| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༤. ཨཙྩཡསུཏྟཝཎྞནཱ
4. Accayasuttavaṇṇanā
༢༧༠. སམྤཡོཛེསུནྟི ཨཉྙམཉྙཾ ཝཱཙསིཀཾ ཕརུསཾ པཡོཛེསུཾ། ཏེནཱཧ ‘‘ཀལཧཾ ཨཀཾསཱུ’’ཏི, ཝིཝཱདཾ ཨཀཾསཱུཏི ཨཏྠོ། ཨཏིཀྐམྨཝཙནནྟི ཝཙཱིསཾཝརཾ ཨཏིཀྐམིཏྭཱ ཝཙནཾ། ཡསྨཱ ཨཙྩཡེ དེསིཡམཱནེ ཏཾ ཁཱིཎཡཏི ཨཉྙམཉྙསྶ ཁམམཱནསྶ ཁམནཾ པཊིགྒཎྷཏོ, ཏསྨཱ ཝུཏྟཾ ‘‘ནཔྤཊིགཎྷཱཏཱིཏི ན ཁམཏཱི’’ཏི། ཏུམྷཱཀཾ ཝསེ ཝཏྟཏུ, ཝིསེཝིཏཾ ཨཀཏྭཱ ཡཐཱཀཱམཀརཎཱིཡོ ཧོཏུ། མིཏྟདྷམྨོ ཨིདྷ ཨུཏྟརཔདལོཔེན ‘‘མིཏྟོ’’ཏི ཝུཏྟོཏི ཨཱཧ ‘‘མིཏྟདྷམྨེ’’ཏི། ཀརཎཝཙནནྟི ‘‘མིཏྟེཧཱི’’ཏི ཀརཎཝཙནཾ བྷུམྨཏྠེ། ཏེནཱཧ ‘‘མིཏྟེསཱུ’’ཏི། ཡཐཱ ནིབྦཏྟསབྷཱཝསྶ བྷཱཝཏོ ཨཉྙཐཏྟཾ ཛརཱ, ཨེཝཾ མིཏྟབྷཱཝཏོ ཝུཏྟཝིཔརིཡཱཡོ ཨམིཏྟདྷམྨོ ཛརཱཔརིཡཱཡེན ཝུཏྟོ། ཨགཱརཡ྄ཧཾ ཨནཝཛྫཾ སབྦསོ པཧཱིནཀིལེསཾ། ཏེནཱཧ ‘‘ཁཱིཎཱསཝཔུགྒལ’’ནྟི།
270.Sampayojesunti aññamaññaṃ vācasikaṃ pharusaṃ payojesuṃ. Tenāha ‘‘kalahaṃ akaṃsū’’ti, vivādaṃ akaṃsūti attho. Atikkammavacananti vacīsaṃvaraṃ atikkamitvā vacanaṃ. Yasmā accaye desiyamāne taṃ khīṇayati aññamaññassa khamamānassa khamanaṃ paṭiggaṇhato, tasmā vuttaṃ ‘‘nappaṭigaṇhātīti na khamatī’’ti. Tumhākaṃ vase vattatu, visevitaṃ akatvā yathākāmakaraṇīyo hotu. Mittadhammo idha uttarapadalopena ‘‘mitto’’ti vuttoti āha ‘‘mittadhamme’’ti. Karaṇavacananti ‘‘mittehī’’ti karaṇavacanaṃ bhummatthe. Tenāha ‘‘mittesū’’ti. Yathā nibbattasabhāvassa bhāvato aññathattaṃ jarā, evaṃ mittabhāvato vuttavipariyāyo amittadhammo jarāpariyāyena vutto. Agārayhaṃ anavajjaṃ sabbaso pahīnakilesaṃ. Tenāha ‘‘khīṇāsavapuggala’’nti.
ཨཙྩཡསུཏྟཝཎྞནཱ ནིཊྛིཏཱ།
Accayasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༤. ཨཙྩཡསུཏྟཾ • 4. Accayasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༤. ཨཙྩཡསུཏྟཝཎྞནཱ • 4. Accayasuttavaṇṇanā
