណ្ហិតុំ ន សក្កុណេយ្យោ។ ទុប្បរិយោគាឡ្ហោតិ ទុឱគាហោ ទុជ្ជានោ។ សេយ្យថាបិ មហាសមុទ្ទោតិ យថា មហាសមុទ្ទោ គម្ភីរោ អប្បមេយ្យោ ទុជ្ជានោ, ឯវមេវ ខីណាសវោបិ។ តំ អារព្ភ ឧបបជ្ជតីតិអាទិ សព្ពំ ន យុជ្ជតិ។ កថំ? យថា បរិនិព្ពុតំ អគ្គិំ អារព្ភ បុរត្ថិមំ ទិសំ គតោតិអាទិ សព្ពំ ន យុជ្ជតិ, ឯវំ។
192.Yena rūpenāti yena rūpena sattasaṅkhātaṃ tathāgataṃ rūpīti paññāpeyya. Gambhīroti guṇagambhīro. Appameyyoti pamāṇaṃ gaṇhituṃ na sakkuṇeyyo. Duppariyogāḷhoti duogāho dujjāno. Seyyathāpi mahāsamuddoti yathā mahāsamuddo gambhīro appameyyo dujjāno, evameva khīṇāsavopi. Taṃ ārabbha upapajjatītiādi sabbaṃ na yujjati. Kathaṃ? Yathā parinibbutaṃ aggiṃ ārabbha puratthimaṃ disaṃ gatotiādi sabbaṃ na yujjati, evaṃ.
អនិច្ចតាតិ អនិច្ចតាយ។ សារេ បតិដ្ឋិតន្តិ លោកុត្តរធម្មសារេ បតិដ្ឋិតំ។ សេសំ សព្ពត្ថ ឧត្តានមេវាតិ។
Aniccatāti aniccatāya. Sāre patiṭṭhitanti lokuttaradhammasāre patiṭṭhitaṃ. Sesaṃ sabbattha uttānamevāti.
បបញ្ចសូទនិយា មជ្ឈិមនិកាយដ្ឋកថាយ
Papañcasūdaniyā majjhimanikāyaṭṭhakathāya
អគ្គិវច្ឆសុត្តវណ្ណនា និដ្ឋិតា។
Aggivacchasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / មជ្ឈិមនិកាយ • Majjhimanikāya / ២. អគ្គិវច្ឆសុត្តំ • 2. Aggivacchasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / មជ្ឈិមនិកាយ (ដីកា) • Majjhimanikāya (ṭīkā) / ២. អគ្គិវច្ឆសុត្តវណ្ណនា • 2. Aggivacchasuttavaṇṇanā
