| Library / Tipiṭaka / तिपिटक • Tipiṭaka / विमानवत्थुपाळि • Vimānavatthupāḷi |
३. आचामदायिकाविमानवत्थु
3. Ācāmadāyikāvimānavatthu
१८५.
185.
‘‘पिण्डाय ते चरन्तस्स, तुण्हीभूतस्स तिट्ठतो।
‘‘Piṇḍāya te carantassa, tuṇhībhūtassa tiṭṭhato;
१८६.
186.
‘‘या ते अदासि आचामं, पसन्ना सेहि पाणिभि।
‘‘Yā te adāsi ācāmaṃ, pasannā sehi pāṇibhi;
सा हित्वा मानुसं देहं, कं नु सा दिसतं गता’’ति॥
Sā hitvā mānusaṃ dehaṃ, kaṃ nu sā disataṃ gatā’’ti.
१८७.
187.
‘‘पिण्डाय मे चरन्तस्स, तुण्हीभूतस्स तिट्ठतो।
‘‘Piṇḍāya me carantassa, tuṇhībhūtassa tiṭṭhato;
दलिद्दा कपणा नारी, परागारं अपस्सिता॥
Daliddā kapaṇā nārī, parāgāraṃ apassitā.
१८८.
188.
‘‘या मे अदासि आचामं, पसन्ना सेहि पाणिभि।
‘‘Yā me adāsi ācāmaṃ, pasannā sehi pāṇibhi;
सा हित्वा मानुसं देहं, विप्पमुत्ता इतो चुता॥
Sā hitvā mānusaṃ dehaṃ, vippamuttā ito cutā.
१८९.
189.
‘‘निम्मानरतिनो नाम, सन्ति देवा महिद्धिका।
‘‘Nimmānaratino nāma, santi devā mahiddhikā;
तत्थ सा सुखिता नारी, मोदताचामदायिका’’ति॥
Tattha sā sukhitā nārī, modatācāmadāyikā’’ti.
१९०.
190.
‘‘अहो दानं वराकिया, कस्सपे सुप्पतिट्ठितं।
‘‘Aho dānaṃ varākiyā, kassape suppatiṭṭhitaṃ;
पराभतेन दानेन, इज्झित्थ वत दक्खिणा॥
Parābhatena dānena, ijjhittha vata dakkhiṇā.
१९१.
191.
‘‘या महेसित्तं कारेय्य, चक्कवत्तिस्स राजिनो।
‘‘Yā mahesittaṃ kāreyya, cakkavattissa rājino;
नारी सब्बङ्गकल्याणी, भत्तु चानोमदस्सिका।
Nārī sabbaṅgakalyāṇī, bhattu cānomadassikā;
एतस्साचामदानस्स , कलं नाग्घति सोळसिं॥
Etassācāmadānassa , kalaṃ nāgghati soḷasiṃ.
१९२.
192.
‘‘सतं निक्खा सतं अस्सा, सतं अस्सतरीरथा।
‘‘Sataṃ nikkhā sataṃ assā, sataṃ assatarīrathā;
सतं कञ्ञासहस्सानि, आमुत्तमणिकुण्डला।
Sataṃ kaññāsahassāni, āmuttamaṇikuṇḍalā;
एतस्साचामदानस्स, कलं नाग्घन्ति सोळसिं॥
Etassācāmadānassa, kalaṃ nāgghanti soḷasiṃ.
१९३.
193.
‘‘सतं हेमवता नागा, ईसादन्ता उरूळ्हवा।
‘‘Sataṃ hemavatā nāgā, īsādantā urūḷhavā;
एतस्साचामदानस्स, कलं नाग्घति सोळसिं॥
Etassācāmadānassa, kalaṃ nāgghati soḷasiṃ.
१९४.
194.
‘‘चतुन्नमपि दीपानं, इस्सरं योध कारये।
‘‘Catunnamapi dīpānaṃ, issaraṃ yodha kāraye;
एतस्साचामदानस्स, कलं नाग्घति सोळसि’’न्ति॥
Etassācāmadānassa, kalaṃ nāgghati soḷasi’’nti.
आचामदायिकाविमानं ततियं।
Ācāmadāyikāvimānaṃ tatiyaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / विमानवत्थु-अट्ठकथा • Vimānavatthu-aṭṭhakathā / ३. आचामदायिकाविमानवण्णना • 3. Ācāmadāyikāvimānavaṇṇanā
