| Library / Tipiṭaka / តិបិដក • Tipiṭaka / បដិសម្ភិទាមគ្គបាឡិ • Paṭisambhidāmaggapāḷi |
៧២-៧៣. សព្ពញ្ញុតញាណនិទ្ទេសោ
72-73. Sabbaññutañāṇaniddeso
១១៩. កតមំ តថាគតស្ស សព្ពញ្ញុតញ្ញាណំ? សព្ពំ សង្ខតមសង្ខតំ អនវសេសំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ 1។
119. Katamaṃ tathāgatassa sabbaññutaññāṇaṃ? Sabbaṃ saṅkhatamasaṅkhataṃ anavasesaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ 2.
១២០. អតីតំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។ អនាគតំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។ បច្ចុប្បន្នំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។
120. Atītaṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Anāgataṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Paccuppannaṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ចក្ខុ ចេវ រូបា ច, ឯវំ តំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។ សោតញ្ចេវ សទ្ទា ច…បេ.… ឃានញ្ចេវ គន្ធា ច… ជិវ្ហា ចេវ រសា ច… កាយោ ចេវ ផោដ្ឋព្ពា ច… មនោ ចេវ ធម្មា ច, ឯវំ តំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។
Cakkhu ceva rūpā ca, evaṃ taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Sotañceva saddā ca…pe… ghānañceva gandhā ca… jivhā ceva rasā ca… kāyo ceva phoṭṭhabbā ca… mano ceva dhammā ca, evaṃ taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
យាវតា អនិច្ចដ្ឋំ ទុក្ខដ្ឋំ អនត្តដ្ឋំ, តំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។ យាវតា រូបស្ស អនិច្ចដ្ឋំ ទុក្ខដ្ឋំ អនត្តដ្ឋំ, តំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។ យាវតា វេទនាយ…បេ.… យាវតា សញ្ញាយ…បេ.… យាវតា សង្ខារានំ…បេ.… យាវតា វិញ្ញាណស្ស …បេ.… យាវតា ចក្ខុស្ស…បេ.… ជរាមរណស្ស អនិច្ចដ្ឋំ ទុក្ខដ្ឋំ អនត្តដ្ឋំ, តំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។
Yāvatā aniccaṭṭhaṃ dukkhaṭṭhaṃ anattaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā rūpassa aniccaṭṭhaṃ dukkhaṭṭhaṃ anattaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā vedanāya…pe… yāvatā saññāya…pe… yāvatā saṅkhārānaṃ…pe… yāvatā viññāṇassa …pe… yāvatā cakkhussa…pe… jarāmaraṇassa aniccaṭṭhaṃ dukkhaṭṭhaṃ anattaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
យាវតា អភិញ្ញាយ អភិញ្ញដ្ឋំ, តំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។ យាវតា បរិញ្ញាយ បរិញ្ញដ្ឋំ…បេ.… យាវតា បហានស្ស 3 បហានដ្ឋំ…បេ.… យាវតា ភាវនាយ ភាវនដ្ឋំ…បេ.… យាវតា សច្ឆិកិរិយាយ សច្ឆិកិរិយដ្ឋំ, តំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។
Yāvatā abhiññāya abhiññaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā pariññāya pariññaṭṭhaṃ…pe… yāvatā pahānassa 4 pahānaṭṭhaṃ…pe… yāvatā bhāvanāya bhāvanaṭṭhaṃ…pe… yāvatā sacchikiriyāya sacchikiriyaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
យាវតា ខន្ធានំ ខន្ធដ្ឋំ, តំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។ យាវតា ធាតូនំ ធាតុដ្ឋំ…បេ.… យាវតា អាយតនានំ អាយតនដ្ឋំ…បេ.… យាវតា សង្ខតានំ សង្ខតដ្ឋំ…បេ.… យាវតា អសង្ខតស្ស អសង្ខតដ្ឋំ, តំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។
