| Library / Tipiṭaka / ติปิฎก • Tipiṭaka / วิมานวตฺถุปาฬิ • Vimānavatthupāḷi |
๓. อาจามทายิกาวิมานวตฺถุ
3. Ācāmadāyikāvimānavatthu
๑๘๕.
185.
‘‘ปิณฺฑาย เต จรนฺตสฺส, ตุณฺหีภูตสฺส ติฎฺฐโต;
‘‘Piṇḍāya te carantassa, tuṇhībhūtassa tiṭṭhato;
๑๘๖.
186.
‘‘ยา เต อทาสิ อาจามํ, ปสนฺนา เสหิ ปาณิภิ;
‘‘Yā te adāsi ācāmaṃ, pasannā sehi pāṇibhi;
สา หิตฺวา มานุสํ เทหํ, กํ นุ สา ทิสตํ คตา’’ติฯ
Sā hitvā mānusaṃ dehaṃ, kaṃ nu sā disataṃ gatā’’ti.
๑๘๗.
187.
‘‘ปิณฺฑาย เม จรนฺตสฺส, ตุณฺหีภูตสฺส ติฎฺฐโต;
‘‘Piṇḍāya me carantassa, tuṇhībhūtassa tiṭṭhato;
ทลิทฺทา กปณา นารี, ปราคารํ อปสฺสิตาฯ
Daliddā kapaṇā nārī, parāgāraṃ apassitā.
๑๘๘.
188.
‘‘ยา เม อทาสิ อาจามํ, ปสนฺนา เสหิ ปาณิภิ;
‘‘Yā me adāsi ācāmaṃ, pasannā sehi pāṇibhi;
สา หิตฺวา มานุสํ เทหํ, วิปฺปมุตฺตา อิโต จุตาฯ
Sā hitvā mānusaṃ dehaṃ, vippamuttā ito cutā.
๑๘๙.
189.
‘‘นิมฺมานรติโน นาม, สนฺติ เทวา มหิทฺธิกา;
‘‘Nimmānaratino nāma, santi devā mahiddhikā;
ตตฺถ สา สุขิตา นารี, โมทตาจามทายิกา’’ติฯ
Tattha sā sukhitā nārī, modatācāmadāyikā’’ti.
๑๙๐.
190.
‘‘อโห ทานํ วรากิยา, กสฺสเป สุปฺปติฎฺฐิตํ;
‘‘Aho dānaṃ varākiyā, kassape suppatiṭṭhitaṃ;
ปราภเตน ทาเนน, อิชฺฌิตฺถ วต ทกฺขิณาฯ
Parābhatena dānena, ijjhittha vata dakkhiṇā.
๑๙๑.
191.
‘‘ยา มเหสิตฺตํ กาเรยฺย, จกฺกวตฺติสฺส ราชิโน;
‘‘Yā mahesittaṃ kāreyya, cakkavattissa rājino;
นารี สพฺพงฺคกลฺยาณี, ภตฺตุ จาโนมทสฺสิกา;
Nārī sabbaṅgakalyāṇī, bhattu cānomadassikā;
เอตสฺสาจามทานสฺส , กลํ นาคฺฆติ โสฬสิํฯ
Etassācāmadānassa , kalaṃ nāgghati soḷasiṃ.
๑๙๒.
192.
‘‘สตํ นิกฺขา สตํ อสฺสา, สตํ อสฺสตรีรถา;
‘‘Sataṃ nikkhā sataṃ assā, sataṃ assatarīrathā;
สตํ กญฺญาสหสฺสานิ, อามุตฺตมณิกุณฺฑลา;
Sataṃ kaññāsahassāni, āmuttamaṇikuṇḍalā;
เอตสฺสาจามทานสฺส, กลํ นาคฺฆนฺติ โสฬสิํฯ
Etassācāmadānassa, kalaṃ nāgghanti soḷasiṃ.
๑๙๓.
193.
‘‘สตํ เหมวตา นาคา, อีสาทนฺตา อุรูฬฺหวา;
‘‘Sataṃ hemavatā nāgā, īsādantā urūḷhavā;
เอตสฺสาจามทานสฺส, กลํ นาคฺฆติ โสฬสิํฯ
Etassācāmadānassa, kalaṃ nāgghati soḷasiṃ.
๑๙๔.
194.
‘‘จตุนฺนมปิ ทีปานํ, อิสฺสรํ โยธ การเย;
‘‘Catunnamapi dīpānaṃ, issaraṃ yodha kāraye;
เอตสฺสาจามทานสฺส, กลํ นาคฺฆติ โสฬสิ’’นฺติฯ
Etassācāmadānassa, kalaṃ nāgghati soḷasi’’nti.
อาจามทายิกาวิมานํ ตติยํฯ
Ācāmadāyikāvimānaṃ tatiyaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / วิมานวตฺถุ-อฎฺฐกถา • Vimānavatthu-aṭṭhakathā / ๓. อาจามทายิกาวิมานวณฺณนา • 3. Ācāmadāyikāvimānavaṇṇanā