Yāvatā khandhānaṃ khandhaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā dhātūnaṃ dhātuṭṭhaṃ…pe… yāvatā āyatanānaṃ āyatanaṭṭhaṃ…pe… yāvatā saṅkhatānaṃ saṅkhataṭṭhaṃ…pe… yāvatā asaṅkhatassa asaṅkhataṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
យាវតា កុសលេ ធម្មេ, សព្ពំ 5 ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។ យាវតា អកុសលេ ធម្មេ…បេ.… យាវតា អព្យាកតេ ធម្មេ… យាវតា កាមាវចរេ ធម្មេ… យាវតា រូបាវចរេ ធម្មេ… យាវតា អរូបាវចរេ ធម្មេ… យាវតា អបរិយាបន្នេ ធម្មេ, សព្ពំ 6 ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។
Yāvatā kusale dhamme, sabbaṃ 7 jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā akusale dhamme…pe… yāvatā abyākate dhamme… yāvatā kāmāvacare dhamme… yāvatā rūpāvacare dhamme… yāvatā arūpāvacare dhamme… yāvatā apariyāpanne dhamme, sabbaṃ 8 jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
យាវតា ទុក្ខស្ស ទុក្ខដ្ឋំ, តំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។ យាវតា សមុទយស្ស សមុទយដ្ឋំ…បេ.… យាវតា និរោធស្ស និរោធដ្ឋំ…បេ.… យាវតា មគ្គស្ស មគ្គដ្ឋំ, តំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។
Yāvatā dukkhassa dukkhaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā samudayassa samudayaṭṭhaṃ…pe… yāvatā nirodhassa nirodhaṭṭhaṃ…pe… yāvatā maggassa maggaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
យាវតា អត្ថបដិសម្ភិទាយ អត្ថបដិសម្ភិទដ្ឋំ, តំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។ យាវតា ធម្មបដិសម្ភិទាយ ធម្មបដិសម្ភិទដ្ឋំ…បេ.… យាវតា និរុត្តិបដិសម្ភិទាយ និរុត្តិបដិសម្ភិទដ្ឋំ…បេ.… យាវតា បដិភានបដិសម្ភិទាយ បដិភានបដិសម្ភិទដ្ឋំ, តំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។
Yāvatā atthapaṭisambhidāya atthapaṭisambhidaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā dhammapaṭisambhidāya dhammapaṭisambhidaṭṭhaṃ…pe… yāvatā niruttipaṭisambhidāya niruttipaṭisambhidaṭṭhaṃ…pe… yāvatā paṭibhānapaṭisambhidāya paṭibhānapaṭisambhidaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
យាវតា ឥន្ទ្រិយបរោបរិយត្តញាណំ, តំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។ យាវតា សត្តានំ អាសយានុសយេ ញាណំ…បេ.… យាវតា យមកបាដិហីរេ ញាណំ…បេ.… យាវតា មហាករុណាសមាបត្តិយា ញាណំ, តំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។
Yāvatā indriyaparopariyattañāṇaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā sattānaṃ āsayānusaye ñāṇaṃ…pe… yāvatā yamakapāṭihīre ñāṇaṃ…pe… yāvatā mahākaruṇāsamāpattiyā ñāṇaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
យាវតា សទេវកស្ស លោកស្ស សមារកស្ស សព្រហ្មកស្ស សស្សមណព្រាហ្មណិយា បជាយ សទេវមនុស្សាយ ទិដ្ឋំ សុតំ មុតំ វិញ្ញាតំ បត្តំ បរិយេសិតំ អនុវិចរិតំ មនសា, តំ សព្ពំ ជានាតីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។
Yāvatā sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
១២១.
121.
ន តស្ស អទ្ទិដ្ឋមិធត្ថិ កិញ្ចិ, អថោ អវិញ្ញាតមជានិតព្ពំ។
Na tassa addiṭṭhamidhatthi kiñci, atho aviññātamajānitabbaṃ.
សព្ពំ អភិញ្ញាសិ យទត្ថិ នេយ្យំ, តថាគតោ តេន សមន្តចក្ខូតិ 9។
Sabbaṃ abhiññāsi yadatthi neyyaṃ, tathāgato tena samantacakkhūti 10.
សមន្តចក្ខូតិ កេនដ្ឋេន សមន្តចក្ខុ? ចុទ្ទស ពុទ្ធញាណានិ។ ទុក្ខេ ញាណំ ពុទ្ធញាណំ, ទុក្ខសមុទយេ ញាណំ ពុទ្ធញាណំ, ទុក្ខនិរោធេ ញាណំ ពុទ្ធញាណំ, ទុក្ខនិរោធគាមិនិយា បដិបទាយ ញាណំ ពុទ្ធញាណំ, អត្ថបដិសម្ភិទេ ញាណំ ពុទ្ធញាណំ, ធម្មបដិសម្ភិទេ ញាណំ ពុទ្ធញាណំ, និរុត្តិបដិសម្ភិទេ ញាណំ ពុទ្ធញាណំ, បដិភានបដិសម្ភិទេ ញាណំ ពុទ្ធញាណំ, ឥន្ទ្រិយបរោបរិយត្តេ ញាណំ ពុទ្ធញាណំ, សត្តានំ អាសយានុសយេ ញាណំ ពុទ្ធញាណំ, យមកបាដិហីរេ ញាណំ ពុទ្ធញាណំ, មហាករុណាសមាបត្តិយា ញាណំ ពុទ្ធញាណំ, សព្ពញ្ញុតញ្ញាណំ ពុទ្ធញាណំ, អនាវរណញាណំ ពុទ្ធញាណំ – ឥមានិ ចុទ្ទស ពុទ្ធញាណានិ។ ឥមេសំ ចុទ្ទសន្នំ ពុទ្ធញាណានំ អដ្ឋ ញាណានិ សាវកសាធារណានិ; ឆ ញាណានិ អសាធារណានិ សាវកេហិ។
Samantacakkhūti kenaṭṭhena samantacakkhu? Cuddasa buddhañāṇāni. Dukkhe ñāṇaṃ buddhañāṇaṃ, dukkhasamudaye ñāṇaṃ buddhañāṇaṃ, dukkhanirodhe ñāṇaṃ buddhañāṇaṃ, dukkhanirodhagāminiyā paṭipadāya ñāṇaṃ buddhañāṇaṃ, atthapaṭisambhide ñāṇaṃ buddhañāṇaṃ, dhammapaṭisambhide ñāṇaṃ buddhañāṇaṃ, niruttipaṭisambhide ñāṇaṃ buddhañāṇaṃ, paṭibhānapaṭisambhide ñāṇaṃ buddhañāṇaṃ, indriyaparopariyatte ñāṇaṃ buddhañāṇaṃ, sattānaṃ āsayānusaye ñāṇaṃ buddhañāṇaṃ, yamakapāṭihīre ñāṇaṃ buddhañāṇaṃ, mahākaruṇāsamāpattiyā ñāṇaṃ buddhañāṇaṃ, sabbaññutaññāṇaṃ buddhañāṇaṃ, anāvaraṇañāṇaṃ buddhañāṇaṃ – imāni cuddasa buddhañāṇāni. Imesaṃ cuddasannaṃ buddhañāṇānaṃ aṭṭha ñāṇāni sāvakasādhāraṇāni; cha ñāṇāni asādhāraṇāni sāvakehi.
យាវតា ទុក្ខស្ស ទុក្ខដ្ឋោ, សព្ពោ ញាតោ; អញ្ញាតោ ទុក្ខដ្ឋោ នត្ថីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។ យាវតា ទុក្ខស្ស ទុក្ខដ្ឋោ, សព្ពោ ញាតោ, សព្ពោ ទិដ្ឋោ, សព្ពោ វិទិតោ, សព្ពោ សច្ឆិកតោ, សព្ពោ ផស្សិតោ បញ្ញាយ; អផស្សិតោ បញ្ញាយ ទុក្ខដ្ឋោ នត្ថីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។ យាវតា សមុទយស្ស សមុទយដ្ឋោ…បេ.… យាវតា និរោធស្ស និរោធដ្ឋោ… យាវតា មគ្គស្ស មគ្គដ្ឋោ…បេ.… យាវតា អត្ថបដិសម្ភិទាយ អត្ថបដិសម្ភិទដ្ឋោ… យាវតា ធម្មបដិសម្ភិទាយ ធម្មបដិសម្ភិទដ្ឋោ… យាវតា និរុត្តិបដិសម្ភិទាយ និរុត្តិបដិសម្ភិទដ្ឋោ… យាវតា បដិភានបដិសម្ភិទាយ បដិភានបដិសម្ភិទដ្ឋោ, សព្ពោ ញាតោ, សព្ពោ ទិដ្ឋោ, សព្ពោ វិទិតោ , សព្ពោ សច្ឆិកតោ, សព្ពោ ផស្សិតោ បញ្ញាយ; អផស្សិតោ បញ្ញាយ បដិភានបដិសម្ភិទដ្ឋោ នត្ថីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។
Yāvatā dukkhassa dukkhaṭṭho, sabbo ñāto; aññāto dukkhaṭṭho natthīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā dukkhassa dukkhaṭṭho, sabbo ñāto, sabbo diṭṭho, sabbo vidito, sabbo sacchikato, sabbo phassito paññāya; aphassito paññāya dukkhaṭṭho natthīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā samudayassa samudayaṭṭho…pe… yāvatā nirodhassa nirodhaṭṭho… yāvatā maggassa maggaṭṭho…pe… yāvatā atthapaṭisambhidāya atthapaṭisambhidaṭṭho… yāvatā dhammapaṭisambhidāya dhammapaṭisambhidaṭṭho… yāvatā niruttipaṭisambhidāya niruttipaṭisambhidaṭṭho… yāvatā paṭibhānapaṭisambhidāya paṭibhānapaṭisambhidaṭṭho, sabbo ñāto, sabbo diṭṭho, sabbo vidito , sabbo sacchikato, sabbo phassito paññāya; aphassito paññāya paṭibhānapaṭisambhidaṭṭho natthīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
យាវតា ឥន្ទ្រិយបរោបរិយត្តញាណំ…បេ.… យាវតា សត្តានំ អាសយានុសយេ ញាណំ… យាវតា យមកបាដិហីរេ ញាណំ… យាវតា មហាករុណាសមាបត្តិយា ញាណំ; សព្ព ញាតំ, សព្ពំ ទិដ្ឋំ, សព្ពំ វិទិតំ, សព្ពំ សច្ឆិកតំ, សព្ពំ ផស្សិតំ បញ្ញាយ; អផស្សិតំ បញ្ញាយ មហាករុណាសមាបត្តិយា ញាណំ នត្ថីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។
Yāvatā indriyaparopariyattañāṇaṃ…pe… yāvatā sattānaṃ āsayānusaye ñāṇaṃ… yāvatā yamakapāṭihīre ñāṇaṃ… yāvatā mahākaruṇāsamāpattiyā ñāṇaṃ; sabba ñātaṃ, sabbaṃ diṭṭhaṃ, sabbaṃ viditaṃ, sabbaṃ sacchikataṃ, sabbaṃ phassitaṃ paññāya; aphassitaṃ paññāya mahākaruṇāsamāpattiyā ñāṇaṃ natthīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
យាវតា សទេវកស្ស លោកស្ស សមារកស្ស សព្រហ្មកស្ស សស្សមណព្រាហ្មណិយា បជាយ សទេវមនុស្សាយ ទិដ្ឋំ សុតំ មុតំ វិញ្ញាតំ បត្តំ បរិយេសិតំ អនុវិចរិតំ មនសា, សព្ពំ ញាតំ, សព្ពំ ទិដ្ឋំ, សព្ពំ វិទិតំ, សព្ពំ សច្ឆិកតំ, សព្ពំ ផស្សិតំ បញ្ញាយ; អផស្សិតំ បញ្ញាយ នត្ថីតិ – សព្ពញ្ញុតញ្ញាណំ។ តត្ថ អាវរណំ នត្ថីតិ – អនាវរណញាណំ។
Yāvatā sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā, sabbaṃ ñātaṃ, sabbaṃ diṭṭhaṃ, sabbaṃ viditaṃ, sabbaṃ sacchikataṃ, sabbaṃ phassitaṃ paññāya; aphassitaṃ paññāya natthīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ន តស្ស អទ្ទិដ្ឋមិធត្ថិ កិញ្ចិ, អថោ អវិញ្ញាតមជានិតព្ពំ;
Na tassa addiṭṭhamidhatthi kiñci, atho aviññātamajānitabbaṃ;
សព្ពំ អភិញ្ញាសិ យទត្ថិ នេយ្យំ, តថាគតោ តេន សមន្តចក្ខូតិ។
Sabbaṃ abhiññāsi yadatthi neyyaṃ, tathāgato tena samantacakkhūti.
សព្ពញ្ញុតញាណនិទ្ទេសោ តេសត្តតិមោ។
Sabbaññutañāṇaniddeso tesattatimo.
ញាណកថា និដ្ឋិតា។
Ñāṇakathā niṭṭhitā.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā / ៧២-៧៣. សព្ពញ្ញុតញ្ញាណនិទ្ទេសវណ្ណនា • 72-73. Sabbaññutaññāṇaniddesavaṇṇanā
